Mateu 10

Haga 10

Iesui Tiꞌatumuꞌe Topotmuꞌeria Hawyi Toiꞌatupoꞌoro Raꞌyn Miitꞌin Muꞌe Hamo

Maku 6.7; Iruka 9.1 Piat Ewy

1Miꞌi hawyi Iesui tiꞌatukay kay temiitꞌin 12 ok takaria tuwewowi. Miꞌi hawyi Iesui tum iꞌatuepe tesaika hap ahiagnia sytpok wuatꞌi miitꞌin piit pywiat hamuat. Iꞌewyte wuatꞌi iꞌahuu rakaria moehãite hamuat. Toimoꞌẽ kahato tesaika hap temiitꞌin 12 ok takaria pe tomisepap oktan nug hamo. 2Pyno mesuwe Iesui potmuꞌeria 12 ok takaria set koi. Saꞌawyꞌi toikay kay Simau e hap het rakat hawyi wẽtup het Peteru e hawyi iꞌywyt Antere hawyi Tiaku iꞌywyt Iuwãu. Miꞌiria ti Sepeteu saꞌyruꞌin 3hawyi topotmuꞌe Wiripi hawyi Patorumeu hawyi Mateu mekewat saꞌup poreraꞌat miitꞌin kaipywiat hat. Hawyi Tiaku Auweu saꞌyru hawyi Tateu 4hawyi Simau teꞌyi motypot hanuat hawyi Iuta mekewat Iesui maꞌat hanuat.

5Miꞌiria 12 ok ti Iesui tiꞌatupoꞌoro tehay henoi hamo maꞌato mio tã e iꞌatuepe toiꞌatunapin -Pyno koitywy worohoꞌopoꞌoro raꞌyn uhehay wakuat moherep hamo aiꞌywania Iuteu kape. Maꞌato yt atikyꞌesat i eweiwat iraniaꞌin ywania kape neꞌi. Iꞌewyte yt eweihytꞌok teiꞌo mekewat yi Samaria piat tawa koꞌi kape. 6Pyno aiꞌywania tukupteꞌen aikotã aihũria howasat rakaria ewywuaria e. Miꞌi pote waku aiꞌywania Iuteuria eweiꞌatumuꞌe saꞌawyꞌi e. 7Putꞌok eweiꞌe aiꞌywania pyꞌasetpe hawyi waku mio tã eweiꞌe eweꞌatumuꞌe -Pywo ti tuut irane Tupana Mipoꞌoro Aiporekuatnuat eweiꞌe. 8Iꞌewyte waku eweiꞌatumoehãite hepihi pihi rakaria iꞌewyte iraniaꞌin aikotã aikotã iꞌahuu rakaria. Iꞌewyte eweiꞌatumoehãite o ikuꞌuro rakaria e. Iꞌewyte eweiputsit o maꞌãu saꞌag koꞌi miitꞌin piit pyi yt kat saꞌup i e. 9Iꞌewyte yt kat hamo i ewetioto eiwoꞌokytyt hap iꞌewyte uru iꞌewyte parata koꞌi iꞌewyte iꞌape rakaria yt wẽtup i ewetioto e. 10Iꞌewyte eweiwat turan yt ewetioto teiꞌo ekuriwu koꞌi maꞌato waku ewetioto eipiit piat yn ehesokpe iꞌewyte eipy sokpe koꞌi. Iꞌewyte eipoꞌyha muap upiat epowyro hap yn ewetioto e. Waku itotiaria ti aru Tupana potpoꞌororia powyro hanuaria wo teꞌeropyhuꞌat. 11Miꞌi hawyi karãpe ewehytꞌok wẽtup tawa piat turan sio miitꞌin typyꞌi rakaria pyꞌasetpiat turan waku eweikat iraniaꞌin eikyꞌe haria waku ereke uiꞌyat pe e haria. Miꞌiria yat pe waku eweikupteꞌen eweiꞌaipok teran itote pywiat hap kape.

12Karãpe ewehytꞌok wẽtup netap wiat turan waku eweiꞌatupoityro o mekewat netawiaria. 13Sio mekewat netawiaria eiꞌatuwaku pote waku mekewat iꞌatupoityro hap topyhuꞌat iꞌatuwywo. Maꞌato yt eikyꞌe haria ete yt topyhuꞌat kuap iꞌatupoityro hap e. 14Maꞌato iraniaꞌin netawiaria sio tawa piaria waku mehin yt iꞌatuꞌe i yt eikyꞌe i haype pote iꞌewyte yt teꞌeruwanetup teran i eimienoi koꞌi kape pote waku eiwenoꞌẽ mekewat tawa pyi. Maꞌato waku eiwenoꞌẽ turan eiwepitpitꞌok kahato tawa sawiu eipy sokpe pya etiat yi koꞌi iꞌatuehamo. Meiẽwat tawa piaria yt uimohey teran i hamo herep hamuat. 15Pywo pe ti areꞌe ehepe taꞌi woꞌoꞌairo sese raꞌyn hap eꞌat pe ti aru poꞌog Tupana miꞌapiheg wo toineꞌen mekewat tawa Sotoma iꞌewyte mekewat tawa Kumura apiheg hap kai.

Iesui Tohenoi Aikotã Niatpo Hap Taꞌatupuẽti Tuereto

16Pyno eiwanetup to uhehay kape. Pyno mesuwe worohoꞌopoꞌoro eipe aikotã aihũ Uweiria koꞌi watipoꞌoro hawyi tukupteꞌen awahuru haiwot rakaria pyꞌasetpe raꞌyn hap ewy. Maꞌato aikotã moĩ iꞌokpipokꞌi kahato toꞌauka tet pupi hap ewy o eweikupteꞌen iꞌewyte waku eweikupteꞌen aikotã pykasu yt ipyꞌahak hin i hap ewy o eweikupteꞌen iꞌatupyꞌasetpiat turan. 17Pyno eiweꞌeg wo eweikupteꞌen katupono ti aru ehereto eipyhik hamo. Iꞌewyte ehereto ti aru waku sio yt hap e hap kape eikuap hamo. Iꞌewyte eiꞌapiheg apiheg wyti aru Tupana motypot yat pe e Iesui. 18Iꞌewyte yt iwese i epiat rakaria ti aru ehereto morekuaria po piat eipag hamo. Maꞌato morekuaria po piat raꞌyn eweikupteꞌen turan waku ehehay uhehay wo. Waku eweiꞌatumuꞌe yt Iuteuria yn i uhehay wo. 19Karãpe ehewanikaptia ehereto morekuaria kape turan o yt eiwanetup koꞌi koꞌi teiꞌo kat are aru atiwesat morekuat paĩ eweiꞌe hap kape. Katupono ti aru mekewat eꞌat Tupana eiwanetup hawe ehepiat iwesat hamuat koꞌi e. 20Katupono ti aru ehereto raꞌyn hap eꞌat pe ti aru yt eiwat sehay hin i tuwẽtem eiwẽ pyi maꞌato aiꞌywot atipy piat paꞌãu kaipyi ti aru tuwẽtem eiwẽ pyi ehehay. 21Iꞌewyte ti aru mekewat eꞌat pe eheykeꞌetꞌin sese pykai eiꞌauka haria wo tukupteꞌen. Iꞌewyte ywot tiꞌauka ti aru tesaꞌyru iꞌewyte imepytꞌin tiꞌauka ti aru taꞌatuꞌywotꞌin uhehay po pyi. 22Yt naku kahato eipe iꞌatuꞌe aru wuatꞌi miitꞌin uimimohey haria eipe pote. Maꞌato uwe uwe uimohey te taꞌatuwanikaptia pyꞌasetpe pykai miꞌiria ti aru uimihakyeraꞌat wuaria sese wo teꞌeropyhuꞌat. 23Uipotpoꞌororia karãpe wẽtup tawa piaria eimohan eiꞌatuuka hamo miꞌi hap eꞌat pe waku eweiwat wẽtup tawa kape iraꞌyn iraniaꞌin muꞌe hamo. Maꞌato karãpe eimohan ehewanikaptia eiꞌauka hamo pote waku eweiwat wẽtup tawa kape iraꞌyn. Katupono ti pywo pe areꞌe ehepe miꞌi tã taꞌatunug ehetiat pykai yt eipo hep kuap i Isareu etawa piaria muꞌe hap ete. 24Pyno yt wẽtup ok i ti toineꞌen mimuꞌe poꞌog tomuꞌe hap kai. Iꞌewyte yt wẽtup ok i ti toineꞌen poꞌog semiit tekaraiwa kai. 25Katupono ti aru mimuꞌe ete taꞌatunug imuꞌe hat etiat ewy ti raꞌyn. Iꞌewyte semiit ete ti aru taꞌatunug aikotã hekaraiwa etiat ewy ti raꞌyn. Iꞌewyte mekewat netawiaria akag toꞌe -Meiẽ ti ahiag Pesepu e hap iꞌatuꞌe. Miꞌi pote ti aru Pesepu e hap iꞌatuꞌe iꞌatuꞌakag me miꞌi pote ti aru iraniaꞌin hemiitꞌin me teꞌeroꞌe wy meimuẽ ti ahiag mepytꞌin kahato iꞌatuꞌe saꞌag wy.

Iruka 12.2-7 Piat Ewy

26Miꞌi tupono yt eweikenꞌẽ teiꞌo iꞌatuminug ehepiat koꞌi pupi. Katupono iꞌatuminug yt heremo pywiat i ti aru Tupana timoherep aru. Iꞌewyte torannia iꞌatumiewyi koꞌi ti aru meiũran wuatꞌi mikuap wo topyhuꞌat. 27Pyno are som uhehay yt heremo i miitꞌin me maꞌato yt heremo i rakat waku ewehenoi hotꞌok kahato miitꞌin me. Iꞌewyte kat uiꞌe hap eimikuap koꞌi uhehay yt heremo i miitꞌin piat rakat waku ewehenoi hotꞌok kahato. 28Iꞌewyte yt eweikenꞌẽ teiꞌo eiꞌauka hap pupi katupono aipiit taꞌatuꞌauka wen maꞌato ahaꞌum yt taꞌatuꞌauka kuap i. Maꞌato waku watokenꞌẽ Tupana pupi katupono miꞌi ti imoma kuap yne torannia ahaꞌum iꞌewyte aipiit.

29Pywo pe ti areꞌe watikyiꞌat kuap wyti typy weita hit yt hawoity hin i kurin saꞌup upi yn. Yt iwato hin rakaria pykai Tupana tikuap kahato wẽtup ikuꞌuro weita hap. 30Tupana tikuap kahato karania aiꞌasap iꞌatu hap pykai toimorania kuap yne. 31Miꞌi tupono yt eweikenꞌẽ teiꞌo iꞌatupupi katupono eiperia wyti poꞌog toiꞌatukyꞌe weitaria koꞌi kai.

Iruka 12.8-9 Piat Ewy

32Karãpe wẽtup ok toꞌe -Pywo pe miitꞌin pyꞌasetpe uito ti atomohey kahato Tupana e miꞌi hat pe uito iꞌewyte woroꞌairo hap eꞌat pe areꞌe pywo ti rat meiẽ uhemiit sese areꞌe uiꞌywot pe. 33Maꞌato uwe toꞌe miitꞌin me -Uito ti yt atomohey Tupana e miꞌi hat pe Uito iꞌewyte areꞌe woroꞌairo hap eꞌat pe uiꞌyat pe meiẽ ti yt uimohey hat i are atipy pe.

Iesui Mienoi Hap Miitꞌin Patꞌok Hap Tohenoi

34Yt eiwanetup teiꞌo ariot meikowo mesuwarotiat miitꞌin wywuat woꞌowese hap nug hamo hap ete. Maꞌato aterut woꞌowanikap hamuat. 35Pyno ariot i ti mekewat tomepytꞌin wywuat toꞌowanikap hamuat. Iꞌewyte tomepyt wywuat toty wywuat iꞌewyte tomimohapyap koꞌi iꞌewyte tosakituꞌin wywuat toꞌowanikap wanikap nug hamuat. 36Pyno ti poꞌog wanikaptia ti aru tukupteꞌen wẽtup ok eꞌyat piat sese ieineꞌen hat. 37Pyno uwe ikyꞌe poꞌog toꞌywot sio toty uikyꞌe hap kai miꞌi hat wyti yt putꞌok e i uhemiitno. Iꞌewyte uwe ikyꞌe poꞌog tosaꞌyru iꞌewyte tosakiꞌyt poꞌog uikai miꞌi hat yt putꞌok e i uhemiitno. 38Pyno uwe toꞌe -Uiꞌauka pykai yt atoiat hin i uhepiat imohey hap miꞌi yn putꞌok e kuap uhemiitno. 39Uwe tuwanetup tomikyꞌesat nug hap kape yn miꞌi hat wyti aru yt karãpe i ipuẽti toieineꞌen hap sese. Maꞌato uwe iwaure tomikyꞌesat nug hap Tupana mikyꞌesat nug hamuat miꞌi hat yn ipuẽti kuap toieineꞌen wuatꞌi eꞌat piat hap.

Miitꞌin Kyꞌe Haria Ereineꞌen Mote Uikyꞌe Hat Ereineꞌen E Iesui

40Iꞌewyte uwe uwe ereke ro e ehepe miꞌiria ti uhepiat ereke ro e hat. Iꞌewyte uhepiat ereke ro e haria ti uimipoꞌororia piat ereke ro e haria. 41Iꞌewyte uwe Tupana ehay moherep hat pe ereke ro e miꞌi hat pe tutum haꞌup Tupana ehay moherep hat piat oktan. Iꞌewyte uwe wẽtup ok miit waku rakat pe ereke ro e miꞌi hat pe tutum haꞌup iꞌoktan e. 42Pywo pe ti areꞌe ehepe uwe uwe uipotpoꞌororia powyro hat tutum wẽtup ekuiꞌa yꞌy iꞌewyte mekewat kurin nakaria uhehay moherep haria yt iraniaꞌin mikuap i koꞌi pe miꞌiria ti aru haꞌup sat uikaipyi.

Currently Selected:

Mateu 10: mav

Highlight

Copy