Génesis 45

Wawqinkuna kanqanta José willanqan

1Judá tsënö willaptinnam Joséqa awantarqannatsu pë wawqinkuna kanqanta willëkïta. Tsëmi sirwiqninkunata nirqan: <<Llapëkikuna këpita yarquyë>>.

Y manam ni mëqan sirwiqninkunapis wawqinkuna kanqanta José willanqan höra tsëchö kayarqantsu.#Hech. 7.13. 2José qaparipa qayaripa waqakïkashqantam Egipto nunakunapis wiyayarqan. Y Faraónpa palaciunchöpis musyariyarqan.

3Tsëpitanam wawqinkunata José nirqan: <<Noqam José kä. ¿Tëtä kawëkanku?>>

Josépa nöpanchö këkäyanqanta musyëkurnam wawqinkunaqa mantsakëwan ni ima nita ni imanö këta puëdiyarqantsu. 4Josénam nirqan: <<Ama mantsayämëtsu. Nöpäman witiyämï>>.

Nöpanman witiriyaptinnam nirqan: <<Noqaqa Egiptuman rantikayämanqëki wawqikikuna Josémi kä. 5Rantikayämanqëkita ama llakikuyëtsu ni tumpanakuyëtsu. Teyta Diosmi puntëkikunata këman kachamashqa nunakuna mallaqëwan mana wanuyänanpaq. 6Ishkë watanam muchï këkan. Y pitsqa wata masran muchï kanqa. Muruyaptinpis manam mikï wayunqatsu. 7Tsënö kananpaq kaptinmi muchïwan mana ushakäyänëkipaq Teyta Dios puntëkikunata këman kachamashqa. Tsënöpam qamkunapis y mirënikikunapis wanuyankitsu. ¿Piraq ichikllapis yarpanman karqan Teyta Dios tsënö permitikanqanta? 8Teyta Dios munaptinmi qamkunaqa rantikayämarqëki. Tsëmi kë nacionman churamashqa Faraónpa käyitsiqnin kanäpaq, wayinta rikänäpaq y llapan Egipto nunakunapa gobernadornin kanäpaq.

9<<Kanan ras tëtantsikman kutïkur willayë: <Tsuriki Josétam Teyta Dios churashqa Egipto nunakunapa gobernadornin kananpaq. Rasllash ëwashun tinkuyänëkipaq. 10Tsëman ëwarqa Gosén partichöshi noqakunawan y willkëkikunawan llapantsik täräshun. Tsëmanshi wätantsikkunata y llapan imantsikkunatapis apanki. Tsënöpash wanukunqëkiyaq José rikäshunki. 11Tsë nacionchö yanapamashqash mikïnintsikpis y imantsikpis pishinqatsu. Pitsqa wataraqshi muchï kanqa>.

12<<Tsënö niyashqaqtaqa wawqï Benjamínwan llapëkim wiyëkäyanki. 13Tëtantsikta willayanki kë Egiptuchö llapanpis respetayämashqanta. Y willayanki këchö llapan rikäyanqëkikunatapis. Tsëmi ras ëwar tëtantsikta pushayämï>>.

14Joséwan Benjamínnam waqunakurkur waqakïkuyarqan. 15Tsënöllam wakin wawqinkunatapis waqurkur mutsar José waqarqan. Tsëpitaqa mana mantsashpanam Joséta wawqinkuna parlapäyarqan.

Egiptuchö täränanpaq Jacobta Faraón qayatsinqan

16Josépa wawqinkuna chäyanqanta musyarirnam mandakur yanapaq nunakunawan Faraónpis kushikuyarqan. 17Tsënam Joséta Faraón nirqan: <<Wawqikikuna ashnunkunata cargapakurkur Canaánman kutiyätsun. 18Tëtëkita llapan castankunatawan këman pushayämutsun. Chäyämuptinnam allin kaq partita tsëchö täräyänanpaq rikätsishaq. Y kë nacionchö allin kaq mikïtam mikuyanqa. 19Tsënölla këpita carrëtakunata apar warmikunata, wamrakunata y tëtëkita apayämutsun. 20Imankunatapis apamïta mana puëdirqa mana llakishpa jaqirayämutsun. Egiptuchö mas allin kaqkunatam chaskiyanqa>>.

21Israelpa#45.21 Israelqa Jacobpa juk kaq shutinmi këkan. tsurinkunaqa José ninqannöllam llapanta rurayarqan. Faraón ninqannöllam carrëtakunata José apatsirqan. Y nänichö mikuyänanpaqpis mirkapankunam ruratsirqan. 22Tsëpitanam mushuq ratashkunata pëkunata qararqan. Benjamíntanam kima pachak (300) siclo qellëta y pitsqa mushuq ratashta qarëkurqan. 23Tëtanpaqnam chunka orqu ashnukunawan Egiptuchö imëkapis mas allin kaqkunata apatsirqan. Tsënöllam apatsirqan chunka china ashnukunawan trïguta, tantata y wakin mikïkunatapis Egiptuman ëwarnin mikuyänanpaq. 24Wawqinkunata despacharnam José nirqan: <<Paqtam piñapänakur ëwëkäyankiman>>.

Tsënö käyiratsiptinnam jeqariyarqan.

25Egiptupita kutirnam tëtankuna Jacob täkushqan Canaánman chäriyarqan. 26José kawëkanqanta y Egiptuchö mandakuq këkanqanta willayaptinnam Jacob mana creyir ni imanö këtapis puëdirqantsu. 27José llapan ninqanta willayaptinmi y apayänanpaq carrëtakunata rikëkurmi alläpa kushïkurqan. 28Tsëmi nirqan: <<¡Kananqa tsurï José kawëkanqantam musyarï! ¡Manaraq wanukur ëwä rikëkamushaq!>>

Currently Selected:

Génesis 45: qwhB

Highlight

Copy