Luke 17

No Good, Make Peopo Do Bad Kine Stuff

(Matthew 18:6-7, 21-22; Mark 9:42)

1Jesus tell da guys he stay teach, “Tings dat make peopo do bad kine stuff goin happen, but bummahs fo da guy dat make anodda guy do bad kine stuff! 2Mo betta take one big stone, tie um aroun da guy neck, an throw him inside da deep ocean fo drown, fo him no make even one a my small kids hea do bad kine stuff. 3#Matt 18:15So watch out wat you do!

“If yoa braddah do bad kine stuff, scold um. If he come fo real kine sorry cuz a dat an no do um no moa, den no stay huhu wit him, but let him go. 4If he do one bad ting fo hurt you seven time in one day, an he come back by you seven time, an tell, ‘I fo real kine sorry, an I no goin do dat no moa,’ den no stay huhu wit him. Let um go.”

Da Guy Dat Trus God Fo Real Kine

5Da guys dat Jesus, Da One In Charge, like sen all ova tell him, “Help us guys trus God moa.”

6Da One In Charge tell, “If you trus God litto bit jalike one small mustard seed, you can tell dis mulberry tree, ‘Pull yoa roots up an go plant um in da ocean,’ an da tree goin do um.”

Wat One Worka Guy Gotta Do

7“Wat you tink? If get one worka guy dat plow da dirt fo his boss, o take kea his sheeps, wen da guy come inside from da field, you tink da boss goin tell um, ‘Come on! Eat’? No way! 8Da boss goin tell, ‘Make my suppa, go get ready, an bring um all fo me fo me eat an drink. Afta dat, you goin eat an drink.’ Dass wat he goin tell um fo do. 9You tink he goin tell da worka guy ‘Mahalo!’ cuz he wen do wat da boss tell um fo do? No way! 10Same ting. Wen you guys go do eryting you suppose to, den you goin tell, ‘Us jus worka guys. We ony wen do wat we suppose to do.’ ”

Jesus Make Ten Lepa Guys Come Good

11Jesus wen go Jerusalem, an he pass by wea Samaria an Galilee come togedda. 12He go inside one small town, an ten lepa guys come by him. Dey stan far away 13an yell, “Jesus, Boss, pity us!”

14 # Pries 14:1-32 Jesus see um an tell um, “Go tell da pries guys check you guys out.” An wen dey stay go, dey come clean from dea sick.

15One a da guys see dat he wen come good. He come back, an tell good stuff bout God wit one loud voice. 16He go down by Jesus feets, an tell him “Mahalo plenny!” He one guy from Samaria.

17Jesus tell, “Get ten guys dat come clean from dea sick, aah? Wea da odda nine? 18How come da odda guys no come back an tell how awesome God stay, ony dis one guy dat not one Jew?” 19Den Jesus tell da guy, “Stan up! Go! You wen trus me, dass how you wen get outa trouble.”

God Da King Goin Come

(Matthew 24:23-28, 37-41)

20One time, da Pharisee guys go aks Jesus wen God da King goin come an take ova. Jesus tell, “Wen God da King take ova, no goin get sign notting fo tell peopo wass goin happen. 21An da peopo no goin tell, ‘Eh! He stay ova hea!’ o ‘Eh! He stay ova dea!’ Cuz God awready stay in charge a da peopo.”

22Den he tell da guys he teaching, “Eh, you know, I Jesus, da Fo Real Kine Guy. Goin get one time, wen you guys goin figga, ‘Eh! Fo real kine, I like see Jesus come back now!’ But you no goin see me. 23Da peopo goin tell you, ‘Eh! He stay ova hea!’ o ‘Eh! He stay ova dea!’ But no lissen, no go wit dem. 24Cuz I da Fo Real Kine Guy, an wen I come back, goin be real fas, jalike wen da lightning flash an make da sky come light from one side to da odda side. 25But firs I gotta suffa plenny, an da peopo dat stay nowdays no goin take me in.

26 # Start 6:5-8 “I da Fo Real Kine Guy, an wen I come back, goin be jalike befo time wen Noah stay. 27#Start 7:6-24Dat time da peopo wen eat an drink, dey marry an give dea girls fo marry, till da day Noah go inside da big boat. Den da big watta come an kill all da odda peopo. 28#Start 18:20–19:25Goin be jalike wen Lot wen stay. Erybody stay eat an drink, buying stuff an selling um, planting seed, an building house. 29But da day Lot wen go way from Sodom, fire an sulfur come down from da sky on top dem an kill um all. 30Dass how goin be wen I show up, me, da Fo Real Kine Guy.

31 # Matt 24:17-18; Mark 13:15-16 “Dat time if one guy stay res on top his flat roof house, he betta not go inside fo get his stuffs. Same ting, da guy inside da field betta not go back fo get someting. 32#Start 19:26Tink bout Lot wife! 33#Matt 10:39; 16:25; Mark 8:35; Luke 9:24; John 12:25Whoeva try hang on to his life goin lose um. An whoeva give up his life goin hang on to um. 34I stay tell you guys, dat nite wen I come, two peopo goin stay in one bed. God goin take one, an leave da odda. 35Two wahines goin stay grind fo make da wheat flour togedda. God goin take one, an leave da odda. 36[Two guys goin stay inside one field. God goin take one, an leave da odda.]”

37Den da guys Jesus stay teach tell, “Wea, Boss?”

Jesus tell, “Wen dat happen, you guys goin know wea I stay. Jalike erybody know wea get someting mahke, cuz dass wea da scavenja birds come togedda.”

Currently Selected:

Luke 17: HPB

Highlight

Copy