Naṉ. 23
23
Sara jakamtai Makpiranam iwiarsamu
1-2Aprajáma nuwe̱ Sáraka siantu painti siati uwí pujus Kiriat Árpanam jakamiayi. Kiriat Arpa nuṉka chíkich náari̱nkia Eprunaiti. Nusha Kanaan nuṉkanmaiti. Tura Aprajámka kúntuts pujak úttiaj tusa táamiayi. 3Tura Sara jaka tepemia nuyá̱ Aprajámsha jiinkí̱ Jet aentsun werí chicharainiak 4“Wikia ju̱ya̱nchuitjiai. Atum shuarchaitjiai. Tuma ai̱ṉ wait aneasrum winia nua̱run iwiartumsataj nuṉka surustarum” tímiayi. 5-6Takui̱ Jet aents aimiainiak “Uuntá, antukta, amincha Yus uunt awajtámsamu nékaji. Tuma asam ii ajakmárar iwiartai̱ nuṉka ámiji̱a̱i̱ túa imiá péṉkerait nu iisam achikiam ame nuwem iwiartumsata. Warí ¿yaki amincha suritramkat?” tiármiayi. 7Nu tutai Aprajám wajaki̱ Jet aentsun tsuntsumpruáwarmiayi. 8Tura chicharainiak “Winia nua̱run ju̱i̱ nekas iwiarsati túrutkurmeka Sujara uchirí̱ Ijrun seampruttiarum. 9Makpira wa̱a̱ ni nuṉké̱ náṉkatkamunam ana nuna urutmá túruta núnis surusti túramui turuttiarum. Túran nú wa̱a̱n tuke nérentin ajastájai” tímiayi Aprajám.
10Tura Jetnumia̱ Ijrunka nui̱ṉ pujá asa niṉki Aprajáman ái̱kmiayi. Tura ashí Jet aents nui̱ pujuarmia nusha tura naṉkaamarmia nusha anturtukarat tusa kakaram chichaak 11“Atsá, uuntá, akirkatin enentáimsaip. Antsu wi ántranak wa̱a̱ncha núṉke̱ntuk amastájai. Wí shuarsha ántuiniamunam tátsujmek. Ame nuwem Sara nui̱ iwiarsata” tímiayi. 12Tutai Aprajámka nú nuṉkanmaya̱ aents iimiainiamunam ataksha tsúntsumprusaṉ paṉkái̱ 13Ijrunan aya̱k “Waitneasam winiasha anturtukta. Nuṉká kuítri̱n akiktajam tusan wakerajai. Emka akikmakan nuyá̱ winia nua̱rnaka iwiarsattajai” tímiayi. 14Aprajám tutai Ijruna aya̱k 15“Antsu uuntá, nuikia antukta. Nuṉká kuítri̱ṉkia kuatrusiántu kuit jeawai. Túrasha íiji̱a̱i̱ṉkia nuṉká kuítri̱ṉkia akasmatú pujushtai. Antsu sumakam ame nuwem iwiartumsata” tímiayi.
16Aprajámka ayu taku Jet aents pujuiniamunam Ijrun timia núnisaṉ nuyá̱ kuitji̱a̱i̱ṉ kuatrusiántu kuítian nekapma akikmiayi. 17Kame Aprajámka Ijruna nuṉke̱n súmak wa̱a̱ncha numirtiuk nu kuitji̱a̱i̱ sumakmiayi. Nuka Mámprinmaya̱ etsa̱ jintiainmaani̱ awai. 18Kame nú sumakman Jet aentssha tura írutkamu wá̱i̱ti̱a̱i̱ri̱ ámanum ashí aents naṉkaamarmia nusha nekaawarmiayi.
19Nuyá̱ Aprajámka Mampri kampuntin etsa̱ jintiainmaani̱ Makpira wá̱a̱nam ni nuwe̱n Saran iwiarsamiayi. Mámprikia Kanaannum Eprunnum jeastatkeyayi. 20Kame ni nuwe̱n iwiarsatniun Jet aents Aprajám susatai tiarmia nú nuṉkan wá̱a̱rtiuk Aprajámka sumak tuke nérentin ajasmiayi.
Currently Selected:
Naṉ. 23: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.
