Lucas 8

Jaꞌ Ebꞌ Ix Ix Jix Colwa Yin Tzet Sowalil Chi Oc Yu Jesús

1Jix lawi tuꞌ xin, ecꞌal wan conobꞌlaj cꞌal wan aldealaj bꞌey jix ecꞌabꞌ Jesús. Yet jix ecꞌ yalon el skꞌane Dios xol-laj ánima, jix ecꞌ yal can el watxꞌ kꞌane xol-laj ebꞌ, tzet utbꞌil chi yun yoc Dios yin Yaawiloj ebꞌ. Jaꞌ ebꞌ lacawan ẍejabꞌ jix ecꞌ yetoj Jesús. 2Ey wan ebꞌ ix ix iꞌbꞌil el pena espíritu yin ebꞌ ix yu Jesús, cꞌal wanxa ebꞌ ix jix waꞌxi can scꞌul yu. Jaꞌ ebꞌ ix ix jix too yetoj Naj. Eyoc María, chi yij pax sbꞌi Magdalena xol ebꞌ. Jaꞌton ix bꞌey jix elcan jujwan pena espíritu yin yu Jesús. 3Ey jun ix chi yij sbꞌi Juana, ix yistil naj scaporal Herodes, chi yij sbꞌi naj yin Cuza. Ey pax jun ix chi yij sbꞌi Susana, yetoj jaywanxa ebꞌ ix chi colwa ebꞌ yin Jesús yetoj stzettaj yetal ebꞌ.

Skꞌaneal Jun Naj Txiom Tiriw

(Mateo 13:1-9; Marcos 4:1-9)

4Caw ey ánima jix tit bꞌey junjun conobꞌ yu jul yilon Jesús ebꞌ. Jaꞌ yet jix syambꞌan sbꞌa ebꞌ, jix yalontej Jesús jun skꞌaneal tiꞌ tet ebꞌ, jix yalon jaxca tiꞌ:

5—Ey jun winaj jix too txio tiriw. Jaꞌ yet lalan xion ey ixim tuꞌ, catuꞌ ey wan chi eyqꞌuey can yul bꞌe. Jaꞌ ixim tuꞌ, tucꞌal jix tecꞌletoj ixim. Catuꞌ jix ecꞌ sicꞌle a ixim yu noꞌ tzꞌiquin. 6Ey ixim xin, yibꞌanlaj saam chꞌen jix apni can ixim. Jaꞌ yet jix aol ixim, eyman jix tajeloj, yutol man chꞌacanoj txꞌotxꞌ txꞌotxꞌ yibꞌan chꞌen saam chꞌen tuꞌ. 7Ey ixim jix apni can xol qꞌuix. Tucꞌal jix qꞌueya ixim xol an yet jix chꞌibꞌa an qꞌuix tuꞌ. 8Ey pax ixim jix apni can bꞌey yaax txꞌotxꞌ. Jaꞌ yet jix chꞌibꞌa ixim, jix chꞌibꞌa masantaꞌcꞌal ey sjolom ixim yin ciento sbꞌakꞌ junjun, ẍi Jesús tet ebꞌ. Jaꞌ yet jix lawi yalontej jun skꞌaneal tiꞌ, catuꞌ jix yalon yin ipal jaxca tiꞌ:

—Jaꞌ wan tzet che yabꞌ tiꞌ, naꞌwejtej sicꞌlebꞌil, ẍi Jesús tet ebꞌ.

Jaꞌ Yopiso Wan Skꞌaneal Chi Yakꞌ Naꞌcha El Tiꞌ

(Mateo 13:10-17; Marcos 4:10-12)

9Jix skꞌanlen el ebꞌ scuywom tuꞌ tet Jesús, tzet yeloc apnoj jun skꞌaneal tuꞌ. 10Jix yalon tet ebꞌ jaxca tiꞌ:

—Lalan xꞌoxon Dios ey jex wan tzet cꞌam mac otajnen tiꞌ, yet watxꞌ chi naꞌcha el je yu tzet utbꞌil yeoc Dios yin Yaawiloj. Jal tet wanxa ánima xin, asan wan skꞌaneal yet txꞌoxbꞌanile chi waltoj tet ebꞌ. Yuxan, caxcꞌal chi yil ebꞌ junoj tzetyetal, chi can pax can ebꞌ jaxca tol cꞌam tzet chi yil ebꞌ. Yetoj pax oj, caxcꞌal chi yabꞌ ebꞌ, cꞌam cꞌal niꞌoj chi naꞌcha el yu ebꞌ.#Isaías 6:9.

Tzet Chi Yal Yeloc Apnoj Jun Skꞌaneal Naj Txiom Tiriw Tiꞌ

(Mateo 13:18-23; Marcos 4:13-20)

11Oj wal ey jex tzet chi yal yeloc apnoj jun skꞌaneal jix wal tiꞌ an. Jaꞌ ixim jinat tuꞌ, yechel skꞌane Dios. 12Jaꞌ ixim jinat jix apni can oc yul bꞌe, yechel ebꞌ ánima chi xew yabꞌen skꞌane Dios catuꞌ chi jul naj diablo yin. Chi jul yiꞌon el skꞌane Dios naj yin spixan ebꞌ, yet watxꞌ cꞌam chi yaoc scꞌul ebꞌ yin, catuꞌ cꞌam chi colcha ebꞌ yu. 13Jaꞌ ixim jinat jix apni can oc yibꞌan chꞌen saam chꞌen, yechel ebꞌ ánima chi chaꞌon abꞌen skꞌane Dios yin tzalacꞌulalil. Cꞌam pax stecꞌanil ebꞌ, txenne tiempo chi yaoc scꞌul ebꞌ yin. Yutol jaꞌ yet chi jul junoj porobꞌal yibꞌan ebꞌ, yin jun txolan chi meltzo ebꞌ yintaj junelxa. 14Jaꞌ ixim jix apni can oc xol qꞌuix, yechel ebꞌ chi abꞌen skꞌane Dios, jaxa yet chi bꞌey cꞌaltoj tiempo xin, miman tzet chi snaꞌ ebꞌ. Chi snaꞌ ebꞌ sbꞌeomal. Chi snaꞌ ebꞌ yet smimanil. Yu wan tuꞌ, chi etex el snaꞌbꞌal ebꞌ. Laan chi yun yeloc ebꞌ jaxca ixim tiriw cꞌam chi waꞌxi sjolom. 15Jal pax ixim jix eyqꞌuey bꞌey yaax txꞌotxꞌ xin, yechel ebꞌ chi chaꞌon abꞌen skꞌane Dios yin masanil scꞌul. Junelne chi yaoc ebꞌ yin scꞌul. Tecꞌan chi yute sbꞌa ebꞌ. Yuxan laan ebꞌ jaxca ixim tiriw ecꞌal sbꞌakꞌ chi yakꞌa.

Skꞌaneal Jun Tzejtebꞌal

(Marcos 4:21-25)

16Jaꞌ yet chi kaon oc cu tzejtebꞌal, cꞌam chi cu nobꞌa oc junoj tzetyetal yibꞌan, catuꞌ cꞌam chi ka pax octoj yalan txꞌat. Jaꞌ yibꞌan junoj tzetyetal naat eyaoj, jaꞌ tituꞌ chi cu bꞌatxbꞌa atoj, yet watxꞌ chi yil sajil jantaj ebꞌ chi octoj yul na. 17Jantaj tzet ewan cꞌuan yeoc tinaniꞌ, oj txeclo cꞌaltaꞌ aoj. Yetoj jantaj tzet cꞌubꞌabꞌil el tinaniꞌ, oj akꞌle otajnele eloj, masanil oj abꞌcha ocoj.

18Yuxan chi cam je yabꞌen tzet chi wal an. Yutol jaꞌ mac chi yoche chi naꞌcha el yu, oj akꞌle naꞌcha el yu ebꞌ. Jal ebꞌ cꞌam chi yoche chi naꞌcha el wan tiꞌ yu xin, jaꞌ niꞌoj tzet ian chi naꞌcha el yu ebꞌ, oj iꞌle xacꞌal ecꞌ tet ebꞌ, ẍi Jesús.

Xutx Jesús Yetoj Ebꞌ Yuẍtaj Naj

(Mateo 12:45-50; Marcos 3:31-35)

19Jaꞌ ix xutx Jesús yetoj cꞌal ebꞌ yuẍtaj, jix apni ebꞌ bꞌey eyecꞌoj. Jaxa jix yunne, ma skeꞌ yoctoj ebꞌ bꞌey eyecꞌ Naj tuꞌ, yutol witzꞌan yu ánima. 20Yuxan, ey jun jix alon tet Jesús jaxca tiꞌ:

—Jix jul ja txutx yetoj ebꞌ ja wuẍtaj stiꞌ na. Tol abꞌ chi yoche ebꞌ chi kꞌanabꞌ ja wetoj, ẍi ebꞌ, ẍi jun tet Jesús.

21Jix yalon Jesús tet ebꞌ eyecꞌ tituꞌ jaxca tiꞌ:

—Yal cꞌal mac chi abꞌen skꞌane Dios, ta chi sjije, jaꞌton ebꞌ tuꞌ jaxca tol jin txutx yeocoj, jaxca tol wuẍtaj yeocoj, ẍi Jesús tet ebꞌ.

Jun Miman Kaꞌeꞌ Cꞌal Jaꞌ Mar Jix Oc Tucan Yu Jesús

(Mateo 8:23-27; Marcos 4:35-41)

22Jaꞌ yet junel, jix oc Jesús yul jun barco yetoj ebꞌ scuywom. Catuꞌ jix yalon tet ebꞌ jaxca tiꞌ:

—Toonwej bꞌey junxa skꞌaxepal jaꞌ, ẍi Jesús tet ebꞌ.

Catuꞌ jix too ebꞌ. 23Jaꞌ yet lalan stoo ebꞌ tuꞌ, jix weya Jesús, eyman jix jul jun kaꞌeꞌ caw jow sicꞌlebꞌil. Jix cꞌoli ya pululoj jaꞌ. Jix octoj jaꞌ yul teꞌ. Ian jix pax ey teꞌ yich jaꞌ. 24Jix stenon el sweyan Jesús ebꞌ:

—Mamin, Mamin, tol lalan cu pax ey yich jaꞌ, ẍi ebꞌ tet Jesús. Jix a linan Naj, jix stenon oc tucan jun kaꞌeꞌ tuꞌ, cꞌal jaꞌ mar. Catuꞌ jix sjijen yoc tucanoj, tzꞌinini xacꞌal. 25Jix lawi tuꞌ xin, jix yalon Jesús tet ebꞌ scuywom tuꞌ jaxca tiꞌ:

—¿Tzet yuxan cꞌam che yaoc je cꞌul yin Dios? ẍi Jesús tet ebꞌ.

Tuxa cꞌal jix qꞌueya scꞌul ebꞌ yu sicꞌlebꞌil. Catuꞌ jix yalon ebꞌ jaxca tiꞌ:

—¿Tzet la yeoc jun winaj tiꞌ? Ilaꞌ chi sjije kaꞌeꞌ yetoj jaꞌ mar tzet chi yalaꞌ, ẍi ebꞌ.

Jun Winaj A Gadara Eyoc Pena Espíritu Yin

(Mateo 8:28-34; Marcos 5:1-20)

26Jix lawi jun tuꞌ, jix ecꞌ apnoj ebꞌ skꞌaxepal jaꞌ bꞌey yul yet Gerasa, bꞌey spacꞌanil Galilea. 27Jaꞌ yet jix apni Jesús stiꞌ jaꞌ, ey jun winaj a conobꞌ tituꞌ jix apni scꞌatan Jesús, eyxa tiempo yoc wan pena espíritu yin. Cꞌamxa chi yaoc spichil naj. Cꞌamxa chi yal scꞌul chi eyecꞌ bꞌey junoj na. Asan bꞌey camposanto eyecꞌoj. 28-29Jaꞌ yet jix yilon yin Jesús naj, jix ey kaan naj yajantaj Naj. Catuꞌ jix yalon Jesús tuꞌ tet wan pena espíritu yin naj tuꞌ tol chi el ebꞌ yin naj. Catuꞌ jix a yaw naj, jix yalon naj jaxca tiꞌ:

—Jaach Jesús, Scꞌaal jaach Dios, yel xacꞌal miman ja weloc apnoj. ¿Tzet ja walon ja wet win an? Chin kꞌanon ey jaach, man chin ja wetne, ẍi naj tet Jesús tuꞌ.

Ecꞌal el chi michꞌcha naj yu pena espíritu tuꞌ. Yuxan chi pixle ey naj yetoj cadena yu ánima, chi oc chꞌen yin yajan cꞌal yin skꞌabꞌ. Chi spixey ebꞌ yet watxꞌ cꞌam chi smakꞌ cam sbꞌa naj. Chi cꞌal nicꞌcha pax toj wan cadena tuꞌ yu naj. Chi iꞌle bꞌey naj yu wan pena espíritu tuꞌ bꞌey cusiltaj txꞌotxꞌ. 30Jix skꞌanle Jesús tet naj jaxca tiꞌ:

—¿Tzet ja bꞌi? ẍi Jesús tet naj.

—Legión#8:30 Legión chi yal yeloc apnoj tol ecꞌal. Legión sbꞌi junjun bꞌulan soldado Romano, sbꞌisil junjun bꞌulan tuꞌ oxebꞌ mil ma wajebꞌ mil soldado. jin bꞌi, ẍi naj.

Queytuꞌ jix yute yalon naj jaxca tiꞌ, yutol ecꞌal pena espíritu eyoc yin naj. 31Catuꞌ jix oc tean ebꞌ pena espíritu tet Jesús tol manche aletoj ebꞌ bꞌey xabꞌ cꞌam yich.* 32Jaꞌ bꞌey spacꞌanil jun wonan bꞌey eyecꞌ ebꞌ tituꞌ, ey wan noꞌ txitam lalan slowi. Yuxan jix skꞌanon ebꞌ pena espíritu tuꞌ tet Jesús, tol chi jajle can to ebꞌ yin noꞌ txitam tuꞌ. Jix jajle cantoj ebꞌ yin noꞌ yu Jesús. 33Yuxan jix elcan ebꞌ yin naj tuꞌ. Jaꞌ yin noꞌ txitam jix toocan ebꞌ. Yuxan jix el noꞌ sat pacꞌan tuꞌ, catuꞌ jix ey apnoj noꞌ xol jaꞌ mar. Jix jiꞌwi eytoj masanil noꞌ xol jaꞌ tuꞌ, catuꞌ jix cam noꞌ.

34Jaꞌ yet jix yilon ebꞌ yilomal noꞌ tuꞌ tzet jix yun noꞌ, caw jix xiwcan a ebꞌ sicꞌlebꞌil. Jix too ebꞌ yalon el xol conobꞌ, cꞌal bꞌey yinlaj conobꞌ tuꞌ. 35Yuxan jix tit ánima yilon jun tzet jix yun tuꞌ. Jaꞌ yet jix apni ebꞌ bꞌey eyecꞌ Jesús tuꞌ, jix yilon ebꞌ, tol chotan ey naj bꞌey jix el ebꞌ pena espíritu tuꞌ. Eyxa oc spichil naj. Watxꞌ xa scꞌul naj eyoc pena espíritu yin tuꞌ. Yuxan jix xiwa ebꞌ sicꞌlebꞌil. 36Jaꞌ ebꞌ jix ilon jun tzet jix el yunen Jesús tuꞌ, jaꞌ ebꞌ jix alon tet wanxa ebꞌ jix apni ilon tuꞌ, tzet jix yun swaꞌxi scꞌul naj bꞌey jix el ebꞌ pena espíritu tuꞌ. 37Yuxan, jaꞌ masanil ánima yul yet Gerasa tuꞌ, jix skꞌanle ebꞌ tet Jesús, tol chi sbꞌosel sbꞌa Naj yul slugar ebꞌ tuꞌ, yutol caw chi xiw ebꞌ. Catuꞌ jix octoj Naj yul teꞌ barco tuꞌ yu spaxtoj. 38Jaꞌ naj bꞌey jix elcan ebꞌ pena espíritu tuꞌ, jix skꞌan oc tzajan sbꞌa naj yintaj Jesús. Ma pax chaꞌletoj Naj. Jix yal Jesús tet naj jaxca tiꞌ, tol chi can naj bꞌey jun lugar tuꞌ:

39—Paxan bꞌey ja na. Cha walaꞌ jantaj tzet jix el yunen Dios ja win, ẍi Jesús tet naj.

Jix too cancan naj tuꞌ xin. Jix yal naj tet masanil ebꞌ yul jun conobꞌ tuꞌ tzet jix el yunen Jesús yin naj.

Ix Scutzꞌin Naj Jairo Yetoj Jun Ix Ix Jix Mitxꞌon Stiꞌ Spichil Jesús

(Mateo 9:18-26; Marcos 5:21-43)

40Yet jix pax ecꞌ Jesús bꞌey junxa skꞌaxepal jaꞌ bꞌey jix tita. Jaꞌ yet jix ecꞌ apnoj tuꞌ, jix tzala masanil ebꞌ ánima tituꞌ yutol caw echbꞌanebꞌil xacꞌal Jesús yu ebꞌ. 41Ey jun naj yaawil snail sculto ebꞌ Israel tituꞌ, Jairo sbꞌi naj. Jix apni scꞌatan Jesús, catuꞌ jix ey kaan yajantaj. Jix oc tean yin Jesús, tol chi too yetoj bꞌey sna. 42Yutol jaꞌ jun qꞌuetxan scutzꞌin, tuxa chi cam ix. Ey mi lacawebꞌoj abꞌil skꞌinal ix scutzꞌin naj tuꞌ. Jaꞌ yet jix too Jesús yetoj naj bꞌey sna tuꞌ, ecꞌal ánima jix too yetoj. Chi switzꞌle xacꞌal sbꞌa ebꞌ stoo bꞌululoj yetoj.

43Jaꞌ xol ebꞌ ánima tuꞌ, ey jun ix ix eyxam lacawebꞌoj abꞌil ian cꞌal chi cam ix yu sbꞌisbꞌal xꞌaaw ix chi eyi. Jix lawi el masanil stzettaj yetal ix tet ebꞌ anwam, cꞌam cꞌal niꞌoj jix waꞌxi scꞌul ix yu ebꞌ. 44Yuxan jix apni ix yintaj Jesús, jix oc mitxꞌan ix yin stiꞌ spichil naj. Jaꞌ yet jix oc mitxꞌan ix yin stiꞌ spichil naj, catuꞌ jix oc tucan yey sbꞌisbꞌal xꞌaaw ix ix tuꞌ.

45Jix skꞌanlen Jesús tet ebꞌ ánima tuꞌ jaxca tiꞌ:

—¿Mactxequel jun jix oc mitxꞌan skꞌabꞌ win an? ẍi Jesús.

Jix yal masanil ebꞌ, tol cꞌam mac jix oc mitxꞌan skꞌabꞌ yin. Catuꞌ jix yalon naj Pedro yetoj wanxa ebꞌ yet cuywomal tuꞌ tet Jesús jaxca tiꞌ:

—Jaach Cuywam, caw chi switzꞌ sbꞌa ánima ja win yet chi cu bꞌeyi. Ecꞌal ebꞌ chi stenoc sbꞌa ja win, chi to wal ja kꞌanlen pax oj: “¿Mac jix oc mitxꞌan skꞌabꞌ win an?” ja chi pax oj, ẍi ebꞌ tet Jesús.

46Catuꞌ jix yalon Jesús tuꞌ:

—Ey jun mac jix oc mitxꞌan win an. Wotaj an, tol jix waꞌxi can scꞌul yu wipal an, ẍi Jesús.

47Jaꞌ yet jix yilon ix ix tuꞌ, tol ma skeꞌ yewbꞌan el sbꞌa ix xol ánima tuꞌ, caw jix bꞌilwi a ix yu xiwcꞌulal, jix apni ix scꞌatan Jesús. Jix ey kaan ix yajantaj. Jix yalon el ix sattaj masanil ebꞌ ánima tuꞌ, tzet yuxan jix oc mitxꞌan ix yin Jesús. Jix yalon ix tzet jix yun swaꞌxi scꞌul ix. 48Yuxan jix yal Jesús tet ix jaxca tiꞌ:

—Txo ix, jix waꞌxi can ja cꞌul wu an, yutol jix ja waoc ja cꞌul win an. Yuxan, paxan yin tzalacꞌulal, ẍi Jesús tet ix.

49Lalanto yalon Jesús tet ix jaxca tuꞌ, ey jun mactxequel speto bꞌey sna naj Jairo tuꞌ, jix yalon tet naj jaxca tiꞌ:

—Jaꞌ ix ja cutzꞌin tuꞌ, jix cam ix. Tuxa cꞌal chi yetne sbꞌa Naj cuywam tiꞌ stoo yiloni, ẍi ebꞌ tet naj Jairo tuꞌ.

50Jaxa yet jix yabꞌen Jesús jun tuꞌ, jix yalon tet naj jaxca tiꞌ:

—Manche jaach okꞌi. Asan tol cha waoc ja cꞌul yin Dios, oj waꞌxoj can scꞌul ix ja cutzꞌin tuꞌ, ẍi Jesús tet naj.

51Jaꞌ yet jix apni ebꞌ bꞌey sna naj, ma chaꞌle octoj ebꞌ ánima yu Jesús yul na tuꞌ. Asanne Pedro, Jacobo cꞌal Juan yetoj smam xutx ix unin tuꞌ jix ẍaꞌoctoj Jesús tuꞌ yetoj. 52Tuxa cꞌal chi nilili ánima yokꞌ yu ix. Catuꞌ jix yalon Jesús tuꞌ jaxca tiꞌ:

—Manche jex okꞌi. Jaꞌ ix unin tiꞌ, man camnaj oj ix, asan tol chi weyi, ẍi Jesús tet ebꞌ.

53Tucꞌal jix tzeewi a ebꞌ, yutol yotaj xa ebꞌ tol camnajxa ix. 54Jix lawi tuꞌ xin, jix oc mitxꞌan Jesús yin skꞌabꞌ ix tuꞌ. Catuꞌ jix yalon Naj yin ipal jaxca tiꞌ:

—Txo kꞌopo, aan linanoj, ẍi Jesús.

55Eyman jix pitzcꞌu a ix. Jix a linan ix tuꞌ. Catuꞌ jix yalon Jesús tol chi akꞌle sloꞌbꞌe ix. 56Caw jix qꞌueya scꞌul smam xutx ix yet jix yilon ebꞌ. Jix yalon Jesús tet ebꞌ tuꞌ, tol cꞌam ojabꞌ junoj mactxequel bꞌey chi yal ebꞌ tzet jix yun spitzcꞌu a ix.

Currently Selected:

Lucas 8: knj

Highlight

Copy