Naṉ. 17
17
Tsupirnaktin chicham Yus Apramja̱i̱ najanamu
1Tura Apram nuwintinuíwi uwí takakuya nui̱ Uunt Yus wantintiuk chichareak
“Witjiai Ashí Tujintkiachu Yus.
Wi íimmianum tuke awajitsuk péṉker atá.
2Amé shuar ti untsurí ártí tusan
Wi ámiji̱a̱i̱ Chichaman najanattajai” tímiayi.
3Nu tutai Apramka tikishmar tsuntsumá nijia̱i̱ji̱a̱i̱ nuṉkan antiṉmatai Yus chichareak
4“Ju̱i̱ti ámiji̱a̱i̱ chichaman nájaneaj nu.
Ámeka untsurí aentsu apachri̱ átatme.
5Yamaikia Apram tunashtatme
antsu Aprajám#17:5 Ipríu chichamja̱i̱ Apramka “uunt apa” tawai. Tura Aprajámka “untsurí aentsu apachri̱” tawai. tunattame.
Warí untsurí aentsu apachrí̱ awajsashtatjamek.
Tuma asam tú náamkattame.
6Ame shuarumin ti untsurí awajsattajai. Ti untsurí awajsam ashí nuṉkanam matsamkartatui. Tura amiiní̱ya̱ úunt akupniusha ártatui. 7Chichaman ámiji̱a̱i̱ yamái nájaneaj ju̱ka ukunmasha ame shuarumji̱a̱i̱sha tuke túrittiajna nuka ju̱i̱ti. Wikia tuke ame Yúsrumek átatjai ántsaṉ ame shuarumin Yusri̱sha átatjai. 8Amincha tura amiiya̱ ukunam akiiniawartatna nunasha Kanaan nuṉkan yamái pujamna ju̱na tuke atumnia atí tusan ashí susattajme. Tura Wikia ame Yúsrum tuke átatjai” tímiayi.
9Yus ataksha Aprajáman chicharuk “Wi chichaman najanamajna nu ámeka umikta. Amesha tura amé shuarsha nuyá̱ amiiya̱ ukunam akiiniawartatna nusha umiktin áiniawai. 10Ju̱i̱ti Wi atumji̱a̱i̱ chícham najanamu ashí amé shuarsha nuyá̱ amiiya̱ ukunam akiiniawartatna nusha umiktin áiniawai. Atumíya̱ ashí áishmaṉ ainia nuka tsupirnararti. 11Atumí shunirí̱ nuapé̱ tsupirnarti. Nu túrakrum iiji̱a̱i̱ chícham najanamu umíaji títiatrume. 12Yamaiya̱ ju̱yá̱ juárkimiuk ashí áishmaṉ uchi akiiniamu uchu tsawant jeamtai tsupirnarti. Kame ame je̱e̱miin akiiniawarusha tura chíkich aents kuitji̱a̱i̱ sumakmasha mash tsupirnarti. 13Mái̱ metek nekas túrunawarti. Túrunamtai atumí aya̱shi̱i̱n chichaman Wi tuke iniaitsuk nájaneajna nu paant nekanattawai. 14Antsu tsupirnaktinian nakitia nuka Wi chícham najanamun umirkachu asamtai atumíiya̱ ji̱i̱ki̱ aju̱i̱miu atí” Yus Aprajáman tímiayi.
15Yus nuya̱sha Aprajáman chicharuk “Yamaikia ame nuwemi náari̱ṉkia Sarái áchattawai. Antsu yamaikia Sara átatui. 16Nincha shiir awajsattajai túram uchin takurtamsattawai. Ti nekas shiir awajsam untsurí aentsun nukurí̱ átatui. Tura ní shuari̱ya̱ṉka úunt akupin ártatui” tímiayi.
17Tutai Aprajámka tikishmar tsuntsumá nijia̱i̱ji̱a̱i̱ nuṉkan antiṉ wishikmammiayi. “¿Wi sian uwí takakeaj ju̱i̱sha yajutmarminiashitiaj. Tura winia nua̱r Sarasha nuwintia uwí takakusha uchin takusminiashit?” 18Tú enentáimtumas Yusan chichareak “Winia uchir Ismaer shiir pujutnum yumiṉkrutramka maak” tímiayi. 19Tutai Yuska aya̱k “Antsu nekas ame nuwemi Sara yajutmartatme. Tura akiiniamtai Isak anaikiattame. Tura ní shuari̱ ukunam akiiniawartatna núnan tuke átinian nu chícham najanamunak Isakja̱i̱ ataksha yamaram awajsattajai. 20Tura Ismaerna seatmena nunasha anturkajme. Nincha shiir awajsan pampamtikrattajai. Pampamtikram ni shuari̱ ti untsurí ajasártatui. Ni uchirí̱sha tuse akupin ártatui. Túrakun Ismaera shuari̱ncha nekas ti untsurí awajsattajai. 21Tura ju̱yá̱ chikichík uwí jeamtai uchirmin Isakan Sara takustatui. Antsu nu uchiji̱a̱i̱ chícham najanamurka tuke átatui” tímiayi Yus.
22Uunt Yus Aprajámja̱i̱ chichasua umik wémiayi. 23Tura nú tsawantai̱k Yus timia nútiksaṉ ashí áishmaṉ ni je̱e̱n pujuarmia nuna Aprajám tsupirarmiayi. Ni uchirí̱n Ismaernasha tura takarniúri̱n ni je̱e̱n akiiniawaru armia nunasha tura ní kuitri̱ji̱a̱i̱ sumakma armia nunasha mash tsupirarmiayi. 24-25Kame tsupirnakarmia nui̱ṉkia Aprajámka nuwintinuíwi uwí achíakuyayi tura ni uchirí̱ Ismaersha traise uwí achíakuyayi. 26-27Nú tsawantai̱k Aprajámsha uchirí̱ Ismaersha tura ashí nui̱ pujuarmia nusha tsupirnakarmiayi. Kame ashí takarin Aprajáma je̱e̱n akiiniawarusha tura chíkich aentsnumia̱ sumakmasha mash tsupirnakarmiayi.
Currently Selected:
Naṉ. 17: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
