San Lucas 2

Joꞌcaꞌin nak quiyoꞌla li Jesús

1Saꞌ eb li cutan aꞌan li acuabej César Augusto quixqꞌue jun li chakꞌrab re nak chixjunileb li tenamit teꞌajla̱k ut teꞌxqꞌue xcꞌabaꞌeb chi tzꞌi̱ba̱c.#Saꞌ li versículo 2:1 saꞌ eb li cutan aꞌan eb laj Roma, aꞌaneb li kꞌaxal nim xcuanquileb. Eb aꞌan queꞌnumta saꞌ xbe̱neb chixjunileb li cuanqueb saꞌ ruchichꞌochꞌ. Li tzꞌakal acuabej quicuan saꞌ li tenamit Roma. Eb laj Roma queꞌxye César re li acuabej aꞌan. Cuanqueb laj Roma chi takla̱nc yalak bar saꞌ ruchichꞌochꞌ. Eb li nequeꞌcꞌamoc be saꞌ xya̱nkeb laj judío cuanqueb rubel xcuanquileb laj Roma. 2Aꞌin li xbe̱n sut nak queꞌxtzꞌi̱ba xcꞌabaꞌeb li tenamit. Aꞌan quicꞌulman nak cua̱nk laj Cirenio chi takla̱nc saꞌ li naꞌajej Siria. 3Chixjunileb queꞌco̱eb xqꞌuebaleb xcꞌabaꞌ chi tzꞌi̱ba̱c. Ac saꞌ xtenamiteb li junju̱nk queꞌco̱eb chixtzꞌi̱banquileb lix cꞌabaꞌ. 4Laj José qui-el saꞌ li tenamit Nazaret li cuan saꞌ xcue̱nt Galilea ut co̱ Belén li cuan xcue̱nt Judea. Aꞌan xtenamit li rey David. Aran co̱ xban nak aꞌan xcomoneb li ralal xcꞌajol laj David. 5Aran quixqꞌue xcꞌabaꞌ chi tzꞌi̱ba̱c rochben lix María li ac tzꞌa̱manbil xban. Lix María ac yaj aj ixk. 6Nak ac cuanqueb aran Belén quicuulac xkꞌehil nak ta̱yoꞌla̱k lix cꞌulaꞌal. 7Ut quiyoꞌla li xbe̱n xcꞌulaꞌal, quixlan saꞌ tꞌicr ut quixyocob saꞌ xnaꞌaj xcuaheb li cuacax xban nak ma̱cꞌaꞌ xnaꞌajeb saꞌ eb li ochoch.

Nak queꞌrabi resil lix yoꞌlajic li Jesús, eb laj ilol xul queꞌco̱eb chixlokꞌoninquil

8Nachꞌ riqꞌuin li tenamit Belén cuanqueb aj ilol xul yo̱queb chixcꞌacꞌalenquil lix queto̱mk chi kꞌek. 9Ma̱cꞌaꞌ saꞌ xchꞌo̱leb nak xaka̱mil jun x-ángel li Ka̱cuaꞌ chiruheb. Ut quisakenoꞌ chi xjun sutam li cuanqueb cuiꞌ. Ut eb laj ilol xul cꞌajoꞌ nak queꞌxucuac. 10Abanan li ángel quixye reheb: —Mexxucuac xban nak la̱in xinchal xyebal e̱re jun cha̱bil esilal. Aꞌin jun sahil chꞌo̱lej chokꞌ reheb chixjunileb li tenamit. 11Anakcuan xyoꞌla jun laj Colol e̱re saꞌ lix tenamit laj David ut aꞌan li Cristo li Ka̱cuaꞌ li yechiꞌinbil xban li Dios. 12Joꞌcaꞌin nak te̱tau. Li cꞌulaꞌal lanbil saꞌ tꞌicr ut yocyo saꞌ xbe̱n li qꞌuim saꞌ xnaꞌaj xcuaheb li cuacax. Aꞌin li retalil nak aꞌan li te̱tau, chan li ángel. 13Ut saꞌ junpa̱t queꞌchal nabaleb chic li ángel saꞌ choxa. Yo̱queb chixlokꞌoninquil li Ka̱cuaꞌ ut yo̱queb chixyebal: 14—Chinima̱k taxak xlokꞌal li Ka̱cuaꞌ Dios li cuan saꞌ choxa ut chicua̱nk taxak li tuktu̱quilal saꞌ xya̱nkeb li cristian li raro̱queb xban li Dios.— 15Nak ac xco̱eb li ángel saꞌ choxa, eb laj ilol xul queꞌoc chixyebal chi ribileb rib: —Yoꞌkeb Belén ut takil chak li cꞌaꞌru xcꞌulman, li xtakla xyebal ke li Ka̱cuaꞌ, chanqueb. 16Co̱eb saꞌ a̱nil ut queꞌxtau lix María rochben laj José ut li cꞌulaꞌal yocyo saꞌ xnaꞌaj xcuaheb li xul. 17Ut nak ac xeꞌxtau, queꞌxserakꞌi reheb li cꞌaꞌru quiyeheꞌ reheb chirix li cꞌulaꞌal. 18Ut chixjunileb li queꞌabin re li cꞌaꞌru queꞌxye laj ilol xul, sachso̱queb xchꞌo̱l queꞌcana. 19Ut lix María quixcꞌu̱la saꞌ xchꞌo̱l chixjunil li cꞌaꞌru quicꞌulman ut yo̱ chixcꞌoxlanquil rix. 20Ut chirix chic aꞌan eb laj ilol xul queꞌsukꞌi saꞌ lix naꞌajeb. Yo̱queb chixlokꞌoninquil ut yo̱queb chixnimanquil ru li Ka̱cuaꞌ riqꞌuin li cꞌaꞌru queꞌrabi ut queꞌril xban nak chixjunil li queꞌril, aꞌan joꞌ li quiyeheꞌ reheb.

Li Jesús quikꞌaxtesi̱c saꞌ rukꞌ li Dios saꞌ li templo

21Cuakxakib cutan cuan re li cꞌulaꞌal nak quixcꞌul li circuncisión ut Jesús queꞌxqꞌue chokꞌ xcꞌabaꞌ, joꞌ quiyeheꞌ re lix María xban li ángel nak toj ma̱jiꞌ nacana chi yaj. 22Lix María quixba̱nu joꞌ naxye saꞌ lix chakꞌrab laj Moisés. Nak ac xnumeꞌ caꞌcꞌa̱l cutan, lix María rochben laj José queꞌxcꞌam li cꞌulaꞌal Jerusalén ut queꞌxkꞌaxtesi chiru li Ka̱cuaꞌ. 23Queꞌxba̱nu chi joꞌcan xban nak saꞌ li chakꞌrab li quiqꞌueheꞌ reheb xban li Ka̱cuaꞌ naxye nak li xbe̱n alalbej tento ta̱kꞌaxtesi̱k saꞌ rukꞌ li Ka̱cuaꞌ. 24Ut teꞌxqꞌue chokꞌ xmayejeb jun sumalak li mucuy malaj ut cuibak li paloma li toj sa̱jeb, joꞌ naxye saꞌ li chakꞌrab.

Laj Simeón quixqꞌue xlokꞌal li Jesús ut quixye ajcuiꞌ resil li raylal li tixcꞌul

25Aran Jerusalén cuan jun li cui̱nk aj Simeón xcꞌabaꞌ. Li cui̱nk aꞌan ti̱c xchꞌo̱l ut naxqꞌue xlokꞌal li Dios. Yo̱ chiroybeninquil nak li Dios ta̱risiheb saꞌ raylal laj Israel. Ut cuan li Santil Musikꞌej riqꞌuin. 26Li Santil Musikꞌej quixcꞌutbesi chiru laj Simeón nak aꞌan incꞌaꞌ ta̱ca̱mk toj ta̱ril ru li Cristo li Colonel li quixyechiꞌi li Ka̱cuaꞌ Dios. 27Li Santil Musikꞌej quixcꞌut chiru laj Simeón nak ta̱xic saꞌ li templo xban nak saꞌ li ho̱nal aꞌan quicꞌameꞌ li Jesús saꞌ li templo xban laj José ut lix María re nak teꞌxkꞌaxtesi saꞌ rukꞌ li Dios joꞌ naxye saꞌ li chakꞌrab. 28Ut laj Simeón quixkꞌalu li Jesús, quixqꞌue xlokꞌal li Ka̱cuaꞌ ut quixye:

29—At Ka̱cuaꞌ, anakcuan xaba̱nu joꞌ xayechiꞌi cue. Anakcuan naru tinca̱mk chi cꞌojcꞌo inchꞌo̱l,

30xban nak riqꞌuin xnakꞌ cuu xcuil li Colonel li yechiꞌinbil a̱ban,

31li xaqꞌue chak re xcolbaleb chixjunileb li cuanqueb saꞌ ruchichꞌochꞌ.

32Aꞌan li ta̱cutanobresi̱nk re lix cꞌaꞌuxeb li ma̱cuaꞌeb aj Israel ut aꞌan lix lokꞌaleb la̱ tenamit Israel, chan laj Simeón.

33Laj José ut li naꞌbej sachso̱queb xchꞌo̱l queꞌcana chirabinquil li yo̱ chixyebal laj Simeón chirix li Jesús. 34Ut laj Simeón quixtzꞌa̱ma rusilal li Dios saꞌ xbe̱neb ut quixye re lix María li naꞌbej: —Chacuabi li oc cue xyebal a̱cue. Saꞌ xcꞌabaꞌ li cꞌulaꞌal aꞌin, nabaleb laj Israel teꞌcolekꞌ ut saꞌ xcꞌabaꞌ ajcuiꞌ aꞌan nabaleb li teꞌsachk. Ut nabaleb li teꞌtzꞌekta̱na̱nk re. 35Riqꞌuin li raylal teꞌxba̱nu re, ta̱cꞌutu̱nk chi tzꞌakal li cꞌaꞌru cuan saꞌ xchꞌo̱leb li xicꞌ nequeꞌiloc re. Ut cꞌajoꞌ nak ta̱rahokꞌ a̱chꞌo̱l la̱at xban li raylal teꞌxba̱nu re. Chanchan nak teꞌxnumsi jun chꞌi̱chꞌ saꞌ la̱ cua̱m, chan laj Simeón. 36Ut cuan ajcuiꞌ jun li xma̱lcaꞌan aran profeta, xAna xcꞌabaꞌ. Aꞌan xrabin laj Fanuel xcomoneb li ralal xcꞌajol laj Aser. Ac ti̱x chic. Toj sa̱j nak quisumla ut cuukub chihab ajcuiꞌ quicuan rochben lix be̱lom. 37Ac cuan chic ca̱hib roꞌcꞌa̱l chihab (84) xcanajic xjunes. Aꞌan cuan junelic saꞌ li templo. Yo̱ chi cꞌanjelac chiru li Ka̱cuaꞌ chi kꞌek chi cutan. Junelic yo̱ chi tijoc ut yo̱ chixba̱nunquil x-ayu̱n. 38Saꞌ li ho̱nal aꞌan quicuulac cuan cuiꞌ li Jesús. Yo̱ chixlokꞌoninquil li Dios ut qui-oc chi a̱tinac chirix li cꞌulaꞌal riqꞌuineb laj Jerusalén li yo̱queb chiroybeninquil lix colbaleb. 39Nak ac queꞌxba̱nu chixjunil li naxye saꞌ li chakꞌrab li quixqꞌue li Ka̱cuaꞌ, laj José ut lix María queꞌsukꞌi saꞌ li tenamit Nazaret li cuan saꞌ xcue̱nt Galilea. 40Ut li cꞌulaꞌal yo̱ chi qꞌui̱c ut yo̱ chi cacuu̱c xchꞌo̱l. Ut yo̱ chixtaubal xnaꞌleb. Ut li rusilal li Ka̱cuaꞌ cuan riqꞌuin.

Li Jesús quicana saꞌ li templo ut quia̱tinac riqꞌuineb laj tzolol chakꞌrab

41Rajlal chihab nequeꞌxic lix naꞌ xyucuaꞌ aran Jerusalén chixninkꞌeinquil li reliqueb Egipto. Pascua nequeꞌxye re li ninkꞌe aꞌan. 42Nak ac cuan cablaju chihab re li Jesús, co̱eb aran Jerusalén saꞌ li ninkꞌe joꞌ cꞌaynakeb xba̱nunquil. 43Ut nak ac xrakeꞌ li ninkꞌe queꞌsukꞌi saꞌ lix tenamiteb. Ut li Jesús quicana Jerusalén chi incꞌaꞌ naxnau laj José chi moco li naꞌbej. 44Saꞌ xchꞌo̱leb aꞌan nak cuan saꞌ xya̱nkeb li rochben. Jun cutan ac xeꞌbe̱c nak queꞌxqꞌue retal nak ma̱ ani. Ut queꞌoc chixsicꞌbal saꞌ xya̱nkeb li rechꞌalal ut saꞌ xya̱nkeb li nequeꞌnaꞌoc ru. 45Queꞌril nak incꞌaꞌ queꞌxtau. Queꞌsukꞌi cuiꞌchic Jerusalén chixsicꞌbal. 46Nak ac xnumeꞌ chic oxib cutan, queꞌxtau aran saꞌ li templo. Cꞌojcꞌo saꞌ xya̱nkeb li nequeꞌxnau chi us li cꞌaꞌru naxye saꞌ li chakꞌrab. Yo̱ chirabinquil li yo̱queb chixyebal ut yo̱ ajcuiꞌ chi patzꞌoc reheb. 47Ut chixjunileb li yo̱queb chi abi̱nc re sachso̱queb xchꞌo̱l nequeꞌcana xban nak cuan xnaꞌleb ut naxnau xsumenquil li cꞌaꞌru nequeꞌxpatzꞌ re. 48Lix naꞌ xyucuaꞌ sachso̱queb xchꞌo̱l queꞌcana nak queꞌril nak li Jesús yo̱ chi a̱tinac riqꞌuineb. Ut lix naꞌ quixye re: —At inyum, ¿cꞌaꞌut nak xaba̱nu ke chi joꞌcaꞌin? Cꞌajoꞌ kacꞌaꞌux cha̱cuix. La̱ yucuaꞌ ut la̱in yo̱co cha̱sicꞌbal, chan lix María. 49Quichakꞌoc li Jesús ut quixye re: —¿Cꞌaꞌut nak yo̱quex chinsicꞌbal? ¿Ma incꞌaꞌ ta biꞌ nequenau nak tento tinba̱nu lix cꞌanjel lin Yucuaꞌ? chan li Jesús. 50Ut eb aꞌan incꞌaꞌ queꞌxtau ru cꞌaꞌut nak quixye reheb chi joꞌcan. 51Li Jesús quisukꞌi Jerusalén rochbeneb lix naꞌ xyucuaꞌ ut na-abin chiruheb. Ut lix naꞌ quixcꞌu̱la saꞌ xchꞌo̱l chixjunil li quicꞌulman. 52Li Jesús yo̱ chi qꞌui̱c ut yo̱ ajcuiꞌ chixtaubal xnaꞌleb. Quiraheꞌ xban li Dios ut quiraheꞌ ajcuiꞌ xbaneb li tenamit.

Currently Selected:

San Lucas 2: kek

Highlight

Copy