Génesis 14
14
Abram Lottan agkanmamtikamu
1Amrafelka nugka Sinarnumia apu, Ariocka nugka Elasarnumia apu, Quedorlaómerka nugka Elamnumia apu, tura Tidalka nugka Goimnumia apu ajakuiti. 2Nu apu ainaka Sodomanmaya apu Berajai, Gomorranmaya apu Birsajai, Sinabnumia apu Admájai, Seméber, Seboímnumia apujai, tura nuiya yaakat Sóarnumia apu Belajai maaniawaru ainawai. 3Cinco apu ajakarua nuka, maaniatnun chichamruinak nayants mijaaku tutainam Sidimman pakarin iruuntraruiti. 4Nu apu ainanka, apu Quedorlaómer nepetak doce uwí matsasuiti. Turasha trece uwítin cinco apu aina, apu Quedorlaómerjai maaniami tusar tiaruiti.
5Catorce uwítin apu Quedorlaómer chikich apu ni matsasa pujurmauri ainasha nita suntaarijai, yaakat Astarot Carnaim tutainam wearu ainawai. Tumawar refaíta ainan nepetkaru ainawai, tura yaakat Hamnum zuzita ainancha nepetkaru ainawai, tura yaakat Savé-quiriataimnumsha emita ainan nepetkaru ainawai. 6Horeo ainan, nugka Seírnum nepetkar patatukiar Paránnum aya nugkanam ejéniaru ainawai. 7Tura Quedorlaómer ni iruuntra yujamurijaimak waketainak En-mispat Cádes tuuta amajtainam jeawaruiti. Tumawar amalecita ainan, tura nugka Hasesón-tamar tuuta amajtainam, amorreo ainajaimak ashi ijinawaruiti.
8-9Tura Sodomanmaya apu, Gomorranmaya apu, Admánmaya apu, Seboímnumia apu, tura Belanmaya apu aina nu yaakat Sidimnum jeawaru ainawai. Nu cinco apu nui jeawar, apu Quedorlaómer, Tidal, Amrafel, tura Ariocjai maaniawaru ainawai. Nu cuatro apu ainaka Elamnumia, Goimnumia, Sinarnumia, tura Elasarnumia ajakaruiti. 10Sodomanmaya apu aina, Gomorranmaya apu ainajai tsekeajkama yaakat Sidimman pakarin wa nukap irunu asamtai, nui chumpimawar jinaawaruiti. Tura apu chikich ainaka muranam tsekeararuiti. 11-12Antsu nepetmakaru ainaka Sodomanmaya, tura Gomorranmaya, yutai ainan, tura warí ainancha ashi yarumainak, Abraman awen Lottan, Sodomanam pujuttamaun achik juinak nina waríri ainajaimak ashi yaruak shiakaruiti.
13Lottan jukiarmatai, chikichik shuar tsekegki uwemrauwa nu amorreo shuar Mamré naartinnau númi encina tutai irunmaunam Abram pujaun jeari ujakuiti. Mamréka Escolan, tura Aneran yachi aina nu Abramjai iruuntrar puju jakaruiti. 14Abram nina awen Lottan achikar jukimun nekaa, nina jeen akinkaru ainan ashi yaruak trescientos dieciocho shuarjai, apu ainan patatukiar yaakat Dannum ejéniaruiti. 15Tura Abram nina inatairi ainajai, apu ainan káshi aneachmaunam jeariar jatekar patatukiar yaakat Damasco nujinam yaakat Hoba tutainam ejéniaruiti. 16Turawar warí ainan yaruakmaunka ashi atantraruiti. Tura nina awe Lottan, nuwa ainan, chikich shuar ainancha ashi ayamrukaruiti.
Melquisedec Abraman Yuus yainmakti timau
17Quedorlaómer, tura chikich apu nijai irutkau ainan maaniamunam nepetak waketkai, Abraman aujsattsa Sodomanmaya apu Savé pakarin wuwaiti. 18Tura Salemnumia apu Melquisedec, Yuus ashi nagkakartakua nuna Sacerdoteri pankan tura vinojai juak, 19Abraman chicharuk:
Yuus ashi nagkakartaku asa nayaimpin, tura nugkancha najanawa nu yainmakti. 20Tura Yuus ashi nagkakartaku asa, amina shuarumin nepetturmaku asamtai tuke ememattai atii, tusa tinaiti. Tama Abram cien warí yaruakmaunmayan Melquisedeckan diez warín akantuk susauwaiti. 21Turam Sodomanmaya apu Abraman chicharuk: Ayamrukmau aina nuka wina surusta. Antsu warí aina nuka aminu atii, tusa tinaiti.
22Tama Abram Sodomanmaya apun ayak: “Wika Yuus ashi nagkakartaku asa nayaimpin, tura nugkancha najanawa nuna ujakmajai. 23Tura asan wii Abramnaka wiakchamtikamjai tusam turutmain asaakmin, aminunka chikichik hilonkesha, tura zapato jigkatainkisha jukishtatjai. 24Tura wina nemartukaru aina yurumak yuamu ainanka tichattajai. Antsu Aner, Escol, tura Mamré nu aina nita wakeruinakka jukiarti”, tusa tinaiti.
Currently Selected:
Génesis 14: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
