Iruka 11

Haga 11

Aikotã Waku Iꞌatuehay Tupana Kape

Mateu 6.9-13 Piat Ewy

1Wẽtup eꞌat pe Iesui toto tehay teran Tupana wywuat hamo. Miꞌi hawyi ihay kahato Toꞌywot wywo hawyi wẽtup ok ipotmuꞌe hẽtup Iesui pe -Uruporekuat urumuꞌe ro En Tupana kapiat Tupana wywuat uruehay hamuat hap ete e. Aikotã ahetꞌok hat Iuwãu tiꞌatumuꞌe topotmuꞌeria hap ewy e katupono uruikyꞌesat En ewywuat uruehay Tupana wywuat hap e. 2Mio tã tohẽtup hawyi Iesui henoi raꞌyn -Ehẽtup Tupana kape turan mio tã waku eweiꞌe.

--Uruꞌywot Atipy piat waku kahato En waku eweiꞌe e.

Uruimotypot kahato En waku eweiꞌe e.

Uruikyꞌesat En ereineꞌen no mesuwat yi tote Wuatꞌi miitꞌin potypot nuat Waku miitꞌin mesuwat rotiat emikyꞌesat ewywuat nug haria wo tukupteꞌen aikotã atipy piaria emikyꞌesat oktan nug haria ewy waku eweiꞌe e.

3Tupana mesuwat eꞌat uruihẽtup epe urueꞌuꞌi mesuwarotiat urumiꞌu hap uruhẽtup epe waku watoꞌe e.

4Uruiꞌaparap kahato ewowi Tupana miꞌi pote uruhẽtup kahato ewowi waure wo ereineꞌen uruminug saꞌag koꞌi ete hap waku eweiꞌe e. Tukupteꞌen kahato urumaꞌat haria uruetiat iꞌaparap haria. Miꞌi hap saꞌag koꞌi ete waure wo teran urutukupteꞌen haype aikotã En ereineꞌen waure wo eetiat uruꞌaparap hap koꞌi kai hap ewy waku eweiꞌe. Mesuwat eꞌat pe iꞌatu kahato uruiãꞌãg ahiag ehay wo yt naku i nug hamo miꞌi pote uruporeroto uruiãꞌãg hap sakpuo urukosap hamo waku eweiꞌe e.

5Miꞌi hawyi Iesui toꞌe Iꞌatuepe -Pyno wẽtup hekatuwy putꞌok e hewowi wãtym hake turan hawyi apo e -Pyno uiwy atipuru porap man myẽꞌym nakaria uhepe uiwy poi hamo. 6Katupono mio raꞌyn putꞌok e uiwy pya pyi uiꞌyat ete hesyꞌat raꞌyn maꞌato yt kat i raꞌyn uiꞌyat pe ipoi hamo. Miꞌi pote ahẽtup ewowi man myẽꞌym nakaria ipoi hamo e get e haria pe. 7Maꞌato wãtym hake turan pote toiwesat. -Uhyt urutukupteꞌen naꞌyn uruꞌeyni pe. Urutoket raꞌyn areꞌokenhyp taꞌyn. Yt areꞌam kuap i man ium hamo e tekatuwy pe. 8Maꞌato miꞌi hawyi -Eherut ro uhyt katupono uiwy muap upiat putꞌok e rakirẽ hesyꞌat kahato toꞌe i toꞌe i kahato hawyi iꞌapeꞌokꞌam hawyi tutum naꞌyn man tekatuwy pe. Yt tutum i hekatuwy pe iwy sese pote maꞌato motꞌi tohẽtup kahato hawyi topoĩꞌam man ium hamo e iãꞌãkap wuo. 9Miꞌi Iesui toꞌe i -Waku ehẽtup hẽtup Tupana kape eimikyꞌesat ewy hawyi putꞌok e ehepe emikyꞌesat ewy. Iꞌewyte eweikat ikaipyi eimikyꞌesat ewy hawyi eweipuẽti raꞌyn. Pywo eweikupteꞌen aikotã okenꞌypy ete teg teg eweiꞌe hamo hap ewy waku putꞌok eweiꞌe Tupana ete eimikyꞌesat ewy puẽti hamo e. 10Katupono hẽtup haria iꞌatumiẽtup putꞌok e iꞌatuepe. Mekewaria iꞌatumikyꞌesat kat haria taꞌatupuẽti raꞌyn. Iꞌewyte okenꞌypy ete gupteꞌen haria teg teg e haria kape iꞌokenhypꞌok taꞌyn. 11Miꞌi hawyi poꞌog Iesui henoi iãꞌãkap wuo -Wẽtup ok haꞌyru hẽtup man toꞌywot kaipyi pote toꞌywot yt karãpe i nu tutum tosaꞌyru pe. Sio pira toikyꞌesat toꞌywot yt karãpe i moĩ tutum tosaꞌyru pe. 12Iꞌewyte tosaꞌyru waipaka upiꞌa toikyꞌesat pote yt karãpe i sapot tutum tosaꞌyru pe. 13Pyno yt nakuaria i eiperia pykai wakuaria yn ewetum eimepytꞌin me. Miꞌi hawyi eiꞌywot atipy piat wakuat sese toineꞌen. Miꞌi ti wakuat sese yn tutum tomepytꞌin me. Pywo Tupana Paꞌãu ehẽtup ikaipyi pote meremo tutum ehepe eimiẽtup hap ewy e temiitꞌin me.

Mateu 12.22-30; Maku 3.20-27 Piat Ewy

14Pyno wẽtup eꞌat pe Iesui ipotpap kahato miitꞌin moehãite hap ete. Miꞌi hawyi itote toineꞌen yt ihay kuap i rakat ahiag topiit piat pote rakat. Miꞌi ti Iesui tisopo raꞌyn hawyi ihay kuap i raꞌyn. Miꞌi pote iraniaꞌin itotiaria teꞌeruwehum kahato Tupana ete. 15Maꞌato iraniaꞌin teꞌeroꞌe saꞌag Iesui ete itote -Taꞌi ahiagnia akag esaika hamo mekewat ahiag potypot Pesepu aipusu puat hesaika hamo wyti Iesui tiꞌatusopo ahiagnia miit piit pyi Iꞌatuꞌe. 16Iraniaꞌin itote -Pyno uruikyꞌesat etunug no emisepap yt miitꞌin minug kuap i hap ewywuat iꞌatuꞌe ikuasa hamo. 17Maꞌato Iesui tikuap iꞌatuwanetup hap saꞌag hawyi toꞌe -Wẽtup tama piaria tuꞌuka tuꞌuka kahato toꞌope toꞌope hawyi meiũran ti aru meiẽwat tama woꞌokyꞌe hap esaika hap yt kat i raꞌyn topyhuꞌat itote e. Iꞌewyte getap wiaria tuꞌuka tuꞌuka toꞌope toꞌope hawyi meiũran yt kat i woꞌowese hap topyhuꞌat itote hawyi yt iꞌatupotpap kuap i kat nug kat nug hap ete yt toꞌowesat i hawyi e. 18Pyno -ahiag koro Pesepu esaika hamo etiꞌatusopo ahiagnia eweiꞌe ti uhepe maꞌato ahiag akag emiitꞌin koꞌi tuꞌuka tuꞌuka toꞌope toꞌope pote yt kat i toꞌowesat hap toineꞌen itote hawyi toꞌomoma hap yn topyhuꞌat itote irane e. 19Uito Pesepu esaika hap kaipyi atiꞌatusopo ahiagnia eweiꞌe. Koitywy apo are ehepe -Kat esaika hap wo som ehaꞌyruꞌin taꞌatuꞌatusopo ahiagnia waku ehenoi uhepe e. Waku miꞌiria tukupteꞌen eiperia waku sio yt e hamo. 20Pywo ti rat Tupana esaika hap wo ti rat atiꞌatusopo ahiagnia e. Taꞌi Tupana puiꞌiã wo atiꞌatupugha ahiagnia miitꞌin piit pyi pote pywo Tupana topyhuꞌat mesuwe Morekuatno raꞌyn e. 21Pyno hesaika rakat toineꞌen toꞌyat piat hekareꞌen apykok hamo pote waku pe toineꞌen Imiꞌapykok hap koꞌi. 22Maꞌato putꞌok e wẽtup ok poꞌog hesaika rakat yat kaꞌiwat esaika hap kai pote toihep taꞌyn yne yat kaꞌiwat imoesaika hap koꞌi. Toineꞌen saꞌawyꞌi yat kaꞌiwat imimohey hap koꞌi imoesaika hamuat maꞌato wẽtup ok poꞌog hesaika rakat putꞌok e hawyi toiꞌaputsit raꞌyn getap kaꞌiwat. 23Pywo pe ti uwe uwe yt uhupiat i hat uhewanikaptia wo teꞌeropyhuꞌat e. Yt uipowyro i miitꞌin atuekyi uhewowiat hamo pote miitꞌin sytpok uhewa pywiat haria wo tukupteꞌen are e.

Mateu 12.43-45 Piat Ewy

24Miꞌi hawyi Iesui toꞌe ihay mikyryꞌi tetiat haria pe -Karãpe wẽtup ok tiꞌokpun naꞌyn ahiag maꞌãu saꞌag nakat wẽtup ok piit pyi hawyi mekewat ahiag hewyry kahato teiam puẽti hamo. Wẽtup ok miit piit pe eke hamuat toikyꞌesat maꞌato yt toipuẽti i. Maꞌato tuwanetup hawyi toꞌe tuwepe -Pyno araꞌaipok irane saꞌawyꞌi wuat uheiam kape hawyi mekewat miit piit saꞌawyꞌi wuat kape toto hawyi teke i raꞌyn tomikyꞌesat ewy e. 25Miꞌi hawyi tuut i raꞌyn miit saꞌawyꞌi te wuat toineꞌen hap kape. Miꞌi hawyi waku kahato toipuẽti mekewat miit piit aikotã aiꞌyat wahywytip rakirẽ hap ipainug hap ewy raꞌyn toipuẽti. 26Miꞌi hawyi ahiag saꞌag toꞌe towyriaꞌin ahiagnia pe -Toꞌiro watuwehytꞌok meiũwat miit piit pe e 7 ok takaria pe towyriaꞌin ahiagnia saꞌag koꞌi pe. Miꞌi hawyi tuwehytꞌok ahiagnia 8 ok takaria tukupteꞌen mekewat piit pe e. Miꞌi hawyi mekewat miit poꞌog hesoꞌok takat topyhuꞌat saꞌawyꞌi wuat kai wẽtup yn toineꞌen ipiit pe turan e Iesui tehay pun haria pe. 27Mio tã toꞌe hawyi wẽtup ok haryporia miitꞌin tok pyi toꞌe Iesui pe tehay pirik hap -Mimi e waku kahato ety toineꞌen e katupono ety wo toineꞌen epoi temi wuat hat pote emotag hat pote e. 28Mio tã e hawyi Iesui tiwesat tope -Mana waku uity wen maꞌato poꞌog waku miitꞌin iꞌatuewuare kaꞌa Tupana ehay kapiat hawyi taꞌatunug imienoi hap ewy.

Mateu 12.38-42 Piat Ewy

29Miꞌi hawyi miitꞌin sem teꞌeruwaꞌatunug poꞌog typyꞌi kahato Iesui ewowi wanetup hanuaria. Miꞌi hawyi toꞌe iꞌatuepe -Are paĩ e eiperia eweikupteꞌen mesuwarotiat miitꞌin yt nakuaria i wo. Yt ehewaure kaꞌa hin i uhehay kape wen maꞌato eweiꞌakasa teran yt uwe i minug hap koꞌi kape yn e. Maꞌato wẽtup yn topyhuꞌat eimkuap mo aikotã saꞌawyꞌi wuat Tupana ehay moherep hat Iona e hap het rakat ikuꞌuro rakat ewy toineꞌen pira ymyꞌẽpe pe wen maꞌato myẽꞌym eꞌat pe hawyi tuwẽtem naꞌyn pira ymyꞌẽpe pyi raꞌyn. Miꞌi yn toineꞌen yt uwe i mikuap nug hap eweiꞌakasa hamo. 30Saꞌawyꞌi wuat Tupana ehay moherep hat Iona Tupana tipoꞌoro tawa Niniwe kape yt naku i rakaria kape wẽtup ywania kape. Tupana timoherep taꞌyn iꞌatuepe yt uwe i misepap hap kape akasa hamo myẽꞌym eꞌat hawyi Iona tuwẽtem guꞌuro pyi hap ewy. Miꞌi hap ewy ti Uito ti Miitꞌin Ykeꞌet Sese areineꞌen mesuwarotiaria yt nakuaria i pyꞌasetpe yt uwe i mikuap mo hap ewy moherep hamo eweiꞌakasa hamo e. 31Saꞌawyꞌi sese wẽtup ywania porekuat haryporia kawiat tuut pya pyi aat wẽtem hap moran kai tuut morekuat pot Sarumau weꞌeg hap kapiat tuwanetup hamo ihay se kuap hamo tuut e. Meiũran ti aru karapeĩ Tupana henoi uwe waku uwe yt naku i e hap eꞌat piat turan toineꞌen itote saꞌawyꞌi wuat morekuat haryporia kawiat eiminug yt naku i hap enoi hanuat e katupono saꞌawyꞌi pya pyi tuut morekuat Sarumau kapiat iweꞌeg hap kapiat tuwanetup hamo maꞌato koitywy Uito areineꞌen eipyꞌasetpe poꞌog uiweꞌeg aseꞌi morekuat Sarumau kai maꞌato uhehay kape yt eweiwanetup teran hin i eipe e. 32Iꞌewyte meiũran ti aru mekewat Tupana uwe waku uwe yt naku i e hap enoi hamuat hap eꞌat pe ti aru tawa Niniwe piaria henoi -Eipe yt nakuaria i iꞌatuꞌe ehepiat katupono saꞌawyꞌi miꞌiria teꞌeruwanetup Tupana ehay enoi hat Iona mienoi kapiat hawyi teꞌeraꞌaipok kahato Tupana kape. Maꞌato Uito poꞌog Iona kai areineꞌen eipyꞌasetpe pykai yt eweiwanetup teran hin i uimienoi hap kape e.

Iãꞌãkap Ariãty Etiat

Mateu 6.22-23 Piat Ewy

33Miꞌi hawyi poꞌog Iesui henoi -Yt uwe i migꞌi wo hytmoĩ ariãty hot hap e. Yt taꞌatupag hin i kamuti kaꞌa pe maꞌato ipytyp sese pe yn taꞌatupag ariãty hot hamo e. Miꞌi hawyi wehytꞌok haria teꞌeraꞌakasa raꞌyn hawyi tehaꞌat kuap heremo hawyi e. 34Eheha ihatꞌok pote eweiꞌakasa kuap yne raꞌyn e. Miꞌi pote eheha koꞌi ariãty ewywuat eipiit piat moẽtyhot hamo e. Maꞌato eheha yt naku i pote eipiit puo iꞌypyryp we sese topyhuꞌat e. 35Yt naku i hap nug neran haria eipe pote yt eheha pytig i rakaria ewywuat hawyi yt kat i toineꞌen wakuat eipiit piat moẽtyhot hamuat. Miꞌi pote iꞌypyryp wiat gupteꞌen haria ewy eweikupteꞌen kahato eipe hawyi eipiit puo eheineꞌen hap yt naku i pe topyhuꞌat e. 36Waku hap yn eweikyꞌesat pote eheha koꞌi ariãty wakuat ewywuat topyhuꞌat e. Miꞌi hawyi yt kat i iꞌypyryp hap eipiit pe. Eheineꞌen hap ete hẽtyhot hap yn ehete e.

Iesui Potmuꞌeria Yt Iꞌatuposei Tenuk Hamo

Mateu 23.1-36; Maku 12.38-40 Piat Ewy

37Iesui piat taꞌatunapin kahu turan putꞌok e Muisei miwan enoi hat hawyi toꞌe -Toꞌiro uiꞌyat kape watenuk hamo e. Miꞌi hawyi Iesui toto raꞌyn hupi iꞌyat kape. Putꞌok iꞌatuꞌe hawyi taꞌapyk yparakai ypyke maꞌato yt tuweposei i tenuk hamo. 38Miꞌi pote Muisei miwan enoi hat tuwanetup -Kat pote som yt tuweposei i Iesui aheko ewy e. 39Miꞌi hawyi Iesui toꞌe -Pywo pe ti eheko ewy ewetunug kahato. Iraniaꞌin teꞌerehaꞌat hawyi waku kahato eiperia iꞌatuꞌe. Yt eweiwaure hin i eiposei hamo iꞌewyte eheparatu koꞌi ehekuiꞌa koꞌi eweikoho kahato raꞌyn wen maꞌato miꞌi pykai eweikupteꞌen aikotã kuiꞌa okpe ete yn eweikoho hap katupono waku eiminug iraniaꞌin teꞌerehaꞌat turan maꞌato eipyꞌa pe ipit pit hap yn toineꞌen. 40Yt weꞌeg i kahato rakaria ti rat eipe e. -Pyno Tupana miit nug hat toineꞌen. Taꞌi iꞌewyte toineꞌen miit ipyꞌa piat nug hatno. Miꞌi pote toikuap kahato aikotã eipyꞌa piat pe. Toikuap kahato eipit pit hap koꞌi eipyꞌa piat pe. 41Waku eiwepyi eweiꞌatumoꞌẽ eimiꞌu ehekareꞌen yt hekat i rakaria pe hatek takaria pe. Miꞌi hawyi Tupana mowepiit hat eweikupteꞌen. Miꞌi hawyi yt eweiposei yn e maꞌato eipyꞌa piat eiwanetup hap wy ikytsig naꞌyn e. 42Miꞌi hawyi poꞌog Iesui toꞌe -Eiperia eimiꞌu apopyt hit kaipyi eweihoꞌoium Tupana pe wen maꞌato yt eweikyꞌe i iraniaꞌin Tupana kyꞌe hap wo. Waku yt eweiwuare raꞌyn iraniaꞌin kyꞌe hamuat Tupana kyꞌe hap wo. 43-Taꞌi eiperia woꞌonapin haria eweikyꞌesat kahato iraniaꞌin miat eimotypot hap yn. Eweihytꞌok waꞌatunug hap hawyi eweikat kahato mekewat poꞌog waku eiꞌapyk hap iraniaꞌin pyꞌasetpe. Iꞌewyte yne tawa pe muap upi ehekat kyiꞌat hap tote miitꞌin wẽpowat kahato hap eimotypot hamuat hap yn eweikat. 44Pyno eiperia woꞌonapin haria seko moherep haria woꞌosyp hawiat hap gupteꞌen haria katupono eimienoi hap yt heremo i ewy eweikupteꞌen. Pywo aikohyewyry tuereto woꞌosyp hap tote turan yt watikuap hin i aikope aikope ikuꞌuro rakaria toineꞌen yi pe aimisyp koꞌi saꞌawyꞌi katupono yt heremo i te itote e. Taꞌi eiperia ti woꞌosyp hawiat hap gupteꞌen haria. Katupono eimienoi hap yt heremo i rakat ewywuat are e. Taꞌi miitꞌin teꞌeruwanetup eimienoi kape maꞌato ehehay kaipyi yt taꞌatukuap hin i Tupana.

45Pyno itote toineꞌen wẽtup ok miit uwe waku uwe yt naku i rakat. Miꞌi ti toꞌe Iesui pe -Urukaꞌiwat eꞌe hap yne uruto woꞌomuꞌe haria akag koꞌi mohit hamuat hap topyhuꞌat e. 46Miꞌi pote Iesui tiwesat -Pyno eiweꞌeg wo o katupono yt naku I hap koꞌi topyhuꞌat irane ehewowi uwe waku uwe yt e haria pe. Waĩ waĩ eweiꞌe yn miitꞌin me maꞌato yt ewetunug hin i eiꞌe hap waĩ e hap koꞌi. Ipotyi rakat ewy eiwoꞌoꞌapyk miitꞌin okpe tote haria ewy hawyi yt eweihupit kuap i ti ehehay ipotyi rakat are e. 47Yt nakuaria i kahato eiperia katupono saꞌawyꞌi wuaria Tupana mipoꞌoro tehay moherep haria eheꞌaseꞌiꞌin miꞌauka haria wo teꞌeropyhuꞌat. Maꞌato mio raꞌyn eiperia etiꞌatumokahu kahato saꞌawyꞌi wuaria eheꞌaseꞌiꞌin miꞌauka haria woꞌosyp hawe. Yt eiwemoti hin i ehaꞌaseꞌiꞌin minug hap upi. 48Pywo eweikuap taꞌyn kahato aikotã saꞌawyꞌi wuaria Tupana mipoꞌororia ehaꞌaseꞌiꞌin miꞌatuꞌuka koꞌi wo teꞌeropyhuꞌat. Maꞌato eiperia yt eiwemoti hin i katupono mio raꞌyn ewetunug woꞌosyp hawiat ikahu rakaria iꞌatumotypot hamuat. 49Taꞌi aikotã aikotã Tupana henoi saꞌawyꞌi miwan me ehetiat hap ewy mesup ewetunug e. Mio tã e ti saꞌawyꞌi Tupana -Uhemiitꞌin iraniaꞌin taꞌatuꞌauka e. Iraniaꞌin ti taꞌatusatyꞌi satyꞌi yne iraniaꞌin taꞌatumohit mohit e Tupana ti miwan me. 50Pyno ti koitywy ehepiat Tupana ihay mekewat miwan me saꞌawyꞌi -Taꞌi koitywy eiꞌywotꞌin miꞌauka uimipoꞌoro koꞌi suu koꞌi yne eipo raꞌyn toineꞌen e. Taꞌi eiꞌywotꞌin ewywuaria eipe eweikupteꞌen e. Haꞌawynug hap tote pywiat Tupana mipoꞌoro haria miitꞌin miꞌauka haria suu eipo pe toineꞌen e. Tupana miꞌapiheg kahato koꞌi aru eweikupteꞌen e. Katupono ehaꞌaseꞌiꞌin minug upi ewetunug ne e. 51Saꞌawyꞌi sese ti ahaꞌaseꞌi pot Atãu saꞌyru Apeu ehaꞌaseꞌi Kaĩ tiꞌauka toꞌywyt Tupana mohey hat Apeu. Toipun kahato toꞌywyt suu yi tote. Saꞌawyꞌi Tupana mipoꞌoro aseꞌi Sakaria eiꞌywotꞌin miꞌauka wo toineꞌen. Tupana motypot hap ete toineꞌen turan. Taꞌi toineꞌen Tupana motypot yat ete yt pya hin i yparakai kai turan taꞌatuꞌauka. Pyno mesup te ti eiperia eiꞌywotꞌin ewywuat eweikupteꞌen ne e. 52Yt naku i wo kahato eiperia uwe waku uwe yt e haria katupono eweikupteꞌen okenꞌypy pyhyp haria miitꞌin moweꞌeg hap koꞌi kuap hamo. Iꞌewyte yt eweikuap i kahato Tupana ehay Muisei mimoherep hap koꞌi. Tukupteꞌen miitꞌin ikuap neran haria wen maꞌato eiperia yt ewehoꞌokenhypꞌok i ikyꞌesat haria wehytꞌok hamo.

Yne Woꞌonapin Haria Taꞌatukat Kahato Aikotã Waku Iesui Auka Hamo

53Mio tã Iesui toꞌe hawyi iꞌatupyꞌahak sese Iesui ete nagnia ehay enoi haria iꞌewyte miwan enoi haria iꞌatupyꞌahak kahato mio tã e pote. Miꞌi hawyi apo apo iꞌatuꞌe kahato Iesui pe maꞌato imaꞌat haype apo apo iꞌatuꞌe. 54Taꞌatukat kahato iꞌaparap hap iꞌe hap towẽ pywiat. Taꞌatukyꞌesat iꞌaparap hap iwẽ pyi. Taꞌatuhenoi teran kahato morekuat pe Iesui iꞌaparap hatno toineꞌen.

Currently Selected:

Iruka 11: mav

Highlight

Copy