Génesis 30
30
1Raquel uchin jurechu asa, nina kain Lean kajerak, aishrin chicharuk: Winisha uchi akiata. Turachkuminka wika jamainaitjai, tusa tinaiti. 2Tama Jacob Raquelan kajerak chicharuk: ¿Wii Yuuskaitaj? Uchin jurechu amajtamsauka Yuusaiti, tusa tinaiti. 3Tama nuwa aishrin chicharuk: Antsu wina inatair Bilha nuatkam uchi akigta. Turawakmin nu uchika winau arti, tusa tinaiti.
4Tusa nina inatairin Jacobon susauwaiti. 5Tura Jacobnaun Bilha uchin jureruiti. 6Tumamtai Raquel chichaak: “Wii seammaun Yuus anturtuku asa, pegker amajtak uchin surusai tusa Dan” anaikauwaiti. 7Tura Jacobnaun ataksha Bilha uchin jureruiti. 8Turamtai Raquel chichaak: Uchin jurechu asan kairun kajermaj nuna, yamaika “uchi juretnum kairun nepetkajai tusa Neftalí” anaikauwaiti.
9Tura Leasha uchin juremainchau nekapeak, nina inatairin Jacobon susauwaiti. 10Tura Jacobnaun Zilpa uchin jureruiti. 11Tumamtai Lea chichaak: ¡Yamaika shir aneajai! tusa Gad anaikauwaiti. 12Tura Jacobnaun ataksha Zilpa uchin jureruiti. 13Tumamtai Lea chichaak: ¡Shir aneajai! Yamaika nuwa ainasha shir aneas pujawai turutiartatui tusa Aser anaikauwaiti. 14Chikich tsawantin trigo juwamunam Rubén wuwaiti. Tuma mandrágora tutain juuk itawaiti, tura nukurin susauwaiti. Turamun Raquel wainak, Lean chicharuk: Winasha wait aneasam uchiram mandrágoran itartama nu surusta, tusa tinaiti.
15Tama Lea ayak: Ame wina aishur jurutkimam nuka imanchau asamtaintsuk, yamaisha mandrágora ainan wina uchir itartimusha jurutkittsam tametai, tusa tinaiti. Tama Raquel chicharuk: Amina uchiram mandrágoran itartami nu surusakminka, arum káshi Jacob amijai kanartatui, tusa tinaiti.
16Timau asa Jacob takauttsa wu, kiarai winaun Lea igkug chicharuk: Yamaika ijai kanartatji, wina uchir mandrágoran itarti nujai sumakjame, tusa tinaiti. Tama Jacob Leajai kanaruiti. 17Lea seammaurin Yuus anturkauwaiti. Turamu asa Lea uchin jureruiti. Nujaimak cinco amajsauwaiti. 18Tura Lea chichaak: Wina inatairun aishrun susau asamtai, Yuus ju uchin surusai tusa, Isacar anaikauwaiti. 19Tura ataksha Lea uchin jureruiti. Nujaimak seis amajsauwaiti. 20Tura chichaak: Yuus wina uchin antrag surusai. Tuma asamtai yamaika wina aishur senchi anentatui tusa, Zabulón anaikauwaiti.
21Tura inagnamun nuwan jureruiti, tura Dina anaikauwaiti. 22Turasha Raquel seammaun Yuus anturkau asa, uchin juren amajsauwaiti. 23Uchin iwairin jurer chichaak: Uchin jurechu asan natsamau ayaj nunaka Yuus ajaprutayi, tusa tinaiti. 24Tusa Yuus ataksha uchin surusti tau asa, José anaikauwaiti.
Jacob Labánkan takarsamu
25Raquel Josén jurermatai pujus, Jacob Labánkan chicharuk: Wisha yamaika wina nugkarui waketkitjai. 26Wina uchir ainan, tura wina nuwar ainancha jukiartasan amina takarsauwaitjam nuka shir nekame. Tuma asan yaruakan waketkitjai, tusa tinaiti.
27Tama Labán ayak: Ame pujau asaakmin amina Yuus yainmak, winasha yainkaun nekaajai. Tuma asamtai wait aneasam ikurkipa. 28Urutma akirkati tusamea wakeram nunaka imatiksanak akiktajme, tusa tinaiti. 29Tama Jacob chicharuk: Wii amina takarkun, tura tagkuram ainancha uruk kuitamkaja nuka ameka shir nekame, tusa tinaiti.
30Wii taatsaigka tagkurmeka ishichik arutrama jakuiti. Turasha wii tamatai Yuus pegkernum yainmaku asamtai, tagkurmeka nukap pampagkai. Turasha wisha urutaiya winauncha takastataj, tusa tinaiti. 31Tama Labán chicharuk: ¿Urutma akirkati tusamea wakeram? tusa tinaiti. Tama Jacob ayak: Pegkesha akirkaipa, antsu amina titatjam nu wakerakminka tagkuram ainan ataksha kuitamatjai, tusa tinaiti.
32Wii amina takarsamunam jukittsanka, tagkuram aina matsatmaunam wena oveja uchiri mukusa ainan, tura cabra uchiri yantsatin ainancha akantratjai. Wii takasmauka nunii akirkata, tusa tinaiti. 33Tura wina tagkur aina iistasam winakmesha, akankamunam oveja mukusachu, tura cabra yantsatin aina wainkamka, juka wina kasartukume tusam turutta, tusa tinaiti. 34Tama Labán chichaak: Ame tame nuka pegkeraiti, tusa tinaiti.
35Turasha nuu tsawantinig Labán cabra aishmag yantsatin ainan, painch ainan akanar, nuwa yantsatin ainan, puju apujturmau ainan, tura oveja mukusa ainan yaruak, uchiri ainan ju atum kuitamatarma tusa akanar inaitusuiti. 36Tura nigka tagku ainan yaruak, tres tsawan jeatainam wuwaiti. Antsu Jacobka Labánkan tagkuri ainan kuitamuk pujau. 37Tuma asa álamo numin kanawen, almendro numin kanawen, tura castaño numin kanawe ainan tsupir pujuri jintrati tusa, tserer tserer tsentsaruiti. 38-39Tura tagku aina entsa umutainam numi kanawe tsentsarmau ainan matsasuiti. Turamu asamtai tagku aina nui patamtunaikar painch ainan, tura yantsatin ainancha petsaina. 40Tumainakai Jacob ninu atinan akanar matsa jakuiti. Jacobka tu tagkurinawaiti. 41Tura tagku nuweram aina pataamtunainakaigka numi kanawe ainan wainkarti tusa aepu jakuiti.
42Turasha tagku watsaku aina pataamtunainakaigka numi kanawe tsentsarmau ainanka aepu jakchauwaiti. Tagku watsaku ainaka Labánnau ajakuiti, antsu tagku nuweram ainaka Jacobnau ajakuiti. 43Jacobka shir wiakach jasuiti. Tuma asa ovejari aina, inatairi aishmag aina, nuwa aina, camello aina, tura burro ainasha nukap arujakuiti.
Currently Selected:
Génesis 30: hubDBL
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
