Zenezi 6
6
Dawasété uptabi na si we oto 're idahâimana za'ra mono zé wasu'u
1Tawamhã duré oto ti'ai mono bâ dasina dahâ'â wamhã, da'ra sipi'õ norĩ, dama 're poto za'ra mono wamhã, 2ma tô 'Re ihâimana u'âsi mono 'ra norĩ, pi'õ wẽ uptabi na 're ihâimana za'ra mono na te te sima 're 'madâ'â ze za'ra. Tahawa ma tô duré te te sima 're iwẽ za'ra mono zéb zarina te te sima 're pisutu za'ra, ãma 're mro za'ra mono da. 3Tahawa te Uburé Danhib'apito tinha ãne:
— A'uwẽ, wasété na 're ihâimana za'ra mono zarina, õne u'â 're ihâimana za'ra mono da hã, mare di za. Tahawa te za duré oto ã hawim haré 120 na ãma iwahum na si 're hâimana za'ra.
4Tô taha wamhã, te a'uwẽ poto 'rãihâ norĩ hã 're hâimana za'ra. Duré ronomro pari, te zahadu õ norĩ hã 're hâimana za'ra, hâiwa ãma isãmri'õ norĩ, da'ra sipi'õ norĩ na 're sapa'a za'ra mono wa, i'ra norĩ hã tãma 're poto za'ra mono ré. Tawamhã a'uwẽ ipoto 'rãihâ norĩ, te duréihã siptete na, duré dama wasu'u za'ẽtẽ na hã 're hâimana za'ra.
5Tawamhã Uburé Danhib'apito, 're idawasété pese uptabi za'ra mono zé ma tô te te 're ab'madâ'â, õne u'â dawasété si da te 're 'manharĩ za'ra mono da, da te dasima ãma 're irosa'rata za'ra mono zé hã. 6Tahawa a'uwẽ te te 're 'manharĩ za'ra mono wa, ma tô 'Re ihâimana u'âsi mono wi hã tiwi tirobzei'õ pese. Duré pẽ'ẽ pire na 're hâimana mono wa, 7te ãne sima tinha:
— Ã hã a'uwẽ norĩ te ipoto za'ra hã, ti'ai hawi sô irobaba za'ra da hã, wa za niha hã tãma rob'manharĩ za'ra. Duré uburé abaze norĩ zama, di'i na dawaprã 're inomro mono norĩ zama, duré si norĩ zama wa za uprosi. E marĩ wa. Ĩwi robzei'õ pese wa, ĩnhimipoto norĩ nhimi'manharĩzé zabâdâ.
8Tane nherẽ, Uburé Danhib'apito, Nowé 're ihâimana wẽ mono zéb zabâdâ si tãma 're toi u'âsi mono di.
Nowé, uba're isa'ẽne te te i'manharĩzé wasu'u
9-10Ã hã Nowéhé wasu'u. Ta hã ãne si'ubdatõ i'ra norĩ nhisi mama na ma tô 're hâimana: Sẽ, Cã, Zafé. Nowé, sena na i'uwaibaba na si, duré õne u'â 'Re ihâimana u'âsi mono mreme te te 're iwapari pese mono na si ma tô 're hâimana. Duré isiré 're idahâimana za'ra mono norĩ nhimi'manharĩ siwaprã, ma tô siwaprosi 'Re ihâimana u'âsi mono ãma si 're mo. 11Tane nherẽ, te 'Re ihâimana u'âsi mono tõmo nho'a, uburé dawasété na si daro mono bâ 're dahâimana za'ra. Tahawa, te uburé daza'rui mono na da te dasina 're rowamnarĩ u'âsi za'ra. 12Tawamhã 'Re ihâimana u'âsi mono, ti'ai ãma uburé 're idahâimana za'ra mono te te da'a'madâ'â wamhã, ma tô 're idawasété za'ẽtẽ za'ra mono zép si ab'madâ. E marĩ wa. Marĩ iwasété si da te 're 'manharĩ za'ra mono wa.
13Tahawa te 'Re ihâimana u'âsi mono, Nowéhé ma tinha ãne:
— Uburé te da'uprosi da, wa tô ĩsima da'ãma rowairébé. Tahawa wa za uburé pese tô da'uprosi. Duré ti'ai wa, uburé marĩ 're ihâimana za'ra mono zama wa za uprosi. E marĩ wa. Ti'ai ãma da te dasina 're irowamnarĩ za'ra mono zé te te sina rosa'réi u'âsi mono wa, hâimo. 14Tahawa ma'ãpé wede iwẽ 'mai'âri mono, uba're isa'ẽne hã ãma asima 'manharĩ da. Tawamhã 'ri 're wa'wa hã te za i'remhã i'awa'õtõ mo. Duré te za wedewa'u tom na isi'riti mono hã uburé i'anhito mo i'remhã, duré imana wawi rowi hawimhã. 15Ãne za tawamhã uba're 'manharĩ pibuzé hã: 133 metru na isadarata pibuzéb za'rata na, duré 22 metru na i'a're si'uiwa pibuzéb za'rata na, duré 13 metru na i'manharĩ pibuzéb za'rata na hâimo hã. 16Tawamhã te za duré uba're upsibizé hã i'manha. Tahawa, duré sa'o hâ prã na te za ipibuzé aiwa ãma isipo'o na i'upsibizé hã i'atété mo. Si'ubdatõ na 'ri ne 'manharĩ 'rãihâ pibuzé hã te za duré i'manha. Tawamhã te za duré nimame isadarata ãma 'ridawa nho'u i'manha. 17Ti'a te te upsibi mono da, wa za â pu'u, uburé pẽ'ẽzani ré 're ihâimana za'ra mono hã te ãma uprosi da. Tawamhã uburé ti'ai ãma 're ihâimana za'ra mono hã te za si'utõrĩ. 18Tane nherẽ, aima si wa za ĩnhimiropisutu zahi hã 'manha. Tahawa te za a hã uba're za'ẽtẽ 'remhã asé. Asébré wamhã, te za aimro, duré ai'ra si'aibâ norĩ, duré asani'aba norĩ asiré i'mazasi za'ra za, uba're za'ẽtẽ u hã. 19-20Tawamhã duré uba're za'ẽtẽ u abaze norĩ sipu'u pese na te za i'anheme mo, uiwada pese na; si norĩ, duré uburé di'i na 're inomro mono norĩ, uburé pese ihâiba ré siré hâimana za'ra da hã. 21Duré te za asa za'ra wa'aba zéb da, duré uburé abaze norĩ sazéb da hã ibâ na i'a'rã'õ, ãma i'asaihuri aba mono zéb da hã si'uiwa na.
22Tawamhã Nowé, uburé 'Re ihâimana u'âsi mono te te tãma iwaihu'uzéb zarina ma tô 'manha.
Currently Selected:
Zenezi 6: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
