SAN JUAN 4

Jesús fako nijmi jngu chjun xi tseꞌe Samaria

1Xuta fariseo kjintꞌe en nga Jesús ngisa ꞌñu tjin ngisare xuta nga ko mare Juan ꞌba nga ngisa ꞌñu nkjin xuta tibatenda ngisa. 2(Ninga bi Jesús fa xi tibatenda xuta. Tu xutare xi ꞌba inyatsaꞌen.) 3ꞌBa kionga Jesús tsabe mé= xi kjintꞌe xuta fariseo, ꞌbatsaꞌen ꞌetju nangi Judea ꞌba jendiba ngani nangi Galilea.

4ꞌBa tjinnere nga kjuaꞌaxtiu nangi Samaria. 5ꞌBa ꞌbatsaꞌen jaꞌe Sicar, naxinanda xi tijña ngajinre nangi Samaria, naxinanda xi tijñatꞌa tiñare xuꞌba xi Jacob kitsjare kiꞌndire xi Kuse ꞌmi. 6ꞌBa kio tijña ngojo nandare Jacob, ꞌba Jesús kikꞌejñatꞌa ngojo nandabiu, ngatꞌa je jejndare nga tsuꞌba ngaya ndiyo. Jeru mején nyusen yaꞌa. 7ꞌBa kio jaꞌe jngu chjun xi tseꞌe Samaria xi jaꞌekꞌaxje nanda. ꞌBa Jesús kitsure:

—Taꞌechinaa̱ nanda xi kꞌuia̱.

8Ngu kui chubabiu bi tjinduko xutare, ngatꞌa xichine= kikatse ngajin naxinando.

9ꞌBa chjunbiu kitsure:

—¿Jótsaꞌen an techjaꞌanaa̱ nanda xi sꞌi, nga ji jngu xuta judío kuáin ꞌba nga an jngu= ña̱ chjun xi tseꞌe Samaria?

Chjunbiu kitsu kibi ngatꞌa bi nda yaꞌa xuta judío ko xuta xi tseꞌe Samaria.

10ꞌBa Jesús kitsingojore:

—Tsa ꞌyari mé= xi Naꞌenchana tsja ꞌba tsa ꞌyaxkuin ꞌyá= xi timiꞌari nanda, ji xjaꞌa_ri ꞌba kui sja=ri nanda xi tsjare kjuabenichun xuta.

11ꞌBa chjunbiu kitsu nganire:

—Ji naꞌen, tsajainri mé= xi kjuiꞌnaxjekoni nando, ꞌba ne nanga ngojo nando. Ngu, ¿ñá kꞌuinchjaꞌe nanda xi tsjare kjuabenichun xuta? 12¿A ngisa= je ngisai ji nga ko mare xuta chingana Jacob? Kui xi ꞌejñana ngojo nandabi, xi ndekui kitsꞌini nandare ꞌba ꞌba nde kitsꞌi kiꞌndire ko tjiuba xi kisꞌere.

13ꞌBa Jesús kitsure:

—Nitu ꞌya xi kꞌui nandabi ku̱axinda= nganire. 14Tunga xi kꞌui nanda xi an tsjaa̱ bi nde ku̱axinda ngisanire. Ngatꞌa nanda xi tsjaa̱, kui= xi ku̱an ngajin yojore xutabiu joni jngu ngojo nanda ña ngantsjai ꞌbetju tajngu nanda, ꞌba ꞌbatsaꞌen sjare kjuabenichun xi bi fetꞌa.

15ꞌBa chjunbiu kitsu:

—Naꞌen, taꞌena nandabiu, tuxi bi nde ku̱axinda ngisanina̱ ꞌba bi nde kjuaꞌekꞌexjeña̱ nanda ngaꞌe.

16ꞌBa Jesús kitsu nganire:

—Tꞌichjaꞌe xiꞌinri ꞌba ndekue ngaꞌe.

17—Tsajainna̱ xiꞌin —kitsu chjunbiu.

ꞌBa Jesús kitsure:

—Kjuakixi= xi tesji, nga tsajainri xiꞌin. 18Ngatꞌa je ón xiꞌin tsikenikue, ꞌba xi tenikue ngandaꞌe bi xiꞌinri mani. Kjuakixi= xi kisji.

19ꞌBa chjunbiu kitsure:

—Naꞌen, xuta chinga profeta=ru kuáin. 20Xuta chingani̱ kitsichjire Naꞌenchana ngaꞌe nindubi. Tunga jun mixun=ñu nga naxinanda Jerusalén= ngaꞌnde ña machjen nga sichjire Naꞌenchana.

21ꞌBa Jesús kitsure:

—Na, ngatjamakjainri mé= xi texinra̱. Kjuaꞌe nixtjin kionga bi nde kjaꞌeñu nindubi ꞌba bi nde kuanginñu naxinanda Jerusalén nga sichji_ru Naꞌenchana. 22Jun bi ꞌyo ꞌyá= xi nichji_ru. Tunga ji̱n ꞌya=ni ꞌyá= xi nichji_ri̱, ngatꞌa ngajinre xuta judío= ndibani xi sikꞌangi xuta. 23Tunga je tifaꞌe nixtjin ꞌba ngandaꞌe= nga xuta xi tsichji kjuakixire Naꞌenchana sichjire nga ko fani kjuakixi jotsaꞌen kuakuyare Isennixtjintsjere Naꞌenchana. Ngatꞌa kui= xuta xi ꞌbatsaꞌen mejénre Naꞌenchana nga sichjire. 24Naꞌenchana, kui= xi Isennixtjin. Kui kjuañu xi sichjire, tjinnere nga ko fani kjuakixi sichjire jotsaꞌen kuakuyare Isennixtjintsjere Naꞌenchana —kitsu Jesús.

25ꞌBa chjunbiu kitsure:

—ꞌBe=ña̱ nga kjuaꞌe Mesías (kui xi Cristo ꞌmi). ꞌBa kionga kui kjuaꞌe, kuetsuya yejena jó tsunire xi tjin.

26—Kui= ña̱, xi tifakori —kitsu Jesús.

27ꞌBa kio jaꞌe ngani xutare, ꞌba kuakunre nga Jesús tifako nijmi jngu chjun. Tunga niꞌyá kuán kakun tsiningiyare mé= xi mejénre asa mé= xi tifako nijmi chjunbiu. 28ꞌBa ꞌbatsaꞌen chjunbiu ꞌejña nisare ꞌba kiji ngajin naxinando nga kikeꞌere nijmi xuta ꞌba kitsu:

29—Ndechutsejen_ru jngu xuta xi kitsuna̱ ngayéje xi tu je kitsaꞌaa̱n. Ngu tsa kui= ni xi Cristo.

30ꞌBa ꞌbatsaꞌen ꞌetjutsiꞌi naxinando ꞌba kiji ña tijña Jesús. 31ꞌBa kionga chjunbiu kiji ngajin naxinando, xutare Jesús inyaꞌbetsꞌare nga inyatsure:

—Maestru, tinchjachi.

32Tunga Jesús kitsure:

—Tjin=na̱ xichine xi bi ꞌyo jun.

33ꞌBa ꞌbatsaꞌen xutare tsiningiyakañare xinkjin:

—¿A tjin= tsé xi jaꞌekore xichine?

34ꞌBa Jesús kitsure:

—Xi chinena̱, kui= nga saꞌaa̱n jotsaꞌen mejénre xi kitsikasenna̱ ꞌba nga sikꞌetjusaa̱n xa xi tseꞌe. 35¿A bi mixun jun: “Ñujun sa chaja ngisa nga kjuaꞌe chanre tsujmi ntjio”? Tunga an xin_nuu̱: Chjuꞌingiu tuxkún ꞌba chutsijon. Xuta xi ndiba jan jo=ni chan xi je jaꞌe nixtjinre, ꞌba je ku̱an sꞌe̱ku. 36Xi ꞌbeku cho̱n, kui= xi machjire. ꞌBa chan xi tiꞌbeku, kui xi tsunire xuta xi sꞌe̱re kjuabenichun xi bi fetꞌa. ꞌBa ꞌbatsaꞌen tujngu ngatatsitsja xi ꞌbentje ꞌba xi ꞌbeku cho̱n. 37Ngatꞌa kjuakixi= xi tsu en xi tsu: “Jngu xi ꞌbentje ꞌba kjaꞌere xi ꞌbeku.” 38An kitsikasen_nuu̱ nga kꞌueku chanre tsujmi ntje xi bi jun kikꞌengiu kjuanima. Kjaꞌe xi ꞌetutsꞌinre xo, tunga ko jun texuntsjo ngandaꞌe chjire xa xi kitsaꞌen —kitsu Jesús.

39ꞌBa nkjin= xuta xi tseꞌe Samaria xi tjindu ngaꞌndebiu kuakjainre ngatꞌare Jesús, ngatꞌa chjunbiu kitsu: “Kitsuna̱ ngayéje xi tu je kitsaꞌaa̱n.” 40ꞌBamani, kionga xuta xi tseꞌe Samaria jaꞌekun Jesús, tsiꞌare nga kꞌuejñako kio. ꞌBa jó nixtjin tsekꞌejña Jesús, 41ꞌba ꞌñu nkjin xuta kuakjain ngisare ngatꞌare en xi kinchja. 42ꞌBa xutabiu kitsure chjunbiu:

—Ngandaꞌe makjainni̱ bi tu ngatꞌare en xi kisji. Ngatꞌa ji̱n fani xi je kjinuꞌya_ri̱ ꞌba ꞌya=ni nga kjuakixi= nga kui= xi sikꞌangi xuta xi tseꞌe ngasunꞌndio.

Jesús tsinda kiꞌndire jngu xuta xi tsaꞌexatꞌare rey

43Kionga je jaꞌa jó nixtjin, Jesús ꞌetju kio ꞌba kiji ngani nangi Galilea. 44Ngatꞌa Jesús kitsuyakixi nga jngu profeta bi ꞌyakun ña nangire fa. 45ꞌBa kionga echu nangi Galilea, xuta xi kio tseꞌe kiskjebetjo, ngatꞌa tsabe ngayéje xi kitsaꞌen Jesús naxinanda Jerusalén ngajinre sꞌiu. Ngatꞌa ko kui kiji sꞌiu.

46ꞌBatsaꞌen echu ngani Jesús Caná, ngaꞌnde xi tijña ngajinre nangi Galilea, ña nando kitsaꞌenni binu. ꞌBa naxinanda Capernaum tijña jngu xuta xi tsaꞌexatꞌare rey xi ꞌñu tjiꞌme kiꞌndire. 47Kionga kui kjintꞌe en nga Jesús ꞌetju nangi Judea ꞌba nga jaꞌe nangi Galilea, ꞌbatsaꞌen jaꞌekun Jesús ꞌba ꞌetsꞌare nga kuaje ndaba, tuxi sindani kiꞌndire xi je mején kueya. 48ꞌBamani Jesús kitsure:

—Tsa bi xio kjuakun ko chuba xi bakutsejen kjuaꞌñure Naꞌenchana, bi ku̱akjainnu.

49ꞌBa xi tsaꞌexatꞌare rey kitsure:

—Naꞌen, tiꞌen kjuanda, ndibafanichi ndeꞌanire nga kje ꞌmejín kiꞌndina̱.

50ꞌBa kio Jesús kitsure:

—Tꞌin ngani niꞌyari. Je nda ngani kiꞌndiri.

ꞌBa xutabiu kuakjainre en xi kitsu Jesús ꞌba kiji. 51ꞌBa kionga je masen tjen ndiyo, kisatejin nchja chuꞌndare ꞌba kitsure:

—Je nda ngani kiꞌndiri.

52ꞌBatsaꞌen xutabiu tsiningiyare nchja chuꞌndare jó chun ꞌetutsꞌinre nga kuanda ngani kiꞌndire, ꞌba nchjabiu kitsingojore:

—Chuba jngu nga kuangixun ngujña ꞌetjukajinre chiꞌin ntꞌai kiꞌndiri.

53ꞌBatsaꞌen naꞌenre kiꞌndibiu jaꞌetsjenre nga kui= chubabiu nga Jesús kitsure: “Je nda ngani kiꞌndiri.” ꞌBa xutabiu ko ngatsiꞌi xi tjin ngaya ndaba kuakjainre ngatꞌare Jesús. 54Kui kjuakunbi xi majóni xi kitsaꞌen Jesús, kionga ꞌetju nangi Judea ꞌba jaꞌe ngani nangi Galilea.

Currently Selected:

SAN JUAN 4: vmy

Highlight

Copy