Lucas 9

1Cꞌacꞌariꞌ xersiqꞌuij ja cablajuj discípulo in xuyaꞌ chique chi cꞌo quekꞌaꞌ chique canojel ja ritzel tak espíritu chi necowini nequiwasajel chique ja winak in xuyaꞌ chique chakajaꞌ chi necowini nequitzursaj yawaꞌiꞌ. 2In xerutakel chi nequiyaꞌaꞌ rbixic ja gobierno xin Dios utzcꞌa chakajaꞌ chi neꞌequitzursaj ja yawaꞌiꞌ. 3Quewaꞌ xbijel chique riꞌ:

—Ni majun nak ta necꞌamel ja tok nixbe, nixtacꞌa necꞌamel ta echꞌameꞌy, nixtacꞌa emaleta, nixtacꞌa eway, nixtacꞌa epwok in ni xa ja wariꞌ ja recamisa necꞌamel ja recojon, ma caꞌiꞌ ta. 4Xa nak ta chi jayil xquixoc wiꞌ triꞌ nixqꞌuejeꞌ wiꞌ, cꞌa tokoriꞌ neyaꞌ can ja tok nixbe chic cha jun chic tinamit. 5In xa nak ta ja maquecꞌulu ewxin, ja cꞌa tok nixelto chipan ja quitinamit tequiraj can ja pokok ja cꞌo pan ewakan. Queriꞌ neban jariꞌ retal chi ejeꞌeꞌ nquetij na ja rpokonal rmal ja matiqueyaꞌ quixquin tre ja nebij chique. Queriꞌ xbijel chique. 6Ja cꞌa cablajuj discípulo ejeꞌeꞌ xeꞌelel, xebe pa tak aldea pro nojel tak aldea, quemaj rbixic ja utzlaj tzij xin Jesucristo in quemaj quitzursaxic ja yawaꞌiꞌ chakajaꞌ. Queriꞌ queban xa bar ta triꞌ xeꞌekaj wiꞌ.

* * * * * * * * * *

7Ja Jesús nojel ja ntajini nuban xekaj rbixic ruqꞌuin ja gobernador Herodes. Ja cꞌa Herodes arjaꞌ kas nkꞌisaj riꞌ chi rchꞌobic nak ja kas mero nbanowi nojel awaꞌ wariꞌ ja nekaj rbixic ruqꞌuin. Como ecꞌoli nebini chi Juan Bautista ja nbanowi como ejeꞌeꞌ nquibij chi cꞌastajnakto chic ja Juan Bautista chiquicojol camnakiꞌ. 8Ecꞌo chi cꞌa juleꞌ nebini chi ja camnak Elías ja nbanowi como ejeꞌeꞌ nquibij chi rcꞌutun chic riꞌ ja rElías chiquewach ja winak. In ecꞌo chic juleꞌ nebini chi cꞌo jun chique ja rojer tak profeta ja cꞌastajnakto chic in arjaꞌ nbanowi, necheꞌe. 9Pro ja Herodes arjaꞌ quewaꞌ xbij riꞌ: —Ja Juan jariꞌ anin waꞌan xinyoꞌ orden chi lasax rwiꞌ pro nak la chi achiꞌal ja nbanowi nojel awaꞌ wariꞌ ja nurkaj rbixic wqꞌuin. Queriꞌ xbij in xumaj rchꞌobic nak nuban utzcꞌa chi nutzꞌat riꞌ quewach ruqꞌuin ja Jesús.

* * * * * * * * * *

10Ja cꞌa cablajuj apóstol tok xemelojto quechol chwach ja Jesús nojel ja xequibanaꞌ. Ja cꞌa Jesús xerucꞌamel, xequiyonaj quiꞌ pa jun lugar ja kas talani ja bar ma ecꞌo ta wiꞌ winak. Jariꞌ lugar pa rcuenta ja tinamit Betsaida cꞌo wiꞌ. 11Ja cꞌa winak tok xekaj rbixic cuqꞌuin chi be ja Jesús xebe ejeꞌeꞌ chakajaꞌ, xequiwilaꞌ. Ja cꞌa Jesús tok xeꞌekaj ruqꞌuin arjaꞌ xerucꞌul, xuyaꞌ rbixic chique nak rbanic ja gobierno xin Dios in xertzursaj ja yawaꞌiꞌ chique.

12Ja cꞌa tok xuban hora xepeti ja cablajuj apóstol in quewaꞌ quibij tre ja Jesús riꞌ:

—Mejor, queꞌatakaꞌel ja winak pa tak tinamit in pa tak aldea ja cꞌo chikanakaj utzcꞌa chi nequicanoj quiposada in nequilokꞌoꞌ queway como ja lugar ja rokcꞌo wiꞌ riꞌ congana talani, xecheꞌ tre.

13—Ixix nixyoꞌ chique ja nquetij, xecheꞌx rmal.

—Pro mta nak ta kacꞌamonto xarwariꞌ joꞌoꞌ rkan caxlanway in e caꞌiꞌ cakan chꞌuꞌ. ¿La nokbe ta na cꞌa ajoj chi rlokꞌic queway alaꞌ winak canojel leꞌ? 14Queriꞌ quibij tre como ja xa queyon achiꞌiꞌ ecꞌo la joꞌoꞌ mil.

—Tebij chique ja winak chi quetzꞌabeꞌe pro pa tak moc ncucꞌaj quiꞌ, e cincuenta ja jujun moc, neꞌ chique ja rapóstol. 15Queriꞌ queban, xekaji canojelal chi tzꞌubulem. 16Cꞌacꞌariꞌ xucꞌam ja joꞌoꞌ rkan caxlanway e rachbil ja caꞌiꞌ cakan chꞌuꞌ, caꞌy chicaj in xmaltioxij tre ja Dios. Xuwechꞌ ja caxlanway, xujach chique ja rdiscípulo chi ejeꞌeꞌ nqueyaꞌ chic chique ja winak. 17Xewaꞌi pro ni canojelal in xenoji chi utz. Ja cꞌa caxlanway rachbil chꞌuꞌ mol ruchiꞌ ja totaji, cablajuj chacach xuban.

* * * * * * * * * *

18Xuban jutij ja Jesús ruyon ryonan riꞌ, ntajini nuban ja roración. Ecꞌoli ja rdiscípulo ruqꞌuin in quewaꞌ xbij chique riꞌ:

—Anin ¿nak inocnak wiꞌ ja nquibij chwe ja winak? neꞌ chique.

19—Ecꞌoli nebin chawe chi atat at Juan Bautista, juleꞌ chic nebini chi at Elías in ecꞌo chic juleꞌ ja nebini chi at jun chique ja rojer tak profeta in camic atcꞌastajnakto chic chiquicojol camnakiꞌ, necheꞌ chawe, xecheꞌ tre.

20—Ja cꞌa rixix ¿nak nebij chwe, nak inocnak wiꞌ? neꞌe. Peti ja Pedro, xbij tre:

—Ja ratat at Cristo ja ratchaꞌon rmal ja Dios, neꞌ tre.

* * * * * * * * * *

21Pro ja Jesús quewaꞌ xbij chique riꞌ:

—Ni majun bar ta triꞌ xtebij wiꞌ chi anin ja rin Cristo. 22Anin ja rin Alcꞌwalaxel ja xinoc alaxic cuqꞌuin ja winak qꞌuiy rwach ja rpokonal ntij na, xa itzel ninquetzꞌat na ja principaliꞌ xin tinamit e cachbil ja jefe quixin sacerdote e cachbil chakajaꞌ ja maestro ja netijon quixin ja winak tre ja ley xin Dios, nincamsax na in chi rox kꞌij nincꞌastaj na, neꞌ chique.

23Cꞌacꞌariꞌ xumaj chic tzij cuqꞌuin canojelal, quewaꞌ xbij chique riꞌ:

—Xa nak ta ja cꞌo rgana nyukeꞌ rucꞌuꞌx wqꞌuin rjawaxic chi matuyaꞌ rgana ja tzabuklaj cꞌaslemal rcꞌan. Rjawaxic chakajaꞌ chi kꞌij kꞌij ni matipokonaj wiꞌ nutij ja rpokonal mwal in ntreꞌel chwij. Jariꞌ caniꞌ jun cruz nya̱ꞌ trij pro matipokonaj nucꞌam ja cruz, nrijkajel in nbe ja bar necamsax wiꞌ. 24Queriꞌ nbij chewe como xa nak ta ja npokonaj nuyaꞌ can ja rcꞌaslemal jariꞌ matuwil cꞌariꞌ ja utzlaj cꞌaslemal ja mta qꞌuisic trij. Pro xa nak ta ja matipokonaj nuyaꞌ can ja rcꞌaslemal mwal anin in rmal ja utzlaj tzij ja ncꞌamonto jariꞌ can nuwil ja utzlaj cꞌaslemal ja mta qꞌuisic trij. 25Como caniꞌ tre jun winak ¿nak cꞌa nuchꞌec trij wi xuchꞌec nojel ja mebaꞌil rxin ja rwachꞌulew pro wi xa ntzꞌilaꞌ ja rcꞌaslemal in wi ma xuwil ta ja utzlaj cꞌaslemal ja mta qꞌuisic trij? 26Queriꞌ nbij chewe como ja winak xa nak ta chi winakil wi xa qꞌuixbal nquenaꞌ nquecoj quiꞌ wqꞌuin in wi xa qꞌuixbal nquenaꞌ rmal ja ntzobal, anin chakajaꞌ qꞌuixbal nnaꞌ chi xquenucoj ta pa ncuenta. Anin ja rin Alcꞌwalaxel ja xinoc alaxic cuqꞌuin ja winak xa qꞌuixbal nnaꞌ chi xquenucoj ta pa ncuenta tokoriꞌ tok xquinpi chic jutij, congana nim chic nukꞌij triꞌ in congana nchꞌaꞌan chic chwij ja gloria xin Dios in chakajaꞌ ewachbilanto ja santilaj tak ángel xin Dios. 27Ni katzij wiꞌ ja xtinbij chewe riꞌ, ecꞌoli chewe ja recꞌo waweꞌ camic riꞌ cꞌa ecꞌas na ja tok xtiquetzꞌat ja gobierno xin Dios. Queriꞌ xbij ja Jesús chique.

* * * * * * * * * *

28Cꞌo la waxakiꞌ kꞌij rbin awaꞌ juleꞌ tzij riꞌ ja tok be parwiꞌ jun jayuꞌ chi nerbanaꞌ oración e rachbil ja Pedro, ja Jacobo in Juan. 29Kas rmajon oración ja tok xuqꞌuex riꞌ ja rachbal in ja rtziak kas sak xeli, congana ncꞌacꞌoti. 30Chaka cꞌa jalal tok xewinakar e caꞌiꞌ achiꞌiꞌ, quemaj tzij ruqꞌuin, jun Moisés in ja jun chic Elías. 31Ja cꞌa Moisés in Elías ejeꞌeꞌ congana nchꞌaꞌan chic chiquij ja gloria xin Dios, quimajon rtzijoxic ja rcamic ja Jesús como ja Jesús nbe pa Jerusalén in triꞌ nerjachaꞌ wiꞌ riꞌ pa camíc. 32Ja cꞌa Pedro arjaꞌ congana majtajnak ma waram in queriꞌ chique ja rachbil chakajaꞌ pro quecochꞌ. Quetzꞌat ja Jesús chi ja gloria xin Dios ntajini nchꞌaꞌan trij in xequetzꞌat ja caꞌiꞌ achiꞌiꞌ chakajaꞌ ja recꞌo ruqꞌuin. 33Ja cꞌa Pedro kas elem nqueban ja caꞌiꞌ achiꞌiꞌ ja tok quewaꞌ xbij tre ja Jesús riꞌ: —Maestro, congana quiꞌil ja rokcꞌo wiꞌ riꞌ. Kabanaꞌ oxiꞌ tak jay waweꞌ, jun awxin atat, jun rxin Moisés in jun rxin Elías, neꞌ tre. Pro ja Pedro xa ma xuchꞌob ta ja xbij. 34Cꞌa rmajon na tzij ja Pedro tok cꞌo juleꞌ sutzꞌ xermujaj in kaj chiquij. Ja cꞌa roxiꞌ apóstol congana quixbej quiꞌ tok quetzꞌat chi ecꞌo chic chipan ja sutzꞌ. 35Cꞌo cꞌa jun kulaj tzijonto chipan ja sutzꞌ, quewaꞌ xbij chique riꞌ: —Jawaꞌ wariꞌ jawaꞌ chakꞌlaj Walcꞌwal, teyaꞌaꞌ ewxquin tre nak ja nbij arjaꞌ chewe, neꞌe. 36Ja tok tzuri tzij rmal ja kulaj, ja rapóstol tok quetzꞌat mchita ja rElías, mchita ja Moisés, xa ruyon ja Jesús cꞌo can chic. Nojel awaꞌ ja quetzꞌat riꞌ xa pa tak canma quecꞌol wiꞌ, qꞌuiylaj tiempo ja ni majun bar ta triꞌ quibij wiꞌ.

* * * * * * * * * *

37Ja cꞌa chi rcab kꞌij tok xemelojto ja Jesús parwiꞌ jayuꞌ congana e qꞌuiy ja winak xebe chi rcꞌulic. 38Cꞌo cꞌa jun achi chiquicojol cow tzijoni, quewaꞌ xbij tre riꞌ:

—Maestro, tabanaꞌ jun utzil, anin cꞌo jun ncꞌajol in ni xarariꞌ ti jun, tatzꞌataꞌ paki jutzꞌit. 39Cꞌo jun itzel espíritu nchapo rxin in chaka jalal tok nuyaꞌ sícꞌ, cꞌol ataque nya̱ꞌ tre in nel rpuluw ruchiꞌ. Congana ncamsax pa tokꞌulew, kas maril nsokpix rmal ja ritzel espíritu. 40In xincꞌutuj jun utzil chique ja radiscípulo chi nquiwasaj ja ritzel espíritu pro ejeꞌeꞌ ma xecowin ta quiwasaj ta, neꞌe ja rachi. 41Ja cꞌa Jesús tok cꞌaxtaj rmal ja bix tre rmal ja rachi quewaꞌ xbij riꞌ:

—Ixix ja rix tinamit Israel, ni takaꞌan mta wiꞌ yukulbal ecꞌuꞌx wqꞌuin, takaꞌan yojtajnak ja renaꞌoj. Taqꞌue titzuri ja nsamaj checojol, cꞌayew chwe chi ncochꞌ más ja matiyukeꞌ ecꞌuꞌx wqꞌuin, neꞌe. Cꞌacꞌariꞌ xbij tre ja tatixel: —Camic tacꞌamaꞌto ja racꞌajol wqꞌuin, neꞌ tre. 42Ja cꞌa ralaꞌ xajalal majaꞌn tekaj chwach ja Jesús ja tok yaꞌ chic jun ataque tre rmal ja ritzel espíritu in chꞌakix pa tokꞌulew rmal. Ja cꞌa Jesús arjaꞌ xchꞌolij ja ritzel espíritu, xutoꞌ ja ralaꞌ pa rukꞌaꞌ in xujach can tre ja rtataꞌ. 43Ja cꞌa winak congana cꞌascꞌoꞌi quetzꞌat canojelal ja nimlaj poder xin Dios ja cꞌo pa rukꞌaꞌ ja Jesús.

* * * * * * * * * *

Ja cꞌa Jesús kas majtajnak rtzijoxic nojel ja nuban cumal canojel ja winak ja tok quewaꞌ xbij chique ja rdiscípulo riꞌ: 44—Kas toc pan ewxquin ja xtinbij chewe riꞌ. Ja Ralcꞌwalaxel ja xoc alaxic cuqꞌuin ja winak arjaꞌ nja̱ch na pa quekꞌaꞌ ja winak, neꞌ chique. 45Pro ja rejeꞌeꞌ xa ma xchꞌobtaj ta cumal ja xbij chique, xa wawan chiquewach utzcꞌa chi matichꞌobtaj cumal nak rbanic. Ja rejeꞌeꞌ xa nquixbej quiꞌ xtiquicꞌaxaj ta tre nak rbanic.

* * * * * * * * * *

46Cꞌacꞌariꞌ quemaj rchꞌaꞌic chibil tak quiꞌ nak ja más nim rukꞌij chique. 47Ja cꞌa Jesús arjaꞌ bien rotak nak ja netajini nquechꞌob kaj pa tak canma. Cꞌo cꞌa jun tacꞌal xucꞌam pon, xuyaꞌ pa rxquin 48in quewaꞌ xbij chique riꞌ:

—Jawaꞌ jun tacꞌal riꞌ xa nak ta xticꞌulu rxin in wi pa nubiꞌ anin tok nucꞌul tibij cꞌa tzij ariꞌ chi anin ja ninrucꞌul. In xa nak ta xticꞌulu wxin tibij cꞌa tzij ariꞌ chi nataꞌ Dios ja nucꞌul chakajaꞌ ja takyonpi wxin. Queriꞌ nbij chewe como ja wi cꞌo jun checojol ja matuyaꞌ kaj rukꞌij ruyon jariꞌ ja más nim rukꞌij chewe, neꞌ chique.

* * * * * * * * * *

49Cꞌacꞌariꞌ bix tre rmal ja Juan:

—Maestro, ajoj cꞌo jun achi katzꞌat ja pan abiꞌ atat ntajini nerlasaj itzel tak espíritu chique winak pro como ma kachbil ta chewiꞌ tok kabij tre chi: —Ma queꞌawasaj chi ta, xokcheꞌ tre, neꞌxi ja Jesús.

50—Ma tekꞌil chi ta ja rachi como jun winak xa nak ta chi winakil wi ma itzel ta nokrutzꞌat jariꞌ kachbil ariꞌ, neꞌ tre ja Juan.

* * * * * * * * * *

51Ja cꞌa Jesús tok nakajinto ja kꞌij ja xticꞌamarel wiꞌ chilaꞌ chicaj arjaꞌ xujic ja rviaje chi nbe ja pa Jerusalén. 52Ecꞌo juleꞌ rachbil xerutakel chi nenabeyajel chwach, ejeꞌeꞌ xebe chipan jun aldea quixin ja raj Samaria chi nquichomij pon ja ncꞌatzin tre. 53Pro ja cꞌa winak ja recꞌo chipan ja raldea ejeꞌeꞌ ma xquecꞌul ta ja Jesús como pa Jerusalén nbe wiꞌ. 54Ja cꞌa caꞌiꞌ discípulo Jacobo in Juan tok quetzꞌat chi ma xcꞌul ta cumal ja winak quewaꞌ quibij tre ja Jesús riꞌ:

—Kajaw ¿la maxta cꞌol agana nkacꞌutuj kꞌakꞌ chilaꞌ chicaj ja caniꞌ xuban ja rojer profeta Elías utzcꞌa chi neꞌurqꞌuisaꞌ jalaꞌ juleꞌ winak leꞌ? xecheꞌ tre. 55Ja cꞌa Jesús arjaꞌ xuyaꞌ vuelta in xumaj quichꞌolixic:

—Ixix xa matichꞌobtaj emwal janiꞌ rnaꞌoj ja rEspíritu ja rucꞌayon ewxin. 56Queriꞌ nbij chewe como anin ja rin Alcꞌwalaxel ja xinoc alaxic cuqꞌuin winak ma inpenak ta chi quicamsaxic winak, inpenak chi quitoꞌic, neꞌ chique. Cꞌacꞌariꞌ xebe chic cha jun aldea.

57Kas cꞌa quimajon chic bey ja tok cꞌo jun achi peti in quewaꞌ xbij tre ja Jesús riꞌ:

—Wajaw, anin can ninbe chawij xa bar ta triꞌ natbe wiꞌ, neꞌ tre. 58In bix tre rmal ja Jesús:

—Ja rutiwaꞌ cꞌo quicꞌolibal ja bar newar wiꞌ in chakajaꞌ ja tak tzꞌiquin cꞌo quesoc pro ja chwe anin ja rin Alcꞌwalaxel ja xinoc alaxic cuqꞌuin ja winak mta wochoch ja ni ta wxin wiꞌ anin ninwar wiꞌ, neꞌxi.

59Cꞌo cꞌa jun chic achi, quewaꞌ bix tre rmal ja Jesús riꞌ:

—Joꞌ, cattreꞌ chwij, catoc ndiscípulo, neꞌxi.

—Wajaw, tayaꞌaꞌ lugar chwe chi nenmukuꞌ can paki na ja nataꞌ nabey, neꞌe ja rachi tre.

60—Ja camnakiꞌ chwach Dios ejeꞌeꞌ na quemuku quixin ja camnakiꞌ. Ja cꞌa ratat jat cuqꞌuin ja winak, jayaꞌaꞌ rbixic ja gobierno xin Dios chique, neꞌxi rmal ja Jesús.

61Cꞌo chi na jun ja rachi quewaꞌ xbij tre ja Jesús riꞌ:

—Wajaw, anin in conforme chi nintreꞌel chawij chi ninoc adiscípulo pro tayaꞌaꞌ lugar chwe chi neꞌenkꞌijlaꞌ can na nabey ja recꞌo pa wochoch, neꞌ tre.

62—Jun ajchonlaꞌ ma utz ta neli ja banoj chenoj rmal ja wi xa trij ncaꞌy can wiꞌ in queriꞌ cꞌa tre jun winak chakajaꞌ xa nak ta chi winakil ja wi xa trij ncaꞌy can wiꞌ jariꞌ ma yatal ta tre chi nsamaj pa rcuenta ja gobierno xin Dios, neꞌxi ja rachi rmal ja Jesús.

Currently Selected:

Lucas 9: tzjW

Highlight

Copy