Juan 8

1Ja cꞌa Jesús arjaꞌ be parwiꞌ ja ti jayuꞌ rbinaꞌan Rjayuꞌal Olivo. 2Ja cꞌa chi rcab kꞌij be chic jutij chanim chipan ja nimlaj templo pa Jerusalén. Ja cꞌa winak xebe ruqꞌuin. Arjaꞌ tzꞌabeꞌe in xumaj quitijoxic. 3Ja maestro ja netijon quixin ja winak tre ja ley xin Dios e cachbil ja fariseo ejeꞌeꞌ cꞌo jun ixok quicꞌamonto, xiltaji macunnak ruqꞌuin jun achi ja ma rchajil ta. Xequiyaꞌaꞌ ja rixok chiquicojol ja winak. 4Cꞌacꞌariꞌ quibij tre ja Jesús:

—Maestro, jawaꞌ rixok riꞌ xiltaji macun ruqꞌuin jun achi ja ma rchajil ta. 5In bin can chake rmal ja Moisés chipan ja ley xin Dios chi necamsax tzaꞌn abaj ja rixokiꞌ ja re quitakawariꞌ. Ja cꞌa ratat ¿nak nabij tre? xecheꞌ tre. 6Ja quicꞌaxaj tre xa nquicꞌambajbej rxin, nquicanoj nak nquichapbej rxin. Ja cꞌa Jesús chꞌuqueꞌ kaj chwi rkan, xumaj tzꞌibanem pa tokꞌulew, rwirukꞌaꞌ xucoj. 7Pro ejeꞌeꞌ como xajutij quimajon rcꞌaxaxic tre peꞌe nojoj in quewaꞌ xbij chique riꞌ:

—Ja ni majun ril rumac chewe jariꞌ tiyowi ja nabey abaj tre ja rixok leꞌ, neꞌ chique. 8Ja tok bitaj queriꞌ rmal chꞌuqueꞌ kaj chic jutij chwi rkan in xumaj chic jutij tzꞌibanem pa tokꞌulew. 9Ja tok quicꞌaxaj ja bix chique rmal ja Jesús quenaꞌ kaj chi cꞌo quil quemac ejeꞌeꞌ chakajaꞌ rmalcꞌariꞌ pa jujunal pa jujunal xebe. Ja cꞌa rijaꞌ ejeꞌeꞌ riꞌ ja kas xeꞌelel nabey in tok qꞌuiswani xebe canojelal. Xa ruyon chic ja Jesús qꞌuejeꞌ can, ja cꞌa rixok arjaꞌ peꞌe can chwach. 10Ja cꞌa Jesús tok peꞌe nojoj chic jutij tok xerutzꞌat ja winak ba la xeꞌoc wiꞌ, ti ruyon chic ja rixok cꞌo can in xbij tre:

—¿Bar cꞌa xeꞌoc wiꞌ ja winak ja nebini ja rawil? ¿La mta jun chique xukꞌet ta tzij chawij xatruqꞌuiak ta tzaꞌn abaj? neꞌ tre.

11—Ni majun, neꞌe ja rixok.

—In nixtacꞌa anin ta xtinkꞌet ta tzij chawij. Camic jat xarwariꞌ macatmacun chi ta, neꞌxi rmal ja Jesús.

* * * * * * * * * *

12Cꞌacꞌariꞌ tzijon chic jutij ja Jesús cuqꞌuin ja winak in xbij chique:

—Anin ja rin luz, nenuyaꞌ pa sakil canojelal ja winak ja recꞌo chwachꞌulew. Canojel ja winak ja nyukeꞌ quecꞌuꞌx wqꞌuin ejeꞌeꞌ maqueqꞌuejeꞌ chipan ja kꞌekumal, nyataj chique ja sakil pro jun sakil ja nuyaꞌ chique ja utzlaj cꞌaslemal ja mta qꞌuisic trij. Queriꞌ xbij chique. 13Pro ja fariseo ejeꞌeꞌ quechꞌaꞌ tre ja xbij:

—Atat como xa nayaꞌ kaj testigoꞌil chawij ayon chewiꞌ tok matikanimaj ja nabij leꞌ, xecheꞌ tre.

14—Masqui xa nuyon nyaꞌ kaj testigoꞌil chwij pro ni katzij wiꞌ ja nbij como anin wotak nak rbanic ja bar inpenak wiꞌ in triꞌ ninmeloj chi wiꞌ chakajaꞌ. Pro ja rixix ma ewotak ta ja bar inpenak wiꞌ in bar xquinmeloj chi wiꞌ. 15Xa enaꞌoj ixix necoj ja nekꞌetbej tzij chwij, ma xin Dios ta, pro ja chwe anin ni majun nak ta nkꞌet ta tzij trij. 16Pro wi cꞌoli ja kꞌetoj tzij nban jariꞌ ni rubey wiꞌ ja kꞌetoj tzij nban. Queriꞌ nbij chewe como ma nuyon ta anin ninkꞌetowi ja tzij, ok caꞌiꞌ ruqꞌuin ja Tatixel ja takyonto wxin. 17Ja chipan ja ley xin Dios ja cꞌol ewqꞌuin cꞌoli tzꞌibtal can chipan quewariꞌ, ja tok ecꞌo caꞌiꞌ achiꞌiꞌ ja xa junan ja testigoꞌil nqueyaꞌ jariꞌ seguro chi ni katzij wiꞌ ja testigoꞌil nqueyaꞌ, queriꞌ tzꞌibtal can. 18Queriꞌ cꞌa chwe anin chakajaꞌ, anin jun in testigo chwij nak ja rinocnak wiꞌ in ja Tatixel ja takyonpi wxin arjaꞌ jun chakajaꞌ. Queriꞌ xbij chique.

19—¿Bar cꞌa cꞌo wariꞌ ja ratataꞌ? xecheꞌ tre.

—Ja rixix ni ma chꞌobtajnak ta wiꞌ emwal nak inocnak wiꞌ in nixtacꞌa ja ta ja Nataꞌ chakajaꞌ chꞌobtajnak ta emwal nak rbanic. Ja wixta chꞌobtajnak emwal nak nbanic anin chꞌobtajnak ta cꞌariꞌ emwal nak rbanic ja Nataꞌ chakajaꞌ, neꞌe ja Jesús chique.

20Queriꞌ cꞌa rbanic ja juleꞌ tzij xuban ja Jesús chipan ja nimlaj templo xin Dios ja tok arjaꞌ rmajon quitijoxic ja winak. Triꞌ paꞌl wiꞌ ja bar nqueyaꞌ can wiꞌ ja quiꞌofrenda ja winak pro ni majun nak ta chapo ta rxin como majaꞌn terilaꞌ ja hora chi nchapi.

21Xumaj chic jutij tzij cuqꞌuin:

—Anin ninmeloji ja bar inpenak wiꞌ. Ja cꞌa rixix ninecanoj chi na pro maquinewil chic, chipan ja rewil emac nixcam wiꞌ. Ja bar xquinbe chi wiꞌ maquixcowin ixix nixekaj ta triꞌ. 22Ja cꞌa raj Israel ejeꞌeꞌ quemaj tzij chibil tak quiꞌ:

—¿La ncamsaj kaj riꞌ ruyon xa chewiꞌ tok makocowini nokekaji ja bar xtibe wiꞌ arjaꞌ? xecheꞌe. 23Ja cꞌa Jesús xbij chic jutij chique:

—Ixix xa ix xin waweꞌ, ja cꞌa ranin in xin chilaꞌ chicaj, xa ix xin rwachꞌulew pro ja chwe anin ma in queriꞌ ta. 24Rmalcꞌariꞌ xinbij chewe chi chipan ja rewil emac nixcam wiꞌ. Ja rinocnak wiꞌ anin nij in quirwariꞌ ja caniꞌ nbin chic chewe, ja cꞌa wi matenimaj chi queriꞌ nbanic jariꞌ ni nixcam wiꞌ chipan ja rewil emac. Queriꞌ xbij chique.

25—¿Nak cꞌa ja ratat? xecheꞌ tre.

—Ja rinocnak wiꞌ anin nij in quirwariꞌ ja caniꞌ nbinto chewe nabey. 26Cꞌa cꞌo na ja rebanon ja majaꞌn tinchꞌaꞌ chewe ja nixbanbex condenar. Pro ja takyonto wxin arjaꞌ ni katzij wiꞌ nojel ja nbij in ja rbin arjaꞌ chwe jariꞌ nmajon rbixic anin chique ja winak waweꞌ chwachꞌulew, neꞌe ja Jesús chique. 27Pro ja xbij ja Jesús ejeꞌeꞌ matichꞌobtaj cumal chi tre ja Tatixel ntzijon wiꞌ. 28Cꞌacꞌariꞌ xbij chic jutij chique:

—Ja Ralcꞌwalaxel ja xoc alaxic cuqꞌuin ja winak tok xtejotbaꞌ chwach jun cruz tokoriꞌ newotakij na nak inocnak wiꞌ chi nij in quirwariꞌ ja caniꞌ nbinto chewe in newotakij na chakajaꞌ chi nojel ja nmajon rbanic ma chaka ta nuyon kaj nban como nojel ja nmajon rbixic, ja Nataꞌ arjaꞌ cꞌutyon chinwach. 29Ja takyonpi wxin arjaꞌ cꞌo wqꞌuin camic, ja Nataꞌ ni ma inryaꞌon can ta wiꞌ. Queriꞌ rbanon chwe como anin ni nmajon wiꞌ rbanic ja nrajoꞌ chwe chi nban, neꞌe ja Jesús chique. 30Ja tok xbij ja tzij riꞌ e qꞌuiy chique ja winak yukeꞌ quecꞌuꞌx ruqꞌuin.

* * * * * * * * * *

31Cꞌacꞌariꞌ xumaj tzij cuqꞌuin ja raj Israel ja yukeꞌ quecꞌuꞌx ruqꞌuin, quewaꞌ xbij chique riꞌ:

—Ja wi xajutij nixqꞌuejeꞌ chipan ja ntzobal jariꞌ ni katzij wiꞌ chi ix ndiscípulo. 32Ja wi queriꞌ neban newotakij na janiꞌ ja nnaꞌoj in newotakij na chakajaꞌ chi ni katzij wiꞌ ja ntzobal in tok xtewotakij jariꞌ nixwasanel libre, neꞌ chique.

33—Pro ja rajoj ok riy rumam can ja rAbraham, majutij okqꞌuejenak ta pa quekꞌaꞌ winak okquibanon ta mandar ¿la ok preso laꞌan chewiꞌ tok nabij chake chi nokwasaxel libre? xecheꞌ tre. 34Ja cꞌa Jesús xbij chic chique:

—Ni katzij wiꞌ ja xtinbij chewe riꞌ, canojel ja winak ja nemacuni ejeꞌeꞌ xa e esclavo pa rukꞌaꞌ ja il mac como jaꞌ il mac nbano mandar quixin. 35Jun esclavo arjaꞌ mta rukꞌaꞌ tre chi xtiqꞌuejeꞌ ta chijutij chipan ja jay rxin ja rajaw pro jun alcꞌwalaxel jariꞌ cꞌo rukꞌaꞌ tre chi nqꞌuejeꞌe chijutij. 36Rmalcꞌariꞌ nbij chewe chi ja Ralcꞌwal Dios wi arjaꞌ nixwasanel libre jariꞌ ni katzij wiꞌ chi ix libre. 37Anin wotak chi ix riy rumam can ja rAbraham pro masqui ix riy rumam can pro emajon rcanoxic wij nwach nak neban chwe chi ninecamsaj. Queriꞌ cꞌa neban como mateyaꞌ lugar tre ja ntzobal chi nqꞌuiy más pa tak ewanma. 38Nojel ja nmajon rbixic anin jariꞌ ruqꞌuin Nataꞌ ntzꞌaton wiꞌ. Pro nojel ja remajon rbanic ixix jariꞌ etataꞌ ixix biyon chewe chi neban. Queriꞌ xbij ja Jesús chique.

39—Pro ja katataꞌ ajoj jariꞌ ja rAbraham, xecheꞌ tre.

—Ja wixta katzij chi ix riy rumam can ja rAbraham ja ta cꞌariꞌ emajon rbanic ja caniꞌ xuban ja rAbraham. 40Anin nojel ja nbin chewe jariꞌ ni katzij wiꞌ como ja Dios arjaꞌ biyon chwe pro masqui queriꞌ rbanic pro ixix necanoj wij nwach nak neban chwe chi ninecamsaj pro ja rAbraham ma queriꞌ ta xuban ja caniꞌ nixtajini neban ixix chwe camic. 41Ja cꞌa retataꞌ ixix, ja caniꞌ nuban arjaꞌ jariꞌ emajon rbanic ixix chakajaꞌ, neꞌe ja Jesús chique.

—Ajoj tok xokalaxi ma ok alakꞌan tak acꞌalaꞌ ta, ajoj xa jun Tatixel kaxin jariꞌ ja Dios, xecheꞌ tre. 42Ja cꞌa Jesús xbij chic chique:

—Ja wixta katzij chi ja Dios arjaꞌ Tatixel ewxin ninewajoꞌ ta cꞌa anin ariꞌ chakajaꞌ. Queriꞌ nbij chewe como anin pa ranma ja Dios inelnakto wiꞌ, ruqꞌuin arjaꞌ inpenak wiꞌ. Ma chaka ta ngana inpenak, arjaꞌ takyonto wxin. 43¿Nak cꞌa tre tok matichꞌobtaj emwal ja nbij chewe? Matichꞌobtaji como ja ntzobal mta egana necꞌwaxaj. 44Ixix ix ralcꞌwal ja diablo in nak cꞌo rgana ja diablo chi nuban nijawariꞌ cꞌol egana ixix neban chakajaꞌ. Ja diablo arjaꞌ ni camsanel wiꞌ ja tok winakarto ja rwachꞌulew. Nojelal ja nbij ja Dios xa rcꞌulel ja diablo como ja diablo arjaꞌ ni majutij ja katzij ta nbij. Ja tok nutzꞌak tzij ja diablo jariꞌ ni rxin wiꞌ como arjaꞌ ni tzꞌakol tzij wiꞌ, arjaꞌ kas nwinakarsani ja tzꞌakoj tak tzij. 45Pro anin ja nmajon rbixic chewe jariꞌ ni katzij wiꞌ pro como ni katzij wiꞌ xa chewiꞌ ja tok maquinenimaj. 46¿La cꞌo ta cꞌa jun chewe ncowini nbij chi cꞌo wil nbanon? Pro ja nmajon rbixic chewe, ja wi ni katzij wiꞌ ¿nak cꞌa tre tok maquinenimaj? 47Ja ralcꞌwal Dios ejeꞌeꞌ nqueyaꞌ quixquin tre ja nbix chique rmal ja Dios pro ja rixix mateyaꞌ ewxquin tre ja nbix chewe rmal como ma ix ralcꞌwal Dios ta chewiꞌ. Queriꞌ xbij ja Jesús chique.

48Ja cꞌa raj Israel quemaj chic ryokꞌic, quewaꞌ quibij tre riꞌ:

—Ajoj ni rubey wiꞌ tok kabij chawe chi xa at caniꞌ jun aj Samaria in cꞌo jun demonio ucꞌayon awxin chakajaꞌ, xecheꞌ tre. 49Ja cꞌa Jesús xbij chic chique:

—Anin mta jun demonio incꞌayon ta como anin nmajon ryaꞌic rukꞌij ja nataꞌ Dios pro ja rixix xa nineyokꞌ. 50Pro anin ma ja ta ncanoj chi nya̱ꞌ nukꞌij cumal winak pro ja Nataꞌ arjaꞌ ntajini nchomarsaj nak nuban chi nya̱ꞌ nukꞌij cumal ja winak, arjaꞌ cꞌa xtibini bar cꞌo wiꞌ ja kas katzij, wi wqꞌuin anin owi ewqꞌuin ixix. 51Ni katzij wiꞌ ja xtinbij chewe riꞌ, ja wi cꞌo jun nnimaj ja ntzobal jariꞌ ni mta wiꞌ camíc trij, neꞌ chique. 52Ja cꞌa raj Israel ejeꞌeꞌ quibij chic jutij tre:

—Camic bien kꞌalaj chi cꞌo jun demonio ucꞌayon awxin como atat nabij chi ni mta wiꞌ camíc trij jun winak wi arjaꞌ nnimaj ja ratzobal pro ¿la ma xcam ta laꞌan ja rAbraham ojer in la ma xecam ta laꞌan ja rojer tak profeta chakajaꞌ? 53¿La tibij an tzij ariꞌ chi atat más nim akꞌij chwach ja katataꞌ Abraham ja tok arjaꞌ cami? In ja rojer tak profeta xecam na ariꞌ chakajaꞌ. ¿Nak cꞌa atocnak wiꞌ nanaꞌ kaj atat? 54Ja cꞌa Jesús xbij chique:

—Ja ranin wixta xa nyaꞌ nojoj nukꞌij nuyon jariꞌ mta noc wiꞌ pro ja Nataꞌ arjaꞌ nyoꞌ nukꞌij in ixix nebij tre ja Nataꞌ chi arjaꞌ Dios ewxin. 55Pro xa ma ewotakin ta rwach ja Nataꞌ pro anin bien wotak rwach. Ja wixta xinbij chewe chi ma wotak ta rwach jariꞌ xta cꞌa in junan ewqꞌuin ariꞌ ja rix tzꞌakol tak tzij. Pro jariꞌ wotak rwach, ni nnimaj wiꞌ ja rtzobal. 56Ja rAbraham ja retataꞌ nixcheꞌ tre, arjaꞌ janila quicoti ojer ja tok chꞌobtaj rmal chi nutzꞌat na ja kꞌij ja tok xquinpit anin in jariꞌ xutzꞌat, congana quicot rmal, neꞌe ja Jesús chique.

57—¿Nak moda cꞌariꞌ pro majaꞌn waꞌan taban cincuenta ajunaꞌ, la atzꞌaton cꞌariꞌ ja rAbraham? xecheꞌ tre. 58Ja cꞌa Jesús xbij chic chique:

—Ni katzij wiꞌ ja xtinbij chewe riꞌ, anin nij incꞌo chi wiꞌ ja tok majaꞌn talaxi ja rAbraham, neꞌ chique. 59Ja tok xbij queriꞌ chique ejeꞌeꞌ quisicꞌlaꞌ abaj, laj queqꞌuiak tzaꞌn abaj pro ja Jesús arjaꞌ xrawaj riꞌ, xelel chipan ja templo in be.

Currently Selected:

Juan 8: tzjW

Highlight

Copy