Juan 9

Wisku nunata Jesús kachakätsinqan

1Jerusalénchö Jesús purikarmi rikarqan yurikushqanpita patsa wisku nunata. 2Tsëmi discïpulunkuna tapuyarqan: <<Rabí, ¿imanirtaq kë nuna wisku yurikushqa? ¿Kikinpa jutsanpitaku o mamäninpa y tëtanpa jutsanpitaku?>>

3Jesúsnam kënö nirqan: <<Manam kikinpa ni mamäninpa ni tëtanpa jutsanpitatsu kë nuna wisku yurikushqa, sinöqa Teyta Dios kachakätsishqanta nunakuna musyayänanpaqmi. 4Junaq kashqanyaq kachamaqnïpa munënintam rurashun#9.4a Wakin griego copiakunachömi rurashaq niyan.. Paqaspaqa manam pipis uryëta puëdinnatsu.#9.4b Junaq kashqanyaq nirqa kë patsachö kashqäyaq nirqanmi. Paqaspaq parlarqa wanïninpaqmi parlarqan. Tsënöpam Jesucristo nirqan kë patsachö kashqanyaq Teyta Dios llapan munashqanta cumplinanpaq kanqanta. 5Kë patsachö kashqäyaqqa aktsim këkä>>.#9.5 Aktsi kashqanta nirqa nunakunata salvaq kashqanta y Dios munashqannö kawananpaq käyitsiq kashqantam Jesús nirqan.#Sal. 27.1; 119.105; Prov. 6.23; Isa. 49.6; Juan 8.12.

6Tsënö nirmi toqaninwan leqitata rurarir tsë wisku nunapa ishkan nawinman Jesús laqarapurqan. 7Tsëpitanam nirqan: <<Siloé kitaman ëwar paqakamï>>.

(Siloéqa kachamushqa ninanmi.)

Jesús nishqannö paqakurirmi kutirirqan rikëkarna. 8Tsëmi vecïnunkuna y pëta reqiqkuna niyarqan: <<¿Manaku kë nunaqa limushnata mañakuq wisku?>>

9Wakinnam niyarqan: <<Awmi, pëmi>>.

Wakinnam niyarqan: <<Manam pëtsu, sinöqa pë niraqmi>>.

Tsënö niyaptinmi kikin kënö nirqan: <<Noqam tsë nuna kä>>.

10Tsëmi tapuyarqan: <<¿Imanöpataq nawiki kachakarqun?>>

11Pënam nirqan: <<Jesús shutiyuq nunam leqitata rurarir nawïta laqëkamushqa. Nïkurnam kachamashqa Siloé kitaman paqakunäpaq. Nimanqannö paqakurirmi kananqa rikëkäna>>.

12Tsëmi tapuyarqan: <<¿Mëchötaq këkan tsë kachakätsishuqniki nuna?>>

Pënam nirqan: <<Manam musyätsu>>.

Kachakashqa nunata fariseukuna tapuyanqan

13Tsëpitanam wisku kashqanpita kachakashqa nunata fariseukunaman pushayarqan. 14Leqitata rurëkur Jesús kachakätsishqan junaqqa jamakï junaqmi karqan. 15Tsëmi imanöpa kachakashqantapis fariseukuna tapuyarqan. Tapuyaptinmi nirqan: <<Juk nunam nawïta leqitawan laqamushqa. Paqakurirnam kananqa rikëkäna>>.

16Tsëmi wakin fariseukuna kënö niyarqan: <<Tsë nunaqa manam Teyta Dios kachamushqan nunatsu. Teyta Dios kachamushqan karqa jamakï junaqta respetanmanmi>>.

Wakin fariseukunanam niyarqan: <<Yarpäyashqëkinö jutsayuq karqa ¿imanöpataq kachakätsinman?>>

Tsënö nirmi kikinpura piñatsinakuyarqan.

17Tsëmi kachakashqa nunata yapë tapuyarqan: <<Tsë kachakätsishuqniki nuna ¿pï kashqantataq qam yarpanki?>>

Pënam nirqan: <<Pëqa profëtam>>.

18Tsënö niptinmi Israel nunakunapa autoridäninkuna tsë nuna wisku kashqanta creyiyarqantsu. Tsëmi mamäninta y tëtanta qayëkatsimur 19tapuyarqan: <<¿Kë nuna tsurikiku? ¿Rasunpaku wisku yurikurqan? ¿Imanöpataq kachakashqa?>>

20Tëtanwan mamäninnam niyarqan: <<Awmi, wamrämi. Rasunpam yurikushqanpita patsa wisku kashqa. 21Tsënö kaptinpis manam musyayätsu imanöpa kachakashqantapis ni pï kachakätsishqantapis. Pëqa awkis nunanam. Kikinta tapuyë>>.

22Tsënö niyarqan autoridäkunata mantsarmi. Autoridäkunaqa willanakuyashqanam këkäyarqan mëqanpis <<Jesúsqa Teyta Dios kachamushqan Cristum>> niq kaqtaqa sinagögapita qarquyänanpaq.#9.22 Sinagögapita autoridäkuna pitapis qarquyaq imëpis manana kutinanpaqmi. Tsëmi manana kutiqnatsu Teyta Diosta adorananpaq ni nunakuna sesionta ruraptin parlananpaqpis. 23Tsëta mantsakurmi mamänin tëtan niyarqan: <<Pëqa awkis nunanam. Kikinta tapuyë>>.

24Tsëmi wisku kashqanpita kachakashqa nunata autoridäkuna yapë qayëkatsir tapuyarqan: <<Teyta Diospa nöpanchömi niyaq. Rasun kaqta willayämë. Musyayämi tsë kachakätsishuqniki nuna jutsasapa kashqanta>>.

25Tsë nunanam nirqan: <<Noqa manam musyätsu jutsasapa kashqanta o jutsannaq kashqanta. Imatam musyäqa: wisku kashqäpita allina rikashqätam>>.

26Tsënö niptinmi yapë kënö tapuyarqan: <<¿Imatataq rurashqa nawiki kachakänanpaq?>>

27Niyaptinmi nirqan: <<Willayarquqnataq. Willayaptiqpis manam creyiyämankitsu. ¿Imanirtaq yapë tapuyämanki? ¿Qamkunapis pëpa discïpulun këtaku munëkäyanki?>>

28Tsënö niptinmi piñar niyarqan: <<Qamchi pëpa discïpulunqa këkanki. Noqakunaqa Moiséspa discïpulunkunam kayä. 29Musyayämi Moisésta Teyta Dios parlapashqanta. Tsë kachakätsishuqniki nunapaqqa ni mëpita shamushqantapis manam musyayätsu>>.

30Tsënö niyaptinmi nirqan: <<Tsë nuna nawïta kachakëkätsimuptinqa ¿imanirtaq käyiyankitsu Teyta Diospita shamushqanta? 31Musyantsikmi jutsasapakunataqa Teyta Dios mana wiyashqanta. Pëta mantsakur munashqannö kawaqkunataqa yanapanmi.#Prov. 15.29. 32Manam imëpis wiyarquntsiktsu yurikushqanpita patsa wisku nunata pipis kachakätsishqanta. 33Tsë nuna Teyta Diospita mana shamushqa karqa manam ima milagrutapis ruranmantsu>>.

34Autoridäkunanam niyarqan: <<¡Qamqa yurikurqunki alläpa jutsayuqmi! ¿Tsënö këkarchi noqakunata yachatsiyämëtaraq munëkanki?>>

Tsënö nishpam sinagögapita tsë nunata qarquyarqan.

Jesústa mana chaskikur wiskunö kayanqan

35Tsë kachakätsishqan nunata sinagögapita qarquyashqantam Jesús musyarirqan. Tsënam tsë nunawan tinkurir nirqan: <<¿Nunapa Tsurinman#9.35 Wakin griego copiakunachömi Teyta Diospa Tsurinman niyan. creyinkiku?>>

36Niptinmi nirqan: <<Tëtë, ¿pitaq tsë nuna? Willëkallämë pëman creyinäpaq>>.

37Jesúsnam nirqan: <<Pëta rikarqunkinam. Tsë nunaqa noqam kä>>.

38Tsënö niptinmi Jesústa adorar nirqan: <<Teyta, qamman markäkullämi>>.

39Jesúsnam nirqan: <<Noqam kë patsaman nunakunata juzganäpaq shamurqü. Juzgaptïmi wiskukuna rikäyanqa y rikaqkunanam wiskuyäyanqa#9.39 Tsënö nirmi Jesús nirqan: Juzgaptïmi mana käyiqkuna käyiyanqa y yachaqkunanam käyiyanqatsu.>>.#Isa. 6.10; 42.19; Mar. 4.12; Juan 12.40.

40Tsënö nishqanta wiyarmi tsëchö këkaq wakin fariseukuna kënö niyarqan: <<Tsëpinqa ¿noqakunapis wiskuchi këkäyä?>>

41Jesúsnam nirqan: <<Wisku karqa manam jutsayuqtsu kayankiman. <Rikäyämi> nirmi jutsayuq këkäyanki>>.#9.41 Fariseukuna yachaq këkarqa käyiyanmanmi karqan Jesústa Teyta Dios kachamushqanta. Mana käyirmi jutsayuq kayarqan. Tsëmi yachaq këkarpis mana creyiyaptin wisku nunaman Jesucristo iwalatsirqan.

Currently Selected:

Juan 9: qwhB

Highlight

Copy