Luca 13
13
Dawasété wi 're idasipizari za'ra mono zé wasu'u
1Tawamhã Zezusi te te dama rowasu'u ré, ma tô ni'wam norĩ hã itẽme aihutu. Tahawa, te tãma rowasu'u za'ra, ãne Zezusihi ma:
— A'uwẽ norĩ hã ma tô simro ni, Galiléa tede'wa norĩ hã. Pilatuhu nhimiwada'uri zarina, ma tô dasiwi hã simro ni. 'Re ihâimana u'âsi mono ma, tinhimizama te te simroi ré, ma tô uprosi ni. — Ãne te Zezusihi ma rowasu'u za'ra. 2Tawamhã Zezusi te asa tãma nharĩ za'ra:
— E Galiléa norĩ hã ma tô danhipai u tiwasédé hã te te 're 'manharĩ za'ra. E tahawa, ma tô tidâ'â za'ra. E ãne, ma tô ãma irosa'rata za'ra wa'wa. 3Mare di. Taha wab õ di. Ta norĩ hã danhipai u, tiwasédé hã te te 're 'manharĩ za'ra mono õ di. Tane nherẽ, ma tô tidâ'â za'ra. Tane, te za tô a norĩ wa'wa hã isine 're atâ'â za'ra wa'aba mo, aiwasété wi 're aipizari za'ra wa'aba mono õ wamhã. 4A'uwẽ norĩ hã, Siroé na 'ri sipo'o ãma 're isi'ubumroi mono norĩ nhisiwi, ma tô 'ri 'rãihâ hã waptãrã, da'madâ'âzé hã. Tahawa, ma da'ahâ na ai'utõrĩ ni. 18 na ma 'ri hã da'uprosi. Ta norĩ hã bété, e ma tô danhipai u tiwasédé hã te te 're 'manharĩ za'ra, Zeruzalẽ ãma 're idahâimana za'ra mono norĩ upana. E tahawa, ma tô tidâ'â za'ra. 5Mare di. Taha wab õ di. Ta norĩ hã danhipai u, tiwasédé hã te te 're 'manharĩ za'ra mono õ di. Tane nherẽ, ma tô tidâ'â za'ra. Tane, te za tô a norĩ wa'wa hã isine 're atâ'â za'ra wa'aba mo, aiwasété wi 're aipizari za'ra wa'aba mono õ wamhã.
Figuera wede i'rãi'õ wasu'u
6Tawamhã te tãma ãma romnhimiré'é za'ra ãne, Zezusi hã:
— Aibâ hã te 're 'maihâimana, buru tede'wa hã. Iburu ãma hã, rob'ru hã te 're hâimana za'ra, uwa 'ru hã. Figuera wede hã te duré tame 're sa. Tawamhã bâtâ na te mo, figuera 'rã zô. Tane nherẽ, i'rã hã te te 'masãmri õ di, 'rãi ãna sa wa. 7Tahawa, te buru 'madâ'â'wai ma tinha, ãne: “Si'ubdatõ, ma tô ĩ'ãma tiwahu oto, taré nasi we sô ĩneb ré hã, figuera 'rã zô. Wa tô 'madâ'â wa'a. Te za isizâ. E marĩ da, te za taré 're sab u'âsi, 're 'rãi mono õ nherẽ.” Ãne te romhuri'wai ma tinha. 8Tawamhã romhuri'wa hã te asa tãma tinha, ãne: “Apito, misi ãma wahu a'â. Wa hã wa za a'â ti'a zu, ti'ai wazarizém na te ãma uirĩ da, wẽ na sab da. 9Wahub amo na 'rãi wamhã, wẽ di za. Duré ãne nherẽ 'rãi õ wapsi, te za ĩma i'ru, te sizâri da oto.” Ãne, te romhuri'wa hã tinha, buru tede'wai ma.
Zezusi hã, romhuri zahârizém na pi'õ isihâpâre te te ipesezé wasu'u
10Tawamhã romhuri zahârizém na ma tô dama rowasu'u Zezusi hã, zudeu norĩ te, rowahutuzéb ãma. 11Tame te pi'õ hã ihâzé ré hã dame nhamra. Hâzé ré ma tô ãma tiwahub ahâ, 18 na, wa'uburé te te 're upi u'âsi mono wa. Sihâpâ u'âsi, te tahawa 're mo, wãi wahutu ãna. 12Tawamhã Zezusi te te 'madâ'â wamhã, te 'mahâ, ãne:
— Pi'õ, aihâzé hã te za oto aima apa.
13Taha pari, ma tô tinhib'rada hã ãma tihi. Tawamhã ma tô awa'awi wãi wahudu. Wãi wahutu wamhã, te ãma tiwata, 'Re ihâimana u'âsi mono ãma, te te pese wẽ te. 14Tane nherẽ, rowahutuzé 'madâ'â'wa hã ma tô sada tizahi, Zezusihi zada, sabadu na nherẽ, te te pese wa. Tahawa, te uburé dama tinha, ãne:
— Bâdâ hã, 6 na ihâiba hã, wa te 're iromhuri za'ra mono zéb da hã. Taha bâtâ na si, te za we 're anomro aba mo, da te 're aipese za'ra wa'aba mono da. Sabadu na hã mare di, romhuri zahârizém na hã.
15-16Tawamhã Wanhib'apito te tãma tinha, ãne:
— Oro sabadu na te dapese wa, ĩma nharĩ za, te za powawẽ hã awaru po'repore zama, 're iwasihu za'ra wa'aba mo, âi ba, 're simroi wa'aba mono da, te te 're âhuri mono da. Ãhãta pi'õ hã, Abra'ãhã nhihudu hã. Satanasi hã te te 're pibui mono ré hã, ma tô 18 na ãma tiwahu. Sabadu na nherẽ, wa tô pese, hâzé ãna oto 're hâimana mono da. E niha bâ bété, aima wẽ za'ra wa'aba õ di, sabadu na te ipesezé hã rowẽ na pi'õ hã oto 're imorĩ da hã.
17Tawamhã Zezusihi mreme hã te te wapari za'ra wamhã, ma tô iwẽ'õ'wa norĩ hã aséb za'ra, Zezusihi mreme ma. Iwẽ'wa norĩ ma, rowẽ za'ra di. Marĩ hã te te dama 're ab'manharĩ wẽ mono wa, te 're to za'ra, tipẽ'ẽ na.
Mostada nhamare wasu'u, i'u'ẽtẽ wasu'u me
Mateu 13.31-33; Marcu 4.30-32
18-19Tawamhã Zezusi hã te dama tinha, ãne:
— Niha marĩ na, wa za ãma simiré'é, 'Re ihâimana u'âsi mono, da'ãma 're isib'a'uwẽ mono zém na hã. Mostada nhamare na, wa za ãma simiré'é. Mostada nhamare hã aibâ hã ma tô a're. Tawamhã ma tô tiwa'ru. Wa'rui wamhã, papo za'ẽtẽ di oto. Tawamhã si hã te isu 'rowi, te te sima 're sasi za'ra. Ãne, 'Re ihâimana u'âsi mono, da'ãma 're isib'a'uwẽ mono zé hã.
20Te duré dama tinha, ãne:
— E marĩ na, wa za duré ãma simiré'é, 'Re ihâimana u'âsi mono, da'ãma 're isib'a'uwẽ mono zém na hã. 21I'u'ẽtẽ wapuzém na, wa za ãma simiré'é. Pi'õ hã te za i'u'ẽtẽ wapuzé hã suru na sa'wa, trigu 'rã zu pese wazari. Trigu zup si, sa'ẽtẽ uptabi di. Tawamhã te te wazari pese wamhã, te za tidupto, i'u'ẽne hã. Sa'ẽtẽ uptabi di za oto. Ãne duré, 'Re ihâimana u'âsi mono, da'ãma 're isib'a'uwẽ mono zé hã.
'Ridawa, 're surure wasu'u
Mateu 7.13-14,21-23
22Tawamhã Zezusi norĩ hã te oto ai'aba'ré, Zeruzalẽ u. 'Ri nho'õmo mono bâ, te te dama 're rowasu'u u'âsi Zezusi hã, 'ri wa'õtõ u zama. 23Tawamhã te ni'wa hã sadanha, ãne:
— Apito, e da'umro na si, te za danho'reptuzé hã da te dasina 're waihu'u za'ra.
Tahawa, ma tô Zezusi hã asa uburé dama tinha, ãne:
24— Tô sena, te za niwapsi da'ahâ na da te dasima 're wẽ za'ra, 'Re ihâimana u'âsi mono u 're danhisisi mono da. Tazahã, itẽme 're danhisisi mono õ di za. Tahawa, 'ri para u 'ridawa 're su'ure na 're danhisisi mono da, sada 're idanhiptete za'ra mono ne, te za sada 're asiptete za'ra wa'aba mo, 'Re ihâimana u'âsi mono u 're asisisi aba mono da. 25Nimahã na te za 'ri tede'wa hã wahudu, te te siré 'rinhitop tete da. Tawamhã te za i'ridawa ta'a za'ra wa'wa, rowi 're ai'ubumroi wa'aba mono hã. 'Ri tede'wa hã te za i'mahârâ za'ra wa'wa, ãne: “Apito, ma'ãpé we wazô 'ridawa za'ra na, ãma atẽme wanhisisi da.” Ãne te za 're i'mahârâ za'ra wa'aba mo. Tazahã, te za asa aima nharĩ za'ra wa'wa, ãne: “Te aiwaihu'u za'ra wa'aba õ di. E ma hawimhã, a norĩ wa'wa hã.” 26Tawamhã ãne te za asa tãma asiwasu'u za'ra wa'wa: “Wa norĩ hã, wa tô asiré wasaihuri ni. Asiré, wa tô duré âhuri ni. Warob ãma hã ma tô duré dama 're irowahutu mo, waza'ru ãma hã.” Ãne te za 'ri tede'wai ma asiwasu'u za'ra wa'wa. 27Tahawa, te za asa duré aima nharĩ za'ra wa'wa, ãne: “Te aiwaihu'u za'ra wa'aba õ di, ĩzazei'wa na hã. Aiwasédé hã ma tô 're i'manharĩ u'âsi za'ra wa'aba mo. Mo oto ai'aba'réi wa'aba, ĩnhiti.” Ãne te za aima rob'ru za'ra wa'wa. 28Tawamhã rowẽ uptabi ãma, 'Re ihâimana u'âsi mono 'rata 're isi'ubumroi mono hã te za i'madâ'â za'ra wa'wa, Abra'ã norĩ hã, duré Izaqui, duré Zaco, duré uburé isadawa wasu'u'wa norĩ hã. Tazahã, a norĩ wa'wa hã te za rowi 're ai'ubumroi u'âsi aba mo. Tahawa, te za asina 're ai'ru'ru aba mo. Te za duré 're ai'wasitete za'ra wa'aba mo, 're robzépata za'ẽtẽ za'ra wa'aba mono wa. 29Daro mono bâ, te za itẽme 're dasihutu, 'Re ihâimana u'âsi mono 'rata 're dasaihuri mono da, Danhib'apito uptabi na 're ihâimana mono zéb u. Bâtâ pusizém hawi, te za itẽme 're dasihutu, bâtâ zasizém hawib zama, duré hâiwa nhimire hawib zama, duré hâiwa nhimi'e hawib zama. 30Tawapsi, te za dama iwapu ma nharĩ za'ra, dama pire na 're hâimana za'ra mono da oto. Duré, dama ipire ma, te za nharĩ za'ra, dama wapu na 're hâimana za'ra mono da oto.
Zeruzalẽ ãma Zezusi hã ipẽ'ẽzézé wasu'u
Mateu 23.37-39
31Tawamhã Zezusi hã te te apo're pu'u parip si, awa'awi ma tô itẽme 'maihaihutu, farizeu norĩ hã. Tahawa, ma tô Zezusihi ma rob'ru za'ra, ãne:
— Mo oto ã hawi aimorĩ. E marĩ wa. Apito Erodi hã ma tô sima aiwẽ, da te dasiwi aiwĩrĩ da.
32Tawamhã Zezusi hã apâ te tãma rob'ru za'ra:
— Mo oto itẽme ai'aba'réi wa'aba apâ, tãma ĩzadawa wasu'u za'ra wa'aba da, wapsã wawẽ ne 're imorĩ ma. Wa'uburé hã wa tô te dama 're anhamra. Wa duré te 're da'apese, ã bâtâ na duré awẽm na. Awẽ amo na, wa za ĩnhimiromhuri hã uprosi. Ãne te za tãma ĩzadawa wasu'u za'ra wa'wa, Erodihi ma.
33— Zeruzalẽ ãma, ma tô da te 're simro, 'Re ihâimana u'âsi mono zadawa 'mahârâ 'rata 'wa norĩ hã. Õne u'âsi. Tahawa, wa za ãma mo, ãhã na, awẽb zama, awẽ amo na zama, tame, da te dasiwi ĩwĩrĩ da, isadawa wasu'u'wa hã.
34— Zeruzalẽ ãma 're ai'ubumroi wa'aba mono norĩ ãma, ai'ãma ĩpẽ'ẽzé za'ra wa'aba di. Aihi'rata norĩ wa'wa hã ma tô 'Re ihâimana u'âsi mono zadawa 'mahârâ 'rata 'wa norĩ hã te te 're simroi u'âsi, ẽtẽ na. Datẽme te te 're isatõrĩ za'ra mono norĩ zama, ma tô duré te te 're simroi u'âsi, ẽtẽ na. Si'a hã ti'ra zawi te, 're ipapo za'ra mono ne, wa aré te ĩsima 're aiwẽ u'âsi za'ra wa'wa, ĩsitẽme te 're ai'awaibui wa'aba mono da. Tane nherẽ, asima 're ĩwẽ za'ra wa'aba mono õ di asa. 35Tahawa, tinhorõwa hã te za oto tirẽ, 'Re ihâimana u'âsi mono hã, ãma 're i'aiwata za'ra wa'aba mono zé hã. Duré a norĩ wa'wa hã, ĩhâiba 'madâ'â na sahu za'ra wa'aba õ di za a'â. Niwapsi duré ĩhâiba 'madâ'â za'ra wa'aba wa, te za ãne asima ĩwasu'u za'ra wa'wa: “'Re ihâimana u'âsi mono zadawa para we imorĩ ma, 're rowẽ za'ẽtẽ mono di za.” Ãne te za asima ĩwasu'u za'ra wa'wa, ĩhâiba 'madâ'â na duré sahu za'ra wa'aba wa. Ãne na aipẽ'ẽ 're asina ĩwaihu'u za'ra wa'aba wapsi, te za ĩhâiba 'madâ'â na duré isahu za'ra wa'wa.
Currently Selected:
Luca 13: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.
