San Lucas 12

Ma̱cꞌaꞌ naru xba̱nunquil chi mukmu chi incꞌaꞌ ta ta̱naꞌekꞌ

1Nak yo̱queb chi chꞌutla̱c li qꞌuila mil chi tenamit, yo̱queb chixtiquisinquil ribeb. Li Jesús qui-oc chi a̱tinac riqꞌuineb lix tzolom xbe̱n cua ut quixye: —Me̱ba̱nu joꞌ nequeꞌxba̱nu laj fariseo. Aꞌaneb aj caꞌ pacꞌal u. 2Ma̱cꞌaꞌ naru na-uxman chi mukmu chi incꞌaꞌ ta ta̱cꞌutu̱nk. Ma̱cꞌaꞌ cuan chi mukmu chi incꞌaꞌ ta ta̱naꞌekꞌ. 3Ma̱cꞌaꞌ naru nayeman saꞌ cab chi mukmu chiru kꞌojyi̱n chi incꞌaꞌ ta ta̱e̱lk resil chi cutanquil. Ut ma̱cꞌaꞌ naru nayeman chi hasbanbil saꞌ cab chi incꞌaꞌ ta ta̱abi̱k resil yalak bar.

Caꞌaj cuiꞌ li Dios tento xxucuanquil ru

4Ex cuami̱g, la̱in ninye e̱re nak mexxucuac chiruheb li ani teꞌraj camsi̱nc e̱re xban nak ma̱cꞌaꞌ naru teꞌxba̱nu riqꞌuin le̱ ra̱m. 5La̱in tinye e̱re ani li tento te̱xucua ru. Chexucua̱k ru li Dios li naru ta̱risi xyuꞌam li junju̱nk ut cuan xcuanquil chixtaklanquil li a̱mej saꞌ xbalba. Aꞌan li tento te̱xucua ru. 6¿Ma incꞌaꞌ ta biꞌ nacꞌayi̱c o̱b chi tzentzeyul chi cuib centavo? Kꞌaxal cubenak xtzꞌak, abanan ma̱ jun reheb aꞌan nasach saꞌ xchꞌo̱l li Dios. 7Joꞌcan ajcuiꞌ li rismal le̱ jolom ajlanbileb chixjunil xban li Dios. Joꞌcan nak mexxucuac chiruheb li xicꞌ nequeꞌiloc e̱re xban nak la̱ex kꞌaxal terto e̱tzꞌak chiruheb nabal chi tzentzeyul. 8La̱in tinye e̱re nak li ani naxye chiruheb li tenamit nak niquinixpa̱b, la̱in tinye chiruheb lix ángel li Dios nak aꞌan cualal incꞌajol. 9Ut li ani ta̱tzꞌekta̱na̱nk cue chiruheb li tenamit, la̱in tintzꞌekta̱na ajcuiꞌ aꞌan chiruheb lix ángel li Dios. 10Li ani ta̱hobok cue la̱in li Cꞌajolbej, ta̱cuyekꞌ xma̱c xban li Dios. Abanan li ani ta̱majecua̱nk re li Santil Musikꞌej incꞌaꞌ ta̱cuyekꞌ xma̱c. 11Nak texcꞌamekꞌ chiruheb li nequeꞌtaklan saꞌ li cab li nequeꞌxchꞌutub cuiꞌ ribeb laj judío, malaj ut chiruheb laj rakol a̱tin ut chiruheb li cuanqueb saꞌ xcuanquil, incꞌaꞌ yo̱kex chixcꞌoxlanquil li cꞌaꞌru texsume̱nk cuiꞌ malaj ut li cꞌaꞌru te̱ye, 12xban nak li Santil Musikꞌej tixcꞌutbesi che̱ru saꞌ li ho̱nal aꞌan chanru texsume̱nk cuiꞌ, chan li Jesús.

Incꞌaꞌ us nak junes li kabiomal takacꞌoxla

13Jun li cui̱nk quia̱tinac chak saꞌ xya̱nkeb li qꞌuila tenamit ut quixye re li Jesús: —At tzolonel, ye re li cuas nak xjachak li jun cablal li quicanaba̱c chokꞌ ke ut xqꞌuehak cue li joꞌ qꞌuial tintzꞌak la̱in, chan. 14Aꞌut li Jesús quixye re: —At cui̱nk, la̱in incꞌaꞌ xakabanbilin chi rakoc a̱tin saꞌ e̱be̱n chi moco xakabanbilin chixjachinquil le̱ jun cablal.— 15Ut quixye ajcuiꞌ reheb chixjunileb li cuanqueb aran: —Qꞌuehomak retal li cꞌaꞌru te̱ba̱nu. Incꞌaꞌ yo̱kex chixrahinquil ru li biomal, xban nak moco riqꞌuin ta kabiomal yoꞌyo̱co, chan. 16Ut quixye ajcuiꞌ jun li jaljo̱quil ru a̱tin reheb. Quixye: —Cuan jun li cui̱nk biom. Cuan jun xchꞌochꞌ cha̱bil ut nabal li acui̱mk na-el chi saꞌ. 17Qui-oc chixcꞌoxlanquil ut quixye saꞌ xchꞌo̱l, “¿Cꞌaꞌru tinba̱nu? Ma̱cꞌaꞌ chic xnaꞌaj li ru li cuacui̱mk”, chan. 18Ut quixye, “Ninnau cꞌaꞌru tinba̱nu. Tinpoꞌ li rochochil li ru li cuacui̱mk li cuanqueb. Ut tinyi̱b chic jalan ni̱nk chokꞌ re̱kaj. Ut chi saꞌ aꞌan tinxoc chixjunil li ru li cuacui̱mk joꞌ ajcuiꞌ chixjunil li cꞌaꞌru cuan cue.” 19Ut tinye: “Us xak cue. Cuan nabal cꞌaꞌru cue xocxo inban re tinnumsi nabal chihab. Anakcuan tinhila̱nk, tincuaꞌak, tin-ucꞌak, ut ta̱sahokꞌ saꞌ inchꞌo̱l”, chan. 20Abanan li Dios quixye re, “Abi, at jip aj cui̱nk. Chiru a kꞌojyi̱n aꞌin tatca̱mk. Ut chixjunil li xocxo a̱ban, ¿ani aj e ta̱cana̱k cuiꞌ?” 21La̱in ninye e̱re: joꞌcaꞌin naxcꞌul li naxcꞌu̱la xbiomal saꞌ ruchichꞌochꞌ ut riqꞌuin li Dios ma̱cꞌaꞌ xbiomal, chan li Jesús.

Me̱cꞌoxla chanru nak te̱numsi li cutan junju̱nk

22Ut li Jesús quixye reheb lix tzolom: —Mixic e̱chꞌo̱l chixcꞌoxlanquil chanru nak te̱numsi li cutan junju̱nk, chi moco riqꞌuin li cꞌaꞌru te̱tzaca chi moco riqꞌuin lix tikibanquil e̱rib. 23Li kayuꞌam, aꞌan kꞌaxal lokꞌ chiru li katzacae̱mk. Ut li katibel, aꞌan kꞌaxal lokꞌ chiru li kakꞌ. 24Cheqꞌuehak retal li xul li nequeꞌrupupic chiru choxa. Eb aꞌan incꞌaꞌ nequeꞌau, chi moco nequeꞌkꞌoloc, chi moco nequeꞌxxoc xcuaheb chi moco cuan xcꞌu̱lanquil xtzacae̱mkeb. Abanan li Dios naxqꞌue xtzacae̱mkeb. ¿Ma tojaꞌ ta chic la̱ex incꞌaꞌ tixqꞌue e̱tzacae̱mk? 25¿Ani e̱re la̱ex ta̱ru̱k tixtik ru lix yuꞌam usta naxtacuasi rib xcꞌoxlanquil? 26Cui incꞌaꞌ nequexru xba̱nunquil li cꞌaꞌak re ru aꞌin, ¿cꞌaꞌut nak nequetacuasi e̱rib chixcꞌoxlanquil? 27Qꞌuehomak retal li utzꞌuꞌuj chanru nak nequeꞌqꞌui chi incꞌaꞌ nequeꞌcꞌanjelac chi moco nequeꞌquemoc. Aꞌut la̱in tinye e̱re, usta cꞌajoꞌ xchakꞌal ru lix tikibanquil laj Salomón, abanan incꞌaꞌ quixtau xchakꞌal ru li utzꞌuꞌuj aꞌin. 28Ut cui li Dios naxqꞌue lix chꞌinaꞌusal li pim li cuan junpa̱t ajcuiꞌ ut cuulaj qꞌuebilak saꞌ xam, ¿ma tojaꞌ ta chic la̱ex incꞌaꞌ textikib? La̱ex incꞌaꞌ nequexpa̱ban chi tzꞌakal. 29Joꞌcan ut nak incꞌaꞌ yo̱k e̱cꞌaꞌux chirix le̱ cua e̱rucꞌa. 30Le̱ yucuaꞌ li cuan saꞌ choxa naxnau li cꞌaꞌru nequeraj ru. Li incꞌaꞌ nequeꞌxpa̱b li Dios, caꞌaj cuiꞌ lix tzacae̱mkeb nequeꞌxcꞌoxla. 31Abanan la̱ex te̱sicꞌ lix nimajcual cuanquilal li Dios ut chixjunil li cꞌaꞌak re ru aꞌin talajqꞌuehekꞌ e̱re chokꞌ xtzꞌakob.

Qꞌuehomak e̱chꞌo̱l chirix li biomal cuan saꞌ choxa

32Mexxucuac ex cualal incꞌajol. Usta incꞌaꞌ qꞌuihex, abanan le̱ yucuaꞌ cuan saꞌ choxa cꞌojcꞌo xchꞌo̱l chixqꞌuebal e̱re lix nimajcual cuanquilal. 33Cꞌayihomak li cꞌaꞌru cuan e̱re ut sihomak reheb li ma̱cꞌaꞌ cuan reheb re nak cua̱nk e̱biomal saꞌ choxa. Aran incꞌaꞌ na-oc laj e̱lkꞌ chi elkꞌac chi moco namaxen. Qꞌuehomak e̱chꞌo̱l chirix li biomal li incꞌaꞌ na-osoꞌ. 34Joꞌcan nak chenauhak nak bar cuan cuiꞌ le̱ biomal, aran ajcuiꞌ cua̱nk le̱ cꞌaꞌux.

Yoꞌon cua̱nkex chiroybeninquil lix cꞌulunic li Ka̱cuaꞌ

35Checauresihak e̱rib. Yo̱kex chiroybeninquil li Ka̱cuaꞌ. Chanchanakex li mo̱s li lochlo xxam ut yo̱ chiroybeninquil lix patrón. 36Chanchanakex li mo̱s li yo̱queb chiroybeninquil lix patroneb nak ta̱sukꞌi̱k chak saꞌ junak sumla̱c. Nak tixtochꞌ li puerta, saꞌ junpa̱t teꞌxte chiru. 37Us xak reheb li mo̱s li yo̱queb chiroybeninquil lix patroneb. Nak ta̱cuulak li patronej, tixtauheb chi ajo̱queb ru. Relic chi ya̱l ninye e̱re li patronej tixcauresi rib ut tixchunubeb lix mo̱s saꞌ me̱x ut aꞌan ajcuiꞌ ta̱qꞌuehok re lix tzacae̱mkeb. 38Us xak reheb li mo̱s li yo̱keb chiroybeninquil lix patrón, usta tuktu kꞌojyi̱n malaj ut sake̱uc re ta̱cuulak. 39Cheqꞌuehak retal aꞌin: Cui ta naxnau li yucuaꞌbej saꞌ li cab jokꞌe ho̱nal re li kꞌojyi̱n tol-e̱lk laj e̱lkꞌ, ta̱yoꞌlek raj ut incꞌaꞌ raj tixcanab chi elkꞌac li cꞌaꞌru cuan saꞌ li rochoch. 40Joꞌcan ajcuiꞌ la̱ex yoꞌon cua̱nkex chi oybeni̱nc xban nak incꞌaꞌ nequenau jokꞌe ho̱nal tincuulak la̱in li Cꞌajolbej. Tincuulak chi ma̱cꞌaꞌ saꞌ e̱chꞌo̱l, chan li Jesús. 41Laj Pedro quixye re li Jesús: —At Ka̱cuaꞌ, ¿ma caꞌaj cuiꞌ ke la̱o xaye li jaljo̱quil ru a̱tin aꞌan, malaj ut reheb ajcuiꞌ chixjunileb li tenamit?— 42Ut li Ka̱cuaꞌ quixye re: —Li mo̱s li cuan xnaꞌleb ut cha̱bil, aꞌan li ta̱qꞌuehekꞌ xcuanquil xban lix patrón saꞌ xbe̱neb li rech mo̱sil. Aꞌan chic ta̱qꞌuehok re xtzacae̱mkeb saꞌ x-o̱ril. 43Us xak re li mo̱s li yo̱k chixba̱nunquil lix cꞌanjel saꞌ xya̱lal nak ta̱cꞌulu̱nk lix patrón. 44Relic chi ya̱l tinye e̱re nak li patrón aꞌan, tixkꞌaxtesi sa rukꞌ chixjunil lix jun cablal. 45Abanan cui li mo̱s aꞌan incꞌaꞌ us lix naꞌleb, tixye saꞌ xchꞌo̱l, “Lin patrón ta̱ba̱yk chi cꞌulu̱nc”. Ut ta̱oc chixsacꞌbaleb li rech mo̱sil joꞌ cui̱nk joꞌ ixk ut ta̱oc chi cuaꞌac, chi ucꞌac ut chi cala̱c. 46Ma̱cꞌaꞌak saꞌ xchꞌo̱l nak ta̱cꞌulu̱nk lix patrón. Ut lix patrón tixqꞌue chixtojbal rix lix ma̱c ut tixtakla saꞌ xya̱nkeb li incꞌaꞌ useb xnaꞌleb. 47Li mo̱s li naxnau cꞌaꞌru naraj lix patrón ut chi ti̱c ma̱cꞌaꞌ naxba̱nu, li jun aꞌan ta̱saqꞌuekꞌ chi cau. 48Abanan li mo̱s li incꞌaꞌ naxba̱nu li us xban nak incꞌaꞌ naxnau cꞌaꞌru naraj lix patrón, li jun aꞌan tixcꞌul ajcuiꞌ xtojbal xma̱c. Abanan caꞌchꞌin ajcuiꞌ chiru li tixcꞌul li naxnau li cꞌaꞌru naraj lix patrón. Li ani naxnau xya̱lal, mas cuiꞌchic nabal li i̱k cuan saꞌ xbe̱n. Ut li ani cuan xnaꞌleb chi us, mas cuiꞌchic li i̱k cuan saꞌ xbe̱n chiru li jun li ma̱cꞌaꞌ xnaꞌleb, chan.

Nacuan chꞌaꞌajquilal nak junak naxpa̱b li Cristo

49Li Jesús quixye ajcuiꞌ: —Chanchan li xinqꞌue xam saꞌ ruchichꞌochꞌ nak xinchal la̱in xban nak saꞌ incꞌabaꞌ la̱in nabal li chꞌaꞌajquilal ta̱cua̱nk. Nacuaj ta ac xnumeꞌ li chꞌaꞌajquilal aꞌin. 50Abanan tento tincꞌul jun li cubi haꞌ xbe̱n cua. Ut li cubi haꞌ, aꞌan li nimla raylal li tincꞌul. Ut yo̱kin chiroybeninquil li ho̱nal aꞌan chi ra saꞌ inchꞌo̱l toj ta̱cuulak xkꞌehil nak ta̱cꞌulma̱nk. 51Ma̱re la̱ex nequecꞌoxla nak junes tuktu̱quil usilal xincꞌam chak saꞌ ruchichꞌochꞌ. Incꞌaꞌ. Ta̱cua̱nk ajcuiꞌ nabal li chꞌaꞌajquilal. 52Chalen anakcuan incꞌaꞌ chic sa teꞌcua̱nk li ju̱nk cabal saꞌ rochocheb xban nak cuan li teꞌpa̱ba̱nk cue ut cuan incꞌaꞌ. Ma̱re cuan o̱b chi cristian saꞌ li jun cabal. Oxib xicꞌ teꞌril li cuib chic. Ut li cuib xicꞌ teꞌril li oxib chic. 53Li yucuaꞌbej xicꞌ ta̱ril li ralal, ut li alalbej xicꞌ ta̱ril lix yucuaꞌ. Li naꞌbej xicꞌ ta̱ril lix coꞌ ut li coꞌbej xicꞌ ta̱ril lix naꞌ. Ut li naꞌbej xicꞌ ta̱ril li ralib ut li alibej xicꞌ ta̱ril lix naꞌ lix be̱lom.— 54Li Jesús quixye ajcuiꞌ reheb li qꞌuila tenamit: —Nak nequeril nak yo̱ chi cha̱lc li chok bar na-oc cuiꞌ li sakꞌe, nequeye, “Ho̱n naxqꞌue hab”, chanquex. Ut ya̱l ajcuiꞌ nak naxqꞌue li hab. 55Ut joꞌcan ajcuiꞌ nak nachal li ikꞌ saꞌ li sur. Nequeye, “Tik ru li cutan tixqꞌue anakcuan,” chanquex. Ut ya̱l ajcuiꞌ nak naxqꞌue li tik. 56La̱ex aj caꞌ pacꞌal u. Nequenau xqꞌuebal retal ru li choxa ut li ruchichꞌochꞌ. Abanan caꞌaj cuiꞌ aꞌan nequenau rilbal. Incꞌaꞌ nequeqꞌue retal li yo̱ chi cꞌulma̱nc saꞌ eb li cutan aꞌin. 57¿Cꞌaꞌut nak incꞌaꞌ nequeqꞌue retal cꞌaꞌru li us te̱ba̱nu? 58Nak yo̱quex chi xic riqꞌuin laj rakol a̱tin, yi̱bomak ru le̱ chꞌaꞌajquil saꞌ junpa̱t riqꞌuin li xicꞌ na-iloc a̱cue nak toj ma̱jiꞌ nequexcuulac. Cui incꞌaꞌ nacacꞌam a̱cuib saꞌ usilal chi junpa̱t, laj rakol a̱tin tatxtakla sa tzꞌalam. 59La̱in ninye a̱cue nak incꞌaꞌ tat-e̱lk aran cui incꞌaꞌ ta̱toj chixjunil li joꞌ qꞌuial teꞌxpatzꞌ a̱cue, chan li Jesús.

Currently Selected:

San Lucas 12: kek

Highlight

Copy