Ducas 23

Pidato yacno Esus buanaid

(Mat. 27.1-2, 11-14; Madc. 15.1-5; Uan 18.28-38)

1Aden chiec Esus muequi nec, queshun isadaidbon chuiquidotedishun Pidato yacno Esus buampanëdash.#23.1 Pidato chiaid iste bunquin Mat. 27.2 istuidshun aid chiaid bëca taëmicquid isbanta. 2Aden Pidato yacno Esus bëec choash nadpanëdash: Nëidën chuibambued tantiashun: Icsambuen namianquid nec, quequin tantiaquin mibi yacno bëombi. Adquid icquin chuiquid tapa Sesadën: Piucquid tsasicquidëmpi bec cho, cac: Menenda, quiosh. Aidbidi: Isadaidbon chuiquid tapa Quidistu nebi, quiosh, quepanëdash isadaidbon chuiquido Pidato chiec.

3Adoaquien Pidaton: ¿Isadaidbon chuiquid tapada ne? capanëdash.

Adoaquien: Ma mimbibi chuipayoc, capanëdash Esusën.#23.3 Ai, aidi nebi, quequin: Ma mimbibi chuipayoc, quepanëdash Esus.

4Adsho tantiash: ¿Atotsi icsambuen nacshoembi cuidpe? Ambi icsambuen naid nibëdec, quepanëdash Pidato nëish iua cuessunneshun pichicaquidon chuiquidobëta chuiquid utsibo chiec.

5Adoaquien: Aidën chuibanac nëbi nidaid cuëshë Cadidea yacnocquido nëishash cumapenec cuëdcuededosh. Amboshon chuibanshumbic nëid nidaid cuëshë Udea yacno choshon adombuembidi chuibanuaposh, quepanëdash isadaidbon chuiquido Pidato chiec.

Edodes Antipas yacno Esus buanaid

6Aden chuisho tantiashun: ¿Nidaid Cadidea yacnocquidta Esus nec? capanëdash Pidaton.

7Adoaquien: Ai, nidaid Cadidea yacnocquid Esus nec, quepanëdash. Aden chiac: Nidaid Cadidea yacnocquidon chuiquid Edodes Antipas nec, quequin tantiaquin Pidaton aid yacno Esus buanmepanëdash: Edusaden yacno Edodes choash tabadec, quesho tantiashun.

8Aden abi yacno bëacsho isash Edodes Antipas: Iuen Esus iste bunec nëbi bëdambo iquebi, quequin ambibi tantiapanëdash. Nadatiambocquin nabanquidquio nec, quequin isquidon chiac Edodes Esus isec: Nadatiambocquin napashun. Isnu, quequin tantiapanëdash. 9Esus chuimenu, quequin Edodesën dadpen chuibampanëdash. Adoaqui Esusën ëcbedenquio icpanëdash. 10Adnubien nëish iua cuessunneshun pichicaquidon chuiquidobëtan Moisesën chiampid tantiamequidon ambobi tabadquin: Esus icsambocquid nec, quec cumapenec cuëdcuededquin Edodes dadpen chuipanëdash. 11Adoshombic Edodesën aton sondadobëtan Esus icsambuen chuiquin mamënshumbededtanquin chuiquid tapabimbuec isadnuc dashcute dapa dasiuinshumbic Pidato yacno Esus buanmeuapanëdash. 12Mimbi tantiacpaden Esus cuidta, quequin Pidato chuita, quequin chuitanquin Edodesën Pidato yacno Esus padpiden buanmeuapanëdash. Adoac chieshënnambuedi Edodesbëd Pidato bëdambuec isnampanëdash.

Esus cueste napotiaidën dectanmeta, quiaid

(Mat. 27.15-26; Madc. 15.6-15; Uan 18.39—19.16)

13Adshumbic nëidtedi Pidaton chochomepanëdash. Nëidic Nuquin Papa ismequin nëish iua cuessunneshun pichicaquidon chuiquido. Nëidic isadaidbon chuiquido. Nëidic isadaidbo utsibo dadpen. Aidtedi chochomeshun 14Esus ismequin Pidaton naden chuipanëdash: Nëid dada bëshun: Cun matses cuesnantiadpambo icnuc cuëdnanmec icsambuen namianquid nec, quequin mimbi ubi chuipoc. Adoac mibitedishun tantianubi aidbëd onqueshun: Icsamianquidpenquio nec, quequin tantiembi. 15Aden umbi tantiacpadombuembidi tantiaquin Edodes Antipasën ubi yacno bëmeuaposh. Esus uënës uamenquioctiadquidi nec. 16Aden tantiaquin cacuesquin mëyanmeshun nidmembi, quepanëdash isadaidbo chiec.

17Aden chiac naden isadaidbon tantiapanëdash: Setan setanquien icsambocquid cun matses quënën tsadunmiaid abentsëc ambi chicmianniacpaden nëbi adquid utsi Pidaton chicmetsiash, quequin tantiec isadaidbo nadec cuëdcuededpanëdash: 18Mimbi Esus caid uënës uamequin mimbi quënën tsadunmenëdaid Badabas cuëmëdquid chicquin puduenmeta, cabededpanëdash cumapenec cuëdcuededquin. 19Badabas Doma yacnocquidon chuiquid tapa bunenquio icquin utsibo chieshënmequin utsi cuessunnequid icsho quënën tsadunmiaid nepanëdash.

20Adec isadaidbo cuëdcuededsho tantiash Esus nidmete bunec: Esus cuidenquioctiadquidi nec, quepanëdash Pidato isadaidbo padpiden chiec.

21Adoaquien cumapenec cuëdcuededuaquin: Cueste napotiaidën dectanme. Cueste napotiaidën dectanme, cabededpanëdash isadaidbon.

22Adec cuëdcuededsho tantiashun padpidembuen: ¿Atotsi queshun: Cueste napotiaidën dectanme, cai? ¿Atotsi icsambuen nasho issun mimbi aden chuipe? Ma aidën icsambuen naid nibëdquio icpayoc. Adquid icsho cacuesquin mëyanmeshun Esus nidmembi, capanëdash Pidaton.

23Adoaquien cumapenec cuëdcuededuaic: Cueste napotiaidën dectanquin uënës uame, cabededpanëdash. Adsho tantiashun Pidaton: Ai, capanëdash.

24Adshun iccuededquidon chiacpaden namenuen 25Pidaton: Matses cuessunnequid icsho quënën tsadunaid Badabas chicquin puduenmeshumbic Esus cueste napotiaidën dectanquin uënës uatan, capanëdash Pidaton aidon chiacpaden chuiquin.

Esus Cueste napotiaidën dectanaid

(Mat. 27.32-44; Madc. 15.21-32; Uan 19.17-27)

26Aden chiac Esus buanquin abi dectante cueste buanmequimbi dada nidaid Sidene caid yacnocquid aton tied yacnouësh chosho bëquedtanquin Esus dectante cueste napotiaid Simon cuëmëdquid iuëmequin chiadtomiac buanquin Esus tsibambampanëdash. 27Adec Esus nidsho issun matses dadpenshun shubiquin tsibambampanëdash. Adecbidi abi tsibanquid chidobo uënësquio icnuc natia sedenquenidpanëdash. 28Adec chidobo shubichosho tantiash bidiadshun isec Esus: Ubi tantiec shubienda, Edusaden yacnocquid chidobo. Mibibi tantiadec min bacuëbobëta tantiec shubicuededta. 29Iuecash mëyadtequid uëshë choendac. Aid uëshë icnuc bacuë nibëdquido caic utsibo nadendac: Bacuë nibëdquid icquin min bacuëbo natiasho mimbi isenquio iquec. Adquid yec bëdambo mibitedi iquec, quendac. 30Mëyadtequid uëshë icnuc natiamequin mëyanaqui matsesën naden chiendac:

Natiamianquieque. Macuësh tapa paëdmequin ubitedi catashmequin ompota, mibi quendac.

Adecbidi acte quiusudquid abucquiocquid ubi ompoquin masecameta, utsi queuaindac.#23.30 Oseas 10.8 tantiaquin nëid dada uapanëdash.

31Adec mibi mëyadtequid uëshë choendac. Aden tantiesa mibi icpec. Ubi cuidenquioctiadquidëmbi ubi icsaisa icshobi mëyanquioquin uënës uasho issun ¿Nuquin Papan cumapenquien cuidenquioda icpec? Ai, cuidec, quequin tantiata, quepanëdash Esus.

32Adembidi Esusbëta dectannun icsambocquid dada daëd buanquimbi 33macuësh tapa Mapi Canite quequin cuënaid yacno buanshun dada daëd ëquë dectambudcuenquin dectantanquin nënantanquio Esus dectampanëdash.#23.33 Isa. 53.12 ista. Aden Esusbëta icsaquido uënës uaid chuipampic. 34Adoac diadequi Esus nadpanëdash: Papa, ubi uënës uanuequidon tantienquio icquin cueste napotiaidën dectanoshibique. Nëidon icsambuen naid tantienquio yec bëshunta, quequin Nuquin Papa chuipanëdash.

Adnubic: Esusën dashcute bednu, quequin sondadobon abi cuëmëdquidtedi dada uashun tëchun sandoshon cadotannequin dada uaidëmpi abia puduenquid isbanquin Esusën dashcute bedpanëdash.#23.34 Aden Esus mëyante ëndenquimbo chuipampic. Iste bunquin chotaquën onqueten dada uaid Cuëd. 22.18 ista.

35Adnubien matses dadpen isec tabadnubi isadaidbon chuiquido isec tabaduaquin icsambuen chuishunquin mamënshumbededec: Utsi utsien bëdanmequidquio yec abibi budsho isnu. Adsho issun Nuquin Papan Chomiaidquio Quidistu ambi tantiaidquio nec, catsiambi, quec onquecuededpanëdash.

36Adembidi sondadon icsambuen chuishunquin mamënshumbededquin: Uba chinaid mucambocquid dauë nëcushaid acmenu, quequin sananquin Esus ismequimbi:#23.35-36 Nëid chiacpadombuen chotaquën onqueten Cuëd. 22.7-8bëta Cuëd. 69.21 dada uabampampic. Aid isbanta. 37Isadaidbon chuiquid tapa nebi, quec: Uënësenquio iquebi, quiash en mibibi bud, capanëdash sondadon.

38Adshumbic abi dectanaid cueste napotiaidën Esusën mapi abuctsëc: Nëid isadaidbon chuiquid tapa nec, quequin cueste pada uaidën dada uashun dectanaid icpanëdash.

39Adnubien Esus icsambuen chiec icsambocquid icsho abëta cuesten dectambued abentsëc: Nuquin Papan Chomiaid Quidistu icquin mibibi budshun ubi daëdi budme, quepanëdash.

40Adec Esusbëta dectambued abentsëc icsambuec onquesho tantiash abëta dectambued utsi: Aid uënës uatequid yacpadquid mibi yec: Nuquin Papan ubi cuidendac, quec ¿dacuëdenquioda mibi icpe? 41Icsambuen nabansho cuidaid nuqui daëdi nec. Nëid dada icsambuen naisa icshobi cuidenquioctiadquidi naic, quepanëdash.

42Aden chiashic Esus caic: Mimbi namiacno nidash chuiquid tapa icquin ubi tantiata, capanëdash abëta dectambued utsin.

43Adoaquien: Abimbo chuinu. Tantia. Nëid uëshëmbi abuc ubi bëdambuec tabadacno ubëdi mibi iquendac, quepanëdash Esus abëta dectambued abentsëc chiec.

Esus uënësaid

(Mat. 27.45-56; Madc. 15.33-41; Uan 19.28-30)

44Adnubien uëshë cuembo icnuc inchëshpondash. Uëshë cuembo icnuc bedanec uëshë budambi 3 icnuc cuësquec nidaid abichobimbo inchëshquioshë icpondash. 45Adec inchëshquio yannubien Nuquin Papa tabadte shubu dapa nuntan utsi puduedtemaid quënë yacno dashcute dapa dectanaid tembi daëdquio yec canchedbudcuempanëdash.#23.45 Dashcute dapa dectanaid: Setan utsin utsinquiec Nuquin Papa tabadacnombo dada abentsëc isadaidbon icsambuen naid nëish iuan intaquën ocacbimbuecnuc puduedtednepampic. Esus uënësnubi Nuquin Papan ambi Esus tantiaquido bëdambuen iste tantiamenuen napanëdash. Aden chiaid iste bunquin Buan. 26.31-33 isbanta. 46Adnubien cumapenec cuëdec: Papa, cun mayan bedquin mibi yacno ubi iuedta, quetanequi Esus uënëspanëdash.#23.46 Chotaquën onqueten Cuëd. 31.5 isbanta.

47Adec Esus uënësso isash ambi isbuedtedi tantiaquin Nuquin Papan naid chiec sondadon chuiquid capitan: Abimbo chuiquid niosh. Nëid dada bëdambocquid niosh, quepanëdash. 48Ambo tabadquin isquid utsibo Esus uënësso isash uënësquio yec shiccuesadec shubinidec aton shubuno nidannepanëdash. 49Aido nidannenubien abi tantiaquido uannoshon isec tabadpanëdash. Ambobidi nidaid Cadidea yacnouësh chosho issun Esus tsibanambued chidobon uanno tabadquin isbededpanëdash.

Esus chococaid

(Mat. 27.57-61; Madc. 15.42-47; Uan 19.38-42)

50-51Adnubien ambobi nidaid Udea yacnocquid shubu dadpen icquid Adimatea yacnoshon tishaid Ose cuëmëdquid isadaidbon chuiquid utsibobëd iccuededquid abentsëc bëdambocquid icpanëdash. Adquid yec: Isadaidbo chuiquido utsibo: Esus uënës uamenuna, quesho tantiash: Padi. Uënës uamenquioctiadquidi naic, quebued Ose nepanëdash. Aidi Nuquin Papan Chomiaid chuiquid tapa yansho iste bunquin cainquidquio yec adpanëdash. 52Adquid icquin Esusën dada bedshun chococate bunquin Pidato yacno nidshun ambi tantiacpaden Osen chuipanëdash. 53Aden chiaquien Pidaton: Adotan, cac nidshun Esusën dada imbudshun dashcute bëdamboshëcquidën dataneshun badedquio buanshun macuësh tapa tsimpiduc cuënote shëcuë uaquin ambi nacnenmiaid utsi chococacmaidënquio Osen Esusën dada chococapanëdash. 54Inchëshbudtsëqui 6 yannuc: Chonoadtemaid uëshë yanec, queshun Esusën dada Osen aden chococapanëdash.

55Aden chococasho isec Cadidea yacnouësh Esusbëd chobuedo chidobon Ose tsibananshun Esusën dada shëcuën nauedshun nanac uesho isbededpanëdash. 56Aden isash aton shubuno chochoshon: Nuadte bëdan Esusën dada danoshcatannu, quequin bedshun danoshquete chidobon nacnempanëdash. Nacnenash inchëshbudtsëqui 6 yannuc: Nuquin Papan chiacpadec chonoadtemaid uëshë yanosh, quiash Esus nauedacno padpidec nidabi Nuquin Papan chiampicpadec tabadpanëdash.

Currently Selected:

Ducas 23: mcfNT

Highlight

Copy