Génesis 25
25
Abraham Seturain uchin akigmau
(1Cr 1.32-33)
1Abraham nuwan chikichnasha Setura naartinan nuatkauwaiti. 2Nuna uchiri ainaka: Zimram, Jocsán, Medán, Madián, Isbac tura Súa, nu ajakaruiti. 3Jocsánka, Sebán Dedánjai akiawaiti. Dedánkan uchiri ainaka: Asureo, Letusim tura Leumim, nu ajakaruiti. 4Madiánkan uchiri ainaka: Efa, Efer, Hanoc, Abida tura Elda, nu ainaka Setur weantu ajakaruiti. 5Abraham nina warírinka Isaackan ashi susauwaiti. 6Tura chikich nuwanam uchi akigmau ainanka warí ainan susa, Isaac pujamun ikumtiki etsa watainmani nugka amaunam ishiakuiti.
Abraham jakamtai ikusmau
7Abrahamka ciento setenta y cinco uwí pujusuiti. 8Tuma uuntach jas jakauwaiti. Tuma nina uuntri jina ainajai iruuntrauwaiti. 9Abraham jakamtai, Isaac, Ismaeljai jukiar, Efrón Sóaran uchiri heteo shuaran nugke Mamrénam etsa watainmani amaunam, Macpelanam ikusaruiti. 10Nu nugkanka Hettan uchirinun Abraham sumakuiti. Nuig nina nuwe Sarajai ikuntsauwaiti. 11Abraham jaka ai Isaackan Yuus pegkernum yaigkuiti. Isaacka yumirmatai “Tuke puju, tura wina kuitamrin” tutainam ayaamas pujusuiti.
Ismaelan uchiri aina
(1Cr 1.28-31)
12-16Sara inatain Egiptonmaya nuwan, Agar naartinnum Abraham Ismaelan akiawaiti. Tura Ismaelan uchiri aina: iwairigka Nebaiot naartin ajakuiti. Nuiya Cedar, Adbeel, Mibsam, Misma, Duma, Massa, Hadar, Temá, Jetur, Nafis tura Cedema. Ismaelan uchiri doce ajakarua nuka nugken, tura yaaktarincha nita naarinak anairaru ainawai. Tura doce apu ajakaruiti. 17Ismael ciento treinta y siete uwí pujus jakauwaiti. Tuma nina uuntri jina ainajai iruuntrauwaiti. 18Tumamtai nugka Havilanam nagkamas Shurnum matsamsaruiti.
Isaackan nuwe Rebeca uchin jimamramu
19Abrahaman uchiri Isaac pachisa timau. 20Betuelan nawantrin Labánkan umain arameo shuar aina Padán-aramnum matsama jakarua nuiyan Isaac cuarenta uwí pujus Rebecan nuatkauwaiti. 21Rebeca uchin jurechu ajakuiti, tumau asamtai nuna pachis Isaac Yuusan aujsauwaiti. Turam Yuus, Isaackan umirkauwaiti. Nunikmatai Rebeca ajaprukuiti. 22Uchi jimar asar ampujnum egkemsar senchi muchitaina, imaniakai: Ju imajnaisha wisha uruk pujustajak tu enentaimu. Tuma asa Yuusan iniastasa wuwaiti. 23Tusa nuna pachis Yuusan iniasuiti. Turam ni ayak: Mai uunnak yaaktamkartin aina ampujmin uchi jimar egketaina asar, kajernainak imatikramainawai. Jimar uchia nuiya chikichik ima senchirtin atinaiti. Uchiram emkauka ekeun anturtinaiti, tusa tinaiti.
24Tsawantri jeaamtai Rebeca uchin jimaran jureruiti. 25Iwairigka kapantu, tura ure jasu akinawaiti. Nunaka Esaú anaikaruiti. 26Tura chikishcha patatkau nina yachi Esaún sagkanin achitkau jinkinaiti. Tuma asamtai Jacob anaikaruiti.#25.26 Jacob ta nuka anagkartin taku tawai. Isaac sesenta uwí ejé pujai Rebeca uchin jureruiti. 27Uchi mai tsakararuiti. Esaúka kuntinan main ajakuiti. Antsu Jacobka jea pujutnak wakerujakuiti. 28Isaacka Esaú kuntin maamun yu asa, nina ima senchi ane jakuiti. Antsu Rebeca Jacobon ima senchi ane jakuiti. 29Chikich tsawantin Jacob yutain inareak pujai, Esaú kuntinan maattsa wu senchi tsukar taawaiti. 30Tuma chicharuk: Winasha inarkaum nu wait aneasam ajamrusta yuatjai, senchi pimpikin, tura tsukamakun tajame, tusa tinaiti. Yutai inarkamu yuamunam Esaú Edom anaikaruiti.#25.30 Edom ta nuka kapantu taku tawai. 31Tama Jacob ayak: “Ame iwairi asam jumainaitam nu wina surusta”, tusa tinaiti.
32Tama Esaú chicharuk: ¿Warinma winasha wii iwairi asan jumain ainasha yainkattawa? Wii nuna surimaknaka tsukarui jakattajai. Nuka ame jukitin atá, tusa tinaiti. 33Timatai Jacob chicharuk: “Ame nekas umiktatkumka, ame jukitin atá tusam yamai tsawanta juik Yuusa naari pachisam turutta”, tusa tinaiti.
Tama nisha ayu tusa ni iwairi asa jumainnaka, Jacobon susauwaiti. 34Turam Jacobo pankan, tura lentejancha Esaún susauwaiti. Turam yua, tura umutaincha umar weak: Ni iwairi asa jumaintri ainanka pachikchauwaiti.
Currently Selected:
Génesis 25: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
