Hechos 2
2
1Ja cꞌa tok xerilaꞌ ja nmakꞌij rbinaꞌan Pentecostés canojel ja rdiscípulo ja Jesús ejeꞌeꞌ xa jun quibanon, xa jun quimolon wiꞌ quiꞌ. 2Chaka cꞌa jalal ja tok cꞌoli quicꞌaxaj penak chicaj caniꞌ jun nimlaj ikꞌ tok njaktajto. Ja cꞌa rukul cꞌaxax cumal canojel ja retzꞌubul pa jay. 3Cꞌacꞌariꞌ cꞌoli winakar chiquewach caniꞌ rxak tak kꞌakꞌ, xuqꞌuiak riꞌ chiquij chiquijujunal. 4Cꞌacꞌariꞌ noji ja rEspíritu Santo pa tak canma canojelal in quemaj tzij chipan chic juleꞌ tzobal ja caniꞌ yataj chique chiquijujunal rmal ja rEspíritu Santo.
5Jariꞌ tiempo ecꞌoli winak ja raj Israel nojel nación epenak wiꞌ, quimolon quiꞌ pa Jerusalén, congana nqueban respetar ja quireligión. 6Ja cꞌa tok quicꞌaxaj ja bantaji xebe xequimoloꞌ quiꞌ. Congana sach quinaꞌoj como pa quitzobal ejeꞌeꞌ netzijon wiꞌ ja rdiscípulo ja Jesús, queriꞌ quicꞌaxaj chiquijujunal. 7Congana cꞌascꞌoꞌi quicꞌaxaj in quewaꞌ quibij chibil tak quiꞌ riꞌ:
—¿Nak tre cꞌalaꞌ? ¿La ma e aj Galilea ta cꞌa ja winak leꞌ ja quimajon tzij? 8¿Nak tre tok netzijon takaꞌan pa tak katzobal chikajujunal? 9Como ecꞌo juleꞌ chake Partia epenak wiꞌ in juleꞌ chic chake e aj Media, ecꞌoli epenak Elam, ecꞌoli epenak Mesopotamia, ecꞌoli epenak pa Judea, ecꞌoli epenak pa Capadocia, ecꞌoli epenak Ponto, ecꞌoli epenak Asia, 10ecꞌoli epenak Frigia, ecꞌoli epenak Panfilia, ecꞌoli epenak pan Egipto in ecꞌoli epenak pa tak lugar ja cꞌo pa rcuenta Africa ja cꞌo chinakaj Cirene. Ecꞌoli ja raj Roma waweꞌ chakajaꞌ, juleꞌ chique waweꞌ pan Israel eꞌalaxnak wiꞌ in juleꞌ chic chique ja xa quiniman ja religión kaxin ja rok aj Israel. 11In ecꞌoli chakajaꞌ ja raj Creta in juleꞌ chic aj Arabia pro kanojel nkacꞌaxaj ja nimlaj samaj xin Dios ja quimajon rchꞌobic chikawach pa tak katzobal chikajujunal, xecheꞌe. 12Canojel congana cꞌascꞌoꞌi quicꞌaxaj in sach quinaꞌoj como ejeꞌeꞌ matichꞌobtaj cumal nak rbanic ja bantaji in quewaꞌ quibij chibil tak quiꞌ riꞌ: —¿Nak tibij cꞌawaꞌ wariꞌ ja bantaji? xecheꞌe. 13Pro ecꞌo juleꞌ chique xa neyokꞌoni in quewaꞌ quibij riꞌ: —Jalaꞌ winak leꞌ xa e kꞌabarelaꞌ, xecheꞌe.
* * * * * * * * * *
14Ja cꞌa Pedro arjaꞌ cꞌo chiquicojol ja re julajuj chic apóstol, xumaj tzij cuqꞌuin ja winak, cow tzijoni in quewaꞌ xbij chique riꞌ: —Achiꞌiꞌ ja rix wach tak aj Israel in ixix chakajaꞌ ewanojel ja rixcꞌo pa Jerusalén, bien tecꞌwaxaj ja xtinbij chewe riꞌ in bien techꞌoboꞌ. 15Ajoj ma ok kꞌabarelaꞌ ta ja caniꞌ nebij chake como cꞌa xuban a las nueve xin akꞌabil. 16Ja xetzꞌat camic jariꞌ bitajnak can ojer rmal ja profeta Joel quewariꞌ: 17—Ja pa rqꞌuisbal tak kꞌij ntakel na ja rEspíritu Santo cuqꞌuin ja winak xa nak ta chi winakil, neꞌe ja Dios. Ja cꞌa rewalcꞌwal chi alaꞌiꞌ chi xtaniꞌ ejeꞌeꞌ nqueyaꞌ na rbixic ja nkꞌalasaj chiquewach. In chakajaꞌ ja cꞌajolaꞌ chewe anin nyaꞌ na chique chi cꞌoli nquetzꞌat jeꞌe ja majaꞌn tibantaji. In ja rijaꞌ chewe nyaꞌ na chique chi cꞌoli ncachcꞌaj jeꞌe ja majaꞌn tibantaji chakajaꞌ. 18Jariꞌ tiempo chakajaꞌ ntakel na ja rEspíritu Santo cuqꞌuin ja rajsamajelaꞌ wxin chi achi chi ixok in ejeꞌeꞌ nqueyaꞌ na rbixic ja nkꞌalasaj chiquewach. 19In cꞌo jeꞌe nwinakarsaj na chwach ja caj ja ni majutij quitzꞌaton ta ja winak. In ja chwachꞌulew chakajaꞌ cꞌo retal jeꞌe ja nwinakarsaj na caniꞌ tre quicꞌ caniꞌ tre kꞌakꞌ in caniꞌ tre sib. 20In maticaꞌy chic ja kꞌij in ja icꞌ chakajaꞌ noqui caniꞌ quicꞌ. Nojel awaꞌ wariꞌ nbantaj na cumplir tokoriꞌ tok majaꞌn terilaꞌ ja nimlaj kꞌij xin juicio. 21In canojel ja winak ja nquicꞌutuj ja quitoꞌic tre ja Dios ejeꞌeꞌ netotaji. Queriꞌ rbin can ja Dios ja caniꞌ tzꞌibtal can chipan ja rtzobal rmal ja profeta Joel, neꞌe ja Pedro chique ja winak. 22In xbij chic chique:
—Achiꞌiꞌ ja rix wach tak aj Israel, tecꞌwaxaj ja xtinbij chic chewe riꞌ. Ja Dios arjaꞌ xuyaꞌ tre ja Jesús ja raj Nazaret chi xuban jun nimlaj samaj checojol in bien ewotak ja juleꞌ milagro ja xuban chewach. Triꞌ cꞌa nkatzꞌat wiꞌ chi ja Jesús arjaꞌ jun achi utz tzꞌat rmal ja Dios. 23Ja Dios xuyaꞌ lugar chewe chi xecamsaj ja Jesús como xejach pa quekꞌaꞌ ja winak ja ma cotakin ta ja rtzobal Dios in ejeꞌeꞌ querip chwach cruz. Ja Dios ni rotak wiꞌ ojer chi ja Jesús nja̱ch na pa quekꞌaꞌ ja netzelan rxin como arjaꞌ ni rchominto wiꞌ ojer chi niquirwariꞌ nba̱n tre. 24Pro ja Dios toꞌo rxin chipan ja camíc in xuyaꞌ tre chi cꞌastaji como ja Jesús mta moda qꞌuejeꞌ ta chijutij pa rukꞌaꞌ ja camíc. 25Mta moda como ja rey David ojer quewaꞌ rtzꞌiban can tre ja Jesús riꞌ: —Anin wotak chi ja wajaw Dios ni cꞌo wiꞌ wqꞌuin, cꞌo pa wiquikꞌaꞌ in ninrutoꞌ utzcꞌa ni majun nxbej wiꞌ wiꞌ. 26Rmalcꞌariꞌ tok congana nquicoti ja wanma in nyaꞌ rbixic ja quicotemal ja cꞌo wqꞌuin. Ja cꞌa tok xquincami wotak chi cꞌa cꞌo na ja rawutzil nwaybej triꞌ 27como atat mta moda xquinayaꞌ can ta chijutij chiquicojol ja camnakiꞌ. Ja cuerpo rxin ja Santilaj Awalcꞌwal wotak chi matayaꞌ lugar tre chi xtakꞌay ta. 28Atat achꞌobon chinwach nak rbeyal ja utzlaj cꞌaslemal. Ja tok xquineqꞌuejeꞌ na awqꞌuin chijutij jariꞌ congana nnoji ja quicotemal pa wanma. Queriꞌ rtzꞌiban can ja David ojer, neꞌe ja Pedro. 29In xbij chic chique:
—Ixix ja rix wach tak aj Israel, bien kotak chi cami ja David ja kamamaꞌ in xemuki in ja rpanteón cꞌa cꞌo na kuqꞌuin camic. 30Pro ja David arjaꞌ jun profeta xin Dios in xurkaj tre ja juramento ja rbanon ja Dios quewariꞌ: —David, anin quewaꞌ ntzujuj chawe riꞌ, cꞌo jun chique ja rawiy amam ja majaꞌn talaxi, arjaꞌ ariꞌ ja Cristo in xtincoj como Rey pan acꞌaxel. Queriꞌ tzujun can tre ja David rmal ja Dios. 31Rmalcꞌariꞌ ja tok cꞌoli ja xtzꞌibaj can ja David tre rcꞌastajic ja Cristo tokoriꞌ tok majaꞌn titakto ja Cristo chwachꞌulew como bien rotak chic chi ncꞌastaj na. Quewaꞌ ja xtzꞌibaj can riꞌ, ja Cristo arjaꞌ matiyaꞌ can chijutij chiquicojol ja camnakiꞌ in matakꞌayi ja rcuerpo chakajaꞌ. 32Ja Dios arjaꞌ xuyaꞌ tre ja Jesús chi cꞌastaji in jariꞌ kotak kanojel in kamajon rbixic. 33Cꞌacꞌariꞌ jotbax chilaꞌ chicaj rmal ja Dios in yataj tre rmal ja Tatixel chi xutakto ja rEspíritu Santo waweꞌ chwachꞌulew ja caniꞌ tzujun tre ojer. Ja cꞌa rixix, ja remajon rtzꞌatic camic in ja remajon rcꞌaxaxic jariꞌ Espíritu Santo banowi. 34Ma ja ta David ja jotbax chilaꞌ chicaj pro quewaꞌ nbij ja David riꞌ: —Ja kajaw Dios quewaꞌ xbij tre ja Wajaw riꞌ: —Cattzꞌabeꞌ pa wiquikꞌaꞌ como congana nim akꞌij, 35waweꞌ natqꞌuejeꞌ wiꞌ in nenucoj na pan awakan ja netzelan awxin, atat natchꞌeco quixin, neꞌe. Queriꞌ rbin can ja David. 36Rmalcꞌariꞌ tok nbij chewe, ja Jesús arjaꞌ rip chwa cruz como ixix xixcꞌutuni ja camíc trij pro jariꞌ mismo Jesús cojon chic rmal ja Dios como Rajaw nojelal, cojon chic rmal como Cristo. Bien tewotakij ja cꞌa xinbij chewe riꞌ in bien ticotakij chakajaꞌ ja kach tak aj Israel pro ni canojelal. Queriꞌ xbij ja Pedro chique.
37Ja cꞌa winak tok quicꞌaxaj ja xbij ja Pedro chique congana xkꞌututuj riꞌ ja canma. Quewaꞌ quibij riꞌ:
—Ixix ja rix kach tak aj Israel ¿nak cꞌa cꞌo rjawaxic chake chi nkaban camic? xecheꞌ tre ja Pedro in chique ja juleꞌ chic apóstol. 38Ja cꞌa Pedro xbij chique:
—Teqꞌuexaꞌ ja renaꞌoj in teyaꞌaꞌ can ja ritzelal in chakajaꞌ quixban bautizar chejujunal pa rubiꞌ ja Jesucristo utzcꞌa chi ncuytaji ja rewil emac. Ja wi queriꞌ neban ja Dios arjaꞌ nutakto na ja rEspíritu Santo ewqꞌuin. 39Jariꞌ Espíritu Santo ja rtzujun can ja Dios ojer como arjaꞌ nrajoꞌ nutakto ewqꞌuin in cuqꞌuin ewalcꞌwal in cuqꞌuin chakajaꞌ canojel ja winak ja recꞌo pa natlaj tak tinamit. Ja rEspíritu Santo arjaꞌ nta̱kto cuqꞌuin canojel ja winak ja nesiqꞌuix rmal ja Dios chi nquinimaj ja rtzobal, neꞌ chique.
40Jawaꞌ tzij xbij ja Pedro chique ja winak in juleꞌ chic paxbanem xuyaꞌ chique chakajaꞌ, quewaꞌ xbij chique riꞌ: —Quixtotaji, maxta teban ja ritzelal ja caniꞌ nqueban ja ritzel tak winak trewaꞌ tiempo riꞌ, neꞌ chique.
41Ja winak ja utz quicꞌaxaj ja xbij ja Pedro ejeꞌeꞌ xeba̱n bautizar in jariꞌ mismo kꞌij ecꞌo la oxiꞌ mil ja xeꞌoc cachbil ja kachꞌalal. 42Ejeꞌeꞌ congana quetij quekꞌij chi rotakixic ja tijonem ja ncꞌu̱t chiquewach cumal ja rapóstol, xa jun quibanon. Ni nquemol wiꞌ quiꞌ chi rtijic ja caxlanway jariꞌ nquinatbej rxin ja Jesús. Chijutij quimajon rbanic ja roración.
* * * * * * * * * *
43Ja winak congana quixbej quiꞌ canojelal como ja rapóstol ejeꞌeꞌ yataj chique chi congana milagro queban. 44Canojel ja kachꞌalal xa jun quinaꞌoj, nojel ja mebaꞌil ja cꞌo cuqꞌuin xa jun quechꞌob trij. 45Ejeꞌeꞌ nquicꞌayij ja quimebaꞌil in nqueyaꞌ ja rjil chique ja kachꞌalal ja cꞌo rjawaxic chique. 46Kꞌij kꞌij ni nequimoloꞌ wiꞌ quiꞌ chipan ja nimlaj templo xin Dios, ejeꞌeꞌ xa jun quibanon. Neꞌewaꞌ pa tak cochoch, congana nequicoti, nojel quecꞌuꞌx nojel canma nquimaltioxij tre ja Dios. 47Congana nqueyaꞌ rukꞌij ja Dios in congana utz netzꞌa̱t cumal ja winak. Ja kajaw Dios arjaꞌ xuyaꞌ chique chi kꞌij kꞌij nij ecꞌo wiꞌ winak ja nquewil ja totajem xin Dios ja neꞌoc cachbil in be más pa nim ja riglesia.
Currently Selected:
Hechos 2: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
