Génesis 9
9
Swa Kꞌane Jehová Yetoj Naj Noé
1Jix yakꞌ syaaxilal Jehová yibꞌan naj Noé, yetoj ebꞌ scꞌaal. Jix yalon jaxca tiꞌ: Chꞌibꞌ ojabꞌ sbꞌisil je yuninal, akꞌwej noel sat txꞌotxꞌ txꞌotxꞌ tiꞌ. 2Masanil noꞌ noꞌ ey sat txꞌotxꞌ tiꞌ, oj xiw noꞌ ey jex, cꞌal noꞌ tzꞌiquin, cꞌal noꞌ ey yul-laj jaꞌ mar. Ey ojabꞌ je yopiso yibꞌan noꞌ. 3Jaꞌ tinaniꞌ, chi skeꞌ je chiꞌon masanil noꞌ noꞌ tiꞌ. Jain chi wakꞌ ey jex jaxca jix yun wakꞌon an ita je chiꞌ. 4Yuxan jaꞌ wan tzetyetal man oj je chiꞌ, jaꞌton noꞌ chiꞌbꞌe eyto oc ẍiqꞌuil, yutol jaꞌ ẍiqꞌuil noꞌ tuꞌ, jaꞌ eyoc skꞌinaloj noꞌ.
5Jain oj waoc syaꞌilal ebꞌ ánima chi smakꞌ cam yet animail, cꞌal noꞌ noꞌ chi makꞌwi cam ánima, oj makꞌle pax cam noꞌ.
6Jaꞌ mactxequel chi smakꞌ cam yet animail, ánima oj makꞌon pax cam jun mactxequel tuꞌ, yutol jaex ánima jex tiꞌ jaxca weocoj, queytuꞌ jix yun jex jin waꞌneni.
7Chi woche an tol ey ojabꞌ je yuninal, no ojabꞌ el yul yibꞌankꞌinal tiꞌ je yu, ẍi Jehová.
8Jix yalon Jehová tet naj Noé cꞌal tet ebꞌ yuninal jaxca tiꞌ: 9Jaꞌ tinaniꞌ, chi wakꞌcan jun jin wa kꞌane tiꞌ je yetoj, cꞌal yetoj masanil ebꞌ je yicꞌaal yet bꞌakꞌin, 10cꞌal yetoj masanil noꞌ noꞌ jix eltej je yetoj yul teꞌ barco, noꞌ tzꞌiquin, noꞌ jobꞌbꞌeal noꞌ, cꞌal noꞌ xol-laj teꞌal noꞌ, yetoj masanil noꞌ noꞌ ey yul yibꞌankꞌinal tiꞌ. 11Jaꞌ jun jin wa kꞌane chi wakꞌ je yetoj tiꞌ, manxa oj jin qꞌuexaꞌ. Manxa oj jin qꞌueyel ebꞌ ánima, cꞌal noꞌ noꞌ yetoj mimej yaax nabꞌ junelxa. Manxa oj jul mimej yaax nabꞌ junelxa sat txꞌotxꞌ txꞌotxꞌ tiꞌ, jaxca jun jix ecꞌ el tiꞌ. 12Tiꞌ ey jun yechel jin wa kꞌane chi wakꞌcan je yetoj tiꞌ, cꞌal yetoj masanil noꞌ noꞌ. 13Chi wa can oc jun kꞌukꞌulcan xol asun jaꞌton jun yechel jin wa kꞌane bꞌey sat txꞌotxꞌ txꞌotxꞌ tiꞌ. 14Jaꞌ yet chi waontej asun catuꞌ oj txeclo a jun kꞌukꞌulcan tuꞌ. 15Queyton tuꞌ chi yun jin naꞌontej jin wa kꞌane chin waꞌne can je yetoj, cꞌal yetoj noꞌ noꞌ, yu jun tuꞌ, cꞌamxa mimej yaax nabꞌ oj jex qꞌueyon eloj. 16Jaꞌ yetoj jun kꞌukꞌulcan oj a xol asun tuꞌ, queyton tuꞌ oj yun wiloni cꞌal jin naꞌontej jun jin wa kꞌane chi wakꞌcan je yetoj yin masanil tiempo cꞌal yetoj noꞌ noꞌ ey yul yibꞌankꞌinal tiꞌ. 17Jaꞌton yechel jin wa kꞌane tiꞌ chin waꞌne can je yetoj, cꞌal yetoj jantaj noꞌ noꞌ ey sat txꞌotxꞌ tiꞌ, ẍi Jehová tet naj Noé.
Naj Noé Yetoj Ebꞌ Scꞌaal
18Jaꞌ ebꞌ scꞌaal naj Noé jix eltej yul teꞌ barco jaꞌton Sem, Cam cꞌal Jafet. Jaꞌ naj Cam tuꞌ smam naj Canaán. 19Jaꞌ ebꞌ tiꞌ scꞌaal Noé ebꞌ, jaꞌ yin yicꞌaal ebꞌ jix chꞌibꞌ cꞌal sbꞌisil conobꞌlaj sat txꞌotxꞌ txꞌotxꞌ tiꞌ.
20Mulnawom cꞌaltaꞌ naj Noé sat txꞌotxꞌ txꞌotxꞌ tiꞌ. Jaꞌ naj jix bꞌabꞌi cꞌoli yawon an uva. 21Ey jun cꞌual jix yucꞌ yal teꞌ uva naj, catuꞌ jix qꞌueyel scꞌul naj yu. Jix yiꞌon el spichil naj yin, catuꞌ jix ey can pakꞌan naj yul jun na waꞌnebꞌil a yetoj kꞌap. 22Jaꞌ yet jix yilon naj Cam, smam naj Canaán, tol tꞌiran el naj Noé tuꞌ. Caw jix tzee naj yin smam tuꞌ, catuꞌ jix too yalon yabꞌ ebꞌ yuẍtaj tuꞌ scawanil. 23Jix cꞌal yabꞌ ebꞌ naj cawan tuꞌ xin, jix sjolom xicꞌnentej jun an sábana ebꞌ. Yintaj ebꞌ jix bꞌeytoj, yet jix apni oc ebꞌ bꞌey smam tuꞌ, catuꞌ jix spichon ey ebꞌ yetoj an. Txꞌoj bꞌey tꞌanantoj ebꞌ, yet watxꞌ cꞌam chi yil smimanil smam ebꞌ tuꞌ.
24Jaꞌ yet jix el sweyan naj Noé tuꞌ, jix yabꞌeni tzet jix yun naj Cam tuꞌ yin. 25Jix yalon naj jaxca tiꞌ:
¡Cꞌam ojabꞌ swatxꞌil chi elcan oc naj Canaán tiꞌ! ¡Maanil oj yun can oc naj bꞌey ebꞌ yuẍtaj tiꞌ! ẍi naj Noé tuꞌ.
26Catuꞌ jix yalon can naj Noé tuꞌ jaxca tiꞌ:
Yakꞌ ojabꞌ Jehová syaaxilal yibꞌan naj Sem, jaꞌ naj Canaán chi oc can ẍejabꞌoj naj.
27Iꞌle ojabꞌ a can naj Jafet yu Jehová; catuꞌ chi eecꞌal ecꞌ naj yul sconobꞌal naj Sem, jaꞌ naj Canaán chi oc can ẍejabꞌoj naj Jafet tuꞌ, ẍi naj Noé tuꞌ.
28Yet jix lawi ecꞌ jun miman yaax nabꞌ tuꞌ, 350 abꞌil to jix ecꞌ naj Noé. 29Ey 950 abꞌil skꞌinal naj yet jix cami.
Currently Selected:
Génesis 9: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
