Naṉ. 19
19
Sutuma tura Kumura nuṉkan Yus émesma
1Tura Rautka Sutuma pepru wá̱i̱ti̱a̱i̱ri̱n nuntumas aents iruntai̱niam pujumiayi. Nui̱ pujái̱ kirir wéamunam Yusa suntari̱ jímiar wininian Raut wainkiamiayi. Tura wainiak iṉkiuṉtaj tusa wajaki̱ werimiayi. Tura jearí tikishmar nuṉká antiastatuk tsuntsumpruámiayi. 2Tura chichaak “Úuntrutiram, waitneasrum jú̱ kashi winia je̱a̱rui̱ kanartarum tusan seajrume. Nui̱ atumí nawe̱ nijiarum yurumárum kanaarum kashin káshik wemintrum” tímiayi. Tutai aimiainiak “Atsá, amiin kanarchattaji antsu aya a̱a̱ṉ pujustatji” tiármiayi. 3Tuínianak Rautcha “Antsu je̱a̱rui̱ kanartarum” tusa ti seam jimiará áishmaṉ armia nu Rauta je̱e̱n wéarmiayi. Núnisaṉ Rautka iraran yurumak péṉker iwiaramun tura wakaprutaija̱i̱nchu paṉ najanamun ayurawarmiayi.
4Tura írar áishmaṉ tepes kánuiniatsa̱i̱ṉ ashí Sutumanmaya̱ áishmaṉ úuntchimiak tura uchichimiak Rauta je̱e̱n káunkar téntakarmiayi. 5Nui̱ káunkar Ráutan chicharainiak “Jú̱ kashi áishmaṉ ame je̱e̱miin táarainia nusha ¿tui̱ pujuinia? Jí̱i̱kiarta niji̱a̱i̱ tsanirmatai. Iisha nekaatai tusar wakeraji” tiármiayi. 6Tuíniakui Rautka chichastaj tusa jíiniuk wáitin péṉker asakamiayi. 7Tura nú aishmaṉkan chicharainiak “Yatsurtírmin ju̱na seajrume waitneasrum nú yajauchikia peṉké túrawairap. 8Wi nawantrun jímiaran áishmaṉja̱i̱ tsanirmacharun aya̱kainiaj ju̱na atumín ji̱i̱rkitjiarme. Túramtai átum wakeramu túratarum. Antsu winia iraruka initiursatarum” tímiayi. 9Tutai nisha “Ámeka éṉkatmasta” tiármiayi. “Warí amesha ju̱ya̱chuitiatmesha ¿urukamtai iin akupkataj tusam wakeram? Wáinkiata. Irarumji̱a̱i̱ naṉkaamas yajauch ámin awajsattajnia nu nekaamata” tiármiayi. Nuya̱ṉ Ráutan kárut shitiawar waiti kupiktai tusar weantkarmiayi.
10Túruiniakui jimiará írar init pujuarmia nu ínitiaṉ uwejé̱n iwiaintiukar Ráutan japiki̱ awayá̱war wáitin epeniarmiayi. 11Tura áishmaṉkan úuntnasha uchichincha mash ji̱n ukustukarmiayi. Túram wáitin wáinkiataj tukamá takakní̱ wekainiarmiayi. 12-13Nuyá̱ ni irari̱ Ráutan chicharainiak “¿Ame shuarum ju̱i̱ pujuinia chikitcha áiniawak? Warí jú̱ pepru emesrattaji. Tuma asamtai ame uchirmesha nawantrumsha awemsha tura ashí takakmarmesha yaruakta. Jú̱ aentsu yajauch túrutairi̱ mui̱jmiai̱ya̱ nu ímia Uunt Yusai̱ jeawai. Tuma asamtai Yus chichaak ‘Mash amuktárum’ tusa akuptámkaji” tiármiayi.
14Tuíniakui Rautka ni awetmaktin armia nuna chicharainiak “Jú̱ nuṉkan Uunt Yus emesrattawai. Wárik ju̱yá̱ jiinkí̱ wetarum” tímiayi. Tura ni awe̱sha auka ántar tawai tú enentáimprarmiayi. 15Tura tsawa̱statuk ajasá̱i̱ Yusa suntari̱ Ráutan chicharainiak “Wárik jíinkitiarum. Jú̱ nuṉka ii émeseakrin ju̱i̱ jáka̱i̱j tákumka nua̱rme̱sha tura mái̱ nawantrumsha jukim wari wetarum” tiármiayi. 16Tura Rautka támaitiat wárik wéachkui nincha nua̱ri̱ncha ántsaṉ nawantri̱ncha Yusa suntari̱ uwejnum achikiar japirkutak nu nuṉkanmaya̱ jí̱i̱kiar uwemtikrarmiayi. Kame Uunt Yus Ráutan waitnenta asamtai nuna túrawarmiayi. 17Tura pepru ikiukí̱ jíinkiarmatai Yusa suntari̱ chicharainiak “Jáka̱i̱j tákurmeka pisartarum. Kame uwemprataj tusa wakerakrumka apajá̱sa íimtsuk paka ju̱i̱ṉkia wajasa ayamtsuk tsékeṉkrum naint wakatarum” tiármiayi. 18Tura nuyá̱ Raut chichaak “Antsu úuntrutiram nuka turutirap tusan seajrume. 19Atumsha ti yaintkiarme tura ti waitnentra asarum uwemtikrururme. Antsu náintiaani̱ wétinniaka tujintiajai. Warí jintiá weai̱ tsuumai̱ amaintiúkchatpiash tura jákashtajash. 20Nuna enentáimsan ju̱na seajrume, ju̱i̱ tíjiu̱chik uchich pepru átsuk. Nui̱ pisartájai. Nui̱ uwemprataj tsaṉkatruktarum. Warí nú peprusha uchichichukait.” Tú timiayi Raut. 21Tutai Yusa suntari̱ chikichik aya̱k “Anturkajme. Seatmena nuna umirkátjame. Wetá tájame. Nú nuṉka támena nuna emesrashtatjai. 22Antsu wárik weme nui̱ jeata. Warí ame nui̱ jeatsmini̱ṉ emesratniun juárkichminiaitjiai” tímiayi. Nu asamtai nú pepruchi náari̱ṉkia Suar anaikiamuyayi.
23Étsa̱ka yama jíinmanum Rautka Suar péprunam jeamiayi. 24Nuyá̱ Uunt Yus Sutumanam tura Kumuranam jinia asupriji̱a̱i̱ yútumtikiamiayi. 25Nú nuṉka pakarí̱i̱n pepru irunmia nuna tura aents nui̱ matsamármia nuna nuyá̱ árak iruniarmia nunasha mash amukmiayi. 26Tura Rauta nuwe̱sha aishri̱ wéamunam úkumur wesa apajá̱s íimiaj tukamá wee najanar nui̱ṉ wajá juákmiayi.
27Tura Aprajámka káshik nantaki̱ nuik Uunt Yusja̱i̱ eem wajamia nui̱ wémiayi. 28Tura nui̱ jeá Sutuma tura Kumura pakari̱ni̱ íimias ji ikiapámua núnis túput túput ajak mukuintiuri̱ jíiniun wainkiamiayi. 29Nuní̱ Raut nuik pujuuya nú nuṉka pakarí̱i̱n írutkamu armia nuna Yus emesrarmiayi. Warí Aprajáman enentáimtus ni kaná uchirí̱n Ráutan nuṉka émesmanumia̱ ji̱i̱ki̱ uwemtikramiayi.
Muap tura Amun aents yama náṉkamma
30Nú ukunam Rautka Suar nuṉkanam pujustinian sapijmiak mai̱ nawantri̱n jukí̱ murá pujustaj tusa wémiayi. Nui̱sha kayá wá̱a̱nam pujuarmiayi. 31Nui̱ pujusár Rauta nawantri̱ iwiá̱i̱ ni kain chichareak “Enentáimsakia, ii aparí̱ úuntach ajaschaik. Tura tuke nuatnaitiaiya áintsaṉ ju̱i̱ iin nuatramkatin áishmaṉ peṉké atsatsuk yaki nuatramkataj. 32Tuma asamtai ii aparí̱ anamkatai. Túrar niji̱a̱i̱ tsaniṉkiar kanartai. Túrarkia ni uchirí̱ takursattaji” tímiayi.
33Tura nú kashi umutai karían súsar ni aparí̱n anamkarmiayi. Nuyá̱ iwia̱i̱ri̱ ni aparí̱ji̱a̱i̱ tsaniṉ kanarmiayi. Aparí̱sha nawantri̱ tepes nantancha nekaachmiayi. 34Tura nuyá̱ kashin iwiá̱i̱ kain chichareak “Wikia ya̱u̱ kashi ii aparí̱ji̱a̱i̱ tsaniṉkian kanarchamkaj. Jú̱ káshisha ataksha áintsarik anamkatai. Tura ame niji̱a̱i̱ tsaniṉkiam kanarminiam. Túrarkia ni uchirí̱ mai̱ takursattaji” tímiayi.
35Kame nú kashi ataksha anamkarmiayi tura patai̱sha aparí̱ji̱a̱i̱ tsaniṉ kanarmiayi. Tura ni tepes nantancha Rautka peṉké nekaachmiayi. 36Tuma ásar Rauta nawantri̱ ímia ni aparí̱niunak uchin ajaprukarmiayi. 37Iwia̱i̱ri̱ uchin takus Muap anaikiamiayi. Nuyá̱ Muap aents akiinkiarmiayi. 38Tura patai̱sha uchin takus Pinami anaikiamiayi. Nuyá̱ Amun aents akiinkiarmiayi.
Currently Selected:
Naṉ. 19: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
