Éxodo 5

Moiséswan Aarón Faraón kaqman ëwayanqan

1Tsëpitanam Moisésqa Aarónwan Faraónman ëwëkur niyarqan: <<Israel nunakunata kuyaq Teyta Diosmi kënö nin: <Kuyanqä nunakunata jaqirïkï chusyaqman ëwëkur noqata adorayämar fiestata rurayänanpaq> >>.

2Tsënö niyaptinmi Faraón nirqan: <<¿Pitaq Teyta Diosnikiqa pëta cäsurnin Israel nunakunata <ëwayë> ninäpaqqa? Teyta Diosnikitaqa manam reqïtsu. Y manam Israel nunakunata ëwayänanta jaqishaqtsu>>.

3Tsënö niptinmi Moiséswan Aarón niyarqan: <<Hebreo nunakunapa#5.3 Hebreo nunakunaqa Israel nunakunam karqan. Tsëmi Moiséspis Hebreo nuna karqan. Diosninmi yuripuyämashqa. Tsëmi kima junaq ëwëtanö chusyaqman ëwar sacrificiuta kayar Teyta Diosnïta adorayäshaq. Tsënö mana rurayaptïqa qeshyawanpis o guërrawanpis ushakätsiyämanqam>>.

4Tsënam Egipto nacionpa reyninqa nirqan: <<Moisés y Aarón, ¿imanirtaq nunakuna alli uryakïkäyaqta tiempunkunata perditsita munayanki? ¡Qamkunapis ras uryaq ëwayë! 5Kë nacionchö tsëtsika Israel nunakuna alli uryakïkäyaptin ¿imanirtaq inkitëkäyanki?>>

Israel nunakunata mana jamatsipa uryatsiyanqan

6Tsënö nirmi tsë junaqlla capatazkunata y yanapaqninkunatapis Faraón nirqan: 7<<Kananpita witsëpaqa ama päjata alistayäpïnatsu Israel nunakuna tikata sutayänanpaq. Kikinkunana ëwayätsun päjata ashimuq. 8Puntata sutanqannölla ni juk tika pishiqta sutayänanpaq obligayanki. Tsë nunakunaqa uryëta qelanarmi nikäyan: <Chusyaq jirkaman ëwar Diosnïkunapaq sacrificiuta kayayäshaq> nir. 9Kananpitaqa Israel nunakunata mana jamatsipa uryatsiyanki. Alläpa uryawanqa inkitayaptinpis manam cäsuyanqanatsu>>.

10Tsëmi capatazkuna y yanapaqkunapis ëwar Israel nunakunata niyarqan: <<Faraónmi niyämashqa kananpita witsëpaqa päjata mana alistayämunäpaq. 11Kananpitaqa tikata sutayänëkipaq kikikikunanam päjata mëpitapis ashiyämunki. Nïkur puntatanöllam tikata sutayanki jukllëllapis mana pishiqta>>.

12Tsëmi Israel nunakunaqa jinantin Egiptupa ramakäyarqan päjapa rantin raströjukunata ashirnin.

13Capatazkunanam niyarqan: <<Listu päjawan tikata waran waran sutayanqëkinöllam kananpis sutayänëki>>.

14Yanapakuqkuna mana cumplitsita puëdiyaptinmi Faraónpa capatazninkunana astarkuryan tapuyarqan: <<Qanyanpis ni kananpis ¿imanirtaq puntatanönaqa tikata sutatsiyämunkinatsu?>>

(Capatazkunapa yanapaqninkunaqa Israel nunakunam kayarqan.)

15Tsënam capatazkunapa yanapaqninkunaqa Faraónman quejakuq ëwar niyarqan: <<Sirwiqniki këkäyaptïqa ¿imanirtaq alläpa jipatsiyämanki, tëtë? 16Capataznikikunaqa päjatapis mananam alistayämunnatsu. Tsënö mana alistëkamurpis nöpa sutatsiyanqänöllam sutatsiyänäta munayan. Nïkurpis maqayämanran. Päjata mana alistayämurmi capataznikikunapis jutsayuq këkäyan puntatanö tikata mana sutatsiyänäpaq, tëtë>>.

17Faraónnam nirqan: <<¡Qamkunaqa qela karmi tsënö nir purikäyanki! Tsëmi Teyta Diospaq sacrificiuta kayaq ëwëta munayanki. 18Tsënö puriyänëkipa rantin ras uryaq ëwayë. Päjata manana alistayämuptinpis puntatanömi ni juk tika mana pishiqta sutatsiyänëki>>.

19<<Manam pishiqtaqa sutatsiyankimantsu>> niptinmi capatazkunapa yanapaqninkunaqa alläpa llakikuyarqan. 20Faraónwan palaciunchö parlayanqanpita yarqamurmi Moisésta y Aarónta tariyarqan pëkunata shuyëkaqta. 21Tsëmi niyarqan: <<Qamkunam Faraónta piñatsiyarqunki kënö jipatsiyämänanpaq. ¡Qamkunata Teyta Dios castigayäshï! Wanutsiyämänanpaq cutsilluta aptatsiqnöran qamkuna ashipäyashqanki>>.

22Tsënö niyaptinnam Teyta Diosta mañakur Moisés nirqan: <<Teyta Dios, ¿imanirtaq alläpa jipëkatsinki akranqëki nunakunata? ¿Tsëpaqku kachamarqëki? 23Faraónwan parlaq ëwanqä junaqpitam kuyanqëki nunakunata maqarkuryan mas uryatsin alläpa jipatsirnin. Tsënö jipëkäyaptinpis manam imatapis rurankitsu pëkunata salvanëkipaq>>.

Currently Selected:

Éxodo 5: qwhB

Highlight

Copy