Luca 6

Sabadu na, Zezusihi nhimirotizé wasu'u

Mateu 12.1-8; Marcu 2.23-28

1Tawamhã sabadu na, Zezusi norĩ hã ma tô ro'rahâri za'ra, amnho wa'wai baba, zudeu norĩ te, romhuri zahârizém na. Tawamhã amnho trigu hã ma tô te te sima 'rãnhinarĩ, tinhib'rata na te te sima tomhâiwazu za'ra da, te te huri mono da, isiré 're inomro mono norĩ hã. 2Tawamhã farizeu norĩ hã te tãma nharĩ za'ra:

— Wahi'rada Mozési hã ma tô wama roti za'ra, sabadu na hã wa te 're romhuri za'ra mono tõ da. E marĩ da, te bété iromhuri za'ra wa'wa, ãne te te wama roti za'ra õ nherẽ.

3Tawamhã Zezusi te asa tãma nharĩ za'ra, ãne:

— E apito Dawihi wasu'u na rob'ui'éré hã 're sõré za'ra wa'aba mono ã bâ, te te irob'manharĩzém na hã, tisiré norĩ me. 4Mra te te simroi wamhã, ma tô ãzé 'ri para u, 'Re ihâimana u'âsi mono nhorõwa 'ri u. Tawamhã sébré wamhã, ma tô 'mai'rẽ i'u'ẽne hã, 'Re ihâimana u'âsi mono ma, aré da te isa'ra za'ra hã. Duré tisiré norĩ ma, ma tô tãma a za'ra. 'Re ihâimana u'âsi mono, ma tô aré pisutu, da'ãma romhuri'wa norĩ si, i'u'ẽne hã te te 're huri mono da hã, sasedoti norĩ si. Tane nherẽ, ma tô 'mai'rẽne za'ra, Dawi norĩ hã.

5Te duré tãma nharĩ za'ra, ãne:

— Wa hã 'Re ihâimana u'âsi mono te te ĩpisudu, dasiré ĩpoto da, ti'ai ãma. Tahawa, dama ĩpire di, sabadu na roti hã te dama 're i'apisutu mono zéb da hã.

Aibâ isimizu'rã're hã, Zezusi te te ipesezé wasu'u

Mateu 12.9-14; Marcu 3.1-6

6Tawamhã sabadu ihâiba amo na, ma tô duré ãzé zudeu norĩ te, rowahutuzéb u, Zezusi hã. Tame te duré aibâ hã dame nhamra, isimire niwĩ isimizu'rã're hã. 7Tawamhã 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã ma tô siwi 'madâ Zezusi hã, sabadu na te te pese zô, romhuri zahârizém na. Farizeu norĩ me, te simiza'rese sina 'madâ'â za'ra. Mozésihi nhimiroti te te 'madâ'â õ wa, te te siwi wẽ'õ da, te 'madâ'â pese za'ra. 8Tawamhã Zezusi ma tô sina waihu'u za'ra, isimirosa'rata za'ra hã. Tawamhã aibâ ma, te tinha, ãne:

— Aiwahutu, dawa'wa asab da.

Tawamhã aibâ ma tô wahudu. Hâiwi te za. 9Tawamhã Zezusi ma tô ãma sadanharĩ za'ra, ãne:

— Wa za asadanharĩ za'ra wa'wa. E niha 'Re ihâimana u'âsi mono nhimiroti, sabadu na hã, romhuri zahârizé bâtâ na roti hã. E ma hã iwẽ, wa te 're i'manharĩ za'ra mono zéb da hã sabadu na. E ma hã iwẽ'õ. E wa te ãma 're dapawaptob za'ra mono õ di za. E wa te ãma 're danho'reptu za'ra mono õ di za. E niwamhã wa za taré wa te 're da'madâ'â za'ra, 're dadâ'â za'ra mono da.

10Tawamhã Zezusi te ab'madâ, te te siwi i'uirĩ za'ra norĩ hã. Tawamhã isimizu'rã're ma, te tinha:

— Ma'ãpé, asimizu wahutu.

Tawamhã ma tô tinhimizu wahutu, aibâ hã. Tawamhã awa'awi ma tô tinhimizu pese. 11Tawamhã rowahutu'wa norĩ hã ma tô sada tizahi za'ra, Zezusihi zada. Tawamhã te sima rosa'rata za'ra, marĩ hã te te tãma 'manharĩ za'ra da.

Zezusi hã aibâ 12 na te te ipisutu za'ra zé wasu'u, tizadawa wasu'u'wa da

Mateu 10.1-4; Marcu 3.13-19

12Tawamhã ẽtẽ 'rãihâ na ma tô Zezusi hã sai'u, 'Re ihâimana u'âsi mono ma, mreme da. Tawamhã mara bâre te tãma mre. 13Tahawa, awẽ wi ma tô sô tihârâ za'ra, tizazei'wa norĩ zô. Tawamhã itẽme sihutu wamhã, ma tô pisutu za'ra, 12 na ihâiba za'ra hã isiré 're nomro mono da. Ma tô oto sisi za'ra, tizadawa wasu'u'wa na. 14Ta norĩ nhisi za'ra hã ãne: Sima Pedru, ino Ãdréhé me. Pedru na te za sisi té, Zezusi hã. Duré Tiagu norĩ hã tisisãnawã Zuwãhã me, duré Filipi norĩ hã, Batolomeuhu me, 15duré Mateu norĩ hã, Tomehẽ me, duré Tiagu, Afeuhu 'ra hã, duré Sima Zeroti, 16duré Zuda Tiaguhu 'ra hã, duré Zuda Icarioti, dama ihâiba nhomri'wa da hã.

Zezusi te te irowasu'uzé, duré te te ida'apesezé wasu'u

Mateu 4.23-25

17Tawamhã Zezusi norĩ hã ma tô sa'a hawi si'ra za'ra. Tawamhã ti'ai haré u sihutu õ ré, te a'â nhamra, sõnhihâpâ ãma, tizazei'wa norĩ me. Isazei'wa norĩ hã ahâ di. Tame duré da'ahâ uptabi na, te sô ai'ubumro ni. Daro mono bâ, ma tô iwana sô tasi'rã'õtõ ni, Zudéa na danhipti'a nho'õmo nhisi hawi, duré Zeruzalẽ hawi, duré Tiru na 'ri nho'õmo nhisi hawi, duré Sidõ hawib zama. Â zaihâ na Tiru hã, duré Sidõ, 'ri nho'u hã. 18Zezusihi mreme hã da te wapari za'ra da, ma tô itẽme dasito. Duré te te da'apese da zama, ma tô itẽme ai'aba'ré ni, duré wa'uburé te te dama anhamra da. Tawamhã ma tô dama anhamra. 19Simipese waihu'u pese wa, ma tô dasima wẽ za'ra ni, danhib'rata na da te upi za'ra da, rowẽ na oto 're dasi'ubumroi mono da.

Dama 're irowẽ za'ra mono zé wasu'u, robzei'õ na 're idasi'ubumroi mono zé wasu'u me

Mateu 5.1-12

20Tawamhã Zezusi hã te tisiré 're inomro mono norĩ hã 'madâ'â pese za'ra. Tahawa, te ãne tãma nharĩ za'ra:

— Ãté asibrob ãna, te oto 're anomro aba mo. Tane nherẽ, aima 're robze za'ra wa'aba mono di za. 'Re ihâimana u'âsi mono hã, Danhib'apito uptabi. Tahawa, isib'a'uwẽ 're anomro aba mono wa, aima 're robze za'ra wa'aba mono di za.

21— Ãté mra, te oto 're isépata za'ra wa'aba mo. Tane nherẽ, te za robze na 're aihâimana za'ra wa'aba mo. Niwapsi mra hã, ahâ di za.

— Ãté te oto 're ai'ru'ru wa'aba mo, aipẽ'ẽzé za'ra wa'aba wa. Tane nherẽ, te za robze na 're aihâimana za'ra wa'aba mo. Niwapsi te za aipẽ'ẽ 're, 're ato za'ra wa'aba mo, rowẽ te.

22— A norĩ wa'wa hã ti'ai ãma Dasiré Ipoto zazei'wa, 're anomro aba mono wa, ãté te za da te 're ai'ruiwapari za'ra wa'wa. Ãté te za da te 're aiwẽ'õ za'ra wa'wa. Ãté te za da te aima 're nharĩ wasété za'ra wa'wa. Ãté aiwasédé hã te za taré da te ai'ãma 're sa'ra za'ra wa'wa. Ãne wamhã, te za robze na 're aihâimana za'ra wa'aba mo. 23Rowẽ te, te za 're asarõtõ za'ra wa'aba mo. A norĩ wa'aba ma si, rowasédé hã da te aima 're 'manharĩ za'ra wa'aba mono õ di za. E marĩ wa. Ihi'rata za'ra norĩ hã ma tô ãne hã rowasédé hã, 'Re ihâimana u'âsi mono zadawa 'mahârâ 'rata 'wa norĩ ma hã te te 're 'manharĩ za'ra. Tahawa, da te 're ai'ruiwapari za'ra wa'aba mono nherẽ, aima 're rowẽ za'ra wa'aba mono di za. Niwapsi, 'Re ihâimana u'âsi mono, te za marĩ iwẽ hã te te aima 're sõmri za'ra wa'wa, hâiwa ãma asô 're isimi'wara aba mono hã. Tahawa, aima 're rowẽ za'ra wa'aba mono di za. — Ãne romhâ ré ma tô tãma waihu'u siromo za'ra, tisiré 're inomro mono norĩ ma hã.

24— Ãté asibrob ahâ na, te a'â 're aihâimana za'ra wa'aba mo. Niwapsi tâibâ za oto asibrob ahâ za'ra wa'wa hã. Tawamhã robzei õ na, te za 're ai'ubumroi wa'aba mo.

25— Ãté asai ahâ na, te a'â 're aihâimana za'ra wa'aba mo. Niwapsi, te za mra hã 're isépata za'ra wa'aba mo. Tawamhã te za robzei õ na 're aihâimana za'ra wa'aba mo.

— Ãté rowẽ te, te a'â aipẽ'ẽ na 're ato za'ra wa'aba mo. Niwapsi te za robzei ãna 're asimroi wa'aba mo. Tawapsi te za duré 're ai'ru'ru wa'aba mo.

26— Tane duréihã ma tô aibâ norĩ ãma 're dawata za'ra. 'Re ihâimana u'âsi mono zadawa wasu'u uptabi 'wa newa, ma tô ãma 're wata za'ra, wahi'rata norĩ hã. Tahawa, a'â ai'ãma 're dawata za'ra wa'aba mono nherẽ, niwapsi aima 're rowẽ za'ra wa'aba mono õ di za.

Zezusihi nhimiroti wasu'u, da te 're idazawi pese za'ra mono zém na

Mateu 5.38-48

27— Ĩwapari'wa norĩ, wa za aima waihu'u za'ra wa'wa, ãne hã: Asawi'õ'wai wa'aba norĩ hã te za 're isawi pese za'ra wa'aba mo. Duré ai'ruiwapari'wa norĩ ma, te za marĩ tãma 're i'manharĩ wẽ za'ra wa'aba mo, iwẽ na. 28Duré da te aima 're nharĩ wasété za'ra wa'aba mono nherẽ, te za da'ãma 're aimreme zusi aba mo, 'Re ihâimana u'âsi mono ma, iwẽ hã te te dama 're anhomri mono da. Da te aima 're rob'manharĩ wasété za'ra wa'aba mono nherẽ, te za 'Re ihâimana u'âsi mono wi 're irowaptẽrẽ za'ra wa'aba mo, te te 're da'apawapto mono da. 29Ai'u'rata wi, da te 're aihâ za'ra wa'aba mono wamhã, dama ãma 're wa'rãmi za'ra wa'aba mono õ di za. Taré te za 're aipizari za'ra wa'aba mo, ai'u'rata amo niwĩ, da te 're aihâ za'ra wa'aba mono da. Duré asi'ubuzé hã da te aiwi 're waibui wa'aba mono wamhã, dawi 're sawi za'ra wa'aba mono õ di za, asõ'utu'u zama, da te aiwi 're waibui wa'aba mono da. 30Marĩ hã da te aiwi 're waptẽrẽ za'ra wa'aba mono wamhã, te za dama 're isõmri za'ra wa'aba mo. Ãté ni'wa hã te za asibro hã aiwi âri 'wa. Tawamhã sô aihârâ õ di za, apâ te te aima sõmri da. 31Marĩ iwẽ si, da te aima 're 'manharĩ za'ra wa'aba mono da, asima 're idawẽ za'ra wa'aba mono ne, te za marĩ iwẽ si dama 're i'manharĩ u'âsi za'ra wa'aba mo, iwa'rãmi.

32— Siwa'ru, te za 're idazawi pese za'ra wa'aba mo. Dawasété na 're idanomro mono hã, tizawi pese 'wa si, te te 're sawi pese za'ra. Tanei õ di, a norĩ wa'wa hã za. Ãne wamhã, iwẽ na te te 're asawi za'ra wa'aba mono õ di za, 'Re ihâimana u'âsi mono hã. Tahawa, te za uburé 're idazawi pese za'ra wa'aba mo. 33Duré, uburé te za marĩ hã dama 're i'manharĩ wẽ za'ra wa'aba mo. Dawasété na 're idanomro mono norĩ hã, tizawi pese 'wa norĩ ma si, te za te te tãma 're 'manharĩ wẽ za'ra. Tanei õ di, a norĩ wa'wa hã za. Ãne wamhã, e niha te za 're i'umnhasi za'ra wa'aba mo, iwẽ na te te aima ãma 're i'a'uwaimrami aba mono da hã, 'Re ihâimana u'âsi mono hã. Tahawa, te za marĩ hã uburé dama 're i'manharĩ wẽ za'ra wa'aba mo. 34Duré, uburé te za dama 're asõprub za'ra wa'aba mo. Ãté marĩ hã te za da te aiwi 're waptẽrẽ za'ra wa'wa, a'â dama 're sõmri za'ra wa'aba mono da. Tawamhã te za dama 're isõmri za'ra wa'aba mo, iwa'rãmib zô 're asimnhasi za'ra wa'aba mono ãna. Dawasété na 're idanomro mono hã te marĩ hã tisiré norĩ ma si, te te 're sõmri za'ra, te te siwi 're waptẽrẽ za'ra mono wamhã. Tawamhã te duré iwa'rãmib zô 're simnhasi za'ra. Tanei õ di, a norĩ wa'wa hã za. Ãne wamhã, iwẽ na te te 're asawi za'ra wa'aba mono õ di za, 'Re ihâimana u'âsi mono hã. Tahawa, te za uburé dama 're asõprub za'ra wa'aba mo. 35Dawasété na 're idanomro mono ne, 're anomro aba mono õ di za. Uburé te za 're idazawi pese za'ra wa'aba mo. Asitob'ru norĩ zama, te za 're isawi pese za'ra wa'aba mo. Uburé te za marĩ hã tãma 're i'manharĩ wẽ za'ra wa'aba mo. Ãté marĩ hã te za da te aiwi 're waptẽrẽ za'ra wa'wa, suru na a'â dama 're sõmri za'ra wa'aba mono da. Tawamhã te za dama 're isõmri za'ra wa'aba mo. Iwa'rãmib zô 're asimnhasi za'ra wa'aba mono õ di za. Ãne wamhã, te za iwẽ na te te 're asawi za'ra wa'wa, 'Re ihâimana u'âsi mono hã. I'ra te za 're aihâimana za'ra wa'aba mo, danhipai u ipire uptabi 'ra na. Marĩ wẽ na, uburé te dama 're sõpru. Isõprum na ãma 're idawata za'ra mono õ norĩ ma zama, te dama 're sõpru. Dawasété na 're idanomro mono ma zama, te uburé 're sõpru. 36Tahawa, te za Aimama aba ne, 're anomro aba mo, aiwẽ na.

37— Dawasédé hã da'ãma 're isa'ra za'ra wa'aba mono zéb zarina, asiwi 're dawẽ'õ za'ra wa'aba mono õ di za. Tawamhã te te siwi 're aiwẽ'õ za'ra wa'aba mono õ di za, 'Re ihâimana u'âsi mono hã. Dawasédé hã da'ãma 're isa'ra za'ra wa'aba mono zéb zarina, dama 're nharĩ za'ra wa'aba mono õ di za. Tawamhã 'Re ihâimana u'âsi mono, te te aima 're anharĩ aba mono õ di za. Marĩ, da te aima 're i'manharĩ wasété za'ra wa'aba mono zé hã, asina 're 'madâ'â za'ra wa'aba mono õ di za. Tawamhã aiwasété 'wa hã te te 're ab'madâ'â mono õ di za, 'Re ihâimana u'âsi mono hã. 38Asibrom na te za dama 're asõprub za'ra wa'aba mo, isimarĩ'õ norĩ ma. Tawamhã 'Re ihâimana u'âsi mono hã te za marĩ hã iwa'rãmi sa'ẽtẽ na te te aima 're sõmri za'ra wa'wa. Marĩ na asima 're asõprub za'ẽtẽ za'ra wa'aba mono ne, te za aima 're sõprub za'ẽtẽ za'ra wa'wa. Sa'ẽtẽ na dama 're sõmri za'ra wa'aba mono wamhã, te za sa'ẽtẽ na te te aima 're sõmri za'ra wa'wa, iwa'rãmi, 'Re ihâimana u'âsi mono hã. Suru na dama 're sõmri za'ra wa'aba mono wamhã, te za suru na te te aima 're sõmri za'ra wa'wa.

39Tawamhã ãne te tãma ãma romnhimiré'é za'ra:

— Ni'wam norĩ hã tob'a zahuré wamhã, nimomo sisaprõni zahuré wamhã, sisaprõni wẽ zahuré õ di za. Te za siré tiwaptã'ã zahuré, ab're u. 40Romnhoré'wa norĩ hã te te 're romnhoré za'ra mono ré hã, pire na 're hâimana waihu'u za'ra mono õ di, tãma iromnhoré'wa norĩ ma hã. Niwapsi te te 're uprosi za'ra mono wapsi, te za te te 're waihu'u za'ẽtẽ za'ra, tãma iromnhoré'wa norĩ sine hã.

41— Ãté wede nhipru atõmo 're, te nomro, aima i'madâ'â waihu'u õ hã. Ãhã nherẽ, e niha te za bété sô itõmo 'madâ, wede nhiprubre wazere da hã, asisãnawã tõmo hawimhã. 42Wede nhipru atõmo 're inomro, 'madâ'â õ nherẽ, e niha te za õhõ ma si hã tãma inha, ãne: “Ropru hã a'â te aima wazere, atõmo hawimhã.” Mare di. Wede nhipru atõmo 're inomro hã te za a'â atõmo hawimhã iwaze. Tawamhã te za sô airĩtĩ wẽ, wazere da, asisãnawã tõmo hawimhã, wede nhiprubre hã.

43-45— Rowede hã wẽ wamhã, 're 'rãi wasété za'ra mono õ di za, wede wẽ wa. Wasété wamhã, 're 'rãi wẽ za'ra mono õ di za, wede wasété wa. 'Re 'rãi wẽ za'ra mono wamhã, te za ãma waihu'u za'ra ni, rowede iwẽ na. E wab'ru u, te za 're aimo, rob'rã ise zô. Mare di. Wab'ru na 're simnhatã mono õ di, rob'rã ise hã. E aptob u, te za 're aimo, rob'rã ise zô. Mare di. Aptom na 're simnhatã mono õ di, rob'rã ise hã. Ãne ni'wa hã 're morĩ wẽ wamhã, tipẽ'ẽ 're, tinhimirosa'rata wẽ hawim na, te za 're mreme wẽ u'âsi. Duré ni'wa hã 're morĩ wasété wamhã, tinhimirosa'rata wasété hawim na, te za duré 're mreme wasété u'âsi. Danhimirosa'rata zarina, te za tô õne u'âsi 're damreme zusi.

'Ri'wa norĩ wasu'u

Mateu 7.24-27

46— E marĩ da, ma tô Asib'apito na asiwi 're ĩnhisi za'ra wa'aba mo, ĩnhimiroti hã 're 'madâ'â pese za'ra wa'aba mono õ nherẽ. 47Ãté ni'wam norĩ hã te za we ĩtẽme aihutu, ĩnhimiroti hã te te wapari za'ra da. Tawamhã te te wapari za'ra wamhã, te za oto ĩnhimiroti hã te te 're 'madâ'â pese za'ra. 48Tahawa, wa za ĩnhimiroti 'madâ'â'wai ãma simiré'é, 'ri'wa na. Aibâ hã ma tô ab're, 'ri da, ti'ai 'rowi ẽne hã inomro u. Tawamhã ma tô ãma tipahâ, ab're na. Ab're 'rehâ di oto. Tawamhã ẽtẽ nhisiwi ma tô 'ri, aibâ hã. Tawamhã âpré wamhã, â hã ma tô 're praba, 'ri u. Tete na ma tô 'ri hã 'manha, aibâ hã. Tahawa, rési ãna te 're sa, 'ri hã. 49Ãté ni'wam norĩ hã te za ĩnhimiroti hã tipo're na te te 're wapari za'ra. Tane nherẽ, te te 're 'madâ'â za'ra mono õ di za, ĩnhimiroti hã. Tahawa, wa za ĩnhimiroti 'madâ'â'õ'wai ãma simiré'é, 'ri'wa ihâiba amo na. Aibâ hã 'ri na'rata da, te te ab're õ di. Ti'a nhisiwip si, ma tô sima 'ri. Tawamhã 'ri u, â 're praba mono wamhã, â, ma tô 'marõwĩ, 'ri hã. Tâibâ oto. Tahawa, ma tô aipru pese, 'ri hã.

Currently Selected:

Luca 6: xavBP

Highlight

Copy