Génesis 19
19
Jix Qꞌueyle El Conobꞌ Sodoma Cꞌal Gomorra Yu Jehová
1Jaꞌ yet lalanxa skꞌejbꞌi, jix apni oc cawan ebꞌ ángel tuꞌ bꞌey conobꞌ Sodoma, jaꞌ naj Lot chotan ey bꞌey stiꞌ spuertail conobꞌ. Jaꞌ yet jix yilon naj Lot tuꞌ xin, catuꞌ jix a waanoj, jix chaꞌle apnoj ebꞌ yu. Jix ey noan naj sat txꞌotxꞌ sattaj ebꞌ. 2Jix yalon tet ebꞌ jaxca tiꞌ:
—Jex waawil, yuwal dios ey jex, toonwej wetoj bꞌey jin na, ey jaꞌ oj je kꞌanaꞌ yet oj je txꞌaon el je yajan, watxꞌ oj jex can wey bꞌey jin na yet jun akꞌbꞌal tiꞌ, jaxa yet sebꞌ yecal chex pax toj.
Jix takꞌwi ebꞌ tet naj:
—Yuwal dios ey jaach, jaon tiꞌ jon, oj cu can bꞌey txombꞌal tiꞌ, jaꞌ titiꞌ oj cu wey jon, ẍi ebꞌ.
3Jaxa jix yun xin, jix oc cꞌal tean naj Lot yin ebꞌ. Yuxan jix too ebꞌ bꞌey sna naj tuꞌ, jaꞌ yet jix apni oc ebꞌ, jix swaꞌne pan tet ebꞌ, tol cꞌam yich, caw watxꞌ jix yun slow ebꞌ.
4Jaꞌ yet cꞌamto chi weya ebꞌ, jix yambꞌa oc sbꞌa masanil ebꞌ winaj a conobꞌ Sodoma tuꞌ yinlaj na, ebꞌ achꞌe cꞌal ebꞌ icham winaj. 5Jix cꞌoli yawi octoj ebꞌ yin naj Lot, chi yalon ebꞌ jaxca tiꞌ:
—¿Bꞌeytuꞌ eyoc wan winaj jix jul bꞌey ja na tiꞌ yet jun akꞌbꞌal tiꞌ? Iꞌeltej ebꞌ naj ey jon yet chi ketnen ebꞌ jon, ẍi ebꞌ.
6Jaꞌ yet jix yabꞌen naj Lot wan kꞌane tuꞌ, jix eltej kꞌanabꞌ yetoj ebꞌ; watxꞌ jix yun smajchen smaj sna tuꞌ yintaj. 7Jix yalon naj tet ebꞌ jaxca tiꞌ:
—Jex wet animail, cꞌam ojabꞌ che yun jun spenail tuꞌ. 8Ey cawan jin cutzꞌin caw kꞌopo, cꞌamto winaj chi yiꞌle ebꞌ, chi skeꞌ chi wiꞌeltej ebꞌ ix ey jex, yet watxꞌ che yun tzet che yoche yetoj ebꞌ ix. Jal ebꞌ naj tiꞌ xin, cꞌam ojabꞌ spenail che yun yin ebꞌ naj; yutol jain chin jul yil ebꞌ naj, yuxan sowalil chin col ebꞌ naj.
9Catuꞌ jix takꞌwi ebꞌ jaxca tiꞌ:
—Elan cu sattaj. ¿Tumi jaach txꞌoj conobꞌal jaach tiꞌ, cha woche xacꞌal cha walaꞌ? Jaꞌ tinaniꞌ yel xacꞌal oj ecꞌ yibꞌan jaach ketnen yintaj ebꞌ.
Jix lawi tuꞌ, jix oc cꞌal ian ebꞌ stenontoj Lot yu sjitzontoj sbꞌa ebꞌ scawilal smajil na tuꞌ, yet chi smakꞌon poꞌo ebꞌ snaꞌoni. 10Jaꞌ ebꞌ naj eyecꞌ bꞌey sna naj Lot tuꞌ, jix yaon eltej skꞌabꞌ ebꞌ naj, jix iꞌle octoj naj yu ebꞌ yul na tuꞌ, catuꞌ jix smajchen can eltej smaj na tuꞌ ebꞌ. 11Jix majchele el sat ebꞌ naj yu ebꞌ ángel tuꞌ, yuxan masanil ebꞌ naj eyecꞌ stiꞌ na tuꞌ, cꞌamxa chi skeꞌ yilwan ebꞌ, ebꞌ achꞌe cꞌal ebꞌ icham winaj, cꞌamxa junoj chi skeꞌ yilwani. Caw jix cꞌuumbꞌi a ebꞌ seyon ecꞌ teꞌ smajil na tuꞌ. 12Jix lawi tuꞌ xin, jix yalon ebꞌ cawan ángel tuꞌ tet Lot:
—Ta eyto mac ey ja wu ja bꞌa yetoj titiꞌ, ja cꞌaal, ja cutzꞌin, ma ja niꞌ, cꞌal junojxa mactxequel, iꞌeltoj ebꞌ ja wetoj yetoj masanil tzetyetal ey, ey jaach. 13Yutol oj cu qꞌueyel jun conobꞌ tiꞌ jon. Caw wal mimanxa spenail sattaj Jehová, yuxan jix cu chejletej yu Jehová yet chi cu qꞌueyon can el wan ánima tiꞌ jon, ẍi ebꞌ ángel tuꞌ.
14Jix lawi tuꞌ, jix too naj Lot yalon tet ebꞌ naj tꞌinan yoc sniꞌoj, jix yaloni:
—Eymanwej, aanwej waanoj, eloj jonwej, yutol oj qꞌueyle el jun conobꞌ tiꞌ yu Jehová, ẍi naj tet ebꞌ.
Ma ẍaꞌ yabꞌ ebꞌ tzet jix yal naj Lot tuꞌ. Tucꞌal chi yal naj snaꞌon ebꞌ. 15Jaꞌ yet lalanxa sajbꞌi eloj, jix yalon ebꞌ ángel tuꞌ tet naj Lot:
—Ta tol cꞌam cha woche chach cam bꞌey jun conobꞌ tiꞌ, eyman, aan waanoj, iꞌtoj ix ja wistil, cꞌal ebꞌ ix ja cutzꞌin scawanil, ẍi ebꞌ tet naj.
16Jaꞌ naj Lot, cꞌam cꞌal chi slaoc naj yeli, yuxan jix oc mitxꞌan ebꞌ cawan ángel tuꞌ yin skꞌabꞌ, jix quetzletoj naj yu ebꞌ, yutol chi okꞌ scꞌul Jehová yin ebꞌ. Jaxca tuꞌ jix yun yiꞌle el naj Lot tuꞌ yetoj yistil yetoj cawan scutzꞌin, queytuꞌ jix yun yeltoj ebꞌ yul conobꞌ tuꞌ. 17Jaꞌ yet jix el ebꞌ stiꞌel conobꞌ tuꞌ, jix yalon junoj ebꞌ ángel tuꞌ jaxca tiꞌ:
—Caw che laoc je yeli, cꞌam cꞌal chex too tꞌanan je yintaj, cꞌam cꞌal chex oc tucan niꞌoj bꞌey jun acꞌal tiꞌ, asiꞌwej sjolomlaj wonan, ta cꞌam chi yoche je cꞌul chex qꞌueyeloj, ẍi ebꞌ.
18Jix yalon naj Lot tet ebꞌ:
—Cꞌamaj jex waawil, yuwal dios ey jex. 19Caw wal mimanxa je watxꞌcꞌulal che txꞌox ey jin, ilaꞌ tol jix jin je colcan eloj yet cꞌam chin cami. Cꞌam chi skeꞌ jin to bꞌey sjolomlaj wonan tuꞌ, tejan chin michꞌcha yu jun syaꞌilal tuꞌ, catuꞌ chin cam yu. 20Jaꞌ scawilal tiꞌ ey jun yaliẍ conobꞌ, jatuꞌ chi skeꞌ jin toi. Toloj wal chin je chaꞌtoj bꞌey jun conobꞌ tuꞌ, yet watxꞌ jaꞌ tituꞌ chin col jin bꞌa. ¿Yutol yaliẍ conobꞌne? ẍi naj Lot tuꞌ.
21Jix yalon jun ángel tuꞌ tet naj:
—Tuxa jix wabꞌe, yun ojabꞌ jaxca cha wal tuꞌ. Man oj jin qꞌueyel jun conobꞌ cha wal tuꞌ. 22Asiꞌ yin eymanil xin, yet chex toocan tituꞌ, yutol cꞌam tzet chi skeꞌ wunen yet cꞌamto chex apni bꞌey jun conobꞌ tuꞌ, ẍi jun ángel tuꞌ.
Yuxan Sóar,#19:22 Jaꞌ yin Hebreo, Sóar, laan chi yal yeloc apnoj yetoj jun kꞌane, “yaliẍ”. jix yij can sbꞌi jun conobꞌ tuꞌ.
23Jaꞌ yet tuxa chi sajbꞌi eloj, jix apni oc Lot bꞌey jun conobꞌ Sóar tuꞌ. 24Jaꞌ Jehová jix aon eytej kꞌakꞌ bꞌey satcan yetoj cꞌol yibꞌan conobꞌ Sodoma cꞌal Gomorra. 25Jix lawi el wan conobꞌ tuꞌ yu Jehová, yetoj masanil tzetyetal awbꞌil eyoj. 26Jal pax ix yistil naj Lot tuꞌ xin, naat tzajan can ix, catuꞌ jix toocan tꞌanan ix yintaj. Jaꞌ tituꞌ jix cancan ix, jix oc can ix jaxca junoj ẍꞌenal atzꞌam.
27Jaꞌ yet junxa cꞌu yet skꞌinibꞌalil, jix too naj Abraham bꞌey jix kꞌanabꞌ yetoj Jehová. 28Catuꞌ jix yilontoj, tol jaꞌ bꞌey Sodoma cꞌal bꞌey Gomorra cꞌal yetoj masanil spananil stiꞌlaj sjobꞌeal, cꞌal masanil satlaj txꞌotxꞌ bꞌey yinlaj conobꞌ tuꞌ, tol wacaqui xacꞌal ya smucꞌal, jaxca smucꞌal junoj miman jorna. 29Jaxca tuꞌ jix yun yakꞌle lawoj el wan mimej conobꞌ tuꞌ yu Jehová, cꞌal jun acꞌal bꞌey ecꞌnaj naj Lot. Jix naꞌletej naj Abraham yu Jehová, yuxan jix col-le el naj Lot xol jun miman syaꞌilal tuꞌ.
Jaꞌ Yicꞌaal Ebꞌ Moabita Cꞌal Ebꞌ Amonita
30Jix lawi tuꞌ xin, jaꞌ naj Lot yetoj cawan scutzꞌin jix xiw ebꞌ yapni oc caan bꞌey conobꞌ Sóar tuꞌ. Yuxan jix toocan naj bꞌey sjolomlaj wonan yetoj cawan scutzꞌin tuꞌ, jix caey ecꞌ ebꞌ yul jun jolan nachꞌen. 31Ey jun cꞌual, jix yal ix bꞌabꞌel ix tet ix tzunan ix jaxca tiꞌ:
—Jaꞌ naj cu mam tiꞌ caw icham winajxa naj, cꞌam junoj winaj bꞌey ey jon ecꞌ tiꞌ chi skeꞌ kiꞌoni, yet chi ali kuninal yetoj jaxca taꞌ sbꞌeybꞌal masanil ánima. 32¡Jaꞌ tinaniꞌ xin, kakꞌ an yucꞌ naj cu mam tiꞌ! catuꞌ chi cu wey yetoj naj, yet watxꞌ chi ali yuninal naj ketoj, ẍi ix.
33Jaꞌ yet jun akꞌbꞌal tuꞌ, jix yakꞌ an ebꞌ yucꞌ smam tuꞌ, caw jix qꞌueyel scꞌul naj Lot tuꞌ yu an, jaꞌ ix bꞌabꞌel ix tuꞌ jix wey yetoj smam tuꞌ. Ma yabꞌ naj janicꞌ jix ey telan ix wey yetoj, ma pax yabꞌ naj janicꞌ jix a waan ix. 34Jaxa yet junxa cꞌu xin, jix yalon ix bꞌabꞌel ix tuꞌ tet ix tzunan jaxca tiꞌ:
—Jaꞌ yet akꞌbꞌalil maꞌi, jix jin wey yetoj naj cu mam tiꞌ; jal tinaniꞌ xin, kakꞌ an yucꞌ junelxa, yet watxꞌ chach wey yetoj jaach tiꞌ, jaxca tuꞌ oj yun yali kuneꞌ cu cawanil, ẍi ix. 35Jaꞌ yet akꞌbꞌalil tuꞌ xin, jix yakꞌon pax an ebꞌ tuꞌ yucꞌ junelxa, jaꞌ ix tzunan ix tuꞌ jix wey yetoj naj. Ma yabꞌ naj janicꞌ jix ey telan ix wey yetoj naj, ma pax yabꞌ naj janicꞌ jix a waan ix. 36Jaxca tuꞌ jix yute sbꞌa ebꞌ ix scutzꞌin naj Lot tuꞌ scawanil, queytuꞌ jix yun yijon oc yuneꞌ ebꞌ ix. 37Jaꞌ ix bꞌabꞌel, jix ali jun yuneꞌ ix, winaj unin jix yakꞌon ix yij sbꞌi Moab, jaꞌton smam icham ebꞌ Moabita tinaniꞌ. 38Jix ali pax yuneꞌ ix tzunan ix tuꞌ, winaj unin, jix yakꞌon ix yij sbꞌi Ben-amí, jaꞌton smam icham ebꞌ Amonita tinaniꞌ.
Currently Selected:
Génesis 19: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
