Iruka 13
13
Haga 13
1Iesui tiꞌatumuꞌe itotiaria turan iraniaꞌin itotiaria teꞌeroꞌe Iesui pe -Mehin iꞌatuꞌe wanikaptia mipoꞌoro aiporekuat nuat mekewat Piratu e hap het rakat yt naku i kahato tutunug katupono gaꞌatpo ti ahetama Karireia piaria morekuat Piratu timoma kahato iꞌatuꞌe. Morekuat totat ahemiitꞌin hawyi toiwuk Tupana motypot yat pe iꞌatuꞌe. Miꞌi hawyi totopag mekewat iꞌatusuu aat hap Tupana motypot yat piat yparakai tote iꞌatuꞌe Iesui pe. 2Miꞌi hawyi Iesui toꞌe iꞌatuepe -Pyno uruto poꞌog morekuat Piratu miꞌatuꞌuka koꞌi kai eweiꞌe. Yt karãpe i urutunug saꞌag imiꞌatuꞌuka koꞌi minug ewywuat eweiꞌe. Miꞌi pote Tupana miꞌapiheg koꞌi wuaria tukupteꞌen miꞌiria aiꞌywania eweiꞌe eiwoꞌope e Iesui. 3Maꞌato pywo pe ti areꞌe ehepe eiperia ti wy iꞌewyte yt nakuaria i kahato eweikupteꞌen are. Gaꞌatpo eiꞌywaniaria morekuat Piratu tiꞌatuꞌuka kahato yi Karireia piaria. Yt ikahu hin i iꞌatukuꞌuro hap eweiꞌe e. Miꞌi hap ewy ti aru eweipap yt uimohey i eipe pote e. 4Taꞌi saꞌawyꞌi sese 18 surara topap yne taꞌatuꞌyat nu kawiat ywaiti rakat taꞌat iꞌatuepiit ete hawyi yt nakuaria i pote eweiꞌe. Taꞌi poꞌog tawa Ierusarẽi miaria kai yt naku i nug haria miꞌiria pote Tupana tiꞌatumoma yne eweiꞌe eiwoꞌope. 5Maꞌato pywo pe areꞌe ehepe miꞌiria yt poꞌog i Ierusarẽi yt naku i nug haria kai. Taꞌi eiperia iꞌewyte eweipap katupono yt paa eweiꞌe hin i eiminug saꞌag hap koꞌi kai. Miꞌi kaipyi ti eikuꞌuro hap topyhuꞌat yt uimohey i haria wo eweikupteꞌen pote e Iesui tomohey hap pun haria pe.
6Miꞌi hawyi Iesui henoi hãꞌãkap wo iꞌatuepe. -Wẽtup ok so toto tomikoi ypia wato hap kape e. Saꞌawyꞌi Uwa ypia pyꞌasetpe Wiku yp toikoi raꞌyn. Meiũran itag hawyi toto mekewat Wiku yp kape hawyi tohoꞌokat Wiku sat tohoꞌohep hamo maꞌato iꞌyhop yn toipuẽti. Yt kat i haat ipoi hamo. 7Miꞌi hawyi toikay kay tuwewawi teropat hat tomikoi ypia apykok hat -Uhyt myẽꞌym anu raꞌyn ariot meiũwat yp kape uipoi hap kat hamo maꞌato yt kat i atipuẽti te e so. Ariot Wiku ywa sat hamo maꞌato yt kat i atipuẽti iꞌyhop yn. Pyno waku etiꞌypun no meiũwat yp e. Kat pote uheꞌyi u hat toineꞌen maꞌato yt uipoi hat i e. 8Mio tã e pote -Yt uhyt e mikoi ypia apykok hat. Yt naku i watiꞌypun e. Waku watum yi hun kahato tope 12 ewaty pe hawyi waku yi hapo ete waku watimorem sio 12 ewaty hawyi haat raꞌyn e. 9Pyno 12 ewaty hawyi waku eraꞌaipok erahaꞌat sio wakuat sio yt hap kuap hamo e. Maꞌato miꞌi turan yt haat i te raꞌyn pote waku etiꞌypun e.
Haryporia 18 Anu Iꞌahuu Hap Tuete
10Miꞌi hawyi Iesui toineꞌen i raꞌyn wẽtup Tupana motypot yat pe i raꞌyn miitꞌin muꞌe hamo. 11Miꞌi tote toineꞌen wẽtup ok haryporia ahiag ipiit piat rakat itote. Iꞌahuu kahato 18 anu raꞌyn. Tohoꞌopot kahato katupono ahiag mimoꞌahuu toineꞌen. Iꞌoktũꞌã kahato hap wywo tohoꞌopot ahiag minug. 12Iesui tehaꞌat miꞌi haryporia kape hawyi toikay kay tuwewawi. Miꞌi hawyi toꞌe tope -Mana atipok taꞌyn epoꞌi poꞌi hap ahiag minug e. Pyno mana e eꞌahuu hap epoꞌi poꞌi hap epoꞌi poꞌi hap atiporop taꞌyn e. 13Miꞌi hawyi tuweponug hawyi iꞌoktũꞌã hap meremo tokosap taꞌyn. Waku hawyi haryporia toꞌe tehay wepiit kahato hap wywo -Waku kahato En Tupana e. 14Maꞌato Tupana motypot yat apykok hat ipyꞌahak kahato Iesui ete katupono Iesui timohãite mekewat haryporia yt topotpap i hap eꞌat pe pote. Miꞌi pote toꞌe tomimuꞌeria pe -Toineꞌen wyti 6 eꞌat aipotpap nug hamuat e. Pyno waku 6 eꞌat aiwepotpap hap turan watikat aimoehãite hap maꞌato mesup eꞌat pe yt naku i kahato watikat amoehãite hap e. 15Miꞌi hawyi Iesui tiwesat -Typy hẽku rakat neꞌi wyti en e. Yne eꞌat pe eweterepoꞌok eihũria iꞌatumoeꞌyꞌu hap kape e Iesui Tupana motypot yat apykok hat pe. 16Pyno mesuwat haryporia ahaꞌaseꞌi Aparãu emiariru toineꞌen wen maꞌato 18 anu turan ahiag mipoꞌi wo toineꞌen. Kat poteĩ waĩ ere mesuwat mana erepoꞌok hap ete yt naku i yt aipotpap i hap eꞌat pe e Iesui. 17Mio tã e Iesui hawyi wanikaptia paa iꞌatuꞌe. Maꞌato iraniaꞌin itotiaria teꞌeruwehum kahato Tupana pe Iesui minug wakuap koꞌi ete.
Iãꞌãkap Mutata Iãꞌỹi Etiat
Mateu 13.31-33; Maku 4.30-32 Piat Ewy
18Miꞌi hawyi poꞌog Iesui henoi teran iãꞌãkap wuo maꞌato saꞌawyꞌi apo e iꞌatuepe -Aikotã som Tupana topyhuꞌat Miitꞌin Porekuat no hap ete apo e. 19-Pyno ahetama pe toineꞌen iãꞌỹi kurin kahato rakat aimiꞌu mosẽꞌẽ hap Mutata iãꞌỹi watoꞌe. Miꞌi ti kurin kahato wen maꞌato wẽtup ok tikoi toko pe hawyi hẽtyt hawyi meiũran iꞌyp ywaiti kahato raꞌyn ariaꞌyp sese ewy wo raꞌyn toineꞌen. Miꞌi hawyi iꞌyp hãikupy pe weitaria teꞌeruwesoknug naꞌyn iꞌyhop koꞌi og muo. Miꞌi hap ewy ti Tupana topyhuꞌat Morekuat no mesuwat yi tote Mutata iãꞌỹi mikoi hap ewy e Iesui tomimuꞌeria pe.
Mateu 13.33 Piat Ewy
20Miꞌi hawyi Iesui apo e i raꞌyn -Aikotã wyti aru so Tupana topyhuꞌat Miitꞌin porekuatno e hawyi sehay iãꞌãkap wuo toiꞌatumuꞌe i raꞌyn. 21-Pyno uhytꞌiꞌin aikotã haryporia topag mani puk ipyre puo hawyi toꞌapokik taꞌyn. Miꞌi hawyi meiũran tuwemowato kahato raꞌyn. Miꞌi hap ewy Tupana miitꞌin porekuat topyhuꞌat irane e.
Kat Muap Hãpyk Takat
Mateu 7.13-14 Piat Ewy
22Miꞌi hawyi Iesui tiꞌatumuꞌe kahato yne tawa hit piaria Tupana ehay wo. Miꞌi hawyi tawa wato Ierusarẽi kapiat epuꞌap upiaria toiꞌatumuꞌe kahato Tupana ehay wo. 23Miꞌi hawyi muap upi wẽtup ok apo e Iesui pe -Uruporekuat e karania apuru pyno teꞌeropyhuꞌat Tupana miehakyeraꞌat koꞌi wo atipy pe e sio apuru typyꞌi kahato miit sio apuru yt typyꞌi i apo e Iesui pe. Miꞌi hawyi Iesui tiwesat. 24Pyno waku ehãꞌãg kahato mekewat okenꞌypy hãpyk takat yt iwato i rakat puo eweihytꞌok. Tukupteꞌen wyti aru iꞌatu rakaria wehytꞌok neran haria maꞌato yt teꞌeruwehytꞌok kuap i katupono miꞌiria meiũran aru areke e haria motꞌi hawyi yt teꞌeruwehytꞌok kuap i okenꞌypy kaꞌiwat toꞌokenhypꞌok taꞌyn pote. 25Miꞌi hap eꞌat pe aru mekewaria -Ereꞌokenhypꞌok to Mimi ereꞌokenhypꞌok to Uhyt iꞌatuꞌe motꞌi kahato getap kaꞌiwat pe wen maꞌato miꞌi ti -U paĩ yt worohoꞌokuap i eipe aikope pyi eweiõꞌẽ e iꞌatuepe aru. Areꞌokenhypꞌok taꞌyn e Iesui. 26Miꞌi tote aru okenꞌypyke teꞌerewak kahato -Saꞌawyꞌi urutenuk kahato ewywo Mimi. Urutuwesapoꞌu kahato kue ewywo Mehin iꞌatuꞌe. Ehay ete ti urutuwemuꞌe kahato wuatꞌi puo muap upi iꞌatuꞌe aru okenꞌypy kaꞌiwat pe. 27Miꞌi hawyi wyti aru toiꞌatuwesat -Pywo pe ti rat areꞌe yt atikuap hin i eiperia e. Eweiwat ro uiꞌyatypepyi paĩ katupono yt atikuap I aikope pyi eweiꞌõꞌẽ. Yt nakuaria i eiperia e okenꞌypy apykok hat wehytꞌok neran haria pe e Iesui. 28Pywo pe ti miꞌiria woꞌokakꞌi haria wo teꞌeropyhuꞌat. Iãi kyret kyret iꞌatuꞌe hoꞌopot hap po puo karãpe okenꞌypy sakpo kaipyi teꞌerehaꞌat Aparãu Isaki Iako kape iꞌewyte yne Tupana ehay moherep haria kape tukupteꞌen aikope Tupana toineꞌen morekuatno hap tote. 29Maꞌato tuwehytꞌok kahato iraniaꞌin ywania. Miꞌi haria ti tuwehytꞌok aikope Tupana toineꞌen Morekuatno hap tote. Tõꞌẽ tõꞌẽ kahato aikope pyi aat tuwẽtem hap kaipyi aikope aat minꞌe hap kape hawyi aat posak kaipyi aat porag kaipyi tõꞌẽ Tupana wywuat tukupteꞌen hamo. 30Uiꞌywania e eipe ti Tupana ehay kuap yian miat haria eweikupteꞌen maꞌato o iraniaꞌin ywania yt uwe mikuap mo i rakaria wyti aru tuwehytꞌok eheꞌyian me aikope Tupana toineꞌen morekuatno hap tote. Miꞌi hawyi iwatꞌyptia iꞌatuwatꞌypmo eweihytꞌok e Iesui toꞌywania Iuteuria pe.
Mateu 23.37-39 Piat Ewy
31Miꞌi hawyi Tupana ehay enoi haria putꞌok iꞌatuꞌe Iesui yatype teꞌeroꞌe hamo -Erẽtem no meremo meiũpepyi iꞌatuꞌe katupono morekuat Eroti wyti eꞌauka teran moityꞌi raꞌyn iꞌatuꞌe Iesui pe. 32Miꞌi hawyi Iesui tiꞌatuwesat -Morekuat Eroti ti Awahuru ewywuat uiwanetup hawe katupono woꞌoꞌauka teran hat miꞌi miit areꞌe. Waku eweiwat ro Eroti kape hawyi ehenoi uiꞌe hap tope -Uito ti meiũ ahiagnia atusopo kahato hat raꞌyn iꞌewyte atiꞌatumoehãite kahato iꞌahuu rakaria mukiꞌite ti aru iꞌewyte atunug wakuat uipotmoehãite hap koꞌi uhewyry hap upi e. Miꞌi hawyi mukiꞌite eꞌihatꞌok hawyi ti aru waku yne raꞌyn uiminug koꞌi miꞌi hawyi waku yne hawyi areto e. 33Mesup eꞌat pe uipotpap teran miitꞌin moehãite hap ete hawyi mukiꞌite iꞌewyte uipotpap teran hawyi mukiꞌite eꞌihatꞌok hawyi toran naꞌyn uipotpap hap mesuwe katupono uiꞌauka hap eꞌat aru putꞌok e raꞌyn are. Maꞌato yt karãpe i Tupana ehay moherep haria wẽtup etawa pe iꞌauka hap. Tawa Ierusarẽi me yn waku toꞌauka hap. Waku miowat uiꞌe hap ewehenoi mekewat Awahuru pe e.
34Miꞌi hawyi Iesui tuwak toꞌywania kyewi tomohey hap pun haria pote -Tawa Ierusarẽi miaria e yt eweiweꞌeg hin i eiperia katupono Tupana mipoꞌororia auka haria eipe e. Ihay moherep haria eweiꞌatuꞌuka haꞌawyte nu koꞌi wo e. Uito worohoꞌokyꞌe eiperia. Worohoꞌokay kay uhewawi aikotã Waipaka ty tiꞌatukay kay tomepytꞌin piku piku koꞌi ewy ipopesap ywytꞌokpype iꞌapykok hamo wen maꞌato eiperia yt eweiꞌõꞌẽ i uhewowi e Iesui tawa wato Ierusarẽi piaria pe tuwak turan. 35Are paĩ mio raꞌyn eiweran eweipyhuꞌat areto hawyi. Yt naku i hawuo eweikupteꞌen aru. Miꞌi hawyi yt eweiꞌakasa hin i uhowowi aru maꞌato meiũran ti aru esaipepiaria aiꞌywania Iuteuria -Waku kahato Tupana Mipoꞌoro Sese Ahehakyeraꞌat hat iꞌatuꞌe aru uhetiat pe hawyi miꞌi hap eꞌat pe aru araꞌaipok ehewowi i raꞌyn e Iesui tuwak hawuo.
Currently Selected:
Iruka 13: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
