Zenezi 3
3
Dawasété u dawaptã'ã na'rata zé wasu'u
1Wahi hã, uburé tisiré abaze norĩ nhipai u, hâimana nhimiza'rese na te 're hâimana, Uburé Danhib'apito 'Re ihâimana u'âsi mono nhimipoto 'remhã. Tahawa te wahi hã pi'õ sadanha ãne:
— E tô sena ma tô 'Re ihâimana u'âsi mono hã aima waihu'u 'wa, rob're ãma uburé rowede 're isimasa mono 'rã hã, 'mairẽne aba tõ da.
2Tawamhã pi'õ, ma te ãma sada'â ãne:
— Uburé siwa'ru rowede 'rã te te wama i'ruzé hã wa za tô wa te 're 'masi. 3Tane nherẽ, rob're norĩ wede wa'wa rowede 're isa mono 'rã si, wa te 're i'mairẽne mono da hã maze di, taha si te te wawi sawi wa. Duré wa te 're upi tõ mono da, ma tô wawi sawi. Ãne hã wa te 'manharĩ wamhã, wa za, u, wadâ'â ni.
4Tawamhã wahi, te pi'õi ma asa tinha ãne:
— Mare di. 'Rẽne aba nherẽ, atâ'â aba õ di za. 5'Re ihâimana u'âsi mono ma, waihu'u pese wa, te ãne na hã aima waihu'u 'wa, nimahã bâtâ na ã rowede 'rã 'rẽne aba wamhã, ato hã za aima isi'ridawa aba zém na hã, duré za isine 're aihâimana aba mono na hã, iwẽ hã duré iwasédé hã za 're i'awaihu'u aba mono na hã oto.
6Tawamhã pi'õ te rowede iwẽ na hã 'madâ. Duré i'rã da te 're ihuri mono da hã te 'madâ'â ze na hã sima 'madâ. Tahawa, ma tô 'râwi duré sina rosa'rata, te te 'rẽne wamhã, za simiza'rese na rowaihu'u wẽ na 're ihâimana mono na hã. Tahawa, ma tô 'mata. Ma tô ti'rẽ. Taha pari, ma tô timro ma tisõ. Tawamhã taha zama ma tô duré oto ti'rẽ. 7Tawamhã awa'awi ma tô ito hã tãma si'ridawa zahuré. Tahawa, ma tô oto ai'uréiwi 're inem na hã 'râwi siwaihu'u zahuré. Tahawa, ma tô rowede figuera su hã ãma isi'ubu zahuré zéb da hã sisada ababarĩ zahuré.
8Tawamhã taha bâtâ na hâiwahâ pesere rowa'u atãma na te te rowapõrĩ ré, aibâ norĩ timro me, ma tô Uburé Danhib'apito 'Re ihâimana u'âsi mono, rob're wa'waibaba 're imorĩ parahâ'ra hã wapari zahuré. Tahawa rowede norĩ wede wa'wa ma tô tiwi aima'uri zahuré. 9Tane nherẽ, Uburé Danhib'apito 'Re ihâimana u'âsi mono, aibâ te te 'mahârâ wamhã, te ãne sadanha:
— E mame te asã.
10Tawamhã aibâ, ma tô sada'â ãne:
— Rowede wa'waibaba we i'aimorĩzé aipara 'ra te wapari wa, wa tô aima ĩpahi, ai'uréiwi ĩhâimana zép te. Tahawa wa tô aiwi aima'u.
11Tawamhã 'Re ihâimana u'âsi mono te sadanha ãne:
— E 'wa ma tô ai'uréiwi aihâimana na hã aima waihu'u. E ma tô rowede 'rã te aiwi isawi hã i'mai'rẽ.
12Tawamhã aibâ, ma duré ãma tãma wa'rã ãne:
— Pi'õ, wasiré 're wasimasisi mono da, ĩma isõmri hã, ma tô rob'rã ĩma tisõ. Ta hã wa tô ti'rẽ.
13Tawamhã Uburé Danhib'apito 'Re ihâimana u'âsi mono te pi'õi ma tinha ãne:
— E marĩ da, ma tô ãne hã i'manha.
Tawamhã pi'õ, ma te ãne asa ãma tãma wa'rã:
— Wahi, ĩma isadawa nhipese zarina wa tô ti'rẽ, rob'rã hã.
Wahi ma, 'Re ihâimana u'âsi mono te te tãma irob'manharĩzé wasu'u
14Tawamhã Uburé Danhib'apito 'Re ihâimana u'âsi mono, te wahi ma tinha ãne:
— Ãne na a hã, i'manharĩ zarina, wa za aima rob'manha. Tahawa uburé ĩnhimipoto norĩ 'remhã aima si wa za iwẽ'õ hã pisutu. Tahawa ã hawim haré te za adi'i na hã 're aimo. Duré te za ti'a zaprum na si 're asai mo. 15Wa za duré aima pisutu 'wa, asi'rui wa'aba na asisada 're aihâimana aba mono da hã. Tawamhã ãne zarina te za asihudu norĩ wa'aba zama si'ru na hã sisada 're hâimana za'ra. Ãhã pi'õ nhihudu norĩ hã te za zahadu wapsi siwi ai'rãihâpâ. Tawamhã a hã te za duré pi'õ nhihudu norĩ hã ipara na'rata wi hã 're i'ahâzu mo.
16Tawamhã pi'õi ma, te duré oto tãma tinha ãne:
— 'Re aiwasã mono sidâpâsi sa'ẽtẽ na 're robzépata mono da hã wa za aima pisutu. Tahawa ai'ra aima 're poto za'ra mono wamhã, te za sé uptabi na isé hã 're i'azépata mo. Ãhã nherẽ, te za aimro siré 're aihâimana mono da hã asima 're iwẽ u'âsi mo. Ta hã te za duré asib'apito na hã aima 're hâimana oto.
17Taha pari, te duré Adãhã ma, 'Re ihâimana u'âsi mono hã tãma tinha ãne:
— Aimro mreme wapari wa, ma rob'rã hã i'rẽ, te aiwi isawi wa'wa hã. Ãhã u'âbâmhã, wa za ti'ai ma hã pisutu, wasété u'âsi 're sa'wari mono da. Tahawa, te za ti'ai hawi rob're asazéb da, ibâ na aima 're hâimana mono da hã 're iromhuri za'ẽtẽ mo, ti'a 're aihâimana mono ré. 18Te za duré ti'ai hawi warõno hã siwazari 'wabzéré me hã 're poto u'âsi za'ra. Tawamhã te za duré rom na da te 're izuri za'ra mono õ hã 're i'a'masi u'âsi mo. 19Tawamhã duré asu'u za'ẽtẽ 'rowi te za romhuri pire na hã 're iromhuri u'âsi mo, asazéb da, ti'ai ãma 're aihâimana mono ré, apâ asiti'azéb u. E marĩ wa. Ti'a 'manharĩ na dâ'âsina, a hã. Duré a hã ti'ai 'manharĩ wa, te za apâ asiti'a.
20Tawamhã aibâ, ma tô timro hã sisi Ewa na, uburé dana na'rata na za 're hâimana mono dâ'âsina. 21Tawamhã 'Re ihâimana u'âsi mono, abaze hâ 'manharĩ ma tô Adã norĩ zada, imro me hã sada 'manharĩ zahuré, ãma isi'uza zahuré zéb da hã.
'Re ihâimana u'âsi mono, Adã norĩ ma, rob're hawi te te tãma irob'ru zahuré zé wasu'u, pusi da
22Tawamhã Uburé Danhib'apito 'Re ihâimana u'âsi mono te ãne sima tinha:
— Aibâ hã te oto wasine 're hâimana. E marĩ wa. Iwẽ hã duré iwasédé hã te te 're waihu'u mono wa oto. Tahawa, rowede 're idahâimana u'âsi za'ra mono nhomri'wai 'rã hã te te 're i'mairẽne mono da hã mare di, õne u'â dâ'â ãna ãma 're hâimana mono tõ da.
23Tahawa, Uburé Danhib'apito 'Re ihâimana u'âsi mono, ma tô Édẽ na rob're nhisi hawimhã tãma rob'ru, ti'a na te te ihâiba 'manharĩzém na si te te sima 're rob're mono da oto. 24Tawamhã duré oto rob're 're ihâimana mono hawi aibâ te te satõrĩ wamhã, ma tô rob're bâtâ pusizém niwĩ ihâimana ãma sõré, hâiwa ãma romhuri'wa isiptete norĩ si hã. Sib'ézé 'wapa 'wa ro'o ré hã ma tô duré tisã, te te nasi irowaimrami mono da hã. Ãne 'Re ihâimana u'âsi mono, ma tô 'manha, ni'wa hã ãhã rowede 'rã da te 're huri mono wa, dadâ'â ãna 're idanomro u'âsi mono zé rowede tẽme 'râwi wisi tõ da hã.
Currently Selected:
Zenezi 3: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
