Luca 19

Zezusi norĩ wasu'u, Zaqueuhu me

1Tawamhã Zezusi hã Zerico u, ma tô wi. Wisi wamhã, 'ri nho'õmo wa'wai baba, ma ro'razâ. 2Zerico ãma, te aibâ isibro pe hã 're hâimana, Zaqueu na isisi hã. Danhib'apito ma, rob'uiprazé arĩ ubumroi'wa norĩ 'madâ'â'wa, Zaqueu hã. 3Ta hã ma tô sima wẽ, Zezusi hã te te 'madâ'â da, duré te te hâiba pibu da. Tane nherẽ, da'ahâ uptabi wamhã, te te 'madâ'â waihu'u õ di Zezusi hã, sapore wa, Zaqueu hã. 4Tahawa, ma tô danho'a wara, wede u, te te sai'uri da, sipapara te te 'madâ'â da, iwa'wai baba za wei morĩ wa, Zezusi hã. 5Tawamhã Zezusi wede u oto wisi wamhã, hâimo te 'mazawẽ. Ãhã wamhã, ma tô 'mahâ Zaqueu hã, ãne:

— Zaqueu, ai'aba'ré na we si'ra na. Ã bâtâ na hã asõrõwa ãma ĩhâimana da hã wa ĩsima wẽ.

6Tahawa, ma si'aba'ré na si'ra. To sina, ma tô tãma tinha, isõrõwa u isiré morĩ da, i'rata a'â sãmra da. 7Tawamhã isõrõwa u sébré wamhã, te dasima nharĩ za'ra ni, Zezusihi za'u, ãne:

— Zapre, ma bété isõrõwa u ãzé, aibâ iwasété nhorõwa u.

8Zaqueu hã hâiwi te oto za, Wanhib'apito ma, siwasu'u da. Tawamhã ãne te tãma tinha:

— Ãhãta, ĩnhibro hã wa za ãma aipo'o, isibrob'õ norĩ ma, te sõmri mono da. Duré, dawi ĩnhipsaihuri hã wa za, te isimi'uri nhowa're're, dama ãma 'rãnhipa, iwa'rãmi. Rob'uiprazé misi wamhã, wa za maparane si'uiwa na dama ãma 'rãnhipa.

9-10Tahawa, te Zezusi hã dama tinha, ãne:

— Ãhã na hã rowẽ di oto, isõrõwa ãma hã. Ã hã aibâ hã ma tô tinho'reptuzé hã sina waihu'u. Abra'ãhã nhihudu, te za tô oto 're mo. Taha da, ma tô ti'ai ãma Dasiré Ipodo hã we mo, ipẽ'ẽ 're, simani ne 're inomro mono norĩ te te 're anho'reptui mono da, wẽ na oto 're nomro mono da.

Romhuri'wa norĩ, 10 na ihâiba za'ra wasu'u

Mateu 25.14-30

11Tawamhã ma tô wapari za'ra ni, Zezusihi mreme hã. Tahawa, te za duré tãma ãma romnhimiré'é za'ra. E marĩ wa. Zeruzalẽ u, iwisizéb u hã, romhuture di oto. Ãne wa, te dasina rosa'rata za'ra ni:

— Ãté, bâdâ te za oto iwa waptãrã, 'Re ihâimana u'âsi mono, da'ãma 're isib'a'uwẽ mono zéb da hã.

12Tahawa, te ãma simiré'é Zezusi hã, ãne:

— Aibâ hã dama ipire hã darob amoi u ma tô mo, tinhib'apito hã te te sabu da. Isib'apito hã te za pisutu, apito na dama 're hâimana mono da, irob ãma. Taha da, te za mo, si'apito da. Taha parip si, te za wei mo apâ, tirob u. 13Tahawa, te morĩ õ ré, sitẽme sô tihârâ za'ra, tãma iromhuri'wa norĩ zô, 10 na ihâiba za'ra norĩ zô. Misi si, ma tô te te tãma sõmri, rob'uiprazé isapotore hã, ẽtẽ waipo pré oru 'manharĩ hã. Tawamhã te ãne tãma 'ru za'ra: “Marĩ hã te za 're i'manharĩ za'ra wa'aba mo, rob'uiprazém na ãma atob za'ra wa'aba da, apâ we ĩmorĩ õ ré.” Taha pari, te oto tiwi timorĩ za'ra.

14— Dama si'apito da nherẽ, irob 're, 're idahâimana za'ra mono hã te siwi 'ruiwapa, dama si'apito tõ da. Tahawa, te isarina siwi da'mazatõ, isib'apito ma, te te ãma dazadawa wasu'u za'ra da.

15— Tane nherẽ, ma tô aibâ hã isib'apito hã pisutu, dama si'apito da. Tahawa, ma tô wi apâ, tirob u. Wisi wi, ma tô sitẽme sô tihârâ za'ra, tãma iromhuri'wa norĩ zô hã, niha ãma isitob za'ra zé, te te waihu'u da. 16Tawamhã itẽme iwisi 'rada hã te tãma tinha, ãne: “Apito, rob'uiprazé isapotore hã ma tô ĩma isõ, misi. 10 na ihâiba za'ra hã, wa tô ãma ato.”

17— Tawamhã isib'apito te asa tãma tinha, ãne: “Wẽ di tô. A hã, romhuri wẽ 'wa. Marĩ hã 'rare nherẽ, ma tô ĩma 're i'manharĩ wẽ u'âsi mo. Ĩma ai'umnhasi di. Tahawa, wa za oto aipisutu, 're da'ab'madâ'â mono da. 'Ri ahâ, wa za aima pisutu za'ra, 10 na 'ri ihâiba za'ra hã tame 're da'ab'madâ'â mono da.”

18— Tawamhã isãna'remhã, ma we duré itẽme wi. Ta hã te duré tinhib'apito ma tinha, ãne: “Apito, rob'uiprazé isapotore hã ma tô ĩma isõ. Imrotõ na ihâiba za'ra hã, wa tô ãma ato.”

19— Tahawa, te isib'apito hã asa tãma tinha, ãne: “Tane tô. 'Ri ahâ hã imrotõ na, wa za aima pisutu za'ra, tame 're da'ab'madâ'â mono da.”

20— Tawamhã isãna'remhã, ma we duré itẽme wi. Tinhib'apito ma, te tinha duré ãne ta hã: “Apito, ãhãta rob'uiprazé ate hã, ĩma isõmri hã. Zazahâ na, wa tô ubu, te asô 'madâ'â pese da. 21A hã, da'ãma aipẽ'ẽzé õ di. Date hã te dawi asima 're i'apisutu mo, ate da. Duré asimirob're õ nherẽ, te za asima 're irob'rãihâri mo, ate da, danho hã. Ãne na, wa tô aiwaihu'u. Tahawa, aipipa di.”

22— Tawamhã isib'apito te asa tãma tinha, ãne: “A hã ĩma romhuri wasété 'wa, te 're aimo. Aimreme wẽ õ wa, wa za aimreme hã aima sizusi, aimreme zarina te aiwẽ'õ da. Ĩte na, ma tô u, ĩwaihu, da'ãma ĩpẽ'ẽzé õ na. Wa hã wa za date hã te ĩsima 're apisutu, u, ĩte da. Duré wa za, u, te ĩsima te 're a'rãihâri, ĩte da, danho hã. Ãne ma tô ĩma inha. 23Ãne na 're ĩhâimana mono wamhã, e marĩ wa bété rob'uiprazé hã ĩzô sẽrẽ õ di, wedehâpâ 're. Ãne we apâ ĩmorĩ wapsi, te aima isõmri nhipai u, wa aré ĩsima waze, ĩzô sina hâ'â wa.”

24— Tahawa, te i'rata isimasam norĩ ma ti'ru: “Ma'ãpé, tiwi âri aba rob'uiprazé hã, 10 na te te ihâiba ma, sõmri aba da.”

25— Tawamhã asa te tãma nharĩ za'ra, ãne: “Oro õhõ te hã, 10 na ihâiba za.”

26— Asa te duré tãma nharĩ za'ra, ãne: “Tô sena wa aima waihu'u za'ra wa'wa. Ni'wam norĩ hã marĩ ahâ nherẽ, simi'ẽ na te te 're romhuri za'ra mono wamhã, te za da te ãma tãma 're sisiwi za'ra, marĩ na. Tane nherẽ, ni'wam norĩ hã marĩ na surure nherẽ, simi'ẽ na te te ãma 're romhuri za'ra mono õ wamhã, te za surure nherẽ, tiwi sani za'ra ni. 27Oto ĩ'rui'wa norĩ hã we ĩtẽme ãwisi za'ra wa'aba. Ma tô siwi ĩwẽ'õ za'ra, tãma ĩsi'apito za'ra tõ da. Tahawa, te za ĩnho'a asiwi isimroi wa'wa.”

Zezusi hã Zeruzalẽ u iwisizé wasu'u

Mateu 21.1-11; Marcu 11.1-11; Zuwã 12.12-19

28Tawamhã te te dama rowasu'u pari, te oto danhowa mo, Zeruzalẽ u, Zezusi hã. 29-30'Ri wa'õtõ u, ma tô rob'umhutu oto, Befazé u hã, duré Betãnha u hã. Oriwera na ẽtẽ 'rãihâ nhisi 'rata, 'ri wa'õno hã. Tisiré 're inomro mono norĩ hã ma tô sisõwa satõrĩ zahuré, maparane. Ãne te tãma rob'ru zahuré, Zezusi hã:

— Õwa te za datẽme ane wa'wa, 'ri wa'õtõ u, asõ're uwaibaba wa'aba. Aimasisi aba wi, te za awaru po'repore isãmri 'wa, iprédupté hã, zahadu ni'wa ãma imorĩ'õ hã. Butu wazi na te za, da te ãma wasisi haré. Tawamhã te za iwasihui wa'wa, we saprõni aba da. 31Ni'wa hã ãne te te asadanharĩ aba wamhã: “E marĩ da, te iwasihui wa'wa,” tawamhã, ãne te za asa tãma inharĩ 'wa: “Wanhib'apito hã ãma morĩ da, wa tãma wasihu ni.” Ãne te za asa tãma inharĩ 'wa.

32Tawamhã te oto tineb zahuré. Zezusi te te tãma iwasu'u zahuré zéb uwaibaba, ma tô sãmri zahuré, awaru po'repore hã. 33Te te wasihu zahuré wamhã, itede'wa norĩ hã te sadanharĩ zahuré, ãne:

— E marĩ da, te asapa'abâ iwasihui wa'wa ari'iwi.

34Tahawa, te asa tãma nharĩ zahuré, ãne:

— Wanhib'apito, marĩ õ wa, ãma morĩ da, wa tãma wasihu ni.

35Tawamhã te oto saprõni zahuré, awaru po'repore hã, Zezusihi ma. Te te tãma ãwisi zahuré wamhã, ma tô tisi'ubuzém na tãma ba'ubu zahuré. Tawamhã ma tô Zezusi pawaptob zahuré, ãma sarõtõ da. 36Ãma morĩ ré, ma tô dasi'ubuzém na bâdâdi hã da te waptâ za'ra. 37-38Tawamhã ma tô rob'umhutu, Zeruzalẽ u hã. Oriwera na te za oto si'ra, Zeruzalẽ u wisi da. Tamomo, te da'ahâ na Zezusihi zarina ai'aba'ré ni, isazei'wa norĩ hã. Ma tô te te ãma 're 'madâ'â za'ra aré, Zezusi te te 're ida'apawapto mono zém na, tiwaihu'u pese uptabi na. Tahawa, te oto damreme 'rãihâ na dasima nharĩ za'ra ni, ãne:

— Uburé Danhib'apito te we oto mo, 'Re ihâimana u'âsi mono zadawa para. Tãma 're rowẽ za'ẽtẽ mono di za. Rowẽ hã hâiwa ãma 're isa'wari u'âsi mono da si, wa wasima wẽ za'ra ni.

39Tahawa, farizeu norĩ hã dawa'wa isi'aba'ré hã, te Zezusihi ma nharĩ za'ra, ãne:

— Rowahutu'wa, ma'ãpé asazei'wa norĩ hã sadawa uwati za'ra na, ari'iwi si'aba'ré da.

40Tawamhã te Zezusi hã asa tãma nharĩ za'ra, ãne:

— Tô sena wa aima waihu'u za'ra wa'wa. Ari'iwi si'aba'réi 'wa'âhã, te aré tô ẽne hã mreme 'rãihâ na, 'Re ihâimana u'âsi mono ãma tiwata za'ra.

Zezusi hã Zeruzalẽ norĩ ãma isiwa'õzé wasu'u

41Tawamhã Zezusi hã ma tô rob'umhutu oto, Zeruzalẽ u hã. 'Ri ahâ hã te te 'madâ'â wamhã, te aiwa'õ, iwa 're idasi'ubumroi mono norĩ ãma hã. 42Tahawa, te ãne tinha:

— Ãhã na dama 're irowẽ za'ra mono zé hã dama waihu'u za'ra 'wa'âhã, aré dama 're rowẽ za'ra mono di. Tane nherẽ, dama waihu'u za'ra õ di. Tahawa, da'ãma ĩpẽ'ẽzé di. 43Niwapsi, te za danhitob'ru norĩ hã daré 'ri uirĩ za'ra. Ti'a za'wari na te za te te 're 'ri uirĩ za'ra, imana wawi, 're dawairébé tõ mono da, nimomo. 44Danhitob'ru norĩ hã te za 'ri hã daré te te 're sãmra za'ra. 'Ri hã, tâibâ za oto. 'Ri tede'wa zama, te za uprosi za'ra. 'Ri tâibâ wamhã, ẽne hã te za oto re na 're simi'wara, 'rizé hã. 'Re ihâimana u'âsi mono, te aré danho'reptu za'ra. Tane nherẽ, danho'reptui'wa, datẽme iwisi na hã da te waihu'u za'ra õ di.

Zezusi te te dama inharĩzé, rowede'wa norĩ ma

Mateu 21.12-17; Marcu 11.15-19; Zuwã 2.13-22

45Tawamhã 'Re ihâimana u'âsi mono nhorõwa u, ma tô ãzé Zezusi hã, 'ri 'wawi wa'ra 're. Sébré wamhã, ma tô rowede'wa norĩ hã te te sate, rob u wairébé da. 46Ãne te tãma nharĩ za'ra:

— Duréihã wahi'rada hã ma tô ãne na rob'ui'éré ibaihâ na hã, 'Re ihâimana u'âsi mono mreme na: “Ĩnhorõwa hã iwa ĩma 're idamreme zusi mono zém na, te za da te 're sisi za'ra, 'ri hã.” Ãne te tinha. Tane nherẽ, ma tô a norĩ wa'wa hã iwa asima 're irob'manharĩ wasété za'ra wa'aba mo. Tahawa, danhibrom na dawi 're isipsaihuri za'ra mono norĩ, 're isi'ubumroi mono zém ne, te oto 'ri hã 're sa, wasété uptabi na.

47Tawamhã bâtâ sidâpâsi, te nasi dama rowasu'u Zezusi hã, 'ri 'wawi wa'ra 're. Ni'wam norĩ hã ma tô Zezusi hã sima 'ru za'ra, te te siwi wĩrĩ da. Ta norĩ hã 'Re ihâimana u'âsi mono ma, da'ãma romhuri'wa ipire norĩ hã, duré isimiroti na rob'ui'éré 'rata na dama rowahutu'wa norĩ hã, duré roti'wa norĩ hã. 48Tane nherẽ, Zezusi te te siwi wĩrĩ da nherẽ, te te siwi wĩrĩ õ di. E marĩ wa. Te te 're iwapari za'ra mono norĩ hã ahâ wa, te te siwi wĩrĩ waihu'u õ di.

Currently Selected:

Luca 19: xavBP

Highlight

Copy