Génesis 18

Abrahamta Teyta Dios watukanqan

1Mamre nunapa chakran këkaq encina montikuna kanqanchö tëkaptinmi Abrahamta Teyta Dios yuripurqan. Tsë höram alläpa achachaptin toldun punkuchö pullan junaqnö Abraham tëkarqan. 2Tsëchömi Abraham rikëkurqan kima nunakuna shëkaqta. Tsëmi chaskinanpaq#Heb. 13.2. ëqillapa ëwar puntankunaman qonqurikur 3nirqan: <<Tëtakuna, pasakuyänëkipaqpis jamakurishunraq. Ama rasllaqa pasakuyëtsu. 4Yakuta apatsimushaq chakikikunata paqariyänëkipaq. Kë monti chakinllachöpis jamakurishun. 5Wamaqlla chäyämunqëkita imallatapis aruratsimushaq. Mikurirnam pasakuyanki>>.

Tsënö niptinnam pëkuna niyarqan: <<Payllä, allim kallanqa>>.

6Tsëmi Abraham toldunman raslla yëkurir Sarata nirqan: <<Sara, ishkë chunka (20) kïlu mas allin kaq jarinapita raslla tantata ruraramï>>.

7Tsëpitanam Abrahamqa wäkankuna kaqman ras ëwar wiran kaq wishita apamur sirwiqninta qorirqan pishtarir raslla arunanpaq. 8Tsëpitanam mantequïllata, lichita y arutsinqan ëtsata apar jamëkäyanqanllaman pëkunata qararqan. Mikuyaptinpis nöpankunachömi mäkuq mäkuq këkarqan imatapis wanayaptin makyarinanpaq.

9Mikurirnam Abrahamta tapuyarqan: <<¿Mëchötaq warmiki Saraqa këkan?>>

Abrahamnam: <<Toldu rurinchömi këkan>> nirqan.

10Tsënam pëkunapita juknin kaq nirqan: <<Watan yapë kutimunäpaq warmiki Sara ollqu wawayuqnam këkanqa>>.#Rom. 9.9.

Punku waqtanllapitam Saraqa wiyarëkarqan Abrahamta tsënö ninqanta. 11Abrahamwan Saraqa tsatsanam kayarqan. Y Sara chakwanna kaptinmi killa qeshyanpis unëna pärashqa karqan. 12Tsënö parlanqanta wiyëkurmi Saraqa asikur shonqunllachö nirqan: <<Chakwanna këkaptïqa y qowäpis awkinna këkaptinqa ¿imanöpanash qeshyaqyäman?>>

13 Teyta Diosnam Abrahamta nirqan: <<¿Imanirtaq asikushqa Sara? ¿Imanirtaq yarpëkan chakwanna kar wawata mana tarinanta? 14¿Imallaqa sasa kantsuraq noqapaq? Watan yapë kutimunäpaq ollqu wawayuqnam Sara këkanqa>>.#Jer. 32.27; Luc. 1.37; Rom. 9.9.

15Tsënö ninqanta wiyëkurnam Saraqa mantsakar nirqan: <<Noqaqa manam asikurqütsu>>.

Tsënam Teyta Dios nirqan: <<Noqa musyämi asikunqëkita>>.

Sodoma markapaq Teyta Diosta Abraham mañakunqan

16Tsëpitanam watukaqninkunaqa#18.16 Tsë kima watukakuqkunaqa manam nunakunatsu kayarqan, sinöqa ishkë angelninkunawan kikin Teyta Diosmi karqan. Tsëta musyanëkipaq leyinki Gén. 18.17; 19.1. Sodoma markapa pasakuyarqan. Abrahampis pëkunata yanaqar karuyaqran ëwarqan. 17Abrahamwan ëwëkarnam Teyta Dios yarpakacharqan: <<Imata ruranäpaq yarpëkanqätapis ¿manatsuraq Abrahamta willäman? 18Pëpita miraqkunaqa jatun nacionmi kayanqa. Tsënöllam pë rëkur kë patsachö llapan casta nunakunapis bendicionnïta chaskiyanqa. 19Pëmi tsurinta y pëpita miraqkunatapis munanqänö imëpis kawayänanpaq yachatsinqa. Tsëpaqmi pëta akrashqä. Tsënö ruraptinmi Abrahamta äninqäkunata llapanta cumplishaq>>.

20Tsënö yarpakacharmi Abrahamta Teyta Dios nirqan: <<Sodomachö y Gomorrachö täraq nunakunapaqmi mëtsë nunakunapis parlayan pasëpa jutsa ruraq kayanqanta. 21Tsëmi kanan ëwëkä nunakuna niyashqannö rasunpa jutsa ruraq kayanqanta o jutsannaq kayanqantapis musyanäpaq>>.

22 Teyta Dioswan Abraham parlayanqanyaqnam ishkë kaqkunaqa Sodomaman puntäkuyarqan. 23Nöpanman witïkurnam Teyta Diosta Abraham tapurqan: <<Jutsasapakunata ushakätsirqa ¿tsëchö jutsannaq kaqkunatapis ushakäratsinkitsuraq? 24Jutsannaq nunakunaqa itsa pitsqa chunkallapis (50) tsë markachö kayan. Pitsqa chunka jutsannaq nunakuna tsë markachö këkäyaptinqa ¿mana ankupashpatsuraq ushakäratsinki? 25Teyta, jutsasapa nunakunatawan iwalqa ama jutsannaq nunakunata ushakäratsillëtsu. Kë patsachö llapan nunakunapa jueznin këkarqa ¿manatsuraq alli justiciëkita rurëkullankiman?>>

26Abraham tsënö rowakuptinnam Teyta Dios nirqan: <<Sodoma markachö pitsqa chunka jutsannaq nunakunata tarirqa pëkuna rëkurmi tsë markata ushakätsishaqtsu>>.

27Tsënam Abraham nirqan: <<Teyta, yapë rowaptiq ama piñakurkullëtsu. Noqaqa polvunö y uchpanöllam kä. 28Jutsannaq nunakunaqa itsapis pitsqa chunka kayänanpaq pitsqallapis pishinraq. ¿Tsëllana pishikaptinpis ushakäratsinkitsuraq tsë markata?>>

Tsënö rowakuptinnam Teyta Dios nirqan: <<Jutsannaq nunakunata chusku chunka pitsqata (45) tarirqa manam ushakätsishaqtsu>>.

29Abrahamnam yapë nirqan: <<Itsapis chusku chunkalla (40) jutsannaq nunakunaqa tsëchö këkäyan>>.

Tsënö niptinnam Teyta Dios nirqan: <<Jutsannaq nunakunata chusku chunkata tarirqa manam ushakätsishaqtsu>>.

30Yapëmi Abraham rowakurqan: <<Teyta, yapëkuryan rowakuptiq ama piñakullëtsu. Itsapis kima chunkalla (30) jutsannaq nunakuna tsëchö këkäyan>>.

Tsënö niptinnam Teyta Dios nirqan: <<Jutsannaq nunakunata kima chunkallatapis tarirqa manam tsë markata ushakätsishaqtsu>>.

31Abrahamnam yapë nirqan: <<Teyta, yapë rowakullaptiq ama piñakullëtsu. Ishkë chunkallata (20) jutsannaq nunakunata tarirqa ¿ushakäratsinkitsuraq?>>

Tsënö niptinnam Teyta Dios nirqan: <<Ishkë chunkallatapis jutsannaq nunakunata tarirqa manam tsë markata ushakätsishaqtsu>>.

32Yapëmi jina Abraham tapurqan: <<Teyta, yapë tapuptiq ama piñakurkullëtsu. Kananllana tapïkushqëki. ¿Imatataq rurëkunki chunkallata jutsannaq nunakunata tarirqa?>>

Teyta Diosnam nirqan: <<Chunkallatapis jutsannaq nunakunata tarirqa manam tsë markata ushakätsishaqtsu>>.

33Abrahamwan parlëta usharirnam Teyta Dios ewkurqan. Abrahamnam täranqanman kutikurqan.

Currently Selected:

Génesis 18: qwhB

Highlight

Copy