MARKOS 4
4
An junbaxtaláb kʼal tin kwenta an óm inik
(Mt. 13:1‑9; Lk. 8:4‑8)
1Jun i kʼij, na Jesús tujey juní ti okʼtsix bin wál an pujal, junkun yán i atiklábtsik xon ti Jajáꞌ kʼwajat ani wiliyat. Jaxtám ti balin na Jesús ba jun i tan xi kʼwajat ban pujal ani buxkan, an atiklábtsik jilkʼon tin wál an pujal. 2In okʼtsitsik tám yán xataꞌ, por kʼal i junbaxtalábkʼi. Tam ti exomich in okʼtsal, in utsaꞌtsik enchéꞌ:
3―Ka achʼaꞌtsik jechéꞌ an junbaxtaláb xi neꞌech tu tʼiltsi: Jun i kʼij, kale jun i inik ti búkʼul iyaláb bin ale. 4Tam ti exomich in bukʼwal an iyaláb, taltsik kwajlan ban bél, ulich an chʼichintsik ani in kʼapu. 5Taltsik an iyaláb, kwajlan ban tʼujublom xon ti yab lej owtsik an lukuk ani jikʼat ti ixkʼan. 6Por tam ti yajbé an kʼakʼal, batʼey ani kom yab owtsik tin koꞌol nin ibíl, wayey. 7Taltsik an iyaláb kwajlan ban kʼídhlom, pakey an kʼídhtsik ani in paxkʼiy an tʼayabláb ani yab xataꞌ in kóꞌoy. 8Por taltsik an iyaláb kwajlan xon ti alwaꞌ an chabál, ixkʼan, pakey ani labey tʼajat. Taltsik, kʼal jún tokot an iyaláb xi tʼayan, in kóꞌoy jun inik láju itsixlek; taltsik, ox inik ani taltsik, boꞌ inik.
9In utsaꞌtsik tám enchéꞌ xi taꞌ ti kʼwajattsik:
―Xitaꞌ in koꞌol nin ochʼoxtal alwaꞌ, kin exbay xowaꞌ u ulal.
Xantʼókʼi tu okʼtsix na Jesús kʼal i junbaxtalábkʼi
(Mt. 13:10‑17; Lk. 8:9‑10)
10Tayíl, tam ti jilkʼonich kwetém na Jesús, konyat kʼal xi taꞌ ti kʼwajattsik jeye kʼunat junax kʼal xi lajucháb an exóbaltsik xantʼéy in léꞌ kin ulu jachanꞌ an junbaxtaláb xin ulu. 11Utsantsik enchéꞌ:
―Tatáꞌtsik, ti pidhál na Dios ka choꞌóbnaꞌ xowaꞌ in koꞌol yab tejwaꞌ kʼal tin kwenta xan ti Jajáꞌ tu takʼix. Por xi yabtsik tin belál, tokot u okʼtsaltsik kʼal i junbaxtaláb. 12Abal anchanꞌ, maske in chuꞌtaltsik, por jáykʼi max yab in chuꞌtal; in achʼáltsik, por yab in exbayal. Anchanꞌ yab neꞌech ka uteytsik kʼal Nanáꞌ abal ku pakwlantsi tin walastalábiltsik.
Na Jesús in wilaꞌ xantʼéy in léꞌ kin ulu an junbaxtaláb kʼal tin kwenta an óm inik
(Mt. 13:18‑23; Lk. 8:11‑15)
13Utsantsik jeye enchéꞌ:
―¿Yab a exbayaltsik jechéꞌ an junbaxtaláb? Pos max yab a exbayaltsik, ¿jan ti neꞌech ka ejto ka exbaytsik xi más an junbaxtaláb? 14An inik xu búkʼul iyaláb, in junwal jelti xin tʼilál nin káwintal na Dios. 15Xowaꞌ u támnal kʼal taltsik an atiklábtsik xin achʼál nin káwintal na Dios, in junwal jelt xan ti támun kʼal an iyaláb xi kwajlan ban bél. Tam in achʼámalich, u utuknáb kʼal an lej atʼax ani u tʼajnal kin ukʼtsi xowaꞌ in achʼámal. 16Xowaꞌ u támnal kʼal xi kʼeꞌet an atiklábtsik, in junwal jelt xan ti támun kʼal an iyaláb xi kwajlan xon ti yab lej waꞌach an lukuk. In achʼál nin káwintal na Dios ani in bachʼwal kʼal i kulbétaláb. 17Por eb itsíchkʼi, jaxtám ti yab u owel an kulbétaláb; pos tam kin tamu jun xataꞌ yajtsik o ka atʼantsik abal in bachʼúmal nin káwintal na Dios, in jiláltsik kin belaꞌ. 18Xowaꞌ u támnal kʼal xi kʼeꞌettsik, in junwal jelt xan ti támun kʼal an iyaláb xi kwajlan ban kʼídhlom. In achʼáltsik nin káwintal na Dios, 19por u chalpaxtsik tʼajat kʼal xowaꞌ in léꞌtsik kin tʼajaꞌ ani u kʼambiyábtsik kʼal an tumín abal in chalpayaltsik ke an tumín u kʼijidhmédhom. In léꞌtsik jeye tʼajat kin kóꞌoy ejtal xowaꞌ waꞌach. Jaxtám, max jaꞌich tokot in chalpómtsik echʼekʼi, in ukʼtsal nin káwintal na Dios ani yab u tʼájnal ni jun xataꞌ alwaꞌ ba jajáꞌtsik. 20Por xowaꞌ u támnal kʼal xi kʼeꞌettsik, in junwal jelt xan ti támun kʼal an iyaláb xi kwajlan ban chabál xi alwaꞌ. Tam in achʼáltsik nin káwintal na Dios, in bachʼwal ani in beláltsik kʼal yantam in ejattal. Jechéꞌtsik in junwal jelti an tʼayabláb xi labey tʼajat. Taltsik, kʼal jún tokot an iyaláb xi tʼayan, in pidhnaꞌ jun inik láju itsixlek, taltsik in pidhnaꞌ ox inik itsixlek ani xi taltsik, in pidhnaꞌ boꞌ inik.
An junbaxtaláb kʼal tin kwenta an tajbaxtaláb
(Lk. 8:16‑18)
21Utsantsik jeye enchéꞌ:
―¿Awxeꞌ u letʼkʼoyáb jun i tajbaxtaláb abal ka paxkʼiyat kʼal jun i kajón o abal ka kʼwajbá bin ál i waytaláb? ¡Yabaꞌ! An tajbaxtaláb u letʼkʼoyáb ani u kʼwajbáb tʼekʼat abal ka tajbaxin alwaꞌ. 22Pos yab waꞌach ni jun xataꞌ chinat xi yab neꞌech ka xalkʼá tayíl, nibal waꞌach ni jun xataꞌ yab tejwaꞌ xi yab neꞌech ka choꞌóbná. 23Max a koꞌoltsik a ochʼoxtal alwaꞌ, ka exbaytsik xowaꞌ u ulal.
24Utsantsik jeye:
―Ka kóꞌoytsik i kwenta kʼal xowaꞌ exom a achʼál. Max wéꞌ i chápláb ka tʼajaꞌtsik abal ka exbay, wéꞌ jeye neꞌech ki pidhantsik ka exbay kʼal na Dios. Por max yán i chápláb ka tʼajaꞌtsik, yán jeye neꞌech ki pidhantsik ani más tʼajat neꞌech ki pidhan ka exbaytsik kʼal na Dios. 25Xin exbayaltsik, neꞌech ka tolmiyat más kʼal na Dios abal kin exbay; ani xi yab in lej exbayal, neꞌech ka tʼajan kin ukʼtsitsik kʼal na Dios xowaꞌ wéꞌ in exbayámal.
An junbaxtaláb kʼal tin kwenta an iyaláb xu pakel
26In ulu jeye enchéꞌ na Jesús:
―Xan tu takʼix na Dios in junwal jelti jun i inik xi kʼale ti óm bin ale. 27Tam ómámadhich, neꞌech tám ka kʼaléch ti wayal ani tam ka tsudhey neꞌech ka chʼakay. Ani anchankʼi, tsudhél u tajkʼanal u watʼel an kʼij. Lejat an iyaláb u ixkʼanal ani u pubel, por jajáꞌ yab in choꞌób xan ti. 28An chabál jaꞌich nin ixkʼandhál an tʼayabláb ani in pubedhál. Okʼox u xeknal, u wixnal ani tayíl u walim. 29Tam kin bajúch nin yéjnék an tʼayabláb, an dhabal neꞌech tám kin junkuntsích an tin walíl abal in bajúmalich an kʼij ka junkuwat.
An junbaxtaláb kʼal tin kwenta in itsích an mostasa
(Mt. 13:31‑32; Lk. 13:18‑19)
30In óntsi ti káw ani in ulu jeye enchéꞌ:
―Neꞌech jeye tu tʼiltsitsik kʼeꞌet ti junbaxtaláb abal tu óltsi xan tu takʼix na Dios. 31In junwal jelt in itsích an mostasa. Jechéꞌ, jaꞌich an iyaláb xi más tsʼitsik xu tʼaynal techéꞌ ti kʼayꞌlá, 32por tam tʼayadhich, u ixkʼanal ani u pubel más ké xi kʼeꞌet an tʼayablábtsik. In kóꞌyal tʼajat pakdhaꞌ in kʼweꞌél, in kóꞌyal tʼajat i chalam ani an chʼichintsik in tʼajál tajaꞌ nin pákʼw.
Xantʼókʼi tu okʼtsix na Jesús kʼal i junbaxtaláb
(Mt. 13:34‑35)
33Anchanꞌ ti okʼtsintsik an ti tsubaxtaláb kʼal na Jesús. Yán i junbaxtaláb tʼiltsintsik jelti jechéꞌ abal ka okʼtsintsik xantikʼi kin ejtotsik kin exbay. 34Tokot kʼal i junbaxtalábkʼi tin okʼtsaltsik, por nin exóbaliltsik, in wiltsal ejtal xowaꞌ in léꞌ kin ulu an junbaxtaláb tam kʼwajatichtsik kwetém.
Na Jesús in kubdhaꞌ ti wawꞌnal an ikʼ ani ti múlákʼ an jaꞌ
(Mt. 8:23‑27; Lk. 8:22‑25)
35Tam ti dhamúch jachanꞌ a kʼítsá, in utsaꞌ enchéꞌ nin exóbaliltsik:
―Wana ku watʼey jun pakʼeꞌ pujal.
36In jilaꞌ tám an atiklábtsik xi taꞌ ti kʼwajat bin wál an pujal ani kʼaletsik kʼal an tan xon ti kʼwajat balidh. Táꞌ jeye ti kʼwajat i atiklábtsik ba kʼeꞌet i tantsik ani kʼale jeye kin juniknaꞌ na Jesús. 37Jun jikʼtowále ti tujey ti wawꞌnal jun i chapik ikʼ ani in múlákʼindhaꞌ an jaꞌ. Ochich an jaꞌ ban tan ke asta wéꞌich tʼajat ka tsʼutsich an tan kʼal an jaꞌ. 38Na Jesús kʼwajat ti wayal ba jun i latsikʼláb tin kúx an tan. Bakyat tám kʼal nin exóbaliltsik ani utsan enchéꞌ:
―¡Okʼtsix! ¿Yabxeꞌ a ódhál ti kwenta max ku lupun?
39Chʼakay tám na Jesús in kʼwiyaꞌ an ikʼ ani in utsaꞌ enchéꞌ an pujal:
―¡Ki chamkʼan! ¡Yabich ki kʼuchun!
Támkʼi ti kublan ti wawꞌnal an ikʼ ani jilkʼon chamamadh tʼajat. 40Utsan tám enchéꞌ an exóbaltsik kʼal na Jesús:
―¿Jantʼókʼi ta jikʼéltsik ani jantʼókʼi ti yabtsik tin belál?
41Jikʼeytsik tʼajat ani u útsáxtsik jún ani jún enchéꞌ:
―¿Jantʼom awiltaláb in koꞌol jechéꞌ an inik abal u axtsinal tam kin tawnaꞌ an ikʼ ani an pujal?
Currently Selected:
MARKOS 4: husNT
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved.
