LUUKAS 23

Nam miꞌ ba aichdhaꞌ gu Jesuus na paiꞌ gu Pilaato

(Mt. 27:1‑2, 11‑14; Mr. 15:1‑5; Jn. 18 :28‑38)

1Baꞌ miꞌ dhɨr na mɨt jax guguu ɨp gio, ba bhɨɨk jamɨt gu Jesuus mummɨ na paiꞌ gu Pilaato. 2Mu buiñor ba iattulhiꞌñ am baꞌ, jup tɨtda am:

―Aach jaꞌp tuꞌm kɨꞌn yaꞌm uaꞌtulhiꞌñ dhi maaꞌnkam. Mu jaꞌp oirɨt ja kokdhichuꞌn guch jaꞌtkamiꞌ, jup ja tɨtda nam sap cham namkiꞌñdhaꞌ gux ioꞌm gɇꞌkam Rooma kam. Gio na puiꞌ ja tɨtda na sap jir diꞌ guch Xoiꞌkam, na jaꞌp kaiꞌñkam jup ji kaiꞌchɨt na dhiꞌr diꞌ gux ioꞌm jich gɇꞌkam tuk.

3Baꞌ gu Pilaato xi chɨkka dɨɨlh gu Jesuus, jup tɨtda:

―¿Aapiꞌ aax ioꞌm jir ja gɇꞌkam tuk gu Israel kam jaꞌtkam?

―Aañiꞌ dho ―jup kaiꞌch gu Jesuus.

4Baꞌp ja tɨtda gu Pilaato gu ja gɇꞌgɇrkam tuk guiꞌ nam ja aꞌmkam tu daandaꞌ dai gu Israel kam jaꞌtkam, gio gu jaꞌtkam nam jɨꞌk miꞌp tuꞌiiꞌ:

―Aañ cham tuꞌ buam kɇɇ dhi maaꞌnkam puiꞌ na jax kaiꞌch.

5Baꞌx ioꞌm gɇꞌ kɨꞌn jup kaiꞌch am guiꞌ:

―Jaꞌpji aach na cham jich koꞌraar na maakam ja mamtuxdhim guch jaꞌtkamiꞌ. Mummɨ dɨr bhaiꞌ ji kɨi Galilea, saalh puiꞌ yammɨ jaꞌp ba ja iatgidhim Judea.

Nam mu ba aichdhaꞌ gu Jesuus na paiꞌ gu Eroodis

6Baꞌ nat ja kai gu Pilaato na mɨt Galilea dɨr bhaiꞌ ji chu aa, ba ja tɨkka noꞌr Galilea kam gu Jesuus. 7Guiꞌp xi aagiꞌñ am nar Galilea kam. Baꞌ mu jaꞌk xi joochxi gu Eroodis, guiꞌ na mur gɇꞌkam kaꞌ Galilea. Janoꞌ pɨk bhaiꞌp oirɨ Jerusaleen. 8Baꞌ giilhim jix bhaiꞌm ɨlh gu Eroodis nat ba tɨɨ gu Jesuus, na guꞌ puiꞌm aaꞌndaꞌ na chiñiaꞌ na tuꞌ jax xi dhuiñdhaꞌx bhaiꞌm duukam na tuꞌ cham paiꞌ dhuuk pu chuꞌm nɨiꞌñ na paiꞌ dhuuk puꞌñi tɨgiaꞌ. Puiꞌ tɇ kɇɇkɇꞌ guꞌ gu Eroodis na gu Jesuus mu jaꞌp paiꞌ joidham jix bhaiꞌm duukam jup tu buadaꞌ, nam tuꞌ cham paiꞌ dhuuk pu chuꞌm tɨ nɨiꞌñ gu jaꞌtkam. 9Bɨɨx aixim baꞌ bhaiꞌ tɨi ji tɨkka, guꞌ ji nat guꞌ pu cham ñio gu Jesuus. 10Baꞌ bɨɨx miꞌp tuiꞌdhiꞌ am gu ja gɇꞌgɇrkam tuk guiꞌ nam ja aꞌmkam tu daandaꞌ dai gu Israel kam jaꞌtkam, gio guiꞌ nam sap jix mat kaꞌ gu ñioꞌkiꞌñ gu Dios. Dhiꞌ pɨk pup xim taattuꞌ am guꞌ nam iattulhdhim gu Jesuus. 11Baꞌ jax ña pɨx xi buaꞌt as gu Eroodis gu Jesuus, tuꞌ pɨx ɨlhiiꞌñ. Sia gu sandaaruiꞌx chugiꞌñ jam jaiꞌ puiꞌp xi bua. Xi chɨiꞌ mɨt ɨp baꞌ gu jannulh gux dhaꞌram namkɨm nam jax chuꞌm ja tɨ tɨꞌ gux ioꞌm gɇꞌgɇrkam, ma aꞌsɨ mɨt baꞌ xi chɨiꞌdhak. Miꞌ dhɨr baꞌ gio mu jaꞌk jup xi joochxi gu Pilaato. 12Baꞌ janoꞌ guiꞌ gu tanoolh chaꞌm dɨr bhaiꞌx bhaiꞌ ji chɨi mɨt gu Pilaato gio gu Eroodis, nam guꞌ bɨɨpɨꞌ dɨr ka xim bhabhaakuiꞌñdhaꞌ.

Nam puiꞌ ba tɨꞌyaꞌ bɨɨx gu jaꞌtkam nam muꞌaaꞌ gu Jesuus

(Mt. 27:15‑26; Mr. 15:6‑15; Jn. 18 :39–19:16)

13Baꞌ gu Pilaato maap xi ja jumpadak gu ja gɇꞌgɇrkam tuk guiꞌ nam ja aꞌmkam tu daandaꞌ dai gu Israel kam jaꞌtkam, gio guiꞌ nam jir ja gɇꞌgɇrkam tuk gu Israel kam jaꞌtkam, 14baꞌp ja tɨtda:

―Aañ cham tuꞌ tuꞌ bhaan buam kɇɇ dhi maaꞌnkam na pimɨt gio yaꞌp bañ aichulh na puiꞌ mu jaꞌp paiꞌ oirɨt ja kokdhichuꞌn gu jam jaꞌtkamiꞌ. Tɨi ñich bɨɨx aixim ba tɨkka na pim jax jiñ kɇɇ, cham tuꞌr jix buam panaas aañ jiñ bui na jɨꞌk jax kaiꞌch. 15Sia chi gu Eroodis puiꞌ cham paiꞌ buam jup kai na jax kaiꞌch, tɨɨꞌ nat gio bhaiꞌp xiñ joochxi. Cham tuꞌ ji matgɨm na tuꞌ bhaan kuiñcha biaꞌ nach moo bhaan jup ba ji muꞌaaꞌ. 16Xi chu chiñiaꞌ iñ nam gɨɨꞌbiaꞌ chipliiñ kɨꞌn, miꞌ dhɨr jañ xi chu chiñiaꞌ nam doꞌñchoꞌ.

17Baꞌ nabap oidhaꞌ na paiꞌ dhuuk puꞌñi aajidhaꞌ gu piasta bhaan Paaskua taꞌm, maaꞌn jup dadoꞌñchodaꞌ gu Pilaato guiꞌ nam kuupkaꞌ nam baꞌ bhaan jix bhaiꞌm taat kaꞌ gu jaꞌtkam. Guꞌ baꞌ gu Pilaato tɨix aaꞌ na gu Jesuus doꞌñchoꞌ, 18guꞌ ji na mɨt guꞌ bɨɨx dhɨt pɨx jiiñak gɨi gu jaꞌtkam, jup kaiꞌch am:

―Tu chiañiñ nam muꞌaaꞌ dhi Jesuus, gu Barrabaas jap baꞌ doꞌñchoꞌ.

19Gu Barrabaas bhaiꞌ kuupkaꞌ muaꞌdaꞌ kɨꞌn, gio na ja bɨntatgɨt guiꞌ na mɨt buiñor bhaakuk tu kokda gux ioꞌm gɇꞌkam Rooma kam bhaiꞌ Jerusaleen. 20Guꞌ baꞌ na guꞌ gu Pilaato tɨix dhoꞌñchom gu Jesuus, tɨi gio puiꞌp xi ja tɨɨꞌn na cham tuꞌ bhaan kuiñcha biaꞌ. 21Guꞌ ji nam guꞌ guiꞌx ioꞌm gɇꞌ kɨꞌn ba xi jiiñak, jup kaiꞌch am:

―¡Tu chiñiaꞌ ap nam sissapaꞌ kuruus taꞌm dhi Jesuus!

Gookim miꞌmiaꞌn jamɨt pu tɨɨꞌn na sap tu chiñiaꞌ nam kuruus taꞌm sissapaꞌ gu Jesuus.

22Baꞌ gio puiꞌ tɨip xi ja tɨɨꞌn gu Pilaato, jup ja tɨtda:

―Jax dhui nat cham tuꞌx buam duu gu tuꞌ gɇꞌkam kɨꞌn kuch moop ba tu chian nam muꞌaaꞌ. Xi chu chiñiaꞌ iñ nam gɨɨꞌbiaꞌ chipliiñ kɨꞌn, miꞌ dhɨr jañ xi chu chiñiaꞌ nam doꞌñchoꞌ.

23Guꞌ ji nam guꞌ guiꞌ pɨx ji kɨɨsaim nam chian na tu chiñiaꞌ nam sissapaꞌ kuruus taꞌm. Nat paiꞌ pu tɨi gu Pilaato na puiꞌ tu duñiaꞌ nam jax kaiꞌch na mɨt baꞌ cham ka ñio, 24sia ku guꞌ tɨi pup cham xi aagimɨk nam muꞌaaꞌ gu Jesuus. 25Baꞌ xi chu chia nam doꞌñchoꞌ gu Barrabaas na muaꞌdaꞌ kɨꞌn bhaiꞌ kuup, gio na ja bɨntatgɨt guiꞌ na mɨt buiñor bhaakuk tu kokda gux ioꞌm gɇꞌkam Rooma kam bhaiꞌ Jerusaleen, dai baꞌ nat xi chu chia nam dɨɨlh pu doodaꞌ gu Jesuus nam jax puiꞌx aaꞌ gu Israel kam jaꞌtkam.

Gu Jesuus nam sissapaꞌ kuruus taꞌm

(Mt. 27:32‑44; Mr. 15:21‑32; Jn. 19 :17‑27)

26Baꞌ nam gamaiꞌ ba uaꞌ gu Jesuus na mɨt ba sissapam, maaꞌn gu maaꞌnkam Simoon tɨɨgim jamɨt gamaiꞌ chia na mootikaꞌ gu kuruus oidhat dɨr gu Jesuus. Jir Sireene kam guiꞌ gu maaꞌnkam, kiaꞌpɨx mu paiꞌ dhɨr jimdat gampɨx muiꞌ ka aajim.

27Baꞌ muiꞌ mu jiimchuꞌ am gu jaꞌtkam nam oiꞌñchuꞌ gu Jesuus, suañim am gu uꞌuub nam jix koꞌkom nɨidhim. 28Baꞌp ja tɨtda gu Jesuus bhaiꞌ xi ja tɨɨgɨk:

―Aapiꞌm uꞌuub Israel kam, chaꞌpim jiñ xuañdhidhaꞌ aañ, na guꞌ aañ jix bhaiꞌ tuñ jim. Aapiꞌm ji dɨɨlh na pim jum suañiꞌñdhaꞌ gio gu jam maamar. 29Na guꞌm aajim gu tanoolh na pim paiꞌ dhuuk jup kaiꞌchdhaꞌ tɨi: “Joidham jix bhaiꞌ tu ja jii guiꞌ na cham jir ja ai gu aꞌaalh, na mɨt cham jɨꞌxkat tu xiꞌiich, ni ku mɨt cham jɨꞌxkat jum aꞌlhich chuutkamta.” 30Baꞌ miꞌ dhɨr bɨɨx gu Israel kam jaꞌtkam tɨix aaꞌndaꞌ am nam gɨt maaꞌn jimdam koꞌyaꞌ. Jup ja tɨtdadaꞌ am tɨi gu oiꞌdhaꞌ: “Gor iam bhaiꞌch aꞌm xi iaꞌlh.” 31Na guꞌ nam jax jiñ chulhiiñchuꞌn aañ xib, jaꞌp pɨx ji buusan na jax gux baaꞌ kuꞌaaꞌ na cham mɨidhaꞌ sia ku tɨi mɨɨjim, nañ guꞌ aañ cham tuꞌ kuiñcha biaꞌ. Guꞌ gi baꞌ guiꞌ nam jix uꞌuaꞌtulhdhix kaꞌ, ¿jax japim ɨlhiiꞌñ na tu ja doodaꞌ janoꞌ nam paiꞌ dhuuk jup jum tulhiiñaꞌ? Na guꞌ jaꞌp ji buusniaꞌ na jax gux gak kuꞌaaꞌ na maaꞌn jimdam mɨɨyaꞌ.

32Baꞌ gook pup muiꞌp ja uaꞌ am gu jaꞌtkam nam puiꞌp ja sissapaꞌ maap gu Jesuus kukrus taꞌm. Dhi gook jaꞌtkam ɨɨxdharaꞌ kɨꞌn ja koodaꞌ am. 33Baꞌ bhammɨ na paiꞌ Kakoiꞌ Moꞌ Daa tɨ tɨɨꞌ, bhaiꞌ mɨt ba sissapa kuruus taꞌm gu Jesuus. Baꞌ gu jaiꞌ gook jaꞌtkam nam jup ja uaꞌ, bɨxxik dɨr jamɨt ja sissapa, ɨrban baꞌ ji bii gu Jesuus. 34Baꞌp kaiꞌch gu Jesuus:

―Jiñ Gɨꞌkoraꞌ, chakuip tuꞌp jum buixiꞌñdhaꞌ ja bui dhi jaꞌtkam, nam guꞌ cham maat noꞌm jup jum uaꞌtulhiꞌñ jum bui.

Baꞌ gu sandaaruiꞌx mi jaꞌp ma tɨtbia mɨt mi jaꞌp ji chu darsak amuub gu jajannulhiꞌñ gu Jesuus na sap baꞌ gu jaroiꞌ na tu maiꞌchiaꞌ, bhaan ji chu biꞌyaꞌ. 35Gu jaꞌtkam baꞌ mu jaꞌp guꞌkat bha ja nɨiꞌñ am guiꞌ nam bhaiꞌ sissap. Baꞌ jaiꞌ gu ja gɇꞌgɇrkam tuk gu Israel kam jaꞌtkam jax ñam pɨx aꞌga gu Jesuus, jup kaiꞌch am:

―Dɨɨlh dho jia xim palhbuidhaꞌ. Tɨɨꞌ nat baꞌ jaiꞌ gu jaꞌtkam bɨxchuꞌ pɨx bhaan ja palhbui. ¿Guꞌ dɨɨlh aa baꞌ cham jup bhaaiꞌ? Gio guꞌ saak jir diꞌ guch Xoiꞌkam nat bhaan tɨ tɨɨgɨk bha joot gu Dios bhammɨ dɨr jix dhaam. Bhaiꞌ dhɨr dho ji chɨmñiaꞌ noꞌ baabuiꞌr sɨlhkam.

36Sia gu sandaaruiꞌx puiꞌ jax ñam pɨx jup xi buaꞌt as gu Jesuus, bha iꞌchuꞌn am gu biiñ jix jɨꞌɨɨk. 37Gam nam jup xi chɨtdat:

―¿Gi nap saak aap jix ioꞌm jir ja gɇꞌkam tuk gu Israel kam jaꞌtkam? ¿Kux cham bhaaiꞌ aa nap dɨɨlh bhaiꞌ dhɨr ji chɨmñiaꞌ na puiꞌ bɨxchuꞌx bhaaiꞌ nap pu tu duñiaꞌ?

38Baꞌ bhaiꞌ moꞌbon gu Jesuus maaꞌn bha siis jamɨt gu taaꞌmla alhiꞌch komaarak na gɇꞌgɇr kɨꞌn bha tu uaꞌñix, jup jum kaiꞌch: “Dhiꞌñir diꞌ gux ioꞌm ja gɇꞌkam tuk bɨɨx gu Israel kam jaꞌtkam.”

39Baꞌ maadɨt guiꞌ nam bɨxxik dɨr jup sissap kukrus taꞌm, jaiꞌ puiꞌp xi chɨtda gu Jesuus, jup kaiꞌch:

―Noꞌp baabuiꞌ sɨlhkam aap jir diꞌ guch Xoiꞌkam nat Dios bham joot, dɨɨlh jap dho bhaiꞌ dhɨr ji chɨmñiaꞌ, sia aach jap jaiꞌp xich palhbuidhaꞌ nach yaꞌch chulhiiñ.

40Baꞌ gu jumai na jaꞌp dɨr jaꞌk jup sissap jup tɨtda gu bɨɨmaꞌn tuꞌm:

―¿Kux aap moo cham jax jum aaꞌ aa na tɨim tulhiiñchuꞌn gu Dios jaꞌp na jax aañ? Aach maaxik yaꞌ puiꞌ ba tuꞌiiꞌ guꞌ na jax jaꞌk jich aꞌm jum aaꞌ, na chich guꞌ maaxik jich uaꞌtulh na chich puiꞌ ji chu dunaak na tuꞌ cham jir kɨɨꞌ. 41Guꞌ dhiñ jaduuñ tɨi cham tuꞌ jax dhuu na yaꞌ puiꞌ tuꞌiiꞌ.

42Miꞌ dhɨr baꞌp tɨtda gu Jesuus:

―Aapiꞌ Jesuus, siamrip xiñ chɨꞌñchoi xiñ baidhai nañ jum bui bap tuiꞌkaꞌ nap paiꞌ dhuuk jix ioꞌm gɇꞌkam kɨꞌn ba daibuꞌ.

43Baꞌp tɨtda gu Jesuus:

―Xib jap bhammɨp tuiꞌkaꞌñ bɨɨm na paiꞌ joidham jix chu abhaar. Aañ yaꞌ pum tɨtda.

Na ba mukiaꞌ gu Jesuus

(Mt. 27:45‑56; Mr. 15:33‑41; Jn. 19 :28‑30)

44Baꞌ jotmodaꞌ bhaiꞌ ji chum tukgamta. Kiaꞌpɨx jix dhaam ba ji dhunaak nat puiꞌ tum duu, nammɨ jaꞌp mia ba duu nat paiꞌ dhuuk gio bhaiꞌp ji chu maaxir. 45Dɨɨlh pɨx naiꞌ ji chuu gu tanoolh. Baꞌ gu gɇꞌx kabook jannulh na mu sɇꞌkaꞌ ɨrban dɨr gu gɇꞌ chiop, pu ɨrban sar. 46Baꞌp kaiꞌch gu Jesuus gɇꞌ kɨꞌn:

―Jiñ Gɨꞌkoraꞌ, ba bhɨikaꞌ ap dhiñ iiꞌmdaꞌ kum bui bap tuiꞌkaꞌ.

Baꞌ puiꞌ xi chɨꞌɨɨk naiꞌ ji muu.

47Baꞌ guiꞌ nar ja gɇꞌkam tuk kaꞌ bɨɨx gu sandaaruiꞌx, nɨiꞌñ nat gɇꞌ kɨꞌn puiꞌ xi chɨꞌɨɨk ba muu gu Jesuus. Baꞌ joiꞌmdaraꞌ bhaiꞌ ji chum suulh nat puiꞌ kai, baꞌp kaiꞌch soiꞌm ɨlhdhat buiñor gu Dios:

―Maaxik cham tuꞌ ji na tɨi kuiñcha biaꞌkat dhi jaduuñ.

48Baꞌ gu muiꞌ jaꞌtkam na mɨt miꞌp jum duu, jix buam jum ɨlhdhak ba jii mɨt bhaiꞌ xi gɨbiidhat gu ja bhaasut. 49Dai baꞌ guiꞌ nam jɨꞌk jix ioꞌm jix kɨɨgalhdhat gu Jesuus mummɨ jaꞌp guꞌkat bhaiꞌ pup nɨiꞌñ am, gio jaiꞌ gu uꞌuub na mɨt mummɨ dɨr bhaiꞌ pu oi Galilea.

Nam ba ulhñaꞌ gu tukgaꞌn gu Jesuus

(Mt. 27:57‑61; Mr. 15:42‑47; Jn. 19 :38‑42)

50,51Baꞌ maaꞌn jix jaiꞌch kaꞌ gu maaꞌnkam Josee tɨɨgim, jir Arimatea kam na paiꞌ bhaan bipioꞌ gu Judea kam dɨbɨɨr. Joidham jir jix bhaiꞌkam kaꞌ, na guꞌ jaiꞌ puiꞌ tɨip tɨ nɨɨradaꞌ na gɨt bam aayaꞌ na gu Dios ja sɨlhkadaꞌ bɨɨx gu jaꞌtkam yaꞌ dhi oiꞌñgaꞌn, nam baꞌ miꞌ puiꞌ ba jiimdaꞌ na jax jix aaꞌ. Baꞌ dhiꞌ jaiꞌ maadɨt jup jir dhiꞌ kaꞌ nar ja gɇꞌgɇrkam tuk kaꞌ bɨɨx gu Israel kam jaꞌtkam, guꞌ ji nat guꞌ cham tuꞌ maaꞌn ñiꞌook jup duu ja bui janoꞌ na mɨt paiꞌ dhuuk tu aꞌga nam bax muꞌaak gu Jesuus. 52Dhiꞌ jɨꞌ baꞌ Josee mu jimɨɨk pu tɨɨꞌn gu Pilaato noꞌx bhaaiꞌ na tɨbaañdhai ulhñaraꞌ gu tukgaꞌn gu Jesuus. Baꞌ gu Pilaato cham jax tɨꞌɨɨk jup xi chia. 53Baꞌ xi chɨbaañdhak bhaiꞌ dhɨr kuruus taꞌm ba ulhñam, dai nat xi bhiibgak jannulh kɨꞌn xibkam jix dhaꞌram namkɨm. Maaꞌn kap baꞌ ulh na paiꞌx chiobim jaꞌk tɨ dɨꞌ, miꞌ nam paiꞌ pu puiꞌ jaꞌk tɨ dɨꞌngaras aiꞌ chaꞌm nam baꞌ puꞌñi miꞌ ja ulhñaidhaꞌ gu koiꞌñgaꞌn. Dai nat miꞌ chakui jaroiꞌ maaꞌnnim mim ulhñak nat paiꞌ bam ulh gu tukgaꞌn gu Jesuus. 54Baꞌ janoꞌ bam ai ɨp gu tanoolh nam jix bhaiꞌ tu duñiaꞌ bɨɨx gu Israel kam jaꞌtkam, na guꞌ buimgidhak cham tum juandaꞌ guiꞌ ja bui.

55Baꞌ gu uꞌuub guiꞌ na mɨt mummɨ dɨr bhaiꞌ pu oi gu Jesuus Galilea, bɨɨx jup jiim am na mɨt ulhñam gu tukgaꞌn. Nɨiꞌñ am baꞌ na mɨt jax jaꞌk mi tɨɨ gio na mɨt jax chuꞌm chiob tɨɨ. 56Baꞌ mu dɨr na mɨt jaꞌk suulhgɨk, jix bhaiꞌ mɨt pu xi dhuuk guiꞌ na joidham uub, nam baꞌ mu juulhdhapuꞌ tukgaram gu Jesuus na jax pɨx xi buusniaꞌ gu tanoolh na paiꞌ dhuuk cham tum juandaꞌ, na jax tu aagix nat tu uaꞌnak gu Moisees bhaankamuꞌn gu Dios. Dai baꞌ nam jum jɨɨpiꞌñ buimgidhak gu bɨx chanoolh.

Currently Selected:

LUUKAS 23: stp

Highlight

Copy