Zenezi 1
1
1Ropoto na'rata hawimhã, 'Re ihâimana u'âsi mono, hâiwa duré uburé marĩ iwa 're isimasa mono da hã, ma tô simisutu ti'ai me hã poto za'ra. 2Taha ré hã te niha na ti'a hã 're sa'wari, marĩ iwa 're hâimana mono ãna. Â poré â 'rehâ hã te duré isisiwimhã 're sa'wari. Duré robra si te â poré nhisiwi 're sa'wari. Taha wamhã te 'Re ihâimana u'âsi mono pẽ'ẽzani, â nhisiwimhã 're mo.
3Tawamhã 'Re ihâimana u'âsi mono te tinha ãne:
— Ma'ãpé airowa'a na.
Tahawa imreme hawi ma tô oto tirowa'a na'rata. 4Tawamhã rowa'a iwẽ na te te i'madâ'âzéb zarina, ma tô oto ãma aipo'o zahuré, robra me hã. 5Tahawa rowa'a, ma tô sisi, rowa'a na. Duré robra, ma tô sisi, mara na. Tawamhã ma tô timara. Duré ma tô oto ti'awẽ. Ã hã oto bâdâ isãna'rada.
6Tawamhã ãne te duré tinha, 'Re ihâimana u'âsi mono hã:
— Â, ma'ãpé aiwa asima aipo'o aba, maparane misi zahuré si'uiwa na 're sa'wari zahuré mono da.
7Tahawa 'Re ihâimana u'âsi mono hã ma tô â na ãma aipo'o. Ãma isipo'o hâiba amo hã ãma isiwãnhizari zahuré 'rowimhã te 're sa'wari. Duré ãma isipo'o hâiba amo hã te hâimo 're sa'wari. 8Tahawa ta hã ma tô 'Re ihâimana u'âsi mono hã sisi, hâiwa na. Tawamhã ma tô duré oto timara. Ma tô oto ti'awẽ. Ã hã oto duré maparane bâtâ ãma hã.
9Tawamhã te duré tinha ãne:
— Â hã hâiwa zahâpâ 're isa'wari mono hã te za misi haré oto ubumro, ti'ai 'ré na oto sihâi'ré da, ti'a hã.
Tahawa ãne hã ma tô oto tiromhâiba. 10Tawamhã rob'ré ma tô duré sisi, ti'a na. Duré â, sitẽme isito simisutu hâimana da hã ma tô sisi, âporé na. Tawamhã 'Re ihâimana u'âsi mono, te te i'apoto mono hã, ma tô iwẽ na hã ab'madâ'â ze. 11Tahawa te duré ãne tinha:
— Ti'a na te za sipu'u pese na rowede norĩ hã oto 're poto za'ra, nima norĩ inhama ré mono hã duré nima norĩ i'rãi ré mono hã.
Tahawa ãne hã ma tô oto tiromhâiba. 12Ti'ai 'remhã ma tô marĩ sipu'u pese na uburé hã apoto, rob're isipotozéb ré hã, duré rowede, 're i'rã za'ra mono da hã. Tahawa 'Re ihâimana u'âsi mono, marĩ te te i'apoto mono zé, ma tô iwẽ na hã ab'madâ'â zei pese. 13Tawamhã ma tô duré timara. Ma tô ti'awẽ. Ã hã oto si'ubdatõ bâtâ ãma hã.
14Tawamhã 'Re ihâimana u'âsi mono te duré tinha ãne:
— Hâiwa na te te 're irob'uiwẽ zahuré mono da hã wa za oto aimawi pisutu zahuré, ihâiba amo hã bâtâ na da hã duré ihâiba amo mara na da hã, bâdâ hã duré wahu hã duré rob'ré te hã duré tãi pĩni na'ratazép te hã da te ãma 're iwaihu'u za'ra mono zéb da hã. 15Tahawa ta norĩ hã te za hâiwa na te te 're rob'uiwẽ zahuré, te te 're rowa'a zahuré mono da, ti'ai ãma.
Tahawa ãne hã ma tô oto tiromhâiba. 16'Re ihâimana u'âsi mono, maparane ma tô isa'ẽtẽ norĩ hã poto zahuré, isa'ẽne hã bâtâ na te te 're irob'uiwẽ mono da hã, duré isa'ẽtẽ prã hã bara na te te 're ĩrob'uiwẽ mono da hã. Tawamhã wasi norĩ zama ma tô te te apoto. 17Ã norĩ hã ti'ai ãma te te 're rowa'a za'ra mono da hã ma tô hâiwa na aza'ra, 'Re ihâimana u'âsi mono hã, 18bâtâ na mara na zama te te 're rob'uiwẽ za'ra mono da, duré rowa'a robra me hã ãma siwãnhizari zahuré da hã. Tahawa 'Re ihâimana u'âsi mono te te i'apoto mono zé hã ma tô iwẽ na hã ab'madâ'â ze. 19Tawamhã ma tô duré oto timara. Ma tô oto ti'awẽ. Ã hã oto duré maparane si'uiwa na bâtâ ãma hã.
20Taha pari 'Re ihâimana u'âsi mono te duré tinha ãne:
— Â 'rowi sipu'u pese na te za ihâiba ré norĩ hã ahâ na te te sina 're ânhitob za'ra. Duré ti'a nhisiwi te za hâiwi, si norĩ hã 're sisa'rei mono.
21Ãne ma tô 'Re ihâimana u'âsi mono, â 'rowi 're inomro mono da hã te te apoto, hâiba ré isa'ẽtẽ norĩ hã, uburé sipu'u pese na hâiba ré â 'rowi ahâ uptabi na 're inomro mono da hã. Duré uburé si norĩ zama ma tô ipoto mono bâ te te apoto. Tahawa 'Re ihâimana u'âsi mono, tinhimipodo ma tô iwẽ na hã ab'madâ'â ze. 22Tawamhã 'Re ihâimana u'âsi mono, tinhimipoto ma, iwẽ hã te te tãma pisutu za'ra sina, te ãne tãma nharĩ za'ra:
— Ma'ãpé atébré aba, â 'rowi asina aihâ'â aba da. Duré si norĩ zama, atébré aba, ti'ai ãma.
23Tawamhã ma tô duré timara. Ma tô ti'awẽ. Ã hã oto imrotõ bâtâ ãma hã.
24Tawamhã te duré tinha ãne:
— Ti'ai 'remhã te za oto abaze norĩ, da te 're itébré za'ra mono hã, duré rom na 're ihâimana za'ra mono hã, duré di'i na 're inomro mono hã sina 're hâ'â, ipoto mono bâ.
Tahawa ãne ma tô tiromhâiba. 25Tawamhã 'Re ihâimana u'âsi mono ma tô abaze norĩ hã uburé te te apoto, ipoto mono bâ, da te 're itébré za'ra mono da hã, duré rom na 're ihâimana za'ra mono da hã, duré di'i na 're inomro mono zama. Tahawa 'Re ihâimana u'âsi mono, tinhimipodo ma tô duré iwẽ na hã ab'madâ'â ze. 26Tawamhã te duré tinha ãne:
— Ãhã na, wasine 're ihâimana za'ra mono da hã a'uwẽ wa te oto poto za'ra na. Tawamhã ta norĩ hã te za â 'rowi tebe 're inomro mono norĩ ma, siptete na hã 're hâimana za'ra, duré si norĩ ma hã, duré abaze da te 're itébré za'ra mono norĩ ma hã, duré rom na 're ihâimana za'ra mono norĩ ma hã, duré di'i na 're inomro mono norĩ ma hã.
27Ãne ma tô 'Re ihâimana u'âsi mono, a'uwẽ hã poto na'rata za'ra. Isine 're ihâimana za'ra mono da hã ma tô te te apoto, aibâ duré pi'õ. 28Tahawa iwẽ hã te te tãma pisutu za'ra sina, te duré ãne tãma nharĩ za'ra:
— Te za atébré aba mo, asina aihâ'â aba da hã. Uburé te za duré ti'a hã asina isito wa'wa, asiptete na asiwi 're 'madâ'â aba mono da hã. Tawamhã duré â 'rowi tepe ma, te za asiptete na tãma 're aihâimana za'ra wa'aba mo, duré si hâiwi 're isisa'rei mono ma, duré uburé abaze norĩ, ti'ai baba 're inomro mono norĩ ma hã. 29Duré asazéb za'ra wa'aba da, uburé wa za rob're inhama ré hã, duré rowede i'rãi ré hã aima pisutu za'ra wa'wa. 30Wa za duré abaze norĩ ma, si norĩ ma, duré di'i na 're inomro mono norĩ ma, du hã duré rob'rã norĩ hã uburé tãma pisutu za'ra, ãma 're isaihuri mono zéb da hã.
Tahawa ãne ma tô tiromhâiba. 31Tawamhã 'Re ihâimana u'âsi mono, uburé marĩ te te duré i'apoto mono hã ma tô iwẽ na hã ab'madâ'â ze. Tawamhã ma tô duré timara. Ma tô ti'awẽ. Ã hã oto 6 na bâtâ ãma hã.
Currently Selected:
Zenezi 1: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
