Zuwã 13
13
Zezusi hã, tisiré 're inomro mono norĩ te te ipara upsõ za'ra zé wasu'u
1Awẽ te za oto dato hã dasiwi 'manharĩ za'ra ni, Pascowa na dato nhisi hã. Zezusi hã ma tô sina waihu'u, romhuture wa oto apâ imorĩzé hã, Timama u. Õne u'âsi te Zezusi hã tinhib'a'uwẽ te te 're azawi pese, ti'ai ãma 're ihâimana za'ra mono norĩ hã, õ tihâimanazéb 'rãsutu u.
2Tawamhã tisa, te te huri da hã, ma tô asimro bara na, Zezusihi siré 're inomro mono norĩ hã. Tisa hã te te huri õ ré, ma tô Zuda Icarioti hã rosa'rata, Zezusihi zô te te danhimroi mono da, te te dama hâiba nhomri da. Wa'uburé nhimirosa'rata hawim na, te ãne sima ãma rosa'rata. Simahã 'ra, Zuda hã. 3Zezusi hã ma tô Imama hã pisutu, dama pire da. Uburé marĩ ma, pire da, ma tô pisutu, ti'ai ãma hâiwa ãma zama. 'Re ihâimana u'âsi mono hawi, ma tô wei mo. Apâ te za oto itẽme mo. Ãne ma tô sina waihu'u siro, Zezusi hã. 4Tawamhã tisa hã te te huri õ ré, ma tô Zezusi hã wahudu. Ti'uza, ma tô sani. Tisi'u'õzém na ma tô si'awasisi. 5Tawamhã â, ma tô sa'wa, piza'a 're nho'a wa, isiré 're inomro mono norĩ hã te te ãma apara upsõ da. Te te i'apara upsõ na ma tô oto ãma sãna'rata. Te te apara upsõi pari, te duré apara u'õ, tisi'u'õzém na. 6Sima Pedruhu 'rata te oto za. Tawamhã Pedru te tãma tinha, ãne:
— Wanhib'apito, e te za ĩpara upsõ. Mare di. Ĩpara upsõi õ di za.
7Tawamhã Zezusi asa te tãma tinha, ãne:
— Te aipara upsõ za'ra wa'aba zé hã, marĩ te aima wasu'u za'ra wa'wa. Zahadu waihu'u õ di, a hã. Zahadu wapsi te za iwaihu.
8Tawamhã Pedru te duré tãma nharĩ zahu, ãne:
— Ĩpara upsõi õ di za.
Ãhã wamhã, Zezusi te duré asa tãma tinha, ãne:
— Te aipara upsõi õ wamhã, ĩnhib'a'uwẽ õ di za, a hã.
9Tawamhã Sima Pedru te duré tãma tinha, ãne:
— Wanhib'apito, tane wamhã ĩpara si upsõi õ di za. Ĩnhib'rata zama te za i'upsõ, duré ĩ'rã zama.
10Tahawa, ma tô Zezusi hã asa tãma tinha, ãne:
— Mare di. 'Re dasisõi mono wapsi, uburé dahâiba hã rã di za. Dapara si 're uptob za'ra mono wa, te za apâ da te 're upsõ za'ra. A norĩ wa'wa hã aiwẽ za'ra wa'aba di, ĩma. Misire ĩma iwẽ õ hã.
11Aibâ hã ma tô sina waihu'u siro, te te dama ihâiba nhomri'wa da hã. Tahawa, ma tãma waihu'u za'ra, misire tãma iwẽ'õ na hã.
12Tawamhã tisiré 're inomro mono norĩ para, te te a'upsõi pari, ma tô apâ si'uza. Ti'a ma tô nhamra. Taha wamhã, sãmra sina, te tãma nharĩ za'ra, ãne:
— E marĩ te aima wasu'u za'ra wa'wa, te i'aipara upsõ za'ra wa'aba zé hã. E ma tô asina iwaihu'u za'ra wa'wa. 13-15A norĩ wa'wa hã rowahutu'wa na te 're ĩnhisi za'ra wa'aba mo. Asib'apito na zama te duré 're ĩnhisi za'ra wa'aba mo. Wa hã rowahutu'wa na 're ĩnhisi za'ra wa'aba mono zé hã, ĩma wẽ di. E marĩ wa. Wa hã rowahutu uptabi 'wai wa. Duré Asib'apito na 're ĩnhisi za'ra wa'aba mono zé hã, duré tô ĩma wẽ di. E marĩ wa. Wa hã, Asib'apito uptabi za'ra wa'aba wa. Wa hã Asib'apito wa'aba nherẽ, aiwi ĩsisawi za'ra wa'aba õ di, te aipara upsõ za'ra wa'aba tõ da hã. Duré rowahutu'wai uptabi 'wa nherẽ, aiwi ĩsisawi za'ra wa'aba õ di, te aipara upsõ za'ra wa'aba tõ da hã. Tahawa, te za ĩsine ĩnhirã zarina 're asipara upsõ za'ra wa'aba mo, ĩnhirã zarina 're anomro aba mono da, ĩsine 're asisawi za'ra wa'aba mono ãna, 're asipawaptob u'âsi za'ra wa'aba mono da. 16Ma'ãpé ĩwapari pese za'ra wa'aba za. Danhib'apito norĩ hã 're sisawi za'ra mono ãna, te te 're dapawaptob za'ra mono wamhã, tãma iromhuri'wa norĩ zama, te za isine te te 're dapawaptob za'ra, 're sisawi za'ra mono ãna. Duré te te 're isatõrĩ za'ra mono hã 're sisawi za'ra mono ãna, te te 're dapawaptob za'ra mono wamhã, isadawa wasu'u'wa norĩ zama te za isine te te 're dapawaptob za'ra, 're sisawi za'ra mono ãna.
17-18— Ãne wa tô aima rowasu'u za'ra wa'wa, waihu'u za'ra wa'aba da. Ĩnhimiroti hã 're 'madâ'â pese za'ra wa'aba mono wamhã, aima 're rowẽ za'ra wa'aba mono di za, uburé aima 're rowẽ za'ra wa'aba mono õ nherẽ. Asimirosa'rata na, wa tô aiwaihu'u za'ra wa'wa. Ĩsiré 're anomro aba mono da, te aipisutu za'ra wa'wa hã, misire ma tô ĩ'maiwẽ'õ wa'wa. Ta hã wa tô pisutu, ĩsiré 're morĩ da, 'Re ihâimana u'âsi mono mreme ui'éré te te sina uwaimrami da. Ãne ma tô wahi'rada hã tinha, aré: “Wasiré 're iwasai mono, ma tô ĩwẽ'õ.” Ãne ma tô duré ĩwẽ'õ'wa na rob'ui'éré siro, poto õ ré, wahi'rada hã. Tahawa, te za oto sina uwaimrami su'u, ĩwẽ'õ'wa hã. 19Taha õ ré, wa aima waihu'u siromo za'ra wa'wa, te te sina uwaimrami wapsi, te ĩsina iwaihu'uzém na, 're ĩzazei u'âsi za'ra wa'aba mono da. 20Ĩwapari pese za'ra wa'aba. Zahadu wapsi, wa za ĩzazei'wa norĩ hã datẽme te 're satõrĩ za'ra, te te dama 're ĩzadawa wasu'u za'ra mono da. Tawamhã imreme za'ra hã da te 're wapari za'ra mono wamhã, da te dasiwi 're sawi pese za'ra mono wamhã, ta norĩ u'âbâ te za duré ĩzama hã da te dasiwi 're ĩzawi pese. Da te dasiwi 're ĩzawi pese za'ra mono wamhã, ĩ'u'âbâ te za duré we ĩzatõrĩ'wa hã da te dasiwi 're sawi pese.
Zezusi hã Zuda te te iwasu'uzé wasu'u, za te te dama ihâiba nhomri da hã
Mateu 26.17-25; Marcu 14.17-21; Luca 22.7-13,21-23
21Tawamhã pẽ'ẽzé uptabi di, Zezusi hã. Tahawa, te duré tãma siwasu'u za'ra, ãne:
— Tô sena, wa aima waihu'u siromo za'ra wa'wa. Misire te za dama ĩ'maihâiba nhomri 'wa.
22Tawamhã aibâ te te sina iwaihu'uzém na, isiré 're inomro mono norĩ hã te te waihu'u za'ra õ wa, ma tô taré pese 'râwi si'madâ'â pese za'ra. 23Isati te 'manhamra, isiré 're inomro mono norĩ siré hã, Zezusi te te 're isawi pese mono hã. 24Tawamhã Sima Pedru te õ hã Zezusihi ãma wada'u, te te sadanharĩ da, sadawa 'rasi sina, ãne:
— Ma'ãpé sadanharĩ. E 'wai hâiba na te apito tinha, te te dama ihâiba nhomri da hã.
25Tawamhã tô õ hã Zezusihi siré 're imorĩ hã itẽme we pari, ma tô oto sadanha Zezusi hã, ãne:
— Wanhib'apito, e 'wa hã te za we asô te te danhimro, te te dama aihâiba nhomri da hã.
26Tahawa, te ãne asa tãma tinha:
— I'u'ẽtẽ wẽ'ẽ, wa za di'i, te tãma sõmri da. Taha na te za iwaihu, dama ĩhâiba nhomri'wa da hã.
Tawamhã ma tô di'i, te te tãma sõmri da, Zudaha ma. Sima Icariotihi 'ra, Zuda hã. 27Te te tãma sõmri pari, ma oto Satanasihi nhimiroti hã wapari pese Zuda hã, ipẽ'ẽ 're, oto sébré wa. Tahawa, te Zezusi hã Zudaha ma tinha, ãne:
— Marĩ hã 'manharĩ su'u pé.
28Tane nherẽ, saihuri da, isiré isi'ubumro norĩ, ni'wa hã te te waihu'u õ di, Zezusi niha na ãne na te te inharĩzé hã. 29Zuda, rob'uiprazé 'madâ'â'wa. Tahawa te ni'wam norĩ hã ãma rosa'rata za'ra, ãne: “Rob'uiprazé hã te te 're 'madâ'â mono wa, ãté marĩ hã wasazéb da, te te wama uipra za'ra da, te ãne tãma tinha.” Ihâiba amo norĩ hã te duré ãma rosa'rata za'ra, ãne: “Ãté isibrob'õ norĩ ma, suru na te te sõmri mono da, te tãma tinha.”
30Tawamhã i'u'ẽtẽ wapu te te 'rẽne pari, rob u ma tô watobro Zuda hã, robra u.
Zezusihi nhimirotizép tém na rowasu'u
31Tawamhã rob u watobro za'u si, te ãne tãma siwasu'u za'ra, Zezusi hã:
— Romhuture di oto bâdâ hã, Dasiré Ipoto ãma 're idawata za'ra mono zéb u hã. Ãma 're dawata za'ra mono wamhã, 'Re ihâimana u'âsi mono ãma te za duré 're dawata za'ra, isiré. 32Isiré ãma 're dawata za'ra mono wamhã, te za duré ãma tiwata, 'Re ihâimana u'âsi mono hã. Ãhã na awa'awi te za ãma tiwata su'u. 33Ĩno norĩ, suru na wa za oto ai'rata ĩnhamra 'wa. Ai'rata 're ĩnhamra u'âsi aba mono da, te za asima 're ĩwẽ za'ra wa'aba mo. Tane nherẽ, wa za mo. Nimomo ĩmorĩ wamhã, ãma ĩtẽme 're anomro waihu'u aba mono õ di za a'â. Ãne na hã wa tô dama waihu'u aré. 34Ĩnhimiroti tém na, wa za oto aima roti za'ra wa'wa, 're asisawi pese za'ra wa'aba mono zéb da hã. Wa hã te 're i'asawi pese za'ra wa'aba mono ne, te za 're asisawi pese za'ra wa'aba mo.
Pedru hã, Zezusi za te te dawi i'udâzém na te te ipo're pu'uzé wasu'u
Mateu 26.31-35; Marcu 14.27-31; Luca 22.31-34
35-36Tawamhã Sima Pedru te sadanha, ãne:
— Wanhib'apito, e momo te za aimo.
Tawamhã Zezusi asa te tãma tinha, ãne:
— Nimomo wa za mo. Ãma ĩzarina, aimorĩ waihu'u õ di za a'â. Zahadu wapsi te za ĩzarina ãma aimo za.
37Tawamhã Sima Pedru te duré asa tãma tinha, ãne:
— E marĩ wa bété, ãhã na asarina ãma ĩmorĩ waihu'u õ di. Te asõ'reptu da, asada ĩdâ'â da hã ĩma wẽ di.
38Tawamhã Zezusi, ma tô duré asa hã tãma tinha, ãne:
— E tô sena asiwasu'uzé hã. Tô sena wa aima rowasu'u. Ĩzadawa para õ nherẽ, si'a hârâ õ ré, te za si'ubdatõ dawi ĩ'udâ, aima ĩza'rese õ na hã.
Currently Selected:
Zuwã 13: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
