Lucas 16
16
1Cꞌacꞌariꞌ cꞌo jun cꞌambal tzij xbij chique ja rdiscípulo quewariꞌ:
—Cꞌo jun achi biyom cꞌo jun ajsamajel ruqꞌuin ja nchajin rxin ja rmebaꞌil. Xebix tre ja biyom chi ja rajsamajel xa ntajini nuqꞌuis ja rmebaꞌil, xa ma chꞌobol ta nuban tre, neꞌxi. 2Ja cꞌa biyom arjaꞌ xutak rsiqꞌuixic ja rajsamajel in tok xekaji quewaꞌ xbij tre riꞌ: —Anin xurkaj rbixic wqꞌuin chi xa nattajini naqꞌuis ja nmebaꞌil. ¿Nak tre ja tok xaban queriꞌ? Camic tajachaꞌ ja racuenta nak abanon tre ja nmebaꞌil como matinyaꞌ chic lugar chawe chi xcatsamaj chi ta más wqꞌuin, neꞌ tre. 3Ja cꞌa rajsamajel quewaꞌ xbij kaj pa ranma riꞌ: —¿Nak nban cꞌawaꞌ camic como ja npatrón xa nwasaj chwe ja nsamaj? Como anin matincochꞌ chic ja xtinban ta samaj ja nrajoꞌ awachokꞌakꞌ, in jun chic, xa qꞌuixbal nnaꞌ ja xtinmaj ta rcꞌutuxic limosna. 4Camic chꞌobtaj mwal nak ja nban utzcꞌa chi ecꞌoli ja necꞌulu wxin pa tak cochoch ja tok mchita nsamaj, neꞌ kaj. 5Cꞌacꞌariꞌ xutak quisiqꞌuixic ja winak chiquijujunal ja cꞌo quecꞌas ruqꞌuin ja rpatrón. Ja tok xeꞌekaji quewaꞌ xbij tre jun riꞌ: —¿Jaruꞌ acꞌas ruqꞌuin ja npatrón? neꞌ tre. 6—Anin jun ciento tonel aceite ja nucꞌas, neꞌxi rmal ja rajcꞌas. Ja cꞌa rajsamajel xbij tre: —Jiꞌ, rwujal ja racꞌas riꞌ, tacꞌamaꞌ. Camic catzꞌabeꞌe, tabanlaꞌ chic jun ja wuj chanim riꞌ pro xa cincuenta tonel aceite acꞌas natzꞌibaj chic chipan, neꞌ tre. 7Cꞌacꞌariꞌ xbij tre jun chic ja rajcꞌas: —¿Jaruꞌ acꞌas atat? neꞌ tre. —Anin jun ciento quintal trigo ja nucꞌas, neꞌxi. In xbij chic tre: —Tacꞌamaꞌ rwujal ja racꞌas riꞌ. Tabanaꞌ chic jun pro xa ochenta quintal natzꞌibaj chic chipan, neꞌe ja rajsamajel tre. 8Ja cꞌa patrón tok xuyaꞌ cuenta tre ja rajsamajel ja ma utz ta xuban quewaꞌ xbij riꞌ: —Ja rajsamajel leꞌ congana listo ja xuban chwe, congana rnaꞌoj. Queriꞌ xbij ja patrón in cꞌo razón ja tok xbij queriꞌ como ja winak ja xa ruqꞌuin ja rwachꞌulew yukul wiꞌ quecꞌuꞌx ejeꞌeꞌ congana e listo tre ja banoj negocio cuqꞌuin ja cach banol tak negocio. Más chi na e listo chiquewach ja ralcꞌwal Dios ja sakirsan chic quebey. 9Ja mebaꞌil xin rwachꞌulew congana itzelal nqueban ja winak rmal. Pro camic nbij chewe, quixoc listo ixix chakajaꞌ, tecojoꞌ ja mebaꞌil xin rwachꞌulew pro ja ta neban ixix tre neꞌetobej ta ja cꞌo rjawaxic chique. Quirtariꞌ neban utzcꞌa tok xtiqꞌuisi ja mebaꞌil xin rwachꞌulew cꞌacꞌariꞌ ja rewamigo ja xeꞌetoꞌ ejeꞌeꞌ necꞌulu ewxin chilaꞌ chicaj pa tak cochoch ja ni mta wiꞌ qꞌuisic trij.
10Ja mebaꞌil xin rwachꞌulew wi utz rcojic neban jariꞌ utz rcojic xteban tre ja mebaꞌil xin Dios chakajaꞌ ja wi nyataj chewe. Ja cꞌa wi xa ma utz ta rcojic neban ja mebaꞌil xin rwachꞌulew jariꞌ xa ma utz ta xteban tre ja mebaꞌil xin Dios chakajaꞌ ja wi nyataj chewe. 11Rmalcꞌariꞌ tok nbij chewe, ja wi xa ma utz ta rcojic ebanon ja mebaꞌil xin rwachꞌulew jariꞌ mta jun cꞌo ta rconfianza ewqꞌuin xtujach ta pan ekꞌaꞌ ja mebaꞌil xin Dios. 12In jun chic, ja wi cꞌoli ja mebaꞌil xin rwachꞌulew jachon pan ekꞌaꞌ chi nechajij pro wi xa ma utz ta rcojic neban jariꞌ mta jun xtiyoꞌ ta chewe ja herencia xin Dios ja ni katzij wiꞌ chi ewxin. 13Jun winak xa nak ta chi winakil ni majun moda xqueqꞌuejeꞌ ta caꞌiꞌ rpatrón, ja queriꞌ jun nrajoꞌ in jun xa itzel nutzꞌat owi jun nnimaj in jun matinimaj. In queriꞌ cꞌa tre chakajaꞌ mta moda xtiyukeꞌ ta ecꞌuꞌx ruqꞌuin ja Dios in xtiyukeꞌ chi ta ecꞌuꞌx ruqꞌuin ja mebaꞌil xin rwachꞌulew. Queriꞌ xbij ja Jesús chique ja rdiscípulo.
14Ja cꞌa fariseo ejeꞌeꞌ quicꞌaxaj chakajaꞌ nojel ja xbij ja Jesús tre ja mebaꞌil. Rmalcꞌariꞌ tok quemaj ryokꞌic como ejeꞌeꞌ chaka benak chi nquiyarij ja mebaꞌil xin rwachꞌulew. 15Ja cꞌa Jesús quewaꞌ xbij chique riꞌ:
—Ixix quewaꞌ ebanic riꞌ, nekꞌalasaj ewiꞌ chiquewach ja winak chi congana ix utzlaj tak winak pro ja Dios arjaꞌ bien rotak nak ja cꞌo pa tak ewanma. Ecꞌoli winak ja xa itzel netzꞌa̱t rmal ja Dios masqui congana utz netzꞌa̱t cumal winak.
* * * * * * * * * *
16Ja ley xin Dios rachbil ja tzꞌibtal can cumal ja rojer tak profeta xin Dios jariꞌ ocnak chipan ja tiempo ja tok Juan Bautista majaꞌn tumaj ja rsamaj. Pro ja tok xurwilaꞌ ja rtiempo ja Juan Bautista triꞌ xumajto wiꞌ rbixic ja gobierno xin Dios in canojel ja winak netajini nquetij quichokꞌakꞌ utzcꞌa chi neꞌoc chipan ariꞌ gobierno. 17Pro mta moda ja maquita xtibantaj cumplir ja ley xin Dios nojelal. Ni ma cꞌayew ta xtichup rwach ja caj in rwachꞌulew chwach ja maquita xtibantaj cumplir jun ti punto tre ja ley. 18Jun achi xa nak ta chi achiꞌal wi nujach can chijutij ja rxjayil in wi nucꞌam chic jun chic ixok jariꞌ adulterio ja nuban. In wi cꞌo jun achi nucꞌam jun ixok jachon can rmal ja rchajil jariꞌ achi adulterio ja nuban, neꞌe ja Jesús chique.
* * * * * * * * * *
19Cꞌacꞌariꞌ xbij chic chique:
—Cꞌo jun achi biyom, congana buen tak tziak nucoj ja nimak rjil. Kꞌij kꞌij ni cꞌo wiꞌ nimak tak waꞌim nuban. 20In cꞌo jun ti mebaꞌ cꞌutul limosna, Lázaro rubiꞌ. Ja cꞌa Lázaro arjaꞌ xeya̱ꞌ can chuchiꞌ ja xoral rxin ja biyom. Ja rcuerpo cꞌo juleꞌ itzel tak chꞌaꞌc trij pro ni chi jun. 21Kas nyarij nutij ja rcꞌutal tak way ja ntzakel xeꞌ tak mesa ruqꞌuin ja biyom. In cꞌuluto ecꞌoli tzꞌiꞌ ja nebe ruqꞌuin, nquerakꞌ ja chꞌaꞌc ja cꞌo trij. 22Ja cꞌa tok qꞌuiswani cami ja ti mebaꞌ ja cꞌutul limosna, ruqꞌuin ja rAbraham cꞌamarel wiꞌ cumal ángel ja bar ecꞌo wiꞌ ja camnakiꞌ ja quimajon quicotemal. Cami ja biyom chakajaꞌ in xemuki. 23Ja cꞌa tok xunaꞌ nojoj congana majtajnak rmal ja rpokonal chipan ja lugar ja bar ecꞌo wiꞌ ja camnakiꞌ ja quimajon bis okꞌej. Ja tok caꞌy chicaj xutzꞌat pon ja rAbraham pro cꞌa cꞌa nat cꞌo wiꞌ, cꞌoloc ja Lázaro pa rxquin. 24Cꞌacꞌariꞌ xumaj rakic ruchiꞌ: —Tapokonaj nwach nataꞌ Abraham. Tatakaꞌto paki jutzꞌit ja Lázaro wqꞌuin, timuꞌuꞌto jun ti rwirukꞌaꞌ pa yaꞌ chi nurxucꞌursaj ja wakꞌ como anin cꞌo jun kꞌakꞌ waweꞌ in congana nmajon rtijic pokon chipan, neꞌ tre ja rAbraham. 25Ja cꞌa rAbraham quewaꞌ xbij tre riꞌ: —Turkaj chawe ncꞌajol, ja tok xatqꞌuejeꞌ chwachꞌulew atat xattijowi ayon ja ramebaꞌil pro ja cꞌa Lázaro arjaꞌ xa rpokonal xutij. Pro ja cꞌa camic congana quiꞌ chi rucꞌuꞌx ja Lázaro waweꞌ pro atat amajon chic rtijic ja rpokonal. 26In cꞌuluto cꞌo jun nimlaj siwan yaꞌon chikacojol utzcꞌa ja wi cꞌo jun waweꞌ ja cꞌo rgana nkꞌax ewqꞌuin pro maticowini nkꞌaxi owi cꞌo jun chewe ixix ja cꞌo rgana nkꞌaxto kuqꞌuin pro maticowini nkꞌaxto chakajaꞌ, neꞌxi rmal ja rAbraham. 27Cꞌacꞌariꞌ xbij chic tre: —Ja wi queriꞌ rbanic nataꞌ, tabanaꞌ jun utzil, tatakaꞌel paki cꞌa jutzꞌit ja Lázaro cuqꞌuin wachꞌalal ja recꞌo pa rochoch nataꞌ. 28Como e joꞌoꞌ ja wachꞌalal ja recꞌo triꞌ in nwajoꞌ nbe ta jutzꞌit ja Lázaro cuqꞌuin chi nerchꞌoboꞌ chiquewach nak rbanic ja waweꞌ utzcꞌa chi maquepit ejeꞌeꞌ waweꞌ chakajaꞌ chipan awaꞌ jun lugar xin tijoj rpokonal riꞌ, neꞌ tre ja rAbraham. 29In bix chic tre rmal ja rAbraham: —Pro cꞌo waꞌan cuqꞌuin ja rtzobal Dios ja tzꞌibtal can rmal ja Moisés in cumal ja juleꞌ chic profeta, tiquiyaꞌaꞌ cꞌa quixquin tre ja quitzꞌiban can ejeꞌeꞌ, neꞌxi. 30—Mni nataꞌ Abraham, pro wi cꞌo jun camnak nelel chiquicojol ja camnakiꞌ in nekaj cuqꞌuin jariꞌ nqueqꞌuex quinaꞌoj, neꞌ tre. 31Ja cꞌa rAbraham quewaꞌ xbij chic tre riꞌ: —Ja wi matiqueyaꞌ quixquin tre ja rtzobal Dios ja tzꞌibtal can rmal ja Moisés in cumal ja juleꞌ chic profeta jariꞌ ni maqueniman wiꞌ chakajaꞌ masqui cꞌo jun camnak xticꞌastaj chiquicojol ja camnakiꞌ, neꞌ tre. Queriꞌ ja cꞌambal tzij ja xbij ja Jesús chique.
Currently Selected:
Lucas 16: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
