Génesis 21

Isaacpa yurikïnin

1Abrahamta Teyta Dios äninqannöllam Saraqa qeshyaqyärirqan. 2Abraham awkinna këkaptinpis Teyta Dios citapanqan killachömi ollqu wamrata Sara qeshpikurirqan.#Heb. 11.11-12. 3Sara qeshpikuriptinnam Abrahamqa tsurinpa shutin churarqan Isaacta. 4Yurinqanpita puwaq junaqyuq këkaptinnam Teyta Dios ninqannölla tsurinta compañonninchö señalarqan.#Gén. 17.12; Hech. 7.8. 5Abraham juk pachak (100) watayuq këkaptinmi tsurin Isaac yurikurqan.

6Tsënam Saraqa nirqan: <<Wawayuq kanäpaq Teyta Dios willamaptinmi asikurqü.#Gén. 18.12-15. Wakin nunakunapis tsëta musyarmi kushikur asikuyanqa. 7¡Piraq Abrahamta ninman karqan noqa wawayuq kanäpaq kaqta! Qowä awkinna këkaptinpis wawayuqmi këkä>>.

Agarta wawantawan Abraham qarqunqan

8Isaac winarkuptinnam mamänin wasqirirqan. Tsë junaqmi Abrahamqa kushikur fiestata rurarqan. 9Tsë junaqmi Agarpa wawan Ismael Isaacta burlapar asipäkïkaqta Sara rikarqan. 10Tsëmi Abrahamta Sara nirqan: <<¡Tsë sirwikuqtaqa wawantawan ras qarqurïkï! Sirwikuqpa wawanqa manam wamrä Isaacwan herencianta rakinakuyanqatsu>>.#Gál. 4.30.

11Tsënö niptinnam Abrahamqa alläpa llakikurqan Ismaelpis tsurin kaptin. 12Tsëmi Abrahamta Teyta Dios nirqan: <<Tsuriki Ismaelpaq y sirwiqniki warmipaq ama llakitsu. Qamta äninqaqqa tsuriki Isaacpaqmi y pëpita miraqkunapaqmi. Tsëmi Sara llapan nishunqëkita rurë.#Rom. 9.7; Heb. 11.18. 13Sirwishuqnikipa wawan Ismaeltapis tsuriki kaptinmi atskaman mirar jatun nación kananpaq permitishaq>>.

14Teyta Dios tsënö niptinnam Abrahamqa waränin qoya qoyalla Agarta mirkapar tantata y yakullantin qara bolsatapis alistapurqan. Tsëkunata aparirkatsirmi wawantawan despachëkurqan. Tsëmi Agarqa wamranwan ewkur Beerseba chusyaqchö pantakashqa purikuyarqan. 15Apayanqan yaku ushakäriptinnam monti jawanchö wawanta jaqirirqan. 16Yakunëwan wawan wanuqta rikëta mana munarmi karuman ëwëkur tëkarqan. Tsëmi wawan alläpa waqarqan.

17Ismael waqaqta wiyarnam Teyta Diospa angelnin ciëlupita patsa qayakamur nirqan: <<¿Imanankitaq, Agar? Ama mantsakëtsu. Teyta Diosmi wiyashqa wawëki waqanqanta. 18Wawëkita shoqë y ama jaqitsu. Pëpapis mirëninkuna jatun nación kayänanpaqmi yanapashaq>>.

19Tsëpitanam Agarta Teyta Dios rikätsirqan pukyuchö yaku këkaqta. Tsënam yakuta qara bolsanman winarkur apar wawanta uputsirqan. 20Teyta Dios yanapaptinmi wamra shumaq winarqan. Chusyaqchö täkurmi yachakurqan flëchawan animalkunata alli wanutsita. 21Pëkuna täräyarqan Parán chusyaqchömi. Jövinyäriptinnam mamänin casatsirqan Egiptupita shipashwan.

Abimelecwan Abraham pactuta rurayanqan

22Tsë witsanmi rey Abimelec#Gén. 26.26. soldädunkunapa capitannin Ficolwan ëwayarqan Abraham kaqta pëwan parlayänanpaq. Chëkurnam niyarqan: <<Llapan ruranqëkichö Teyta Dios yanapashunqëkitam käyiyarqü. 23Tsëmi kanan shayämurqü shumaq parlakurinantsikpaq. Teyta Diospa shutinchö änïkamë shumaq rikämanqëkinö tsurïkunata y pëkunapita miraqkunatapis shumaq rikëkunëkipaq, tsënölla këchö täraqkunatapis shumaq rikëkullänëkipaq>>.

24Tsënam Abraham kënö nirqan: <<Diospa shutinchömi äniq nimanqëkinö ruranäpaq>>.

25Kënömi Abimelecta Abraham nirqan: <<Uchkutsikunqä yaku pözutam sirwishuqnikikuna mälas qochiyämashqa>>.

26Tsënam Abimelec nirqan: <<Teyta, kananyaq manam tsëta musyarqütsu, ni manam qampis tsëtaqa willamarqunkitsu. Ni musyätsu mëqan sirwimaqnï tsëta ruranqanta>>.

27Tsënö parlarirnam Abrahamqa Abimelecta qoykurqan üshankuna, chiwankuna y wäkankuna. Tsë junaqmi Abrahamwan Abimelec pactuta rurayarqan imëpis alli pasakuyänanpaq. 28Tsënöllam üshankunapita qanchis masta china achkaskunata Abraham rakirqan. 29Tsënö ruraqta rikarnam Abimelec tapurqan: <<¿Imapaqtaq tsë qanchis china achkaskunata rakirqunki?>>

30Abrahamnam nirqan: <<Kë qanchis china achkaskunata rakirqü chaskimaptiki tsë pözupa duëñun kanqäta pïmëpis musyayänanpaqmi>>.

31Tsëchö pactuta rurayanqanpitam tsë partipa shutin churayarqan Beerseba#21.31 Beerseba ninanqa Juramentu Pözu ninanmi. nir. 32Beersebachö pactuta rurarirnam Abimelecwan Ficol kutikuyarqan filisteo nunakuna täräyanqan partiman. 33Beersebachömi Abraham plantarqan tamarisco montita.#21.33 Tsë montita plantarqan Teyta Dios yanapanqanta yarpänanpaqmi. Tsëchömi imëyaqpis kawaq Teyta Diosta mañakur adorarqan. 34Abrahamqa atska watam filisteo nunakunapa markanchö tärarqan.

Currently Selected:

Génesis 21: qwhB

Highlight

Copy