Matey 25

Jun techil kyiꞌjjo lajaj txin

1Kyojjo qꞌij anetziꞌn, a Tkawbꞌil Dios toj kyaꞌj, ikyxjo tzeꞌnku lajaj txin, i xiꞌ toj jun mejebꞌlin. Xi kynojsin kytzaj tukꞌa aseyt, tej kyxiꞌ yolte qꞌa.#Lc. 12:35. 2Kyxoljo txin, attaq jweꞌ ntiꞌ kynabꞌl, ex ayetziꞌn jweꞌtl manyor ẍtijqe. 3Ayetziꞌn ntiꞌ kynabꞌl xi kyiꞌn kytzaj, me mi xi kyiꞌne chꞌintl kyaseyt. 4Me ayetziꞌn ẍtij, xi kynojsinl tkꞌwel kyaseyt, ex xi kyiꞌn junx tukꞌa kytzaj. 5Me mix jaꞌ pone tej qꞌa liwey, ex bꞌeꞌx bꞌaj tzaj kywatl kykyaqilx, ex bꞌeꞌx i xiꞌ ktal.

6Me atzaj teꞌ tnikyꞌjin aqꞌwil, xi kybꞌiꞌn jun aꞌla tjaw ẍchꞌin: ¡Luꞌ qꞌa tzul! ¡Ku kytzaja kꞌlelte! chiꞌ.

7I bꞌaj jaw weꞌksjo txin kykyaqilx, ex i bꞌaj ok ten txqol kytzaj. 8Me ayetzin kyeꞌ jweꞌtl ntiꞌ kynabꞌl xi kyqꞌmaꞌn kye ẍtij: Kyqꞌontz chꞌin qeꞌ qaseyt tiꞌjjo kyeꞌ, quꞌn chꞌix tkubꞌ yupj qtzaja, chi chiꞌ.

9Me ayetzin kye txin ẍtij xi kyqꞌmaꞌn kye: ¡Mina! Quꞌn nlaypela kanin qe. ¿Yajtzilaꞌ tuꞌn t-xi qqꞌoꞌntza chꞌin kyeꞌ? Qalaꞌ ku kyxiꞌy jaꞌ nkꞌayajtze, ex kꞌaꞌ tzaj kylaqꞌoꞌn chꞌintla.

10Me noqx ncheꞌxku kyej jweꞌ txin, a ntiꞌ kynabꞌl, laqꞌol kyaseyt, teꞌ tkaniꞌn qꞌa. Ayetzin kyeꞌ jweꞌ txin, quꞌn mix ele bꞌete kyeꞌ, bꞌeꞌx i okx tuja toj mejebꞌlin, ex bꞌeꞌx etz kyjpuꞌn ja.

11Maꞌytaq chꞌintl, tej kykanin kyej jweꞌ, ex i okx qꞌolbꞌin: Tata, tata, jqonkxjiy ja qeꞌy, chi chiꞌ.

12Me atziꞌn xi tqꞌmaꞌn tajaw ja kye: Twutzxix kxel nqꞌmaꞌn kyeꞌy, ntiꞌ kyokliꞌn tuꞌn kyoktza, chiꞌ.#Lc. 13:25.

13Tuꞌnpetziꞌn, xi tqꞌmaꞌn Jesús kye: Noq tzaj kywatla toj kynimbꞌila, quꞌn mi bꞌiꞌn kyuꞌn tiꞌ qꞌijil mo alkye or chin ula, ayiꞌn Tkꞌwal Ichin, chiꞌ.#Mt. 24:42; Mr. 13:33; Lc. 12:35-40.

Jun techil tuꞌn Jesús, tuꞌn tok tilil quꞌn toj qchwinqil

(Lc. 19:11-27)

14Ex ikyxjo, a Tkawbꞌil Dios toj kyaꞌj, tzeꞌnku jun xjal, tuꞌntaq t-xiꞌ toj jun tbꞌe najchaq. I tzaj ttxkoꞌn taqꞌnil, ex xi toqxenin tpwaq kye. 15Te jun, xi tqꞌoꞌn jweꞌ mil; te juntl kabꞌe mil, ex te juntl, noq jun mil, teyile junjun xi tqꞌoꞌn tzeꞌnkux kynabꞌl. Ex bꞌeꞌxsin xiꞌtz toj tbꞌe.

16Me ante aqꞌnil, a xi ttzyuꞌn jweꞌ mil pwaq, bꞌeꞌx kubꞌ tqꞌoꞌn tkꞌaẍjil, tuꞌn tchꞌiy pwaq. Ex bꞌeꞌx tkanbꞌe jweꞌtl mil. 17Ex ikyx tene tuꞌn, a xi ttzyuꞌn kabꞌe mil; ex tkanbꞌe jun kabꞌetl tibꞌaj. 18Me anteꞌ xi tzyuꞌnte jun mil, bꞌeꞌx xiꞌ ewil teꞌ tpwaq tajaw toj jun jul, ex kux tmiquꞌn toj txꞌotxꞌ.

19Tbꞌajlinxiꞌ jun jteꞌbꞌin abꞌqꞌe, meltzꞌajljo xjal, a kyajawjo aqꞌnil, ex bꞌaj xi tqanin tpwaq teyile junjun tukꞌaxjo taꞌl.

20Nejxix xi xkye tukꞌaꞌ xi tzyuꞌnte jweꞌ mil, ex xi tqꞌoꞌn jweꞌ mil te tajaw tukꞌaxjo juntl jweꞌ miltl, a otaq kanbꞌit tuꞌn. Ex xi tqꞌmaꞌn te: Taa, jweꞌ mil tzaj tqꞌoꞌn weꞌy. Me luꞌ juntl jweꞌ miltl, ma nkanbꞌiy tukꞌa.

21Me antej tajaw pwaq xi tqꞌmaꞌn: Chjontiy. Jun aqꞌnil, a tbꞌanilx wen ex tzꞌaqlexix. Atzin jaꞌlin, quꞌn tuꞌn nimx xbꞌant tuꞌn tukꞌa tal chꞌin, nimxixtl kxel nqꞌoꞌn tey. Ku toktza ex ku ttzalaja wukꞌiy.

22Atzaj teꞌ tkanin juntl aqꞌnil, a xi ttzyuꞌn teꞌ kabꞌe mil pwaq, xi tqꞌmaꞌn: Taa, kabꞌe mil tzaj tqꞌoꞌn weꞌy. Me luꞌ juntl kabꞌe miltl lo, ma nkanbꞌiy tukꞌa.

23Xi tqꞌmaꞌn tajaw pwaq te: Chjontiy. Jun aqꞌnil, a tbꞌanilx wen ex tzꞌaqlexix. Atzin jaꞌlin, quꞌn tuꞌn nimx xbꞌant tuꞌn tukꞌa tal chꞌin, nimxixtl kxel nqꞌoꞌn tey. Ku toktza ex ku ttzalaja wukꞌiy.#Mt. 25:21.

24Atzaj teꞌ tkanin aqꞌnil, a xi tzyuꞌnte jun mil, xi tqꞌmaꞌn te tajaw: Taa, bꞌiꞌn wuꞌn qa ay jun xjal kuj, ex qa njyet jun tpwaqa noq tuꞌn taqꞌnbꞌin juntl, ex at tey, me mi n-aqꞌniꞌn. 25Tuꞌnpetziꞌn, bꞌeꞌx in tzaj xobꞌa tey, qa xnajku pwaq wuꞌn. Tuꞌnpetziꞌn bꞌeꞌx xkux nmiquꞌn toj txꞌotxꞌ. Ex luꞌ tpwaqa lo.

26Atzin xi tqꞌmaꞌn tajaw pwaq te: Jun aqꞌnil, a nya bꞌaꞌn, ex manyor kyꞌajxa. Qa bꞌiꞌntaq tuꞌn, qa at npwaqa noq tuꞌn taqꞌnbꞌin juntl, ex qa at weꞌy, tuꞌn mi nchin aqꞌniꞌn; 27tuꞌnpetziꞌn, noqit bꞌeꞌx s-okx tqꞌonjiy npwaqa toj nim ja te kꞌuꞌbꞌl pwaq, tuꞌntzintla, tej ẍin ula jaꞌlin, matla tzꞌetz wiꞌn weꞌ npwaq, ex matla tkanbꞌe manbꞌilte.

28Ex xi tqꞌmaꞌn kyeꞌ iteꞌtaq antza: Kyimiljiꞌy ajo mil pwaq te, ex kyqꞌonxa te a at lajaj mil tukꞌa. 29Quꞌn ankyeꞌ at nim te, ex kyjaꞌ kxele txqantl teꞌ, tuꞌn mi bꞌajix. Me anteꞌ, a ntiꞌ at te, majxpeꞌ tal chꞌinl at te, k-elil qꞌiyit.#Mt. 13:12; Mr. 4:25; Lc. 8:18. 30Ex atziꞌn aqꞌnil ntiꞌ tajbꞌin, kyqꞌomixa tzma peꞌn toj qxopin kyukꞌa jniꞌ nya nimil, a jaꞌ kchi oqꞌile ex jaꞌ kchi juꞌchꞌile kyste tuꞌn kyixkꞌoj.#Mt. 8:12; 22:13; Lc. 13:28.

Aj kyok kykyaqilxjal toj paꞌbꞌin twutz Jesús

31Ok tenl Jesús qꞌmalte: Aj wula, a ayiꞌn Tkꞌwal Ichin, kchin ula tukꞌa nim nqoptzꞌajiyila ex kyukꞌa kykyaqil n-angela wukꞌiy. Ex kchin kꞌwel qeꞌy tibꞌaj nqꞌuqbꞌila kawil kyibꞌaj kykyaqil tukꞌa tkyaqil nqoptzꞌajiyila. 32Ex tkyaqil xjal toj tkyaqil twutz txꞌotxꞌ kchi ul chmet nwutza, ex kchi elil npaꞌnjiꞌy xjal jun tukꞌa juntl, tzeꞌnku jun kyikꞌlel nchi el tpaꞌn rit kyxol chiv.#Mt. 16:27; Ro. 14:10. 33Kchi kꞌwel nqꞌoꞌnjiꞌy aye wen xjal, ayeꞌ tzeꞌnqekuꞌ rit, toj nman qꞌobꞌa, ex ayetziꞌn nya wen, ayeꞌ tzeꞌnqekuꞌ chiv, toj nẍnayaja.

34Ex kxel nqꞌmaꞌn ayiꞌn, a Nmaq Kawil, kye ayeꞌ iteꞌ toj nman qꞌobꞌa: Ku kytzaja, ayiꞌy ma chi kubꞌ kyꞌiwliꞌn tuꞌn nMaꞌn. Kyetzinxjiꞌy kyokliꞌn tiꞌjjo tbꞌanilxix Tkawbꞌil nMaꞌn, a bꞌinchin te kyeꞌy, atxix teꞌ tkubꞌku xkye twutz txꞌotxꞌ. 35Quꞌn tej ttzaj qꞌaqꞌin nkꞌuꞌja, tzaj kyqꞌoꞌn nwaꞌy. Ex tej ttzaj kꞌwaj wiꞌja, tzaj kyqꞌoꞌn nkꞌwaꞌy. Tej woka bꞌetin xjal, tzaj kyqꞌoꞌn nwatbꞌila. 36Ex tej tel bꞌaj nxbꞌaliꞌn, ma chin ok kyktxuꞌn.#Ez. 18:7. Ex tej nyabꞌtiꞌy, chi txaꞌja qꞌolbꞌil weꞌy. Ex tej nkuꞌxa toj tze, chi txaꞌja lol weꞌy.#Eb. 13:3.

37Ex ayetziꞌn tzꞌaqleqe kchi xel qaninte te: QAjaw, ¿Jtojetzin xqliꞌy ay tukꞌa waꞌyaj, ex ma txi qqꞌoꞌn twaꞌy? ¿Jtojetzin xqliꞌy ay tukꞌa kꞌwaj, ex ma txi qqꞌoꞌn tkꞌwaꞌy? 38¿Jtojetzin xqliꞌy ay ma tzꞌoka te bꞌetin xjal, ex matla txi qqꞌoꞌn twatbꞌila; ex jaꞌtzin xqlaꞌyiꞌy ay ntiꞌt t-xbꞌaliꞌn tok, ex matla txi qqꞌoꞌn? 39¿Ex jtojetzin xqliꞌy tuꞌn tyabꞌtiy mo qa tkuxa toj tze, ex o xtajatlaꞌy loltiꞌy?

40Twutzxix kxel nqꞌmaꞌn ayiꞌn, a nmaq kawil, kyeꞌy: Ex okxix kxel nqꞌmaꞌn kyeꞌy, tkyaqilxjo xkubꞌ kybꞌinchiꞌn tiꞌj jun tal yaj mo tiꞌj jun aꞌla, a kꞌuꞌjlinkxix wuꞌn, toj twutz Dios, wiꞌja s-oke kybꞌinchiniꞌy.

41Ex ikyxjo kxel nqꞌmaꞌn kye iteꞌ toj nẍnayaja: Ku kyela nkꞌatza, quꞌn ma chi kyija tjaqꞌ tqanbꞌil nMaꞌn. Ku kyxiꞌy toj qꞌaqꞌ, a mixla k-yupjilx, bꞌinchinl te kawbꞌil kujxix te tajaw il exqetziꞌn jniꞌ taqꞌnil. 42Quꞌn tej tqꞌaqꞌin nkꞌuꞌja, mix tzaje kyqꞌoꞌn nwaꞌy. Ex tej ttzaj kꞌwaj wiꞌja, mix tzaje kyqꞌoꞌn nkꞌwaꞌy. 43Tej woka bꞌetin xjal, mix tzaja kyqꞌoꞌn nwatbꞌila. Ex tej tel bꞌaj nxbꞌaliꞌn, mix in oka kyktxuꞌn. Ex tej nyabꞌtiꞌy, mix i xtajiꞌy qꞌolbꞌil weꞌy. Ex tej nkuꞌxa toj tze, mix i xtajiꞌy lol weꞌy.

44Tuꞌnpetziꞌn, kxel kyqanin: Tata, ¿Jtojetzin xqlontiꞌy tukꞌa waꞌyaj mo qa tukꞌa kꞌwaj, ex tzeꞌn jun bꞌetin xjal, mo qa ntiꞌ t-xbꞌalinja, ex qa yabꞌja mo qa toj tze, ex mix qo mojiꞌn tiꞌja?

45Me kxel ntzaqꞌwiꞌn: Okxix kxel nqꞌmaꞌn kyeꞌy, tkyaqilxjo mi s-ok kybꞌinchiꞌn kyiꞌjjo tal yaj, mo tiꞌj jun aꞌlaj, ayeꞌ kꞌuꞌjlinqexix wuꞌn; toj twutz Dios, wiꞌja mi s-oke kybꞌinchiniꞌy.

46Ayetziꞌn xjal luꞌn kchi xeꞌl toj najin te jun majx. Me ayetziꞌn tzꞌaqleqe, kchi xeꞌl toj tkabꞌ kychwinqil, a nlayx bꞌaj.#Dan. 12:2.

Currently Selected:

Matey 25: mamC

Highlight

Copy