Lucas 12

Jix Yaltej Jesús Yin Ebꞌ Ánima Caabꞌ Sat

1Jaꞌ yet junel, ecꞌal sbꞌisil smilal ebꞌ ánima jix yamcha oc scꞌatan Jesús. Chi stecꞌle xacꞌaltoj sbꞌa ánima yutol tuxa cꞌal chi nilili ecꞌ ebꞌ. Jix yalon Jesús sbꞌabꞌelal tet ebꞌ scuywom jaxca tiꞌ:

—Che yil cꞌal je bꞌa yu yich span ebꞌ Fariseo, jaꞌton scaabꞌ satil ebꞌ. 2Yutol masanil jantaj tzet majan ey tinaniꞌ, oj txeclo aoj. Yetoj jantaj tzet ewan cꞌuan yei, oj akꞌle otajnele eloj. 3Yuxan, masanil tzet jix je yal yin ewantajil, oj yabꞌ masanil ebꞌ ánima. Yetoj masanil tzet jix je ewan alne yul je txiquin, oj al-le el xol ánima yul-laj calle.

Asanne Ojabꞌ Tet Dios Chi Cu Xiwi

(Mateo 10:28-31)

4Jaꞌ jaex jex wamigo, chi wal ey jex, manche jex xiw tet ebꞌ chi skeꞌ yakꞌon cam je mimanil tiꞌ, yutol jaꞌ yet chi xew je cam yu ebꞌ, cꞌam junojxa tzet chi skeꞌ yunen ebꞌ je yin. 5Tol chi wal ey jex, mac tet smoo chex xiwi. Jaꞌ tet Dios jatuꞌ chex xiwi, jaꞌ yet chi xew slawi je yakꞌle cam yu, ey pax yipal jex yaontoj bꞌey syaꞌtajilal. Jaꞌton tet Dios smoo chex xiwi.

6Ilaꞌ noꞌ niẍtej tzꞌiquin tinaniꞌ, cꞌam yeloc apnoj noꞌ. Jocꞌon noꞌ chi skeꞌ kiꞌon yin caabꞌ niẍtej tumin. Jal pax Dios xin, ilbꞌil cꞌal noꞌ masanil yu. 7Jaex tiꞌ, yel miman je yeloc apnoj yintaj noꞌ. Jaꞌ xil je jolom bꞌisbꞌil yu Dios. Yuxan, manche jex xiwi.

Jaꞌ Ebꞌ Chi Alon Tol Yet Cristo Ebꞌ

(Mateo 10:32-33; 12:32; 10:19-20)

8Chi wal ey jex, yal cꞌal mac cꞌam chi qꞌuixwi yalon sattaj ánima tol wet an, jain Akꞌbꞌil Wopiso yu Dios xol ebꞌ ket animail tiꞌ an, oj wal oc ebꞌ wetoj an sattaj ebꞌ yángel Dios. 9Jal pax ebꞌ chi alon sattaj ánima tol man wetoj an, oj wal pax sattaj ebꞌ yángel Dios tol man wetoj pax ebꞌ an. 10Yal cꞌal mac chi alon junoj tzetyetal win an, jain Akꞌbꞌil Wopiso yu Dios xol ebꞌ ket animail tiꞌ an, eyto mimancꞌulal yin. Jal pax mac chi bꞌuchon Naj Santo Espíritu, jaꞌ jun tuꞌ xin, cꞌamxa mimancꞌulal yin.

11Jaꞌ yet oj jex iꞌletoj bꞌey snail sculto ebꞌ ket Israelal, ma yet oj jex iꞌletoj sattaj ebꞌ yaaw, manche je yiꞌ bꞌiscꞌulal yu tzet oj je yute je pajtzen tet ebꞌ. Manche je yiꞌ bꞌiscꞌulal yu tzet oj je yalaꞌ. 12Yutol jaꞌ yet oj jul stiempoal je yalon tuꞌ, jaꞌ Santo Espíritu oj akꞌon tzet watxꞌ oj je yalaꞌ, ẍi Jesús tet ebꞌ.

Caw Ey Smey Yu Ebꞌ Ey Sbꞌeomal

13Jaꞌ xol ebꞌ ánima tuꞌ, ey jun mactxequel jix alon tet Jesús jaxca tiꞌ:

—Jaach cuywam, al tet jun wuẍtaj an, tol chi yakꞌ niꞌoj wet yin jantaj tzet jix can yu cu mam, ẍi naj tet Jesús.

14Jix yalon pax Jesús tet naj jaxca tiꞌ:

—Wuẍtaj, ¿mac jix akꞌon wopiso woc je yilomaloj, catuꞌ chex jin waꞌnen eloj? ẍi Jesús tet naj.

15Catuꞌ jix yalon Jesús tet ebꞌ ánima tuꞌ jaxca tiꞌ:

—Chi cam je yabꞌeni, catuꞌ che teynen cꞌal je bꞌa. Yet watxꞌ cꞌam junoj tzetyetal comon cꞌal che yoche ocoj. Man yu oj tol miman tzet ey, ey jon, yuxan tzalacꞌulal ket yul yibꞌankꞌinal tiꞌ, ẍi Jesús.

16Catuꞌ jix yalontej jun skꞌaneal tiꞌ tet ebꞌ:

—Jaꞌ yet junel, ey jun winaj caw bꞌeom naj. Miman tzet awbꞌil yu jix el sat xꞌotxꞌ. 17Yuxan, jix snaꞌ naj jaxca tiꞌ: “¿Tzet la oj wute an? ¿Yutol cꞌamxa bꞌey watxꞌ oj jin cꞌubꞌa tzet awbꞌil wu oj wiꞌ tiꞌ an?” ẍi naj. 18Catuꞌ jix snaꞌon pax naj jaxca tiꞌ: A… tol oj wute jun tiꞌ an. Oj jin xuy ey wan jin cꞌunaꞌ tiꞌ an, catuꞌ oj jin waꞌnen wanojxa yel mimej oj wute an. Jatuꞌ oj jin yambꞌa tzet awbꞌil wu tiꞌ an, cꞌal masanil tzetyetal ey, ey jin an. 19Oj lawoj tuꞌ, oj walon yin jin pixan jaxca tiꞌ an: “Jaꞌ tinaniꞌ xin, miman tzet jix jin yambꞌa, caw miman tiempo oj jin kꞌanbꞌalne. Yuxan, chi skeꞌ chin xew tinaniꞌ, chi skeꞌ chin lowi, chi wuqꞌuen jantaj cꞌal chi woche. Chi skeꞌ wakꞌon tzalabꞌoj jin cꞌul an, jin chi catuꞌ oj waloni,” ẍi naj. 20Jix yalon pax Dios tet naj jaxca tiꞌ: “Jaach tiꞌ, caw cꞌam niꞌoj ja naꞌbꞌal. Jaꞌ yet jun akꞌbꞌal tiꞌ, oj jaach camoj. Jal pax jantaj tzet oj ja yambꞌa a tuꞌ, ¿mac oj iꞌon can cha naꞌ?” ẍi Dios tet naj. 21Jaxca ton jun winaj tuꞌ, queyton tuꞌ oj yun yeloc ebꞌ lalan syambꞌan sbꞌeomal yu yoc yetoj xꞌojli, ta cꞌam pax tzet lalan syambꞌan ebꞌ yin yet Dios, ẍi Jesús tet ebꞌ.

Jaꞌ Dios Chi Steyne Ebꞌ Yuninal Xa

(Mateo 6:25-34)

22Jix lawi jun tuꞌ, jix yalon Jesús tet ebꞌ scuywom jaxca tiꞌ:

—Chi wal ey jex xin, manche je yakꞌ bꞌiscꞌulal yu tzet chi yun yecꞌ tiempo je yu titiꞌ, yu tzet che loꞌ. Manche je yakꞌ bꞌiscꞌulal yu je pichil. 23Jaꞌ Dios chi akꞌon cu cawil. Oj yakꞌ pax tzet oj cu loꞌ. Jaꞌ jix akꞌon cu mimanil tiꞌ. Oj yakꞌ pax cu pichil, ¿ta man oj yakꞌ che naꞌ? 24Ilaꞌ tax noꞌ joo tinaniꞌ, cꞌam tzet awbꞌil yu noꞌ, cꞌam niꞌoj tzet chi sjatxꞌa noꞌ, catuꞌ chi syambꞌa noꞌ. Cꞌam scꞌunaꞌ noꞌ, cꞌam bꞌey watxꞌ chi scꞌubꞌa noꞌ niꞌoj tzetyetal. Jaꞌ Dios chi akꞌon masanil tzet chi sloꞌ noꞌ. Jaex tiꞌ, yel miman je yeloc apnoj yintaj noꞌ yul sat Dios. 25¿Ma ey junoj jex chi skeꞌ je yaon oc junojxa cꞌu yakꞌiloj je kꞌinal yu che yakꞌ bꞌiscꞌulal yin? 26Yuxan, ta cꞌam chi skeꞌ je waꞌnen wan tiꞌ, ¿tzet yuxan che yakꞌ bꞌiscꞌulal yu wanojxa tzetyetal xin?

27Ilaꞌ tzet chi yun ẍꞌibꞌ an xumac cꞌultaj tinaniꞌ. Jaꞌ an xumac tuꞌ, cꞌam chi mulna an, cꞌam chi mulna an tam wal chi skeꞌ xꞌalwi an, yuxan chi wal ey jex, jaꞌ naj rey Salomón, caxcꞌal caw watxꞌ yili naj yetoj spichil, ma apnoj yili jaxca an xumac teꞌ tuꞌ. 28Jaꞌ an xumac teꞌ tuꞌ, watxꞌ yili an tinaniꞌ, jaxa yet yecal, chi tzꞌaꞌ an yul jorna. Caxcꞌal jaxca tuꞌ chi yun slawi el an, jaꞌ Dios chi akꞌon swatxꞌil yili an tuꞌ. Jaex tiꞌ, yel xacꞌal oj yakꞌ je pichil. Ian cꞌam pax che yaoc je cꞌul yin Dios. 29Manche je yakꞌ miman bꞌiscꞌulal xin. Manche je yakꞌ bꞌiscꞌulal yu tzet che loꞌ, cꞌal yu tzet che yuqꞌueꞌ. 30Yutol jaꞌ ebꞌ man otajnenoj Dios, asan yin wan tuꞌ, bꞌey eyoc snaꞌbꞌal ebꞌ. Jaꞌ cu Mam Dios yotaj xa tol chi oc pax yopiso wan tuꞌ ku. 31Yuxan akꞌwej je yip je chaꞌon Dios je Yaawiloj. Ta che yun jaxca tuꞌ, oj akꞌle masanil wan tiꞌ ey jex.

Jaꞌ Tzetyetal Chi Cu Yambꞌa Satcan Jaxca Cu Bꞌeomal Yin Yet Dios

32Jaex tiꞌ, jaxca tol jin meꞌ je yei. Manche jex xiwi. Jaywanne jex toni, jaꞌ cu Mam Dios chi yoche chi oc cꞌal je Yaawiloj, yutol jaxca tuꞌ jix el yin scꞌul. 33Txonwej can el masanil je tzettaj yetal, catuꞌ che saꞌontoj stool tet ebꞌ mebꞌa. Jaxca ton tuꞌ oj je yute je waꞌnen scaẍail je tumin cꞌam bꞌakꞌin chi xilbꞌi eloj. Jaꞌ bꞌey satcan oj je yambꞌa wan jaxca je bꞌeomal tuꞌ. Jaꞌ wan tuꞌ, cꞌam bꞌakꞌin oj lawoj. Cꞌam junoj elkꞌom oj skeꞌ yapni yelkꞌanen tituꞌ. Yetoj pax oj, cꞌam pax noꞌ ii oj oc yin tituꞌ. 34Yutol, jaꞌ bꞌey chi cu yambꞌa cu bꞌeomal, jatuꞌ chi ka pax toj cu naꞌbꞌal.

Sowalil Listo Chi Kute Cu Bꞌa

35Caw listo che yute je bꞌa, jaxca junoj mactxequel eyoc spichil, tzejbꞌil pax stzejtebꞌal catuꞌ chi smajon sjul spatrón. 36Kꞌinaloj ey wan mooso lalan yechbꞌanen sjul spatrón jix bꞌet bꞌey junoj kꞌin nupil. Jaꞌ yet chi apni naj bꞌey sna, chi awi octoj yul sna, catuꞌ listo yeoc ebꞌ sjajon yin eymanil. Jaxca chi yute yechbꞌanen spatrón ebꞌ mooso tuꞌ, queytuꞌ che yute je bꞌa jaex tiꞌ. 37Jaꞌ ebꞌ smooso iquisto yet chi apni spatrón tuꞌ, caw watxꞌ yet ebꞌ. Caw yel chi wal ey jex, jaꞌ naj patrón tuꞌ, eyman oj sqꞌuexel sbꞌa, jaxa yakꞌle low yu ebꞌ smooso tuꞌ. Catuꞌ oj yakꞌon servil ebꞌ naj tuꞌ. 38Caxcꞌal chuman akꞌbꞌal, ma yet tuxa chi sajbꞌi yet chi apni, ta iquisto ebꞌ smooso tuꞌ yet chi apni, caw watxꞌ yet ebꞌ. 39Naꞌcha ojabꞌ el jun skꞌaneal tiꞌ je yu. Kꞌinaloj ey junoj elkꞌom chi oc elkꞌan yul sna junoj ánima. Kꞌinaloj ta yotaj jantaj hora chi jul jun elkꞌom tuꞌ, listo cꞌal yeoc naj steyneni, catuꞌ cꞌam chi ẍaꞌoc elkꞌom bꞌey sna tuꞌ. 40Yuxan, quey jex ojabꞌ tuꞌ. Listo che yute je bꞌa je majoni. Yutol jaꞌ yet jun tiempoal che naꞌ tol cꞌam chin jul an, jatuꞌ oj jin jul, jain Akꞌbꞌil Wopiso yu Dios xol ebꞌ ket animail tiꞌ an, ẍi Jesús tet ebꞌ scuywom tuꞌ.

Ebꞌ Moso Jijem, cꞌal Ebꞌ Penawom

41Jix skꞌanle naj Pedro tet Jesús jaxca tiꞌ:

—Jaach cuywam, ¿Asanne mi ey jon jix ja wal jun skꞌaneal tiꞌ, ma yu masanil ánima tiꞌ, yuxan jix ja walaꞌ? ẍi naj Pedro.

42Jix yalon Jesús tet ebꞌ jaxca tiꞌ:

—Kꞌinaloj ta ey junoj patrón tinaniꞌ. Ta ey junoj smooso jijem catuꞌ jelan pax oj, jaꞌton jun tuꞌ chi yaoc yopiso naj yibꞌan masanil ebꞌ yu steynele ebꞌ masanil, cꞌal yu yakꞌle sloꞌbꞌe ebꞌ junjuntaj el. ¿Mac wal txequel junoj ebꞌ mooso tuꞌ jijem che naꞌ? 43Jaꞌton naj lalan smulna jaxca chi yoche scꞌul spatrón tuꞌ yet oj juloj. Caw watxꞌ yet jun mooso tuꞌ. 44Caw yel chi wal ey jex, oj ale oc naj mooso tuꞌ yaawiloj yibꞌan jantaj tzet ey yul skꞌabꞌ yu naj patrón tuꞌ. 45Kꞌinaloj ta jaxca tiꞌ chi yun snaꞌon jun smooso tuꞌ tol man tocꞌal oj jul spatrón tuꞌ. Catuꞌ chi cꞌoli smakꞌon ebꞌ yet moosoal, cꞌal ebꞌ ix criadaeal. Catuꞌ asan cꞌal loꞌo chi yunne, cꞌal uqꞌue an. 46Jaꞌ yet jun cꞌual man echbꞌanebꞌil oj sjul spatrón naj mooso tuꞌ, jaꞌton yet tuꞌ oj jul naj. Junelne man yotaj oj naj ta jaꞌ yet jun txolan tuꞌ chi juli. Oj akꞌle syaꞌilal naj sicꞌlebꞌil yu naj patrón tuꞌ. Catuꞌ oj ale cantoj naj bꞌey eyecꞌ wan ebꞌ ma yaoc scꞌul yin Dios yu naj patrón tuꞌ.

47Kꞌinaloj ta ey junoj mooso yotaj tzet chi yoche scꞌul spatrón chi swaꞌne. Ta man pax listo oj chi yute sbꞌa, catuꞌ cꞌam chi sjije tzet chi yal spatrón tuꞌ. Jaꞌ jun mooso tuꞌ, caw miman syaꞌilal oj ẍaꞌ. 48Kꞌinaloj ta ey pax junojxa mooso man yotaj oj, catuꞌ chi swaꞌnen wan tzetyetal tol smoo chi yij tzꞌuum yu. Jaꞌ jun tuꞌ, txenne tzꞌuum oj yijaꞌ. Jaꞌ ebꞌ miman tzet akꞌbꞌil tet, miman tzet oj kꞌanle el tet ebꞌ. Yetoj ebꞌ miman tzet akꞌbꞌil yul skꞌabꞌ, sowalil miman pax tzet oj yakꞌ ebꞌ.

Ebꞌ Oj Yakꞌle A Jowal Syaꞌiloj Cꞌal Jesús

49Jain tiꞌ, jix jin jul yu waon oc jun tzetyetal jaxca junoj kꞌakꞌ bꞌey yul yibꞌankꞌinal tiꞌ. Caw chi woche tol lalanxa snusle jun tzetyetal jaxca kꞌakꞌ tuꞌ tinaniꞌ. 50Ey jun miman syaꞌilal oj jul wibꞌan an, jaxca tol oj jin akꞌle bautizar yetoj an. Caw ey jun jin miman cuscꞌulal tinaniꞌ, masantaꞌcꞌal oj yun jun tuꞌ. 51¿Ma yu wakꞌon watxꞌcꞌulal yul yibꞌankꞌinal tiꞌ, yuxan jix jin jul an, je naꞌoni? Caw yel cꞌamaj. Tol yu yoc poꞌolebꞌail yu ebꞌ ánima, yuxan jix jin jul an. 52Kꞌinaloj ey jowanoj ánima bꞌey jun na. Oxwan ebꞌ chi oc scajat wan cawan. Jaxa ebꞌ cawan chi oc scajat wan oxwan. Queytuꞌ oj yun ebꞌ ánima yet jun tiempoal lalan sjul tiꞌ. 53Ey ebꞌ mame oj oc scajatoj yuninal. Ey ebꞌ uninale oj oc scajatoj smam. Yetoj pax oj, ey ebꞌ txutxe oj oc scajatoj yuneꞌ. Ey ebꞌ yuneꞌ oj oc scajatoj xutx. Ey ebꞌ ix alibꞌe oj oc scajatoj yalibꞌ, ẍi Jesús tet ebꞌ.

Wan Txꞌoxbꞌanile Chi Txꞌoxon El Tzet Oj Juloj

54Jix yalon pax Jesús wanxa tiꞌ tet ebꞌ ánima tuꞌ:

—Jaꞌ yet che yiloni, tol chi tit asun bꞌey jun pacꞌ, che yalaꞌ: “Tol oj yakꞌ nabꞌ,” je chi. Yel ton che yalaꞌ, chi yakꞌ nabꞌ. 55Yetoj pax yet chi tit kaꞌeꞌ bꞌey sur, che yal pax jaxca tiꞌ: “Jaꞌ tinaniꞌ, oj kꞌaxna aoj,” je chi. Yel cꞌal che yalaꞌ, tol oj kꞌaxna aoj. 56Jal jex jaex tiꞌ, caw caabꞌ sat jex. Jelan jex ton je naꞌon el tzet oj jul yu wan che yil satcan tuꞌ, cꞌal sat txꞌotxꞌ tiꞌ. ¿Tzet yuxan cꞌam pax chi naꞌcha el je yu tzet utbꞌil yeoc jun tiempoal tiꞌ tinaniꞌ? ẍi Jesús tet ebꞌ.

Waꞌne Yeoc Yetoj Ja Cajat

57¿Tzet yuxan cꞌam che naꞌ tzetyetal watxꞌ yul sat Dios? 58Kꞌinaloj ta ey junoj mactxequel chach awten sattaj yaaw. Jaꞌ ojabꞌ yet lalan ja too yul bꞌe yetoj, cha wakꞌon ja wip ja waꞌnen ey yetoj, yet watxꞌ cꞌamxa chach yiꞌtoj sattaj yaaw tuꞌ. Yutol ta oj jaach apnoj sattaj yaaw tuꞌ, catuꞌ chach yaon oc naj yul skꞌabꞌ ebꞌ policía. Catuꞌ chach yiꞌontoj ebꞌ preso. 59Chi wal ey jex, ma jex jajle eloj masantaꞌcꞌal tzꞌajan che yakꞌ can masanil je multa.

Currently Selected:

Lucas 12: knj

Highlight

Copy