Génesis 33

Jacob wawqin Esaúwan tinkuyanqan

1Chusku pachak (400) nunakunawan Esaú yëkïkaqta rikarmi tsurinkunata Jacob rakirqan wakinta Leawan ëwayänanpaq, wakintana Raquelwan ëwayänanpaq, wakinta Bilhawan ëwayänanpaq y wakintana Zilpawan ëwayänanpaq. 2Sirwiqnin kaq ishkë warminkunatam wawankunatawan puntata ëwayänanpaq mandarqan. Pëkunapa qepanta ëwayänanpaqnam Leatapis wawantawan mandarqan. Tsëpita mas qepanta ëwayänanpaqnam Raquelta wawan Josétawan mandarqan. 3Jacobnam pëkunapa puntanta jeqarirqan. Wawqinwan tinkunqanyaqmi qanchis kuti qonqurikur qonqurikur ëwarqan. 4Tsënö ëwëkaptinmi wawqin Esaúqa ëqillapa ëwar waqurkur mutsëkurqan. Tsëmi waqunakurkur waqayarqan.

5Warmikunatawan wamrakunata rikärirmi Esaúqa tapurqan: <<¿Pitaq pëkunaqa?>> nir.

Tsënö tapuptinnam Jacob nirqan: <<Teyta Dios qomanqan wamräkunam kayan, tëtë>>.

6Tsëpitanam Jacobpa sirwiqnin kaq ishkan warminkunana wawankunawan witiyarqan. Pëkunapis Esaúta respetarninmi urkunkunapis patsaman chanqanyaq qonqurikuyarqan. 7Tsënöllam Leapis wawankunawan chëkur Esaúpa nöpanman qonqurikuyarqan. Tsëpitanam Raquelpis wawan Joséwan chëkur Esaúpa nöpanman qonqurikuyarqan.

8Esaúnam nirqan: <<Wawqi, ¿imanirtaq purwa purwa rakïkur wätëkikunata qatikätsimunki?>>

Tsënam Jacobqa nirqan: <<Tsëkunaqa qampaqmi, tëtë, noqawan alli kawakunapaq>>.

9Tsëmi Esaú nirqan: <<Wawqi, noqapapis atskam wätäkunaqa kapaman. Qaramänëkipaq kaq kikikipaq katsun>>.

10Tsënam Jacobqa nirqan: <<Tëtë, qaranaqpaq kaqtaqa chaskïkallämë. Chaskimaptikiran musyashaq alli shonqïkiwan kuyamanqëkita. Kanan tinkurirmi rikëkullarquq kikin Teyta Diosta rikëkuq cuenta. 11Qampaq apamunqätaqa ari chaskïkallämë. Teyta Dios yanapamaptinmi imëkayuqpis këkä>>.

Jacob tsënö kutïkuryan rowaptinmi Esaúqa chaskirqan qaranqan wätakunata.

12Chaskirirnam Esaúqa nirqan: <<Ewkushunna. Noqa ëwashaq qamkunapa puntëkikunata>>.

13Jacobnam nirqan: <<Rikanqëkinöpis wamräkunaqa pishillaran kayan y wätäkunapis wawayuqmi këkäyan. Juk junaqllata chätsita munar qatiptïqa utinëllawanchi üshäkuna wanuriyanman. 14Tëtë, mejor puntäkï. Noqaqa wätäkuna wamräkuna päsunllachömi shamushaq hasta täranqëki Seirman chämunqäyaq>>.

15Tsënö niptinmi Esaúpis nirqan: <<Tsënö kaptinqa pushamunqä nunakunata jaqirishaq yanapayäshunëkipaq>>.

Tsënam Jacob nirqan: <<Tëtë, ama afanakïtsu. Alli chaskimanqëkillawannam kushishqa këkä>>.

16Tsëmi Esaúqa tsë junaqlla Seirman kutikurqan. 17Jacobnam ewkurqan Sucotman. Tsëchönam wayinkuna rurarqan y wätankunapaq ramädankunapis. Tsëmi tsë sitiupa shutin churarqan Sucot#33.17 Sucot ninanqa ramäda ninanmi. nir.

18Tsënöpam Padan-arampita kutimur Canaánman yamëlla chäyarqan. Siquem marka wak tsimpanman chëkurmi quedakuyarqan. 19Tsë quedayanqan sitiutam Jacobqa rantirqan juk pachak (100) qellëwan Hamor nunapa tsurinkunapita. Hamorpa juk kaq tsurinpa shutinmi karqan Siquem.#Jos. 24.32; Juan 4.5. 20Tsëchömi altarta Jacob perqarir shutin churarqan El-Elohe-Israel#33.20 El-Elohe-Israel ninanqa Teyta Diosqa Israelpa Diosninmi ninanmi. nir.

Currently Selected:

Génesis 33: qwhB

Highlight

Copy