Juan 5

Purita mana puëdiq nunata Betesda kitachö Jesús kachakätsinqan

1Tsëpitanam Israel nunakunapa juk fiestan Jerusalénchö kaptin Jesúspis tsëman ëwarqan. 2Jerusalénman yëkunachömi Üsha Punku niyashqanchö jatusaq kita këkan. Hebreo idiömachö tsë kitapa shutinmi Betesda#5.2 Wakin traduccionkunachöqa Betzata niyanmi.. Lädunkunapam pitsqa alarkuna këkäyan. 3Tsë alarkunachömi jitaräkïkäyarqan atskaq qeshyaqkuna, wiskukuna, weqrukuna y purita mana puëdiqkunapis. [Pëkunam shuyarëkäyarqan yaku kuyuqta. 4Tsëchömi ciëlupita ángel unëllatayan urämur yakuta kuyutsiq. Yakuta kuyurkatsiptinnam mëqan qeshyaqpis puntata yakuman yëkuq kaqqa kachakashqana yarqaramuq.]

5Tsëchömi juk nuna kima chunka puwaq (38) watana qeshyar jitarëkarqan. 6Tsë nuna unëpitana qeshyashqanta musyarmi Jesús tapurqan: <<¿Kachakëta munankiku?>> nir.

7Qeshyaqnam nirqan: <<Awmi tëtë, kachakëtam munallä. Manam pïnïpis kantsu yakuta ángel kuyurkatsiptin kitaman yëkatsimänanpaq. Nakakïkällaptïmi jukna llalliraman>>.

8Jesúsnam nirqan: <<¡Sharkï! Kirmëkita aparkur ewkï>>.

9Tsëmi tsë höra kachakärir kirmanta aparkur kushishqa ewkurqan. Tsë junaqqa jamakï junaqmi karqan. 10Tsë kachakashqa nunata rikarnam Israel autoridäkuna kënö niyarqan: <<Jamakï junaq këkaptin ¿imanirtaq kirmëki aparishqa purikïkanki?>>#Neh. 13.19; Jer. 17.21.

11Pënam nirqan: <<Kachakätsimaqnïmi nimashqa: <Kirmëkita aparkur ewkï> >>.

12Tsëmi kënö tapukurkuyarqan: <<¿Pitaq tsënö nishurqunki?>>

13Tapukuyaptinpis kita kaqpita Jesús ewkushqana kaptinmi rikätsinanpaq tarirqannatsu.

14Tsëpitanam templupa patiunchö tsë kachakätsishqan nunawan Jesús tinkurir kënö nirqan: <<Kachakashqana këkarqa amana jutsata rurankinatsu. Paqtam mas peor imapis pasashunkiman>>.

15Tsëpitanam tsë nunaqa Israel autoridäkunaman ëwëkur Jesús kachakätsishqanta willarqan.

Diospa Tsurin kanqanta Jesús ninqan

16Jamakï junaqchö kachakätsishqanpitam Israel autoridäkuna Jesúspa contran shärir [wanutsiyänanpaq] ashiyarqan. 17Tsëpitanam pëkunawan tinkur Jesús kënö nirqan: <<Jamakï junaq kaptinpis Teytä uryanmi. Tsënöllam noqapis uryëkä>>.

18Tsënö niptinmi Israel autoridäkuna Jesústa wanutsita munayarqan. Manam jamakï junaqchö nunata kachakätsishqanllapitatsu wanutsita munayarqan, sinöqa <<Diosmi Teytä>> niptin Dios tukunqanta yarparmi.#Juan 10.30-38.

19Jesúsnam nirqan: <<Rasunpam rasunpam niyaq: Teyta Diospa Tsurin karmi Teytä llapan rurashqanta noqapis rurëkä. Manam kikïpa munënïlläpitatsu imatapis rurä, sinöqa Teytä rurashqanta rikashqällatam rurä. 20Teytä kuyamarmi llapan rurashqankunatapis rikätsiman. Mas wakinkunata ruranäpaqpis käyitsimanqam. Tsëta rikarnäqa masran espantakuyanki. 21Tsënö espantakuyanki wanushqakunata Teytä kawëta qoshqannö noqapis munashqä kaqkunata kawëta qoptïmi.

22<<Tsënöllam Teytätsu pitapis juzganqa, sinöqa noqatam Tsurin kaptï pitapis juzganäpaq churamashqa. 23Tsënö churamashqa kikinta adorayashqannölla noqatapis llapan nunakuna adorayämänanpaqmi. Tsëmi noqata mana adoramaq kaqqa Teytätapis adorëkantsu.

24<<Rasunpam rasunpam niyaq: Willakushqäta wiyar kachamaqnï Teytäman markäkuqkunaqa wiñë kawëtam tariyashqa. Pëkunaqa manam infiernuman jitashqatsu kayanqa, sinöqa wanushqanö kayashqanpitam mushuq kawëtana tariyashqa.

25<<Rasunpam rasunpam niyaq: Tiempu chämushqanam wanushqanö kaqkuna Diospa Tsurin willakushqanta wiyayänanpaq. Willakushqanta chaskikuqkunaqa wiñë kawëtam tariyanqa. 26Tsënö kananpaqmi Teyta Dios poderninta Tsurinta qoshqa. Tsëmi nunakunata kawëta qonanpaq Teyta Dios puëdiq kashqannö Tsurinpis puëdiq këkan. 27Tsënöllam Nunapa Tsurin kaptin nunakunata juzgananpaqpis Teyta Dios poderninta qoshqa.

28<< <¿Imanöraq tsë kanqa?> nir ama yarpakachäyëtsu. Tiempu chämunqam llapan wanushqakuna Diospa Tsurinpa shiminta wiyayänanpaq. 29Allita ruraqkunaqa kawarirkamurmi wiñëpa kawayanqa. Mana allita ruraqkunaqa kawarimurpis infiernuman jitëkushqam kayanqa.#Dan. 12.2. 30Manam kikïpa munënïlläpitatsu juzgashaq, sinöqa kachamaq [Teytä] munashqannömi juzgashaq.

Teyta Dios kachamunqanta Jesús käyitsinqan

31<< <Teyta Diosmi kachamashqa> nir kikïpa munënïllapita niyaptiqqa manam creyiyämankimantsu. 32Manam kikïllatsu musyatsiyaq, sinöqa kikin Teyta Diospis noqapita musyëkätsiyäshunkim. Pë musyatsiyäshunqëkiqa llapanpis rasun kaqllam.

33<<Bautizakuq Juanman tapukuq kachayaptiki pëpis noqapita rasun kaqtam willayäshurqëki.#Juan 1.19-27; 3.27-30. 34Manam pï nuna willamaptinraqtsu Teyta Dios kachamashqanta musyä, sinöqa Teytä musyatsimaptinmi musyä. Tsëmi noqapita Juan willakushqanta yarpëkätsiyaq Teyta Dios kachamashqanta creyir salvakuyänëkipaq. 35Juanqa imëka rupëkaq chiwchinömi karqan. Willakushqanta wiyarmi juk rätulla kushikuyarqëki.

36<<Teyta Dios kachamashqantaqa manam Juan willakushqanta wiyarllatsu nunakuna käyikäyan, sinöqa milagru rurashqäkunata rikar y yachatsikushqäkunata wiyarmi käyikäyan. Y llapantapis rurëkä Teytä nimashqanllatam. 37Tsënöpam kikin Teyta Dios mana parlapäyäshurnikipis y mana yuripuyäshurnikipis noqata kachamashqanta musyëkätsiyäshunki. 38Tsënö musyëkätsiyäshuptikipis noqata mana chaskimarqa Teyta Diospa palabrantapis manam chaskiyankitsu.

Nunakuna mana chaskiyanqanta Jesús parlanqan

39<<Qamkunaqa wiñë kawëta tariyänëkipaq kashqanta yarparmi Teyta Diospa palabranta leyir yachakïkäyanki. Tsënö yachakurpis manam musyayankitsu tsë qellqarëkaqkuna noqapaq parlëkashqanta.#5.39 O Teyta Diospa palabranchö wiñë kawëta tariyänëkipaq kashqanta yarparqa pëpa palabranta yachakuyë. Pëpa palabranqa noqapaqmi qellqarëkan. 40Tsënö parlëkaptinpis manam chaskiyämankitsu. Chaskimarnïqa wiñë kawëtam tariyankiman.

41<<Noqaqa manam qamkuna alabayämänëkita munätsu. 42Musyämi Teyta Diosta rasunpa mana kuyayashqëkita. 43Teytäpa shutinchö shamushqa kaptïpis chaskimëta manam munayankitsu. Kikinpa munëninllapita shamuqkunataqa rasmi chaskiriyanki. 44Qamkunaqa alläpam yarpakachëkäyanki nuna mayikikunawan alli kawayänëkillapaq. Manam Teyta Dioswan alli kawayänëkipaqqa yarpakachäyankitsu. Tsënö këkarqa ¿imanöpataq creyiyämankiman?

45<<Ama yarpäyëtsu Teyta Diospa nöpanchö shimpiyänaqpaq kashqanta. Markäkuyanqëki Moisésmi shimpiyäshunkiqa. 46Moisés qellqashqankunaqa noqapaqmi parlëkan. Tsëmi pë qellqashqankunata creyirqa noqa nishqäkunatapis creyiyankiman. 47Pë qellqashqankunata mana creyirmi noqa nishqäkunatapis creyiyankitsu>>.

Currently Selected:

Juan 5: qwhB

Highlight

Copy