Lucas 11

Jesupi Ye'yapi, Maija'quëre Se̱ñe

(Mt 6.9-15; 7.7-11)

1Ti̱jupë Jesús Maija'quëre se̱ni tëjisi maca i̱ ye'yacohua'i aquëpi capi, i̱te. Ëjaë, ye'yajë̱'ë, Maija'quëre se̱ñe, Juan i̱ ye'yacohua'ire ye'yaquë pa'ise'eje̱.

2Caquëna, Jesupi sehuopi:

“Se̱cohua'i pani ñeje cajë̱'ë:

Yëquë Ja'quë ma'tëmo pa'iquë,

Më'ë mami de'oyere pa'ë.

Më'ë cua̱ñeñe daija̱quë yëquëna,

Më'ë yëyepi yo'oye pa'ija̱'quë, iye yejaje̱, ma'tëmo yo'oyeje̱ pa'ye.

3Iye mu'se a̱i ja̱'ñere i̱sijë̱'ë, caraye peoye.

4Yecohua'ipi yëquëni do'i pajëna, sa̱i de'huacaiyeje̱ pa'ye më'ëpi yëquë do'ire sa̱i de'huacaijë̱'ë.

Neñañe pa'ito më'ëpi co'ayere nejocaijë̱'ë.”

5Jesupi capi, ja̱ohua'ire:

“Mësaru aquëpi te'ire i̱ cajeire paquëni ja̱ëpi ñami jopo i̱ huë'ena dani caji, i̱te: ‘Cajei, toaso̱ a̱o i̱sijë̱'ë, co'yoja̱'quë a'ë.’ 6Yë'ë cajeipi yure ti̱taëna, a̱oñepi peoquëna, cayë, caji. 7Caquëna, tu'rihuëpi de sehuoquë casipi: ‘Jo̱sa da cayë. Eta sa'ro si̱osicoa. Jere më'ëre i̱sisi'quë coa huëiye'ni, tsi̱ ja̱'re u̱ini.’ 8Ja̱je casiquëta'a cajei pa'isi do'ire huëni i̱siye pa̱pi, coa jo̱sa jerepa se̱ma'quëni caquë huëni i̱sipi, si'aye i̱te carase'ere. 9Ja̱je pa'ina, yë'ëpi cayë, mësarute: Se̱jë'ë. Maija'quëpi i̱sija̱'quë api. Co'ejë ti̱'aja'cohua'i a'ë. Eta sa'rona të'cajëna, hui'yosipi. 10Ja̱je pa'ina, se̱quëpi i̱si cua̱ñoñe pa'iji. Cui'ne co'equëpi ti̱'añe pa'iji. Cui'ne eta sa'rona të'caquëni hui'yocaiye pa'iji.

11Mamaquëpi panre se̱ina, quë̱na përe i̱si'ñe pa'i a'ë mësaru aquë je̱'quë mamaquëre ¿panita'a hua'ire se̱ina, a̱ñani a̱o'ñe pa'i a'ë? 12¿Pa̱nita'a tsiapëre se̱ina, pu̱nini a̱o'ñe pa'i a'ë? Pa̱ni. 13Ñajë'ë. Mësaru co'acohua'ita'a mamajëre oijë de'oyere i̱sicohua'i a'ë. Ja̱je pa'iye sëte mësaru Ja'quë ai jerepa oiquë sëte i̱ de'o joyore pañu'u cajë se̱cohua'ire i̱sija̱'quë api.”

Jesupi Huati Tutupi Yo'oji, Coa Caye

(Mt 12.22-30; Mr 3.20-27)

14Yequë mu'seña huatipi coca cama'quëre nesiquëni Jesupi huatire eto sauna, coca capi, cama'quë pa'isiquëpi caquëna, ñajë jai pa̱i ai cuasahuë, merepa yo'o u'ni iye cajë. 15Yecohua'ipi cahuë:

“Huatiohua'i ëjaë Beelzebú tutupi yo'oji, iquë, huatire eto saoquëna, ñajë.”

16Yecohua'ipi pa̱i yo'o ti̱'a ma'ñe ma'tëmo ayere yo'o i̱ñojë'ë cajë se̱i'ë. 17Ja̱ se̱cohua'i cuasayere asaquëpi ja̱ohua'ire capi:

“Te'e yeja ëjaohua'ipi jopoja̱'a huasicohua'i pani sa̱'ñe uihuani co'ye i̱ohua'i yejare nejoñë. Cui'ne te'e caje tsëcapë pa'isicohua'ipi hua saisicohua'i pani sa̱ñope yo'ojë i̱ohua'ija̱'a peo hue̱'ña ne huesëyë. 18Satanáspi i̱ tsëcapëni sa̱ñope yo'oquë pani ¿me si'aohua'i cua̱ñe ti̱'añe pa'iquë'ni? Iye cayë, mësarupi yë'ëni Beelzebú tutupi huatire eto saoji cajëna. 19Ja̱je yë'ëpi Beelzebú tutupi yo'oquë pa'ito, ¿nepi mësarute tuicohua'ire tutu i̱siye'ni, huatiohua'ire eto sao ja̱'ñe? Ja̱je pa'ina, i̱ohua'ini mësarupi se̱ni asajë̱'ë, quëaja̱jë. 20Ja̱je pa'iquëta'are yë'ë cato Maija'quë tuture papi huatire eto saoquë yo'oyë. Ja̱je pa'ina, yë'ë yo'oye cato Maija'quë cua̱ñe te̱'tepi tsoe ti̱tapi caquë i̱ñoñe a'ë.

21Ai tutu quë'ipi cui'ñasiquë i̱ co'amañare de'oye ñaquë pa'ito, yecohua'ije̱ jioye peoji. 22Ja̱je pa'iquëta'are yequë ai jerepa tutu quë'ipi cacani i̱te quëco saoye pa'iji. Ja̱ maca si'aye i̱ quëcoquë uihua ja̱'ñere pase'e jioni i̱ tse̱ de'huaye pa'iji, i̱ pase'ere.

23Ja̱je pa'ina, yë'ë yo'oyere de'oji cacaima'quë cato yë'ëre sa̱ñope yo'oquë api, cui'ne yë'ë ja̱'re te'e tsi'soma'quë pani, coa ne tiya saoquë api.

Co'a Joyopi Cui'naona Co'iye

(Mt 12.43-45)

24Huatipi pa̱ini pa'isiquëpi eta saisiquë pani coa cue̱ne yejañare cu'iji, pëa hue̱'ñare co'equë. Ja̱je co'equë ti̱'ama'ë co'isi'i yë'ë etani daisi huë'ena cuasaji. 25Cani co'iquë ñaquëna, de'oyerepa yuani ne de'huase'eje̱ pa'ipi pa'iji. 26Pa'ina, ñani sani siete huatiohua'i i̱ jerepa co'acohua'i ja̱'re co̱ni cacani cui'naëna, pëasi maca yureta'a ja̱'në pa'ise'e se̱ña maca co'aquë pa'ija̱'quë api.”

Nuñerepa Sihuaye

27Jesús ja̱ yë'ta'a i̱tire caquëna, pa̱i jopopi nomiopi cuio:

“Më'ëre co̱ani ai de'huasico ai sihuaco pa'ico.”

28Ja̱je cacona, i̱pi capi:

“Ai jerepa sihuacohua'i pa'iyë, Maija'quë caye asacohua'ipi cui'ne sehuocohua'ipi.”

Co'acohua'ipi Se̱ñe, Pa̱i Yo'o Ti̱'a Ma'ñere

(Mt 12.38-42; Mr 8.12)

29Pa̱ipi Jesús quë̱no macana tsi'sini saijëna, i̱pi coca ca huëopi:

“Iye'në pa̱i co'acohua'i a'ë. Ja̱je pa'iohua'ipi se̱ñë, pa̱i yo'o ti̱'a ma'ñere yo'o i̱ñojë'ë cajë. Ja̱re se̱toje̱ Maija'quë yo'o ja̱'ñere quëacaiquë Jonás yo'oquë pa'ise'eje̱ pa'ye de'oye yo'o i̱ñoñe pa'iji. Mësaru yëyere i̱ñoñe peosipi. 30Jonás Nínive daripë pa̱ire Maija'quë case'ere i̱ñocaiquë paji'i. Cui'neje pa'isiquëpi yure Pa̱i Mamaquëpi yure pa'icohua'ire i̱ñoja'quëpi pa'iji. 31-32Nínive daripë pa'icohua'ipi pa̱i ñape yo'ose'e ña mu'se huëni iye'në pa̱ire sa̱ñope caja̱'cohua'i a'ë. Jonáspi Maija'quë cocare quëaquëna, asani ja̱'rë pa'ise'e je̱oni po̱nësi do'ipi. I̱ñore yure Jonásre tëto saisiquëpi pa'iji. Pa̱i ñape yo'ose'e ña mu'se pa'i maca iye pa̱ire i̱ohua'i yo'ose'eje̱ pa'ye sa̱i maca ti̱'aëna, huë'ehuë te̱'te pa̱i ëjaopi huëni nejoñe pa'iji caja̱'coa. I̱o so'o yejapi Salomón ta̱'ñe yo'oye asasi'i caco daisi do'ire. I̱ñore Salomón jerepa pa'ipi pa'iji, yure.

Maire Miacaiye

(Mt 5.15; 6.22-23)

33Toa tsë̱oni yahueye peoji, pa̱nita'a mahuë sa̱'nahuëna ayaye peoji. Ja̱je yo'oye pa̱jë coa ai jerepa ë̱mëje'ena nëcoyë, daicohua'ire miacaija̱'coni. 34Ca̱përe ñaco ca̱ miacaiye pa'iji. Ja̱je pa'ina, më'ë ñaco ca̱pi de'oyere ñañe pa'ito më ca̱pëje̱ de'oye miacaisico pa'iji. Ja̱je pa'iquëta'are më'ë ñaco ca̱pi co'ato si'a më'ë ca̱pëje̱ ai yo'oyere pa'iji. 35De'hua ñajë'ë, më'ë miañe pa'iyere, neañena po̱nëma'coni caquë. 36Ja̱je pa'ina, më'ë ca̱pëpi miañe jopore pa'ito si'aye ti̱ñarepa ñañe pa'iji, neañe peoto. Toa tsë̱ocopi miacaina, ñañeje pa'ye.”

Fariseohua'ire Cui'ne Cua̱ñese'e Ye'yacohua'ire Sa̱ñope Caye

(Mt 23.1-36; Mr 12.38-40; Lc 20.45-47)

37Jesús coca ca tëji maca, fariseopi Jesure huëopi, i̱ huë'ena a̱o sani a̱ijë'ë caquë. Huëouna, sani ja'rupi a̱o a̱i saihuëna. 38Ja'runa, fariseopi jë̱ña tsoajë̱'ë a̱ima'në cua̱ñese'ere yo'oma'aji'i, ñaquë cuasapi. 39Ja̱je cuasaquëna, Ëjaëpi capi, i̱te:

“Mësaru fariseo pa̱i cato coa ë̱mëje'e u̱cu duruhuë̱ase'e cui'ne quë̱na ne'ñase'e tsoacohua'i a'ë. Ja̱je yo'ocohua'ita'a sa̱'nahuë cato si'sio. Yecohua'i payere yëcohua'ipi cui'ne co'ayepi ti̱mësicohua'i a'ë. Mësaru cui'ne pa'iyë. 40Huesëohua'i, ña ma'ñe ë̱mëje'e nesiquëpi sa̱'nahuë ayeje̱ Maija'quëpi nese'e a'ë. 41Ja̱je pa'ina, peocohua'ina i̱sijë̱'ë, mësaru sa̱'nahuë payere. Ja̱je yo'oto si'aye tsoa to̱se'e pa'ija̱'coa.

42Teayerepa mësaru fariseo pa̱i maña. Mësarupi diez topë̱a neni te'ore Maija'quëna i̱siyë, a̱iñena huëo së̱ñe nejë a̱iñere, cui'ne ta̱se'e co̱ni. Ja̱je de'oye yo'ojëta'a nuñerepa de'oye yo'oyere cui'ne Maija'quë oiyeje̱ pa'ye yo'oyere peocohua'ipi pa'iyë. Ja̱je pa'ina, iyere yo'oye pa'iji, mësaru tsoe de'oye yo'oyena co̱ni.

43¡Teayerepa mësaru fariseo, pa̱i maña! Pa̱i tsi'si huë̱'ñare de'o saire ñu'ijëna, ñajë pa̱ipi jerepa pa'iohua'i a'ë caja̱jë cuasacohua'i a'ë, cui'ne co'amaña huero hue̱'ñare nëcajëna, jai pa̱i i̱ti maca ñacohua'ipi jerepa pa'iohua'i a'ë cajë de'oye pëpaja̱jë cajë, mësaruje̱ teaye yo'ocohua'i a'ë.

44Cua̱ñese'e ye'yacohua'i cui'ne fariseo pa̱i co̱ni teayerepa coa cacohua'i a'ni, ta̱si daripëje̱ pa'iohua'ini, pa̱i ñama'pë tsa'cujë si'si neñeje yo'oyë.”

45Ja̱je caquëna, cua̱ñese'e ye'yaquëpi ñeje caquë sa̱ñope sehuopi:

“Ye'yaquë, ja̱je më'ë cani yëquëreje̱ tea ju̱'i cayë.”

46Ja̱je caquëna, Jesupi sehuopi:

“Teayerepa mësaruje̱ cua̱ñese'e ye'yacohua'ije̱ yo'oyë. Yecohua'ise'ere dëquë co'amañare hue'ocaiyë. Ja̱je yo'ojëta'a mësarupi te'e moño macaje̱ se co̱caiye coecohua'i a'ë.

47Maija'quë yo'o ja̱'ñere quëacaicohua'ire ja̱re mësaru aiohua'ipi huani je̱oni ta̱si daripë̱are mësaru teayerepa ne de'huacohua'i a'ë. 48Ja̱je yo'ojë mësaru aipë yo'ose'ere de'oji cuasajë yo'oye ñañe pa'iji, mësarupi i̱ohua'i huani ta̱si daripë̱are ne de'huajëna.

49Ja̱je pa'ina, Maija'quë i̱ ta̱'ñe asayepi capi: ‘Jëjo saoja̱'quë a'ë yequë mu'se yo'o ja̱'ñere ca nëocohua'ire cui'ne sahuani yë'ë coca quëacohua'ire nesicohua'ireje̱ ja̱ohua'ini huani je̱aja'cohua'i a'ë, yecohua'ini coa jo̱sa yo'ojë.’ 50Ja̱je pa'ina, yeja de'huasi macapi i̱te quëacaicohua'ire huaisi do'ire yure pa'i pa̱ini Maija'quëpi se̱ja'quë api. 51Abelre huaisi macapi cui'ne Sacariare huaisi macaja̱'a acohua'i do'ire yëi ñamare ëo hue̱'ñana cui'ne Maija'quëre se̱ huë'ena joporepa. Ja̱je pa'ina, nuñerepa cayë quëapi, yure pa'i pa̱ina se̱ja'quë api, tsie do'ire.

52Teayerepa mësaru cua̱ñese'e ye'yacohua'i nuñerepa cocare yahueyë. Ja̱je yo'ojë coejë yecohua'i asañu'u cajë yëcohua'ireje̱ ë̱sejë sa̱ñope yo'oyë, mësarupi.”

53Ñeje Jesús caquëna, asani cua̱ñese'e ye'yacohua'i cui'ne fariseohua'i ai pë̱titei'ë. Ja̱je pa'ijë jaiye se̱ huëohuë. 54Se̱jëna, tayo sehuouna, ñani tse̱añu'u, co'aquë api caja̱jë cuasajë.

Currently Selected:

Lucas 11: sey

Highlight

Copy