Lucas 20

Jesús Cua̱ñeñerepa Pa'iye

(Mt 21.23-27; Mr 11.27-33)

1Te'e mu'se Jesús Maija'quëre se̱ huë'ere pa̱ire ye'yaquë cui'ne huaso cocare quëaquë pa'ina, ti̱tahuë, Maija'quë huë'e ñacaicohua'i ëjaohua'i, cua̱ñese'e ye'yacohua'i cui'ne aiohua'i co̱ni. 2Ja̱ohua'ipi ti̱tani cahuë:

“¿Quëajë̱'ë, i̱que tutupi cua̱ñequërepa pa'i yo'oquë'ni, iye? ¿I̱queipi iye cua̱ñe tutu i̱sina, yo'oquë'ni?”

3Cajëna, ja̱ maca Jesupi ja̱ohua'ire capi:

“Yë'ëre cui'ne se̱si'i, mësarute. Sehuojë̱'ë, yë'ë cato: 4¿Nepi cua̱ñere'ni, Juan oco doquë pa'i ja̱'ñe? ¿Maija'quë pa̱nita'a pa̱i?”

5Caquëna, sehuoye pa̱jë coa sa̱'ñe i̱ohua'ija̱'a cahuë, ñeje:

“¿Me caja̱'cohua'i a'ni? Maipi Maija'quëpi jëjo daopi cacohua'i pa'ito i̱pi sehuoja̱'quë pa'ini: ‘¿Ja̱je pa'ita'are me yo'ojë sehuoye pa̱re'ni?’ 6Cui'ne maipi pa̱ipi cua̱ñesiquë paji'i catoje̱, si'a pa̱i huëni maire quë̱na pë̱api je̱ajë huani je̱aja'cohua'i pa'ini, si'aohua'i Juanre Maija'quë coca quëaquërepa paji'i cuasajë cahuë.”

7Ja̱je cuasani cahuë: “Huesëyë. Ne sa'api Juanre oco doquë pa'i ja̱'ñe cua̱ñehuë.” 8Cajëna, Jesuje̱ capi, ja̱ohua'ire:

“Yë'ëje̱ mësaru se̱se'e quëaye pa̱ñë.”

Co'acohua'i Yo'oye Ayere Quëaye

(Mt 21.33-44; Mr 12.1-11)

9Ja̱ jeteyo'je Jesús pa̱ire coca ca huëopi. Pa̱i yo'oyeje̱ pa'ye neni quëapi, ñeje:

“Paji'i, te'i tsio paquëpi cuiya'i ta̱ni i̱ co'amaña necaicohua'ina i̱si nëoni sani huesëquë. 10Tëaye ti̱'asi maca saisiquëpi i̱ jo'yaëre jëjo daopi, co'amaña necaicohua'ire se̱ni tëani dajë̱'ë, yë'ëre nëocaise'ere caquë. Ja̱je cani jëjo daosiquëni ja̱ohua'ipi coa tarapi të'cani jëjo saohuë, peoquëre. 11Ja̱ maca i̱ti tse̱ aquëpi yequë jo'yaëre jëjo dao co̱pi. Cui'ne ja̱ëteje̱ tarapi të'cani jëjo saohuë, ti i̱sima'pë. 12I̱ti tse̱ aquëpi ti̱jupë yequë jo'yaëre jëjo daoruje̱ co'amaña necaicohua'ipi ñani ja̱ëteje̱ të'cani hue'sena quërë eto saohuë, pë̱ijë. 13Ja̱ maca ña jujani i̱ti yeja tse̱ aquë capi: ‘¿Me neñe ja̱je pa'ito? cani i̱ oi mamaquëre pani jëjo saopi. Ja̱ëni ñanita'a ca'rajë de'oye sehuoja̱'cohua'i a'ë.’ 14Jëjo saouna, i̱pi ti̱'aquëna, tsio ñacaicohua'ipi ñani sa̱'ñe cahuë: ‘Iquëpi iye tsio tse̱ aquë de'oja̱'quë api, huani je̱oñu'u. Ja̱je yo'oni ti ñese maipi i̱ti tse̱ acohua'i de'oñu'u cahuë.’ 15Ja̱je cani tsio peo hue̱'ñana etoni i̱te huani je̱ohuë.”

Ja̱je quëani Jesupi se̱ji'i:

“¿Ja̱je yo'osi do'i me yo'oja̱'quë a'ni, i̱ti tsio aquë ja̱ohua'ire?”

16Cani capi, i̱pi:

“Dani co'amaña necohua'ire huani je̱ani yecohua'ina i̱sija̱'quë api, i̱ yeja.”

Ja̱je caquëna, iyere asani cahuë:

“¡Ja̱je yo'oto Maija'quëje̱ coeni!”

17Ja̱je cajëna, Jesús i̱ohua'ire ñani capi:

“Ja̱je mësaru cuasato, ¿i̱quere caquë'ni, toya pëpë, pa'iye ñañu'u? Ñeje caji:

Huë'e necaicohua'i ne jujani nejosi quë̱na pëpi

Ja̱opi yure quë̱na pë i̱orepa pa'iji.

18Ja̱o quë̱na pë ë̱mëje'na pa̱ipi to̱mecohua'i pani, to̱me jë'yeye pa'iji. Cui'ne quë̱na pëpi pa̱i ë̱mëje'na to̱meco pani peo së̱pë̱arepa neñe pa'iji.”

Pa'i Do'ire Sa̱iñe Ayere Ye'yese'e

(Mt 21.45-46; 22.15-22; Mr 12.12-17)

19Maija'quë huë'e ñacaicohua'i ëjaohua'i cui'ne cua̱ñese'e ye'yacohua'i Jesure i̱ti macapi tse̱ani coñu'u maini caquë ja̱je quëaji. Cuasajëta'a pa̱ini ca'rajë yo'oye pa̱huë. 20Ja̱ maca yahue de'o pa̱irepa cayeje̱ cajë coa cosoja̱'cohua'ire jëjo saohuë. Ja̱ohua'ipi se̱jëna, i̱pi tayo caëna, ja̱ do'ire pa̱i ëjaëna tse̱ani i̱siñu'u cajë. 21I̱te se̱ni ñañu'u cajë saisicohua'ipi cahuë:

“Ye'yaquë, më'ë pa̱ire nuñerepa caquë ye'yaquëpi cui'ne pa̱ireje̱ si'ahua'ire si'a yë'quë maca caquëpi coa ai jerepa nuñere pare Maija'quë cocare ye'yaquëna, asayë, yëquë. 22Ja̱je pa'ina, se̱ñë. Quëajë̱'ë: ¿De'oquë pa'i do'ire pa̱i ëjaë Césarna sa̱iñe, pa̱nita'a co'aquë?”

23Cajë se̱jëna, tsoe Jesús asapi, i̱ohua'i co'aye cuasajë se̱ñe. Ja̱je ñani capi:

“¿Me yo'ojë yë'ëre ja̱je neñañu'u cajë yo'oye'ni? 24I̱ñojë'ë, curiquë të'quire. ¿Ne tsiare hue'eco'ni? ¿Cui'ne ne mamire toyase'eje̱ hue'eco'ni?” Caquëna, i̱ohua'ipi sehuohuë:

“Romano pa̱i ëjaë mamire toyasicoa.”

25Cajëna, ja̱ maca i̱pi capi:

“Ja̱je pa'ito i̱sijë̱'ë, romano pa̱i ëjaëna i̱ tse̱co pa'ito. Cui'ne Maija'quë tse̱ pa'ito Maija'quëna i̱sijë̱'ë.”

26Ja̱je pa̱i ña hue̱'ñana si'aye i̱ohua'i cosojë neñu'u cajë yo'ose'ere sehuoquëna, ñani ai ta̱'ñe asaji cuasajë ca'rajë jerepa cama'pë paë'ë.

Ju̱'isicohua'i Huëiye Pa'iquë Cajë Se̱ñe

(Mt 22.23-33; Mr 12.18-27)

27Jeteyo'je Saduceohua'ipi Jesure sani ñahuë. Ja̱ohua'i Saduceohua'i cato ju̱'isicohua'i huëiye peoji cacohua'i paë'ë. Ja̱je pa'iohua'ipi cahuë, Jesure:

28“Ye'yaquë, Moisés toyani yëquëre je̱ocaji'i, ñeje: Te'i ë̱mëpi mamajëre pama'ë nëjore je̱oni ju̱'isiquë pa'ito i̱ yo'jeipi hua'jeore huejani mamajëre pacaiye pa'iji, maja'yë do'ire, toyapi careña. 29Ja̱je pa'ina, te'e tsëcapëre siete ë̱mëohua'ipi ñeje yo'ohuë: Maja'yëpi huejapi. Huejani mamajëre peoquë ju̱ji'i. 30Ju̱quëna, jeteyo'je aquëpi hua'jeore huejani cui'ne ja̱ëje ju̱ji'i, mamajëre peoquë. 31Ja̱ maca toaso̱ñe aquëpi huejapi i̱ote ja̱ëje cui'ne yo'opi. Ja̱re ja̱jese'e siete pa'iohua'i huejajë mamajëre peocohua'i ju̱ju sahuë. 32Ai jeteyo'jerepa nomio ju̱co'ë. 33Ja̱je pa'ito ju̱'isicohua'i huëi maca ¿nepi ja̱ote nëjore paja̱'cohua'i a'ni, si'ahua'i siete pa'iohua'i huejasicore?”

34Cajëna, ja̱ maca Jesupi sehuopi, ja̱ohua'ire:

“Iye yeja cato ë̱mëohua'i cui'ne nomiohua'i huejajë. Cui'ne nomiohua'ire huejojë yo'oyë. 35Ja̱je pa'iquëta'are sehuosicohua'ipi ju̱'isicohua'ipi huëisicohua'ipi ma'tëmo ti̱'ani huejaye peoji, cui'ne mamajëre pajë huejoye peoji. 36Ja̱ro cato hui̱ñaohua'ije̱ pa'iohua'i pa'ija̱'cohua'i a'ë ju̱'isicohua'ipi huëisi do'ire Maija'quë mamajërepa pa'ija̱'cohua'i a'ë, ju̱'ima'cohua'i. 37Ja̱je pa'ina, so̱quë yëpi tsë̱'isi maca, Moisés ñaquë pa'ise'ere toyase'e acopi caji, ñeje: ‘Ëjaëpi ca'a̱ji'i. Yë'ë cato Abraham, Isaac, Jacobo, Diusu a'ë. Ja̱ do'ire asayë, ju̱'isicohua'ipi huajëcohua'i huëiye.’ 38Ja̱je pa'ina, Maija'quë ju̱'isicohua'i Diusu peoji, coa ai jerepa huajëcohua'i Diusupi. Ja̱je pa'ina, i̱te cato si'ahua'i huajëcohua'ise'e pa'iyë. Peoji, ju̱'isiquë i̱pi ñato.”

39Ja̱ maca cua̱ñese'e ye'yacohua'i acohua'ipi cahuë:

“Ye'yaquë, de'oyerepa cahuë, më'ë.”

40Ja̱je cani ai jerepa jaiye se̱ñe pa̱huë, ca'rajë.

Ne Mamaquë A'ni, Cristo

(Mt 22.41-46; Mr 12.35-37)

41Jesupi capi, ja̱ohua'ire:

“¿Me yo'ojë Cristore David tsëcapë api caye'ni? 42Ja̱je i̱pi David ñeje casiquëta'are Salmos toya pëpëna:

Ëjaëpi capi, yë'ë Ëjaëre:

Ja'rujë̱'ë, yë'ë ëja te̱'tena.

43Më'ëre sa̱ñope yo'ocohua'ire yë'ëpi më'ë quë̱o të'ya me macaja̱'a.

44¿Ja̱je pa'ito me yo'oquë Cristo David tsëcapë aquë pa'iquë'ni, tsoe ja̱re i̱pi Davidpi Yë'ë Ëjaë cato?”

Ju̱'isicohua'i Huëiye Ayere Se̱ñe

(Mt 23.1-36; Mr 12.38-40; Lc 11.37-54)

45Si'a pa̱i asahuë, Jesús i̱ ye'yacohua'ire ja̱je cajëna:

46“Cua̱ñese'e ye'yacohua'i cato tsoa ca̱ña su̱ñani cui'ne de'oyerepa jai pa̱i pa'i hue̱'ñapi pëpajëna, cu'iyere yëcohua'i a'ë, cui'ne pa̱i tsi'si huë̱'ñaje ai de'o ñu'i saina co'ejë ja'ruyere yëcohua'i a'ë, jerepa pa'iohua'i a'ë cajë. Ja̱je yo'oye mësaruta'a de'hua ñajë'ë. Cui'neje yo'oma'pë pañu'u cajë. 47Cui'ne hua'jeohua'ireje̱ i̱ohua'i huë̱'ña jiojë yo'ocohua'i a'ë, cui'ne pa̱ipi de'ocohua'i a'ë caja̱jë cajë, tsoerepa se̱cohua'i a'ë. Ja̱je pa'ina, ja̱ohua'i a'ë, i̱ti co'ayerepa sa̱i cua̱ñoja'cohua'i.”

Currently Selected:

Lucas 20: sey

Highlight

Copy