GENESA 20
20
Ta Abrahama na Abimeleke.
1Kutani Abrahama a suka, a ya etikweni ra le dzongeni, a tshama exikarhi ka Kadexe na Xuru; kambe a tshama nkarhi eGerara. 2Abrahama a a vula Sara, nsati wa yena, makwerhu. Kavaloko Abimeleke, hosi ya Gerara, a rhuma ku ya vutla Sara. 3Kambe Xikwembu xi ta eka Abimeleke, enorhweni wa vusiku, xi ku eka yena: “Waswivo, u ta fa hikwalaho ka nsati loyi u n'wi tekeke, hikuva u ni nuna.”
4Kambe Abimeleke a a nga si tshinelela eka yena, kutani a ku: “Hosi, xana u nga dlayisa tiko ni loko ri lulamile? 5Xana a nga ndzi byelanga leswaku i makwavo? Na yena wansati a nga ndzi byelanga leswaku i makwavo xana? Ndzi endlile sweswo eku lulameni ka mbilu yanga, ni le ku baseni ka mavoko ya mina.”
6Kutani Xikwembu xi n'wi byela enorhweni, xi ku: “Ndza swi tivisisa leswaku u endlise sweswo eku lulameni ka mbilu ya wena, hikwalaho-ke, ndzi nga ku sivela ku ndzi dyohela; ndzi nga ku pfumelelangiki ku n'wi khumba. 7Kutani sweswi, tlherisa nsati wa nuna loyi, hikuva i muprofeta, u ta ku khongelela, u va u hanya. Kambe loko u nga n'wi tlherisi, tiva leswaku u ta fa kunene, wena ni hinkwaswo leswi nga swa wena.”
8Kutani Abimeleke a pfuka ka hari mixo, a vitana malandza ya yena hinkwawo, a ma ambela marito walawo hinkwawo; kutani vanhu volavo va khomiwa hi ku chava lokukulu. 9Kavaloko Abimeleke a vitana Abrahama a ku eka yena: “U hi endle yini? Kumbe ndzi ku onhele kwihi, leswi u nga vangela mina ni tiko ra mina nandzu lowonghasi? U ndzi endlele mhaka leyi nga faneriki ku endliwa.” 10Abimeleke a engeta a ku eka Abrahama: “U anakanyile yini leswi u nga endlisa sweswo?”
11Kutani Abrahama a ku: “A ndzi ku kumbe, ku chava Xikwembu ku hava etikweni leri, kutani va ta ndzi dlaya hikwalaho ka nsati wa mina. 12Kasi na kona, i makwerhu kunene, n'wana wa tatana, ntsena a hi n'wana wa manana, kambe i nsati wa mina. 13Kuteloko Xikwembu xi ndzi tsendzelekisile ekule ni yindlu ya tatana, ndzi te eka yena: ‘Vona, u ta ndzi pfunisa sweswo: Hinkwako laha hi yaka kona, u nge: i makwerhu.’ ”
14Kavaloko Abimeleke a teka swifuwo leswitsongo ni leswikulu, ni makhumbi ya xinuna ni ya xisati, a nyika Abrahama, a n'wi tlherisela na Sara nsati wa yena. 15Kutani Abimeleke a ku: “Waswivo, tiko ra mina hi leri, aka laha u ku rhandzaka.” 16Ni ka Sara, a ku: “Waswivo, ndzi nyikile makwenu khume ra madzana ya macheleni, xi ta va xisirhelo emahlweni ya wena eka hinkwavo lava nga na wena, kutani u ta va la lulameke emahlweni ka hinkwavo.”
17Kutani Abrahama a khongela Xikwembu, Xikwembu xi hanyisa Abimeleke, ni nsati wa yena, ni makhumbi ya yena, va ta tlhela va tiva ku veleka vana. 18Hikuva Yehovha a a sivile timbeleko hinkwato endlwini ya Abimeleke, hikwalaho ka Sara, nkata Abrahama.
Currently Selected:
GENESA 20: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
