Lucas 1

1Ibuneda Teófilo, mi peje su ye quirica yama ebeituinia pamapa Jesús ja ecuana duju su atana cuana equisa puji. 2Jesús batana cuana ja tu ai atana cuana ema quisaenitana. Tuneda Cristo sa quisa saida cuana quisaquisa putana. 3Saida yama pibana tueda ai cuana edere puji, pamapa tueda ai cuana yama butsepi quisachacuana putsu. Beju jiahue cuaja pupirume puana pamapa tueda ai cuana yama butsepi edereinia mi etiame puji. 4Ye quirica mi etiameinia mi buetsuatana Cristo jepuiti ai cuana saida eshanapa puji. Beju jiahue mida yama tueda ai cuana equisa.

Angel Juan Bautista bataji epu quisa puana

5Da tiempo su Herodes Judea yahua sa echua puji puina. Tueda yahua su piada sacerdote di anina. Tueda banime puina Zacarías. Tuahueda pia sacerdote neje Diusu mebajataina templo su. Tueda sacerdote cuana da Abías cuana puina. Zacarías sa ehuane Elisabet banime puina. Tueda di Zacarías nime Aarón chenu sa familia jenetia puina. 6Tuatseda Diusu butse su nimebutsepi puina. Aiya biame cuaja tuaquisa taji mahue tse batana huecuana. Pamapa Diusu sa jacuatsasiati cuana jei ataina tse. 7Betana su bacua mahue edhi puina tse, Elisabet jabuacuati bue mahue puina putsu.

8-9Beju Abías cuana sa jaturucati tsine cuinana su, Zacarías dharetana huecuana iyuda eti jude su enubi puji, Diusu butse su insensario neje ejudua puji. 10Beju Zacarías ja ejuduatani tupu, pamapa cristiano cuana etseque su Diusu neje jamitsunetitanetina. 11Da hora su Diusu sa ángel Zacarías peje su bataji puana. Bai eni bene altar su ángel neticuinana. 12Angel ba putsu, Zacarías rubutanana. Cuaja pu taji mahue jabanetiatiana. 13Da su ángel ja Zacarías uja atana:

—Zacarías, be iyuame puji. Diusu ja mique jabajati id'abatana. Elisabet beju ebacuati. Tueda yanana Juan miada ebaniicha. 14Metseda ebia su beidaji epu. Tueda yanana bataji epu su, jucuada cristiano cuana di beidaji eputa. 15Mique ebacua deja aida epu Diusu sa puji. Aimue vino tsetseda id'i bahue epu mahue. Tu bataji puji mahue jenetia Espíritu Santo sa tucheda mesa yani epu. 16Tuahueda dueji israelita cuana Diusu peje su neicha esiapametayu. 17Tueda da Echua Puji Jesucristo hui su epu. Tueda ebia su nimetucheda epu, cuaja profeta Elías chenu puidha nime. Tata cuana, mecuana sa ebacua cuana neje saida yameta. Diusu jei aja mahue cuana ebuetsuata Diusu sa jacuatsasiati cuana jei paata huecuana puji. Cristiano cuana ebasetata Echua Puji saida einatsu puji.

18Daja ángel ja Zacarías atana. Da su Zacarías ja ángel uja quisabatana:

—¿Cuaja ni da ye ai cuana pu cua? Etseju mu beju edhi.

19Da su ángel ja Zacarías uja jubida jeutsutana:

—Ema da Gabriel banime. Ema da Diusu sa ani jude butse su eneti tu emebaja puji. Diusu ja ema mi peje su beitutana ye quisa saida mi equisa puji. 20Da su beju mida mimi bue mahue epu yanana bataji epu teje, miada quema jaquisati mue jei aitia putsu. Cuaja mi yama equisainia nime, beju daja epu.

21Da cama beju, etseque su cristiano cuana ja Zacarías ecuinana id'uatanetina. Uja tuneda japibatitana: “¿Jucuaja su da ebia su etsunutani Zacarías?” 22Beju Zacarías cuinana putsu, cuaja mitsu taji mahue cristiano cuana batana. Eme neje bahui shanapametana huecuana. “Zacarías tahui su nime jia da ai bataitia. Da putsu, cuaja mimi taji mahue ebatiani”, japibatitana huecuana.

23Beju mesa mudumudu taji tsine cuana pupeana su, Zacarías mesa ete su jasiapatibana. 24Quejucua tsine jaitianana su, beju Elisabet dheji puana. Pishica badi mesa ete jenetia mue cuinana puana. 25Uja tueda japibatiana: “Diusu ja ema ibunebatana. Beju u jenetia su aimue cristiano cuana ema neje eid'ebatita mahue, ema bacuaji putsu.”

Angel da Jesús bataji epu quisa puana

26Elisabet sucuta badi dheji yani su, Diusu ja ángel Gabriel beitutana María peje su. María sa ete Nazaret ejude su anina. Tueda ejude Galilea yahua su anina. 27Beju María deja shanapa bue mahue puina. José neje yahueti jamitsuti mesa anina. Tueda José da echua puji David chenu sa familia jenetia puina. 28Beju ángel María naja su janariatiana putsu, uja atana:

—María, yama mi equisainia, Diusu ja mi pia epuna cuana ebia su eibunebatani. Beju tueda mi neje yani.

29Da su María nimetiuichana, ángel sa mimi id'aba putsu. Uja ángel quisabatana:

—¿Jucuaja su mi ema daja emitsuinia?

30Angel María jeutsutana:

—María, be iyuame puji. Diusu ja mi dharetana. 31Jiahue mida dheji epu. Piada ebacua mida ebacuinati. Tueda ebacua miada Jesús ebani eicha. 32Tueda da ebia su aida epu, Diusu Aida sa Ebacua putsu. Diusu ja tueda huaraji aida eichata. Echua puji David chenu puidha nime, daja Diusu ja tueda Echua Puji eichata. 33Israelita cuana sa Echua Puji tueda epu ecuatsasiaenita huecuana puji. Tu ecuatsasiati aimue epupe mahue beju.

34Da su María ja ángel quisabatana:

—¿Cuaja ni da pu cua ye ai cuana, aimue ema deja shanapa bue mahue putsu?

35Da su ángel ja María jeutsutana:

—Espíritu Santo da mi peje su epue. Diusu Aida ja mi judu padha nime neje ebabuta. Da su beju tueda yanana bataji epu Diusu sa puji ichaderajiji epu. Diusu sa Ebacua epu. 36Mique edue puji Elisabet di bacuaji epu, punatia biame. Cristiano cuana, “Elisabet jabacuati bue mahue”, mimitaina biame, beju bacuaji epu. Sucuta badi tueda dheji beju. 37Diusu sa puji mu mue ai biame atadhada mahue.

38Da su María ángel uja atana:

—Ema da Diusu sa emebajaji. Daja Diusu ja ema paata, cuaja miada ema equisainia batame.

Mimipe putsu, ángel putibana.

María Elisabet peje su pereperetiana

39Beju quejucua tsine jaitianana su, María tipeida putiana Zacarías, Elisabet detse sa ejude su. Tueda ejude da Judea yahua emata chidi cuana duju su anina. 40Dapia cuinati putsu, Zacarías sa ete su nubiana. Elisabet mitsutana. 41Elisabet ja María sa jamitsuti id'aba putsu, mesa edhe su yanana ruburubuana. 42Da su Espíritu Santo ja Elisabet uja jubida quisametana:

—Diusu ja mi pamapa pia epuna cuana ebia su ibunebatana. Mique ebacua di daja huecha ibunebatana. 43¿Ai eni ema bata miada ema eperejeu puji, mida da quema Echua Puji sa cuara putsu? 44Miada ema mitsuana su, quema yanana edhe su ruburubuana, tueda beidaji pu putsu. 45Beidaji mida, Diusu sa jaquisati su mi jei puana putsu. Pamapa Diusu ja mi quisatana cuana epupe.

46Da su María uja puana:

Yama Diusu emitsutsuainia.

47Tuahueda ema beidaji ametana.

Tueda da ema D'eji su Aji.

48Ema ai eni mahue papu biame, ema ibunebatana.

Jiahue jenetia pamapa cristiano cuana quema puji saida emimita,

49Diusu tucheda ja ai saida nimetiuda cuana ema peje su atana putsu.

Tueda da saida, butsepi.

50Pamapa tu eiyubatani cuana eibunebatani.

51Ai aida cuana atana.

Ebia su aida jabatiji cuana pishitiametana.

52Huaraji aida, tucheda eni cuana dajajametana.

Beju nimemitsida cuana aida atana.

53Diusu shanapaja cuana tusa ai cuana shanapameenitana.

Diusu shanapaeni bahue epudhaatani cuana mu aiji mahue jusiaderatana.

54Cuaja ecuana sa tata chenu cuana Diusu ja mesa jamitsuti ataidha batame, daja jiahue israelita cuana ibunebatana.

55Abraham chenu mesa jamitsuti tiataidha uja:

“Yama mida eibuneba.

Pamapa mique bataji epusiu familia cuana di yama eibunebaeniti.”

Da nime tu mebajaji israelita cuana tsahuatana, cuaja mesa jamitsuti tiataidha huecuana batame.

56Da su María quimisha badi aniana Elisabet sa ete su. Da su beju jasiapatibana mesa ete su.

Juan Bautista bataji puana

57Beju Elisabet sa neda pu taji tsine cuinana su, deja janana bataji puana. 58Pamapa Elisabet sa familia, tu naja su aniji cuana tu peje su putitana epereti puji. Diusu ja Elisabet ibunebatana bahue putana huecuana. 59Beju ocho tsine su yanana dusutana ehuitsanasiqui puji. Pamapa tuneda Zacarías ebani ichaja putana. 60Beju Elisabet sa tsada mahue puana. Uja atana huecuana:

—Mahue, Juan da banime epu quema yanana.

61Da su cristiano cuana ja Elisabet uja atana:

—¿Jucuaja su ni? Aimue piada biame mique familia cuana duju su Juan banime ani cua mahue. Beju bahue mida ecuana sa puiti. Etse sa familia quitaita sa ebani cuana jenetia dhare taji ebani eicha puji.

62Da su beju tuneda seña neje Zacarías quisabatana uja:

—¿Ai ebani mique tsada ebacua sa epu?

63Da su Zacarías ja quirica su uja deretana: “Mesa ebani da Juan epu.” Da su pamapa su nimetiunetitana. 64Da hora su beju neicha Zacarías mimipiruibana. Diusu sa puji saida mimipiruana. 65Tu naja su netiji cuana jubida nimetiunetitana. Tueda yahua je aniji cuana jaquisatitana cuaja puana ai cuana. 66Ebia su japibatitana huecuana ye ai cuana jepuiti. Huamahuama uja jaquisabatitana huecuana:

—¿Ai deja jia ye yanana epu?

Diusu sa tucheda Juan neje yani batana huecuana putsu, daja jaquisatitana huecuana.

Zacarías Juan jepuiti satsuana

67Espíritu Santo Zacarías peje su pue putsu, uja mimiametana:

68Beju pamitsutsuatija israelita cuana sa Diusu, ecuana peje su pueitia beju ecuana d'eji su ya puji.

69Ecuana Salvador tucheda tiatana.

Tueda da David chenu sa familia jenetia.

70Biahua tiempo Diusu ja mesa profeta chenu cuana uja quisaquisa ametaidha:

71“Yama Salvador ebeitu israelita cuana peje su tuna sa majai cuana peje jenetia d'eji su epu puji, tuna duininibaji cuana peje jenetia di d'eji su epu puji.

72Aimue da yama eseta mahue quema tuna neje jamitsuti cuana.

Beju yama eichenuba huecuana.”

Daja Diusu sa profeta chenu cuana quisaquisa ametaidha.

73Uja Diusu ja Abraham chenu mesa jamitsuti tiataidha:

74“Yama israelita cuana tuna sa majai cuana peje jenetia d'eji su yayu ema saida iyuame mahue neje pamebajata huecuana puji.

75Tuneda ema saida, butsepi neje pamebajata, eid'e yani tupu.”

Daja Diusu ja Abraham chenu ataidha.

76Beju quema ebacua chidi, mida Diusu aida sa quisaquisa puji epu.

Echua Puji hui su mi epuniuneti cristiano cuana ebaseta puji, tueda saida pabatsuta huecuana puji.

77Echua Puji ja mesa cristiano cuana d'eji su yatayu.

Tuna sa jucha cuana eperdonatayu.

78Beju Diusu ja daja ecuana yameta, tuahueda ecuana ebia su eibunebatani putsu.

Tusa quisa saida cuana hueda nime cielo jenetia ecuana peje su.

79Jucha su epuniuneti cuana Diusu ja mesa quisa saida cuana eshanapametayu.

Emanu puji iyuame eputani cuana di eshanapametayu.

Tuneseda puji tueda quisa saida cuana da hueda nime.

Tuahueda ecuana enimepijajametayu.

Quema ebacua chidi, pamapa ye ai saida cuana miada cristiano cuana eshanapame.

Daja Zacarías satsuana mesa ebacua jepuiti.

80Beju yanana Juan saida, nimetucheda, jubida sehuana. Beju deja puana su, d'anita yahua su netina. Dapia tu mehua netina israelita cuana peje su quisaquisa epupiru teje.

Currently Selected:

Lucas 1: tna

Highlight

Copy