San Lucas 8

Eb li ixk li queꞌcꞌanjelac chiru li Jesús

1Li Jesús co̱ saꞌ eb li tenamit chixyebal resil li cha̱bil esilal. Ut quilajeꞌxbeni chixjunileb li tenamit ut li cꞌaleba̱l rochbeneb lix tzolom cablaju. Yo̱ chixchꞌolobanquil lix ya̱lal chirix lix nimajcual cuanquilal li Dios. 2Cuanqueb ajcuiꞌ ixk yo̱queb chi ochbeni̱nc reheb. Eb li ixk aꞌin, aꞌan eb li queꞌqꞌuirtesi̱c xyajeleb ut eb li queꞌisi̱c ma̱us aj musikꞌej riqꞌuineb xban li Jesús. Saꞌ xya̱nkeb aꞌan cuan lix María. Lix Magdalena nequeꞌxye ajcuiꞌ re. Aꞌan li ixk li qui-isi̱c cuukub li ma̱us aj musikꞌej riqꞌuin. 3Cuan lix Susana saꞌ xya̱nkeb. Ut cuan ajcuiꞌ lix Juana li rixakil laj Chuza li quicuan chokꞌ merto̱m riqꞌuin laj Herodes. Ut cuanqueb ajcuiꞌ nabaleb chic li ixk rochbeneb. Aꞌan eb li nequeꞌtenkꞌan reheb riqꞌuin li cꞌaꞌruheb re.

Li jaljo̱quil ru a̱tin chirix laj acuinel

4Nabaleb li tenamit queꞌchꞌutla riqꞌuin li Jesús. Queꞌchal chak saꞌ eb li naꞌajej yalak bar. Ut li Jesús qui-oc chixyebal jun li jaljo̱quil ru a̱tin reheb. Ut quixye: 5—Jun aj acuinel co̱ chi a̱uc. Ut nak yo̱ chixhirbal li iyaj, cuan li quinak chire be ut quiyekꞌi̱c. Queꞌchal li xul li nequeꞌxicꞌan ut queꞌxcuaꞌ li iyaj. 6Ut cuan ajcuiꞌ li iyaj quinak saꞌ xya̱nk li pec. Quimok, abanan saꞌ junpa̱t quichakic xban nak chaki li chꞌochꞌ. 7Ut cuan cuiꞌchic li iyaj quinak saꞌ xya̱nk li qꞌuix. Ut nak quichamoꞌ li qꞌuix saꞌ xbe̱n, quixnatꞌ li acui̱mk. 8Ut cuan cuiꞌchic li iyaj quinak saꞌ li cha̱bil chꞌochꞌ. Quimok ut quiqꞌui ut quiu̱chin chi us. Quixqꞌue oꞌtakcꞌa̱l (100) ru li junju̱nk chi rok. Ut quixye cuiꞌchic li Jesús, —Li ani ta̱raj rabinquil li cꞌaꞌru yo̱quin chixyebal, chixqꞌuehak retal li yo̱quin chixyebal, chan. 9Ut eb lix tzolom queꞌxpatzꞌ re: —¿Cꞌaꞌru xya̱lal li jaljo̱quil ru a̱tin li xaye? chanqueb. 10Quichakꞌoc li Jesús ut quixye reheb: —La̱ex qꞌuebil e̱re xnaubal xya̱lal li mukmu̱quil naꞌleb chirix lix nimajcual cuanquilal li Dios. Aꞌut li jun chꞌol chic li incꞌaꞌ nequeꞌpa̱ban, riqꞌuin jaljo̱quil ru a̱tin ta̱yema̱nk reheb. Usta yo̱queb chi iloc, abanan incꞌaꞌ teꞌxqꞌue retal. Usta yo̱queb chi abi̱nc, abanan incꞌaꞌ teꞌxtau xya̱lal. 11Aꞌan aꞌin lix ya̱lal li jaljo̱quil ru a̱tin li xinye. Li iyaj, aꞌan retalil li ra̱tin li Dios. 12Ut li iyaj li quinak chire li be, aꞌan retalileb li nequeꞌabin re li ra̱tin li Dios. Nak ac xeꞌrabi li a̱tin, laj tza incꞌaꞌ naxcanabeb re teꞌxtau ru lix ya̱lal li ra̱tin li Dios re nak incꞌaꞌ teꞌpa̱ba̱nk ut teꞌcolekꞌ. 13Ut li iyaj li quinak saꞌ xya̱nk li pec, aꞌan retalileb li nequeꞌabin re li ra̱tin li Dios ut nequeꞌxpa̱b chi saheb saꞌ xchꞌo̱l. Abanan incꞌaꞌ nacana saꞌ xchꞌo̱leb. Nak nayaleꞌ rix lix pa̱ba̱leb, incꞌaꞌ nequeꞌxcuy xnumsinquil. Nachꞌinan ban xchꞌo̱leb. 14Ut li iyaj li quinak saꞌ xya̱nk li qꞌuix, aꞌan retalileb li nequeꞌabin re li ra̱tin li Dios. Nequeꞌxpa̱b, abanan incꞌaꞌ nequeꞌqꞌui saꞌ xpa̱ba̱leb xban nak caꞌaj cuiꞌ li cꞌaꞌak re ru cuan saꞌ ruchichꞌochꞌ nequeꞌxcꞌoxla, li biomal ut xra̱bal ru li cꞌaꞌak chic re ru. Aꞌan li naramoc lix ya̱lal chiruheb. 15Ut li iyaj li quitꞌaneꞌ saꞌ cha̱bil chꞌochꞌ, aꞌan retalileb li nequeꞌabin re li ra̱tin li Dios. Nequeꞌxpa̱b li ra̱tin chi anchaleb xchꞌo̱l ut nequeꞌqꞌui saꞌ xpa̱ba̱leb, chan li Jesús.

Li jaljo̱quil ru a̱tin chirix li candil

16Ut li Jesús quixye ajcuiꞌ reheb: —Ma̱ ani tixloch junak candil ut tixqꞌue ta rubel junak ucꞌal malaj ut tixqꞌue ta rubel chꞌa̱t. Tixqꞌue ban saꞌ junak naꞌajej najt xteram re nak cua̱nkeb saꞌ cutan li ani teꞌoc saꞌ li cab. 17Joꞌcan ajcuiꞌ ma̱cꞌaꞌ cuan chi mukmu chi incꞌaꞌ ta ta̱nauma̱nk mokon. Ut li incꞌaꞌ natauman ru anakcuan, ta̱tauma̱nk ru mokon. 18Joꞌcan ut cheqꞌuehak retal li cꞌaꞌru te̱rabi xban nak li ani naxqꞌue xchꞌo̱l chixtaubal ru lix ya̱lal, ta̱qꞌuehekꞌ mas xnaꞌleb. Abanan li incꞌaꞌ naxqꞌue xchꞌo̱l chixtaubal ru, ta̱makꞌekꞌ chiru li naxcꞌoxla nak naxnau, chan.

Eb li ri̱tzꞌin ut lix naꞌ li Jesús

19Ut eb li ri̱tzꞌin li Jesús rochbeneb lix naꞌ queꞌcuulac chi a̱tinac riqꞌuin. Abanan incꞌaꞌ queꞌru chi oc cuan cuiꞌ li Jesús xban nak kꞌaxal cuiꞌchic nabaleb li cristian. 20Ut quiyeheꞌ resil re li Jesús: —La̱ naꞌ ut eb la̱ cui̱tzꞌin cuanqueb chirix cab ut teꞌraj a̱cua̱tinanquil, chan. 21Quichakꞌoc li Jesús ut quixye reheb: —Li ani nequeꞌabin re li ra̱tin li Dios ut nequeꞌxba̱nu li cꞌaꞌru naxye, aꞌaneb lin naꞌ ut li cui̱tzꞌin, chan li Jesús reheb.

Li Jesús quixkꞌus li ca̱k-sut-ikꞌ

22Saꞌ jun li cutan li Jesús quixye reheb lix tzolom: —Kꞌaxonko jun pacꞌal li palau, chan reheb. Ut qui-oc saꞌ jun li jucub rochbeneb lix tzolom ut co̱eb. 23Nak ac yo̱queb chi xic chiru li palau, li Jesús quicuar. Saꞌ li ho̱nal aꞌan quichal jun li ca̱k-sut-ikꞌ ut qui-oc chi nujac li haꞌ saꞌ li jucub ut yo̱queb re chi subu̱nc saꞌ li palau. 24Eb lix tzolom co̱eb cuan cuiꞌ li Jesús ut queꞌrajsi. Ut queꞌxye re: —At tzolonel, at tzolonel, osocꞌ ke, chanqueb. Ut li Jesús qui-aj ru ut quixkꞌus li ikꞌ ut quixkꞌus li palau ut chꞌanamil quicana. Incꞌaꞌ chic qui-ecꞌan. 25Ut li Jesús quixye reheb: —¿Cꞌaꞌru xecꞌul? ¿Ma ma̱cꞌaꞌ chic e̱pa̱ba̱l? chan. Cꞌajoꞌ nak qui-oc xcꞌaꞌuxeb ut queꞌxsach xchꞌo̱l. Queꞌxye chi ribileb rib, —¿Chanru nak nequeꞌabin li ikꞌ ut li palau chiru li cui̱nk aꞌin? Ut, ¿chanru nak cuan xcuanquil chixkꞌusbaleb? chanqueb.

Li Jesús quirisi li ma̱us aj musikꞌej riqꞌuin jun li cui̱nk cuan saꞌ li tenamit Gadara

26Li Jesús ut eb lix tzolom queꞌcuulac saꞌ li naꞌajej Gadara li cuan jun pacꞌal li palau Galilea. 27Tojeꞌ ajcuiꞌ teꞌcuulak li Jesús nak quichal jun li cui̱nk li cuan saꞌ li tenamit aꞌan chi cꞌuluc re. Li cui̱nk aꞌan ac junxil cuan ma̱us aj musikꞌej riqꞌuin. Incꞌaꞌ chic nacuan saꞌ rochoch chi moco naxqꞌue chic rakꞌ. Junes saꞌ li naꞌajej li nequeꞌmukeꞌ cuiꞌ li camenak nacuan. 28Nak quiril li Jesús li cui̱nk quixcuikꞌib rib chiru. Quixjap re chixyebal: —¿Cꞌaꞌru ta̱cuaj cuiqꞌuin, at Jesús? La̱at li Ralal li nimajcual Dios. Nintzꞌa̱ma cha̱cuu nak mina̱chꞌiꞌchꞌiꞌi, chan re. 29Quixye chi joꞌcan xban nak li Jesús ac yo̱ chixyebal re li ma̱us aj musikꞌej nak ta̱e̱lk riqꞌuin li cui̱nk. Nabal sut narahobtesi̱c li cui̱nk xban li ma̱us aj musikꞌej. Nequeꞌxbacꞌ riqꞌuin chꞌi̱chꞌ ut riqꞌuin cadena. Abanan naxtꞌupi li cadena ut nacꞌameꞌ xban li ma̱us aj musikꞌej saꞌ eb li naꞌajej bar ma̱cꞌaꞌ cuan. 30Li Jesús quixye re: —¿Ani a̱cꞌabaꞌ? chan re. —Cuakib mil incꞌabaꞌ xban nak nabalo, chan nak quichakꞌoc. 31Ut eb li ma̱us aj musikꞌej queꞌxtzꞌa̱ma chiru li Jesús nak incꞌaꞌ tixtaklaheb saꞌ xbalba. 32Aran cuanqueb jun tu̱b li a̱k yo̱queb chi ichajibc chiru li tzu̱l. Eb li ma̱us aj musikꞌej queꞌxtzꞌa̱ma chiru li Jesús nak tixtaklaheb chi oc riqꞌuineb li a̱k. Ut li Jesús quixcanabeb chi oc riqꞌuineb. 33Queꞌel li ma̱us aj musikꞌej riqꞌuin li cui̱nk ut queꞌoc riqꞌuineb li a̱k. Eb li a̱k queꞌoc chi a̱linac. Saꞌ xbe̱n li u̱l queꞌel chak ut toj saꞌ li palau coxeꞌnak ut aran queꞌcam. 34Ut eb li yo̱queb chi iloc reheb li a̱k queꞌco̱eb saꞌ a̱nil ut coxeꞌxye resil saꞌ li tenamit li cꞌaꞌru quicꞌulman joꞌ ajcuiꞌ saꞌ li cꞌaleba̱l. 35Ut nabaleb li tenamit queꞌco̱eb chirilbal li cꞌaꞌru quicꞌulman. Queꞌcuulac cuan cuiꞌ li Jesús ut queꞌril li cui̱nk li qui-isi̱c nabal chi ma̱us aj musikꞌej riqꞌuin. Chunchu chiru li Jesús. Tikto chic ut tuktu chic xjolom. Riqꞌuin rilbal aꞌan queꞌsach xchꞌo̱leb li tenamit. 36Ut eb li queꞌiloc re li cꞌaꞌru quicꞌulman, queꞌxserakꞌi reheb li tenamit chanru nak quiqꞌuira li cui̱nk li quicuan ma̱us aj musikꞌej riqꞌuin. 37Cꞌajoꞌ nak queꞌxucuac chixjunileb li tenamit li cuanqueb saꞌ eb li naꞌajej li cuanqueb saꞌ xcue̱nt Gadara. Ut queꞌxtzꞌa̱ma chiru li Jesús nak ta̱e̱lk saꞌ lix naꞌajeb. Joꞌcan nak li Jesús qui-oc cuiꞌchic saꞌ li jucub ut qui-el saꞌ li naꞌajej aꞌan. 38Ut li cui̱nk li qui-isi̱c ma̱us aj musikꞌej riqꞌuin quixye re li Jesús: —Xicakin cha̱cuix, chan re. Abanan li Jesús quixye re: —Incꞌaꞌ. Cana̱kat. 39Ayu saꞌ la̱ cuochoch ut ta̱serakꞌi reheb chixjunileb chanru nak li Dios xruxta̱na a̱cuu, chan li Jesús. Joꞌcan nak co̱ li cui̱nk ut quixserakꞌi reheb chixjunileb li cuanqueb saꞌ li tenamit chanru nak li Jesús quiruxta̱na ru.

Li Jesús quixqꞌuirtesi lix rabin laj Jairo joꞌ ajcuiꞌ li ixk li quichꞌeꞌoc re li rakꞌ

40Nak li Jesús quinumeꞌ cuiꞌchic jun pacꞌal li palau, li qꞌuila tenamit yo̱queb chiroybeninquil chi saheb saꞌ xchꞌo̱l. 41Ut saꞌ li ho̱nal aꞌan quicuulac jun li cui̱nk aran aj Jairo xcꞌabaꞌ. Aꞌan li nataklan saꞌ li cab li nequeꞌxchꞌutub cuiꞌ ribeb laj judío. Nak quiril li Jesús, quixcuikꞌib rib chiru ut quixtzꞌa̱ma chiru nak ta̱xic saꞌ rochoch xban nak ca̱mc re lix rabin. 42Jun ajcuiꞌ lix rabin chiru. Cablaju chihab na cuan re. Ut eb li cristian yo̱queb chixlatzꞌanquil li Jesús nak yo̱ chi xic. 43Saꞌ xya̱nkeb cuan jun li ixk cablaju chihab xticlajic xyajel. Junelic yo̱ lix yajel li ixk aꞌan ut incꞌaꞌ chic natzꞌap lix quiqꞌuel. Quixqꞌue rib chi banecꞌ riqꞌuin nabaleb aj banonel ut nabal li tumin quixsach. Abanan ma̱ jun quiru chi banoc re. 44Li ixk aꞌan quijiloc riqꞌuin li Jesús ut quixchꞌeꞌ li rakꞌ. Ut saꞌ ajcuiꞌ li ho̱nal aꞌan quiqꞌuira li ixk. 45Ut li Jesús quixye: —¿Ani xchꞌeꞌoc cue?— Ut chixjunileb queꞌchakꞌoc ut queꞌxye: —La̱o incꞌaꞌ yo̱co cha̱chꞌeꞌbal.— Tojoꞌnak laj Pedro joꞌqueb ajcuiꞌ li cuanqueb rochben queꞌxye re: —At tzolonel, la̱at nacacuil chanru nak yo̱queb cha̱latzꞌanquil li tenamit. ¿Cꞌaꞌut nak nacapatzꞌ ani xchꞌeꞌoc a̱cue? chanqueb re. 46Ut li Jesús quixye cuiꞌchic reheb: —La̱in ninnau nak cuan ani xchꞌeꞌoc cue xban nak xcuecꞌa nak cuan ani xqꞌuira riqꞌuin incuanquil, chan. 47Li ixk quixqꞌue retal nak li Jesús naxnau nak xchꞌeꞌ li rakꞌ. Nasicsot xban xxiu li ixk. Saꞌ xchꞌo̱l aꞌan nak ta̱chꞌila̱k xban li Jesús. Quixcuikꞌib rib chiru li Jesús ut quixye re chiruheb chixjunileb li cristian cꞌaꞌut nak quixchꞌeꞌ li rakꞌ. Ut quixye ajcuiꞌ re nak saꞌ ajcuiꞌ li ho̱nal aꞌan xqꞌuira. 48Li Jesús quixye re: —Kanaꞌ, xban nak xapa̱b nak cuan incuanquil cha̱qꞌuirtesinquil, joꞌcan nak xatqꞌuira. Ayu chi sa saꞌ a̱chꞌo̱l, chan. 49Toj yo̱ ajcuiꞌ chi a̱tinac li Jesús nak quichal jun li cui̱nk saꞌ rochoch laj Jairo li nataklan saꞌ li cab li nequeꞌxchꞌutub cuiꞌ ribeb laj judío ut quixye re laj Jairo: —Xcam la̱ rabin. Ma̱chꞌiꞌchꞌiꞌi chic laj tzolonel, chan re. 50Nak quirabi li Jesús li cꞌaꞌru quixye li cui̱nk, quixye re laj Jairo: —Matcꞌoxlac. Caꞌaj cuiꞌ ta̱pa̱b ut la̱ rabin ta̱colekꞌ, chan. 51Nak quicuulac li Jesús, ma̱ ani quixcanab chi oc saꞌ li cab. Caꞌaj cuiꞌ laj Pedro, laj Jacobo ut laj Juan rochbeneb lix naꞌ xyucuaꞌ li xkaꞌal. 52Chixjunileb li cuanqueb aran japjo̱queb re chi ya̱bac xban nak ac xcam. Ut li Jesús quixye reheb: —Mexya̱bac. Li xkaꞌal aꞌin moco camenak ta. Cua̱rc yo̱, chan. 53Chixjunileb li cuanqueb aran queꞌxseꞌe li Jesús xban nak queꞌxnau nak li xkaꞌal camenak chic. 54Abanan li Jesús quixchap chi rukꞌ li xkaꞌal, ut quixye re: —At chꞌina xkaꞌal, cuaclin, chan. 55Saꞌ li ho̱nal aꞌan quicuacli cuiꞌchic chi yoꞌyo li xkaꞌal. Ut li Jesús quixye reheb nak teꞌxqꞌue chi cuaꞌac. 56Ut eb lix naꞌ xyucuaꞌ sachso̱queb xchꞌo̱l riqꞌuin li quicꞌulman. Abanan li Jesús quixye reheb nak ma̱ ani aj e teꞌxserakꞌi li cꞌaꞌru quicꞌulman.

Currently Selected:

San Lucas 8: kek

Highlight

Copy