San Juan 6

Jesuuz briic mi nu gow gaay miily mbecy

1Na despuees ni de nu ndeꞌ, orzeꞌ Jesuuz zam tub laꞌ gaꞌ ruꞌ nisyudoo ni Galilea. Laab ndeꞌ nisyudoo ni Tiberias. 2Orzeꞌ zigy mbecy za ca dey ich mi, gun bzaac dey de nusuriidz ily nu bicy mi nu de mbecy rat zeꞌ. 3Orzeꞌ Jesuuz gup mi too tub bicy. Orzeꞌ gusub mi nu de yu nu rsyaꞌ lom. 4Na tiem zeꞌ bi rgaab tub saꞌ ni de mbecy Israeel nu la saꞌ ni Pas. 5Na ornu briꞌ lom, orzeꞌ bzaac mi nu tonaꞌ la zigy mbecy bdeꞌ dey lom. Orzeꞌ nam rab mi Lip:

―¿Ca chan cha gyiin coz nu gric na gow dela de mbecy ii? ―nam.

6Ni mniim ben la gnii Lip, gun ub mi bi rad lagy mi la na coz nu gyicy mi. 7Orzeꞌ na Lip rab yum:

―Ni nu sac i moz ni cyup gaynal dzi wal ñii nu gad coz nu gow dey mas ñuu ga ―nay.

8Orzeꞌ brusu tub dey lat de yu nu rsyaꞌ lom, yu nu la Ndrees, yu zeꞌ laab bicy Simo̱o̱ Bed. Orzeꞌ nay rab yu Jesuuz:

9―Ii zu tub yu nguzh nuuy gaay gyishtily nu byaa nu arin ni sebada, nunu nuuy cyup bel. ¿Par ca gal laa ndeꞌ lat de mbecy zigy? ―nay.

10Orzeꞌ na gaꞌm rab mi yu:

―Mnii der lo dela mbecy nu gzub dey ―nam.

Lugaar zeꞌ tonaꞌ la nash gyizh caꞌ. Orzeꞌ gucua dey loñ. Nac tub gaay miily yu gyeey lat de mbecy nu gucua lugaar zeꞌ. 11Orzeꞌ Jesuuz gush mi de gyishtily zeꞌ. Orzeꞌ briic mi gras ni Ñgyoozh. Orzeꞌ briic mi ñii nu dugyeez ñi lat de mbecy nu nguaa zeꞌ. Niꞌ ziꞌl bicy mi nu de bel zeꞌ nu dugyeez ma lat dey dub gal nu galagy ñi ni tub ga dey. 12Na ornu blazh bdow dey, orzeꞌ na Jesuuz rab mi de yu nu rsyaꞌ lom:

―Gua teꞌ der de coz nu brusub gun cueꞌ nu nit loñ ―nam.

13Orzeꞌ de yu zeꞌ brugyiꞌ rteꞌ dey de gyishtily nguzh nu brusub ni gaay gyishtily sebada zeꞌ. Orzeꞌ bduꞌ dey ñi nañ trocyup chicyiw nunu bdzaa lañ. 14Ornu bzaac de mbecy nu nguaa zeꞌ nusuriidz nu bicy Jesuuz nu de gyishtily zeꞌ, orzeꞌ na dey rab yu losaꞌy:

―Rishli gaal mi ii nac mi tub biñ nu rnii por cuen ni Ñgyoozh. Mi ii nac mi biñ nu rnii por cuen ni Ñgyoozh nu ca lo cuen nu cyid gyishlombecy ―na dey.

15Tees Jesuuz gud lagy mi nu rlagy dey nu zeeñ yum rey por fers la. Orzeꞌ bruum lat dey zam ub zim too tub bicy.

Jesuuz bzam lo nis

16Na ornu becheñ, orzeꞌ de yu nu rsyaꞌ lo Jesuuz bet dey par ruꞌ nisyudoo. 17Orzeꞌ guꞌ dey nañ tub barc. Orzeꞌ bded dey lo nisyudoo par nu cha dey par Capernaum. Na ornu bi bet rel nap la, orzeꞌ gaal zi nigul ruꞌña Jesuuz lo dey. 18Laab or zeꞌ tonaꞌ la fert bruꞌña tub bi ily, nunu tonaꞌ la ricy ñi nu rzup nguuly lo nisyudoo zeꞌ. 19Na ornu dzi bi psaa dey barc zeꞌ lo nis nu rnii tub gaay o shuup miily metr, orzeꞌ bzaac dey Jesuuz nu rzam lo nis, nunu yagaab mi lo dey. Orzeꞌ tonaꞌ la gudzib dey. 20Orzeꞌ nam rab mi dey:

―¡Ya̱ nu ndeꞌ! ¡Cueꞌ dzib der! ―nam.

21Orzeꞌ de yu zeꞌ pshet ic dey nu chuꞌm nañ barc zeꞌ. Orzeꞌ sij la bri dey gashtal lugaar zeꞌ nu rsaap dey chay.

De mbecy ryub dey Jesuuz

22Na ornu bzaꞌ yu tuubaꞌ dzi, orzeꞌ de mbecy nu byeeñ tub laꞌ gaꞌ dzu ruꞌ nisyudoo brugyiꞌ rnii too dey. Gud lagy dey nu za ga de yu nu rsyaꞌ lo Jesuuz nañ tub zi barc nu zu lugaar zeꞌ. Nunu gud lagy dey nu de yu zeꞌ wancha nu dey Jesuuz. 23Zeꞌ lat zeꞌ bri reñaꞌ barc. Barc zeꞌ bruuñ gyedz Tiberias. Briñ gaab ga lugaar zeꞌ nu bdow dey gyishtily despuees ornu Shuaan na Jesuuz briic mi gras ni Ñgyoozh. 24Na ornu de mbecy zigy zeꞌ bzaac dey nu sac Jesuuz lugaar zeꞌ gal nu de yu nu rsyaꞌ lom, orzeꞌ niꞌ ziꞌl de mbecy zeꞌ guꞌ dey nañ barc. Orzeꞌ za dey za yub yum par Capernaum.

Jesuuz nac mi gyishtily nu rbic gyel mbañ nu rishli

25Na ornu bri de mbecy zigy zeꞌ tub laꞌ gaꞌ ruꞌ nisyudoo, orzeꞌ bdzeel dey Jesuuz. Orzeꞌ na dey rab yum:

―Masht, ¿gul brir lugaar ii? ―na dey.

26Orzeꞌ na Jesuuz rab mi dey:

―Ya̱ rishli rne̱e̱ lo der nu de ru ryub der ya̱ par nu nac nu brica̱ nu bdow der nu byel la nir. Walab par nu bet lag der cuen de nusuriidz nu bicya̱. 27Cueꞌ gyicy der riiñ par de coz nu gow der gyishlombecy ii, gun ndeꞌ wazu tuuñ ñi; sinu bicy der riiñ par de coz nu gow der nu gyicy ñi nu cui mbañ der tub la. Ndeꞌ coz nu gric ya̱, biñ nu byac mbecy. Gun de nusuriidz nu ricya̱, ndeꞌ tub sey nu briic Ñgyoozh ne̱ par nu gabe nu laab ñi de riidz nu rne̱e̱ ―nam.

28Orzeꞌ na dey rab yum:

―¿Ca na coz nu rlagy ñi nu gyicy de̱ par nu gyicy de̱ coz nu rlagy Ñgyoozh? ―na dey.

29Orzeꞌ na gaꞌ Jesuuz rab mi dey:

―Coz nu rlagy Ñgyoozh nu gyicy der, ndeꞌ nu gyicy cup der consuel lo ya̱, biñ nu bzuu nez mi ―na Jesuuz.

30Orzeꞌ na dey rab yu Jesuuz:

―¿La ñuu nusuriidz lyuur lo̱ de̱ par nu gzac de̱, gun orzeꞌ gyicy cup de̱ consuel lor? ¿La ñuu na coz nu gyicy ru? 31Gun de gyitoo bel ni den bdow dey tub lo gyishtily nu la maná. Ndeꞌ bruuñ gal gyibaa lat nu gusa dey de lugaar ub zi, gal nu rniiñ lat riidz ni Ñgyoozh: “Ñgyoozh briic mi gyishtily nu bruu gyibaa gow dey”, rniiñ ―na dey.

32Orzeꞌ na Jesuuz rab mi dey:

―Ya̱ rishli rne̱e̱ lo der nu walab Moisees briic yu gyishtily nu bruu gyibaa nu gow dey, sinu Ñgyoozh, uza̱, briic mi ñii. Zeꞌ na Ñgyoozh, uza̱, mi zeꞌ rbic mi gyishtily nu rishli nu bruu gyibaa nu gow der. 33Gun gyishtily nu rbic Ñgyoozh zeꞌ, ndeꞌ gyishtily nu bruu gyibaa bet ñi gyishlombecy ii, nunu rishli rbic ñi nu cui mbañ de mbecy gyishlombecy ii ―nam.

34Orzeꞌ na dey rab yum:

―Jesuuz, cuic ru gyishtily nu rniir zeꞌ da̱w de̱ de dzi la ―na dey.

35Orzeꞌ na Jesuuz rab mi dey:

―Ya̱ naca̱ gyishtily nu rbic gyel mbañ zeꞌ. Yu nu gyechaꞌ lo̱, yu zeꞌ rila wariibaꞌ nu gyan yu nañ lardooy. Nunu de yu nu gyicy cup consuel lo̱ rila wariibaꞌ nu cuigy dey nis nañ lardooy. 36Tees ya̱ bi mne̱e̱ lo der nu mas rzac der ya̱, tees wayicy cup der consuel lo̱. 37Dela de yu nu rbic Ñgyoozh ne̱ yechaꞌ dey lo̱. Nunu de yu nu gyechaꞌ lo̱ walo̱o̱ chu̱ dey. 38Gun ya̱ walab nu bru̱u̱ gyibaa par nu yapa̱ nu gyicya̱ coz nu rlagy uba̱, sinu yapa̱ nu gyicya̱ coz nu rlagy Ñgyoozh, uza̱, biñ nu bzuu nez ya̱. 39Nunu biñ nu bzuu nez ya̱ zeꞌ rlagy mi nu ni gyicya̱ nu cueꞌ zaana̱ nu duneꞌ ni tub la mbecy nu briic mi ne̱, sinu gyicya̱ nu gyabañ de mbecy nu bi gut ornu laab ndeꞌ la nu shuub dzi nu ded ni gyishlombecy. 40Gun coz nu rlagy Ñgyoozh, uza̱, ndeꞌ nu dela mbecy nu cuꞌ lo ya̱, iꞌñ mi, nunu gyicy cup dey consuel lo̱, orzeꞌ cui mbañ dey tub la; nunu gyicya̱ nu gyabañ de mbecy nu bi gut ornu laab ndeꞌ la nu shuub dzi nu ded ni gyishlombecy ―nam.

41Orzeꞌ la be de mbecy Israeel brugyiꞌ rnii deet dey nu nac Jesuuz, par nu mniim: “Ya̱ naca̱ gyishtily nu bruu gyibaa beta̱ gyishlombecy ii”, nam. 42Nunu na gaꞌ dey:

―¿A walab yu ii, yu nu nac iꞌñ See? De ub na yuꞌ lo den uz yu, nunu yuꞌ lo den ñaay. Güii la rnii gaꞌy na. Nay nu gyibaa bruuy bet yu gyishlombecy ii ―na dey.

43Orzeꞌ na gaꞌ Jesuuz rab mi dey:

―Cueꞌ nii deet der lat losaꞌr. 44Ni tub la mbecy wac gyechaꞌ dey lo̱ benu walab Ñgyoozh uza̱ biñ nu bzuu nez ya̱, rniim nañ lardoo dey nu gyechaꞌy lo̱. Nunu gyicya̱ nu gyabañ yu ornu shuub dzi nu ded ni gyishlombecy. 45Gun ca tub riidz lat de riidz nu bzeeñ de yu nu mnii por cuen ni Ñgyoozh. Orzeꞌ rniiñ: “Ñgyoozh rlyuum ni dela mbecy”, rniiñ. Ndeꞌ nu dela de yu nu rzuub gyidag de riidz ni Ñgyoozh uza̱, nunu rsyaꞌ dey lom, de yu zeꞌ gyechaꞌ dey lo̱.

46’Ndeꞌ nu walab nu ca na tub mbecy bi bzaac yu Ñgyoozh uza̱; sinu tub zi la ya̱, biñ nu bruu lom rzaca̱m. 47Ya̱ rishli rne̱e̱ lo der nu cyu ziꞌl yu nu gyicy cup consuel lo̱, yu zeꞌ bi guud nu cui mbañ yu tub la. 48Gun ya̱ naca̱ gyishtily nu cuic gyel mbañ ni mbecy. 49De gyitoo bel ni de ru bdow dey gyishtily nu la maná nu briic Ñgyoozh lat nu gusa dey de lugaar ub zi, tees gut dey. 50Tees gyishtily nu ya̱ rzata̱ lo der, ndeꞌ gyishtily nu bruu gyibaa. Mbecy nu gow gyishtily zeꞌ wat yu. 51Ya̱ naca̱ gyishtily nu cuic gyel mbañ: gyishtily nu bruu gyibaa. De yu nu gow gyishtily zeꞌ, cui mbañ yu tub la, nunu gyishtily nu ya̱ grica̱ ni dey, ndeꞌ laab cuerp ne̱. Rica̱ ñii, gun orzeꞌ de mbecy gyishlombecy gad nu cui mbañ dey ―nam.

52Orzeꞌ la be de mbecy Israeel brugyiꞌ nu ro zi dey riidz nu losaꞌy. Orzeꞌ na dey:

―¿Lac mod gyicyaꞌ yu ii par nu cuic yu cuerp niy dow den? ―na dey.

53Orzeꞌ na Jesuuz rab mi dey:

―Ya̱ rishli rne̱e̱ lo der benu wow der cuerp ne̱ ya̱, biñ nu byac mbecy, nunu benu woꞌ der reña̱, orzeꞌ wad nu cui mbañ der. 54Cyu ziꞌl mbecy nu gow cuerp ne̱ nunu goꞌy reña̱, yu zeꞌ bi guud nu cui mbañ yu tub la, nunu gyicya̱ nu gyabañ yu ornu laab ndeꞌ la nu shuub dzi nu ded ni gyishlombecy. 55Gun cuerp ne̱, ndeꞌ tub comid nu rishli gaal. Zeꞌ reña̱, ndeꞌ tub nis nu rishli gaal nu goꞌ dey. 56Gun de yu nu gow cuerp ne̱ nunu goꞌy reña̱, de yu zeꞌ cyiiñ du̱ yu, nunu de yu zeꞌ cyiiñ nuy ya̱. 57Ñgyoozh uza̱, biñ nu bzuu nez ya̱, mbañ mi, nunu ya̱ mbaña̱ par nu nac mi zeꞌ. Ndeꞌ nu niꞌ ziꞌl mod de yu nu gow cuerp ne̱, cui mbañ yu nu nac ya̱. 58Gyishtily nu ya̱ rzata̱ lo der, ndeꞌ gyishtily nu bruu gal gyibaa. Gyishtily nu rne̱e̱ ii, nii wasaap ñi gyishtily nu la maná nu bdow de gyitoo bel ni den. Mas bdow dey de gyishtily zeꞌ, tees gut dey. Zeꞌ de yu nu gow gyishtily nu ya̱ rne̱e̱, de yu zeꞌ cui mbañ dey tub la ―nam.

59De nii coz nu blyuu Jesuuz ni de mbecy nu byatublaazh nañ yuꞌ nu rsyaꞌ de mbecy Israeel riidz ni Ñgyoozh Capernaum.

Riidz nu gyicy nu cui mbañ mbecy tub la

60Na zigy de yu nu rsyaꞌ lom, ornu güeñ dey de ndeꞌ, orzeꞌ na dey rab yu losaꞌy:

―De riidz nu mniim ii, dzi ga biigy. ¿Cyu gagye nu gyeñ de nu nde? ―na dey.

61Na ornu gud lagy Jesuuz nañ lardoom nu rnii deet dey nu nac ndeꞌ, orzeꞌ nam rab mi dey:

―¿A nu nac de riidz nu mne̱e̱ ii, ndeꞌ nu wangyuꞌ lagy der? 62¿Zeꞌ la gyicyaꞌ der benu gzac ru nu ya̱, biñ nu byac mbecy, nu chupa̱ gyibaa, zeꞌ nu pcyiiña̱ nu loga? 63Espiriit Yon ni Ñgyoozh, mi zeꞌ gyicy mi nu cui mbañ de mbecy gun de mbecy gyishlombecy se la la cyiiñ dey par nu gyicy dey nu cui mbañ yu. Tees de riidz nu mne̱e̱ lo der ii, nii coz nu bruu lo Espiriit Yon ni Ñgyoozh. Nunu mi zeꞌ gyicy mi nu cui mbañ dey. 64Tees gabee yuꞌ la be mbecy lat der nu wagyicy cup consuel lo̱ ―nam.

Gun Jesuuz nil bi gud lagy mi nese anzir nu cuim dey nu ca na de yu nu wayicy cup consuel lom, nunu bi gud lagyaꞌm ca na yu nu guꞌm yaa mbecy rzi lagy. 65Orzeꞌ na gaꞌm:

―Ndeꞌ nu ya̱ bi mne̱e̱ lo der nu ni tub la mbecy wac gyechaꞌ dey lo̱, benu walab Ñgyoozh niim nañ lardoo dey.

66Par nu nac de riidz zeꞌ, zigy de yu nu rsyaꞌ lom bya ich yu nunu wanchesa nu gaꞌ dey mi. 67Orzeꞌ na Jesuuz rab mi de trocyup yu nu rsyaꞌ lom:

―Zeꞌ de ru, ¿a niꞌ rlagy der ruu chur lo̱? ―nam.

68Orzeꞌ na Simo̱o̱ Bed:

―Shuaan de̱, ¿zeꞌ cyu lo cha̱ de̱ beni? De riidz nu ru rniir, ndeꞌ riidz nu gyicy ñi nu cui mbañ de̱ tub la. 69Nunu de̱ ya̱ bi ricy cup de̱ consuel lor, nunu bi rad lagy de̱ nu ru nac ru biñ yon nu bruu lo Ñgyoozh ―na Bed.

70Orzeꞌ na gaꞌ Jesuuz rab mi dey:

―¿A walab nu pcui̱ de trocyup de ru? Zeꞌ lo trocyup der, tub yu nac yu tub mbecy ni nuras ―nam.

71Lat nu mniim de riidz ii, orzeꞌ bzat mi Judas, iꞌñ Simo̱o̱ Iscariote, gun mas Judas nac yu tub de trocyup yu nu rsyaꞌ lom, tees yu zeꞌ yu nu bguꞌ Jesuuz yaa mbecy nu rzi lagy.

Currently Selected:

San Juan 6: zpz

Highlight

Copy