Lucas 8
8
Jesústa yanapaq warmikuna
1Tsëpitanam chunka ishkë discïpulunkunawan markan markan Jesús purir Teyta Diospa mandakïninpa alli willakïninta willakurqan. 2Pëkunawanmi ëwayarqan supëyuq kayanqanpita y qeshyayanqanpita kachakätsishqan warmikunapis. Jukninmi karqan Magdalena niyashqan María. Pëpitam qanchis supëkunata Jesús qarqushqa karqan. 3Tsënöllam ëwayarqan Herodespa mayuralnin Chuzapa warmin Juana, Susana y mas warmikunapis. Pëkunam Jesústa y discïpulunkunata kayäpunqankunawan yanapayarqan.
Diospa willakïninta muruman Jesús iwalatsinqan
Mateo 13.1-9; Marcos 4.1-9
4Jinantinpita atskaq nunakuna ëllukäyaptinmi Jesús kënö yachatsirqan: 5<<Juk nunash trïgu muruq ëwanaq. Muruta ramaptinshi näniman wakin pintiyänaq. Tsëtash jalukuyänaq y pishqukunanash upshakurkuyänaq. 6Wakin murunash ranraman pintiyänaq. Tsëchö jeqaramurpis allpa mana kaptinshi tsakirinaq. 7Wakin murunash kashakuna rurinman pintiyänaq. Jeqaramuptinnash kashakuna nitiriptin qarwashyar wanuriyänaq. 8Wakin murunash alli allpaman ishkiyänaq. Tsëkunaqa jeqaramur winarshi cada espïgachö juk pachak (100) trïguta wayunaq>>.
Tsënö yachatsikurirmi Jesús qaparipa kënö nirqan: <<¡Rinriyuq kaqkunaqa nishqäkunata wiyakuyë!>>
Iwalatsikïwan imanir Jesús yachatsinqan
Mateo 13.10-15; Marcos 4.10-12
9Discïpulunkunanam Jesústa kënö tapuyarqan: <<Tëtë, ¿ima ninantaq tsë iwalatsikïpa yachatsikushqëki?>>
10Jesúsnam kënö nirqan: <<Qamkunataqa Teyta Diospa mandakïnin imanö kashqantapis shumaqmi käyitsiyashqëki. Qamkunata käyitsirpis wakinkunataqa imawanpis iwalatsikïpam willapëkä. Tsëmi rikëkarpis cuentata qokuyantsu y wiyëkarpis käyiyantsu>>.#Isa. 6.9-10.
Muruman iwalatsikïpa yachatsinqanta Jesús käyitsinqan
Mateo 13.18-23; Marcos 4.13-20
11<<Iwalatsikïpa yachatsikunqäta kanan käyitsiyashqëki. Muruqa Teyta Diospa willakïninmi.
12<<Wakin nunakunaqa chukru näniman murushqanömi kayan. Teyta Diospa willakïninta wiyayaptinpis diablu shamurmi wiyayashqantapis qonqaratsin. Tsëmi mana creyikur salvakuyantsu.
13<<Wakin nunakunaqa ranra chakraman murushqanömi kayan. Tsëmi Teyta Diospa willakïninta wiyar kushishqa chaskikurpis mana alli sipiyuq#8.13 Wakin nunakunaqa watsiyuq o jawayuq niyanmi. plantanö kar desgraciakuna pasayaptin markäkïninta jaqiriyan.
14<<Wakin nunakunaqa kasha kasha chakraman murushqanömi kayan. Tsëmi Diospa willakïninta wiyarirpis yarpakachäyan kë vïdachö imanöpis kawayänanllapaq, kapuqyuq kayänanpaq y kushikïllachö kawakïllapaq. Tsënö karmi mana wayuq trïgunö këkäyan.
15<<Wakin nunakunaqa alli allpaman murushqanömi kayan. Tsëmi Teyta Diospa willakïninta alli shonqunkunawan wiyar Teyta Dios munashqannö kawayan. Alli allpachö muru winamur alli wayushqannömi imëpis kawakuyan>>.
Willakïninta aktsiman Jesús iwalatsinqan
Marcos 4.21-25
16<<Manam pipis chiwchita sendirkur manka rurinman ni catripa rurinman churantsu, sinöqa alërumanmi churan wayiman yëkuqkuna rikäyänanpaq.#Mat. 5.15; Mar. 4.21. 17Tsënömi yachatsishqäkuna kanan pakarëkaqnö karpis musyakanqa. Kanan mana käyirpis warëkunaqa käyiyanqam.#Mar. 4.22. 18Tsëmi alliq wiyayämë. Yachatsishqäta cäsukuqkunaqa masmi käyiyanqa. Mana cäsukuqkunaqa ichiklla käyiyashqanllatapis qonqëkuyanqam>>.#Mat. 13.12; 25.29; Mar. 4.25.
Jesúspa mamänin y wawqinkuna pikuna kayanqan
Mateo 12.46-50; Marcos 3.31-35
19Tsëpitanam Jesúspa mamänin y wawqinkuna chäriyarqan Jesús këkashqan wayiman. Atska nuna kayaptinmi yëkïta puëdiyarqantsu. 20Tsëmi Jesústa juk nuna kënö willarqan: <<Mamëki y wawqikikunam waqtachö shuyëkäyäshunki>>.
21Jesúsnam nirqan: <<Pipis Teyta Diospa willakïninta wiyar cäsukuq kaqmi mamänïqa y wawqïkunaqa kayan>>.
Vientuwan qocha laqchiqsaqta Jesús päratsinqan
Mateo 8.23-27; Marcos 4.35-41
22Juk junaqnam discïpulunkunawan barcuman Jesús lloqarir nirqan: <<Wak tsimpaman pasashun>>.
Tsënö niptinnam barcuwan jeqariyarqan. 23Ëwarëkäyaptinnam Jesús punukärirqan. Tsëyaqmi alläpa vientuwan yaku laqchiqsar barcuta hundikätsinanpaqna këkarqan. 24Tsënam Jesústa riyatsir niyarqan: <<¡Rabí, rabí! ¡Hundikëkantsiknam!>>
Tsënam Jesús sharkur vientuta y yakuta piñaparqan. Piñapaptinmi vientupis yakupis pärarirqan. 25Tsëpitanam discïpulunkunata nirqan: <<¿Imanirtaq markäkïnikikuna kantsu?>>
Tsëmi kikinkunapura mantsakashqa ninakuyarqan: <<¡Pitaq kë nunaqa yakupis vientupis tsënö cäsunanpaqqa!>>
Juk nunapita supëkunata Jesús qarqunqan
Mateo 8.28-34; Marcos 5.1-20
26Tsëpitanam Gerasa#8.26 Wakin griego copiakunachömi Gadara niyan. Wakinnam Gergesa niyan. niyashqan partiman chäriyarqan. Tsëqa këkan Galileapa wak tsimpanchömi. 27Barcupita Jesús yarpuriptinnam supëkuna löcuyätsiyashqan nuna shamurqan. Tsë nunam unëna qalapächu purikurqan. Y wayichö mana tärashpam panteonkunallachö tärarqan. 28Jesústa rikëkurmi feyupa qaparir nöpanman lätëkur qaparipa kënö nirqan: <<¡Puëdiq Diospa Tsurin Jesús! ¡Imatataq noqawan munanki! ¡Ama jipatsillämëtsu!>>
29(Tsënö supë nirqan nunapita yarqunanpaq Jesús nishqa kaptinmi. Tsë nunataqa unëpitam supë munashqanta ruratsirqan. Tsëmi cadënakunawan chakinta makinta pankayaptinpis rachikacharkur chusyaq jirkakunapa ewkuq.)
30Tsëpitanam Jesús tapurqan: <<¿Imataq shutiki?>> nir.
Pënam nirqan: <<Legión>>.#8.30 Legión ninanqa atska waranqa ninanmi.
(Tsënö nirqan atska supëkuna pëchö kaptinmi.)
31Tsë supëkunam Jesústa yapëkuryan rowakuyarqan alläpa tutapaqman mana qarpunanpaq. 32Tsë jirkachömi atska kuchikunata mitsikäyarqan. Tsëmi supëkuna Jesústa rowayarqan kuchikunaman yëkuyänanpaq. Rowayanqanta Jesús äniriptinmi 33supëkuna nunapita yarqurir tsë kuchikunaman yëkukïkuyarqan. Tsëmi kuchikuna löcuyar ladërapa ëqir qochaman jeqakurkuyarqan. Tsëchömi shenqakëpa wanuyarqan.
34Tsëta rikëkurmi kuchi mitsiqkuna ëqillapa ëwar jinan markachö y estanciankunapa willakuyarqan. 35Tsënam nunakuna shayämurqan: <<Mä ¿imash pasakushqa?>> nirnin. Jesús kaqman chärirnam tariyarqan supëyuq nunata ratashnin yakashqa juiciunchöna Jesúspa lädunchö tëkaqta. Tsëta rikëkurmi alläpa mantsakäkuyarqan.
36Jesús kachakätsishqanta rikaqkunanam tsëman chaqkunata willayarqan imanö kachakätsishqantapis. 37Tsënam tsë partichö täraq nunakuna alläpa mantsakur Jesústa rowayarqan tsëpita ewkunanpaq. Tsënö rowayaptinnam barcuman lloqarkur discïpulunkunawan Jesús ewkurqan.
38Manaraq ewkuyaptinmi kachakaq nuna Jesústa rowarqan pëwan ewkunanpaq. Jesúsnam nirqan: 39<<Wayikipa kutir Teyta Dios kachakätsishushqëkita willakunki>>.
Tsënam ëwar pïmëtapis willaparqan Jesús kachakätsishqanta.
Jairupa tsurinta kawaritsinqan y warmita kachakätsinqan
Mateo 9.18-26; Marcos 5.21-43
40Qocha wak tsimpanman Jesús kutiptinmi shuyarëkaq atska nunakuna kushishqa chaskiyarqan. 41Tsëmanmi sinagögachö mandakuq Jairo shutiyuq nuna chärirqan. Pëmi Jesúspa nöpanman qonqurikur rowarqan wamranta kachakätsiq wayinman ëwananpaq. 42Tsë wamranqa chunka ishkë watayuqnö jukllëlla warmi tsurinmi karqan. Pëmi pasëpa lástima qeshyar wanukïkarqan.
Jairupa wayinman Jesús ëwëkaptinmi atskaq nunakuna kichkinakurraq qatiyarqan. 43Tsë nunakunawanmi chunka ishkë watana yawar ëwëwan qeshyakuq warmipis ëwëkarqan. [Tsë warmim imëkantapis rantikur usharqan jampikunanpaq. Tsënö kaptinpis] manam pï jampikuqpis kachakätsirqantsu. 44Tsë warmim Jesúspa qepanllapa yëkurir mantunpa kuchunta yatëkurqan. Yatëkunqan höram yawar ëwënin pärarirqan. 45Jesúsnam tapukurqan: <<¿Pitaq yatamarqun?>> nishpa.
Llapan nunakuna: <<Manam noqatsu>> niyaptinnam Pedro nirqan: <<Ay tëtë, këläya nunachöqa juknin juknintaq tanqayäshunki. [¿Imanöparaq musyayäman mëqan yatëkushushqëkitapis?]>>
46Jesúsnam nirqan: <<Ari pï karpis yatamashqam. Podernï yarquqtam mäkurqü>>.
47Yatashqanta mäkuriptinnam tsë warmi mantsakashqa karkaryëkar Jesúspa nöpanman qonqurikïkurqan. Y llapan nunakunapa nöpanchö willarqan imanir yatashqanta y jina höra kachakärishqanta. 48Jesúsnam nirqan: <<Markäkamushqëkipitam kachakärirqunki. Kananqa kushishqana ewkï>>.
49Jesús tsënö parlëkaptinmi Jairupa wayinpita willakuq taripëkur nirqan: <<Tëtë, tsurikiqa wanurishqanam. Amana Jesústa afanënatsu>>.
50Tsënö niqta wiyëkurmi Jesús kënö nirqan: <<Ama llakikïtsu. Teyta Diosman markäkï. Wamrëkiqa kawarimunqam>>.
51Wayiman chärirnam Pedruta, Juanta, Santiaguta y wamrapa tëtanta y mamäninllata Jesús yëkatsirqan. Manam wakinkuna yëkuyänantaqa munarqantsu. 52Wamrapaqnam waqtachö qaparipa qayaripa waqakïkäyarqan. Tsënam Jesús nirqan: <<Ama waqayëtsu. Wamraqa punïkanllam. Manam wanushqatsu>>.
53Tsënö niptinmi wamra wanushqanta musyarnin Jesústa asipäyarqan. 54Jesúsnam makinpita tsarirkurnin wamrata kënö nirqan: <<Wamra, sharkï>>.
55Tsënö niptinnam jina höra kawarir sharkaramurqan. Jesúsnam nirqan: <<Kë wamrata pachan qarayë>>.
56Wamran kawarimushqanta rikëkurnam tëtan mamänin espantakuyarqan. Jesúsnam atikarqan wamra kawarimushqanta pitapis mana willakuyänanpaq.
Currently Selected:
Lucas 8: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
Lucas 8
8
Jesústa yanapaq warmikuna
1Tsëpitanam chunka ishkë discïpulunkunawan markan markan Jesús purir Teyta Diospa mandakïninpa alli willakïninta willakurqan. 2Pëkunawanmi ëwayarqan supëyuq kayanqanpita y qeshyayanqanpita kachakätsishqan warmikunapis. Jukninmi karqan Magdalena niyashqan María. Pëpitam qanchis supëkunata Jesús qarqushqa karqan. 3Tsënöllam ëwayarqan Herodespa mayuralnin Chuzapa warmin Juana, Susana y mas warmikunapis. Pëkunam Jesústa y discïpulunkunata kayäpunqankunawan yanapayarqan.
Diospa willakïninta muruman Jesús iwalatsinqan
Mateo 13.1-9; Marcos 4.1-9
4Jinantinpita atskaq nunakuna ëllukäyaptinmi Jesús kënö yachatsirqan: 5<<Juk nunash trïgu muruq ëwanaq. Muruta ramaptinshi näniman wakin pintiyänaq. Tsëtash jalukuyänaq y pishqukunanash upshakurkuyänaq. 6Wakin murunash ranraman pintiyänaq. Tsëchö jeqaramurpis allpa mana kaptinshi tsakirinaq. 7Wakin murunash kashakuna rurinman pintiyänaq. Jeqaramuptinnash kashakuna nitiriptin qarwashyar wanuriyänaq. 8Wakin murunash alli allpaman ishkiyänaq. Tsëkunaqa jeqaramur winarshi cada espïgachö juk pachak (100) trïguta wayunaq>>.
Tsënö yachatsikurirmi Jesús qaparipa kënö nirqan: <<¡Rinriyuq kaqkunaqa nishqäkunata wiyakuyë!>>
Iwalatsikïwan imanir Jesús yachatsinqan
Mateo 13.10-15; Marcos 4.10-12
9Discïpulunkunanam Jesústa kënö tapuyarqan: <<Tëtë, ¿ima ninantaq tsë iwalatsikïpa yachatsikushqëki?>>
10Jesúsnam kënö nirqan: <<Qamkunataqa Teyta Diospa mandakïnin imanö kashqantapis shumaqmi käyitsiyashqëki. Qamkunata käyitsirpis wakinkunataqa imawanpis iwalatsikïpam willapëkä. Tsëmi rikëkarpis cuentata qokuyantsu y wiyëkarpis käyiyantsu>>.#Isa. 6.9-10.
Muruman iwalatsikïpa yachatsinqanta Jesús käyitsinqan
Mateo 13.18-23; Marcos 4.13-20
11<<Iwalatsikïpa yachatsikunqäta kanan käyitsiyashqëki. Muruqa Teyta Diospa willakïninmi.
12<<Wakin nunakunaqa chukru näniman murushqanömi kayan. Teyta Diospa willakïninta wiyayaptinpis diablu shamurmi wiyayashqantapis qonqaratsin. Tsëmi mana creyikur salvakuyantsu.
13<<Wakin nunakunaqa ranra chakraman murushqanömi kayan. Tsëmi Teyta Diospa willakïninta wiyar kushishqa chaskikurpis mana alli sipiyuq#8.13 Wakin nunakunaqa watsiyuq o jawayuq niyanmi. plantanö kar desgraciakuna pasayaptin markäkïninta jaqiriyan.
14<<Wakin nunakunaqa kasha kasha chakraman murushqanömi kayan. Tsëmi Diospa willakïninta wiyarirpis yarpakachäyan kë vïdachö imanöpis kawayänanllapaq, kapuqyuq kayänanpaq y kushikïllachö kawakïllapaq. Tsënö karmi mana wayuq trïgunö këkäyan.
15<<Wakin nunakunaqa alli allpaman murushqanömi kayan. Tsëmi Teyta Diospa willakïninta alli shonqunkunawan wiyar Teyta Dios munashqannö kawayan. Alli allpachö muru winamur alli wayushqannömi imëpis kawakuyan>>.
Willakïninta aktsiman Jesús iwalatsinqan
Marcos 4.21-25
16<<Manam pipis chiwchita sendirkur manka rurinman ni catripa rurinman churantsu, sinöqa alërumanmi churan wayiman yëkuqkuna rikäyänanpaq.#Mat. 5.15; Mar. 4.21. 17Tsënömi yachatsishqäkuna kanan pakarëkaqnö karpis musyakanqa. Kanan mana käyirpis warëkunaqa käyiyanqam.#Mar. 4.22. 18Tsëmi alliq wiyayämë. Yachatsishqäta cäsukuqkunaqa masmi käyiyanqa. Mana cäsukuqkunaqa ichiklla käyiyashqanllatapis qonqëkuyanqam>>.#Mat. 13.12; 25.29; Mar. 4.25.
Jesúspa mamänin y wawqinkuna pikuna kayanqan
Mateo 12.46-50; Marcos 3.31-35
19Tsëpitanam Jesúspa mamänin y wawqinkuna chäriyarqan Jesús këkashqan wayiman. Atska nuna kayaptinmi yëkïta puëdiyarqantsu. 20Tsëmi Jesústa juk nuna kënö willarqan: <<Mamëki y wawqikikunam waqtachö shuyëkäyäshunki>>.
21Jesúsnam nirqan: <<Pipis Teyta Diospa willakïninta wiyar cäsukuq kaqmi mamänïqa y wawqïkunaqa kayan>>.
Vientuwan qocha laqchiqsaqta Jesús päratsinqan
Mateo 8.23-27; Marcos 4.35-41
22Juk junaqnam discïpulunkunawan barcuman Jesús lloqarir nirqan: <<Wak tsimpaman pasashun>>.
Tsënö niptinnam barcuwan jeqariyarqan. 23Ëwarëkäyaptinnam Jesús punukärirqan. Tsëyaqmi alläpa vientuwan yaku laqchiqsar barcuta hundikätsinanpaqna këkarqan. 24Tsënam Jesústa riyatsir niyarqan: <<¡Rabí, rabí! ¡Hundikëkantsiknam!>>
Tsënam Jesús sharkur vientuta y yakuta piñaparqan. Piñapaptinmi vientupis yakupis pärarirqan. 25Tsëpitanam discïpulunkunata nirqan: <<¿Imanirtaq markäkïnikikuna kantsu?>>
Tsëmi kikinkunapura mantsakashqa ninakuyarqan: <<¡Pitaq kë nunaqa yakupis vientupis tsënö cäsunanpaqqa!>>
Juk nunapita supëkunata Jesús qarqunqan
Mateo 8.28-34; Marcos 5.1-20
26Tsëpitanam Gerasa#8.26 Wakin griego copiakunachömi Gadara niyan. Wakinnam Gergesa niyan. niyashqan partiman chäriyarqan. Tsëqa këkan Galileapa wak tsimpanchömi. 27Barcupita Jesús yarpuriptinnam supëkuna löcuyätsiyashqan nuna shamurqan. Tsë nunam unëna qalapächu purikurqan. Y wayichö mana tärashpam panteonkunallachö tärarqan. 28Jesústa rikëkurmi feyupa qaparir nöpanman lätëkur qaparipa kënö nirqan: <<¡Puëdiq Diospa Tsurin Jesús! ¡Imatataq noqawan munanki! ¡Ama jipatsillämëtsu!>>
29(Tsënö supë nirqan nunapita yarqunanpaq Jesús nishqa kaptinmi. Tsë nunataqa unëpitam supë munashqanta ruratsirqan. Tsëmi cadënakunawan chakinta makinta pankayaptinpis rachikacharkur chusyaq jirkakunapa ewkuq.)
30Tsëpitanam Jesús tapurqan: <<¿Imataq shutiki?>> nir.
Pënam nirqan: <<Legión>>.#8.30 Legión ninanqa atska waranqa ninanmi.
(Tsënö nirqan atska supëkuna pëchö kaptinmi.)
31Tsë supëkunam Jesústa yapëkuryan rowakuyarqan alläpa tutapaqman mana qarpunanpaq. 32Tsë jirkachömi atska kuchikunata mitsikäyarqan. Tsëmi supëkuna Jesústa rowayarqan kuchikunaman yëkuyänanpaq. Rowayanqanta Jesús äniriptinmi 33supëkuna nunapita yarqurir tsë kuchikunaman yëkukïkuyarqan. Tsëmi kuchikuna löcuyar ladërapa ëqir qochaman jeqakurkuyarqan. Tsëchömi shenqakëpa wanuyarqan.
34Tsëta rikëkurmi kuchi mitsiqkuna ëqillapa ëwar jinan markachö y estanciankunapa willakuyarqan. 35Tsënam nunakuna shayämurqan: <<Mä ¿imash pasakushqa?>> nirnin. Jesús kaqman chärirnam tariyarqan supëyuq nunata ratashnin yakashqa juiciunchöna Jesúspa lädunchö tëkaqta. Tsëta rikëkurmi alläpa mantsakäkuyarqan.
36Jesús kachakätsishqanta rikaqkunanam tsëman chaqkunata willayarqan imanö kachakätsishqantapis. 37Tsënam tsë partichö täraq nunakuna alläpa mantsakur Jesústa rowayarqan tsëpita ewkunanpaq. Tsënö rowayaptinnam barcuman lloqarkur discïpulunkunawan Jesús ewkurqan.
38Manaraq ewkuyaptinmi kachakaq nuna Jesústa rowarqan pëwan ewkunanpaq. Jesúsnam nirqan: 39<<Wayikipa kutir Teyta Dios kachakätsishushqëkita willakunki>>.
Tsënam ëwar pïmëtapis willaparqan Jesús kachakätsishqanta.
Jairupa tsurinta kawaritsinqan y warmita kachakätsinqan
Mateo 9.18-26; Marcos 5.21-43
40Qocha wak tsimpanman Jesús kutiptinmi shuyarëkaq atska nunakuna kushishqa chaskiyarqan. 41Tsëmanmi sinagögachö mandakuq Jairo shutiyuq nuna chärirqan. Pëmi Jesúspa nöpanman qonqurikur rowarqan wamranta kachakätsiq wayinman ëwananpaq. 42Tsë wamranqa chunka ishkë watayuqnö jukllëlla warmi tsurinmi karqan. Pëmi pasëpa lástima qeshyar wanukïkarqan.
Jairupa wayinman Jesús ëwëkaptinmi atskaq nunakuna kichkinakurraq qatiyarqan. 43Tsë nunakunawanmi chunka ishkë watana yawar ëwëwan qeshyakuq warmipis ëwëkarqan. [Tsë warmim imëkantapis rantikur usharqan jampikunanpaq. Tsënö kaptinpis] manam pï jampikuqpis kachakätsirqantsu. 44Tsë warmim Jesúspa qepanllapa yëkurir mantunpa kuchunta yatëkurqan. Yatëkunqan höram yawar ëwënin pärarirqan. 45Jesúsnam tapukurqan: <<¿Pitaq yatamarqun?>> nishpa.
Llapan nunakuna: <<Manam noqatsu>> niyaptinnam Pedro nirqan: <<Ay tëtë, këläya nunachöqa juknin juknintaq tanqayäshunki. [¿Imanöparaq musyayäman mëqan yatëkushushqëkitapis?]>>
46Jesúsnam nirqan: <<Ari pï karpis yatamashqam. Podernï yarquqtam mäkurqü>>.
47Yatashqanta mäkuriptinnam tsë warmi mantsakashqa karkaryëkar Jesúspa nöpanman qonqurikïkurqan. Y llapan nunakunapa nöpanchö willarqan imanir yatashqanta y jina höra kachakärishqanta. 48Jesúsnam nirqan: <<Markäkamushqëkipitam kachakärirqunki. Kananqa kushishqana ewkï>>.
49Jesús tsënö parlëkaptinmi Jairupa wayinpita willakuq taripëkur nirqan: <<Tëtë, tsurikiqa wanurishqanam. Amana Jesústa afanënatsu>>.
50Tsënö niqta wiyëkurmi Jesús kënö nirqan: <<Ama llakikïtsu. Teyta Diosman markäkï. Wamrëkiqa kawarimunqam>>.
51Wayiman chärirnam Pedruta, Juanta, Santiaguta y wamrapa tëtanta y mamäninllata Jesús yëkatsirqan. Manam wakinkuna yëkuyänantaqa munarqantsu. 52Wamrapaqnam waqtachö qaparipa qayaripa waqakïkäyarqan. Tsënam Jesús nirqan: <<Ama waqayëtsu. Wamraqa punïkanllam. Manam wanushqatsu>>.
53Tsënö niptinmi wamra wanushqanta musyarnin Jesústa asipäyarqan. 54Jesúsnam makinpita tsarirkurnin wamrata kënö nirqan: <<Wamra, sharkï>>.
55Tsënö niptinnam jina höra kawarir sharkaramurqan. Jesúsnam nirqan: <<Kë wamrata pachan qarayë>>.
56Wamran kawarimushqanta rikëkurnam tëtan mamänin espantakuyarqan. Jesúsnam atikarqan wamra kawarimushqanta pitapis mana willakuyänanpaq.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.