SAN LUCAS 22
22
'Noo'² tsá² xiiala saan'²¹in Jesús
1Nigajatyéen¹mo tyan'² jmɨɨ²¹² 'e gø'² tsá² 'iñi'¹ 'e jo tyiia'³ jeei¹. 'øøi'²¹‑tsi tsá² jmɨɨ²¹² 'e sii²¹ pascua. 2Joon 'in tyʉ'² to² tya' untsá² coon'¹³ tɨfo'² tya' ley 'noo'¹on xiiala ijngaa'¹³i Jesús pe 'gøø'²¹mo tsá².
3Joon ga'í² Satanás alma tya' Judas, 'in sii²¹o jon Iscariote. Jaain²¹ jee²¹² dyatuuin¹ tsá² tya' Jesús 'ii. 4'Ido ngóo¹o ngafee'¹³i 'in tyʉ'² to² untsá² coon'¹³ 'in tyʉ'² to² 'in jǿø² inʉʉ cwo'¹ do. Joon ngafee'¹³i 'ido xiiala jmáa¹a cwáain¹ 'e 'í¹ Jesús ja'cwoo²¹. 5'Idogɨ galijløø'³mo. Joon gaunrøø¹ júu³ 'e cwó² Judas cuu². 6Joon ga'ii'²¹mo. Joon ga'láa² 'wii²¹² 'noo'¹²on xiiala jaan'²in Jesús mo ga'ɨ́ɨ² tii², mo jo tsá² seein²¹.
Lɨ gatséi¹ gø'² Jesús coon'¹³ tsá² tya'a
7Joon gatɨ́² jmɨɨ²¹² 'e gø'² tsá² 'iñi'¹ 'e jo tyiian'³ jeei¹. Joon jngaai'¹³ tsá² joo'saa'²¹ jiin'¹³ la tɨɨsi'². 8Joon gasii¹in Jesús 'in sii²¹ Tʉ́³ coon'¹³ jaain²¹gɨ 'in sii²¹ Wó³ joon gasɨɨ'²¹ɨ 'ii²¹:
―Cwolíin²naa' joon cwotyá²aa' tyʉ́² 'e tyé³e' 'e gatɨ́² jmɨɨ²¹².
9'Idogɨ gaunngɨɨ¹ɨ:
―¿Xiia 'iin²¹²u'un tsatyaa²¹a'a tyʉ́²? ―gajin'²in sɨɨ'²¹ɨ Jesús.
10Joon gajin'² Jesús:
―Mi cwotaa²¹naa' 'e fuu²¹ joon jiin'¹naa' jaain²¹ tsañʉʉ'¹ 'in tyiian¹ coon²¹ tsʉʉ² sɨ'o² jmɨɨ²¹. Cwolíin²naa' caluu‑u ca xiia'²¹ 'nʉ́¹ li 'í²i. 11Joon fuu²uu' 'in fii²¹² 'nʉ́¹ do: “La lo‑o jin'² tɨfo'² tyii'i sɨɨ'²¹ɨ 'nʉ: ¿Xiiali cwo'²'o yii²¹a'a tyee²e'e coon'¹³ tsá² tyiia tya' jmɨɨ²¹² 'e gatɨ́²?” 12Joon ni'e'²e 'naa' coon²¹ tsi inʉʉ fee'¹ lɨ ñii². Do‑o tyaa²aa' tyʉ́².
13Joon ngalíin²mo. Joon galɨ́² jiin'¹³ la nigajin'² Jesús. Joon gatyaa¹ tyʉ́² 'e dø'¹ø mo gatɨ́² jmɨɨ²¹² do.
14Mo gatɨ́² 'ii'²¹, joon gacwó²o Jesús coon'¹³ tsá² tya'a 'e dø'¹ø. 15Joon gajin'² Jesús:
―¡'Áa¹mo nagali'iin²¹²na jmáa³aa coon'¹³ 'naa' 'e tyee²e' tya' 'e jmɨɨ²¹² lo la nʉ'gɨ ijúun²na! 16Tsʉ fuu²¹²uu 'naa' 'e jo jmáa³gɨɨ ca mi tɨ́² 'ii'²¹ 'e tyʉ'² Dios to².
17Joon gason'¹on coon²¹ wúun¹xʉ sɨ'o² vino joon gacwo'²o 'maai'¹³ Dios joon gajin'²in:
―Jun'² 'elo, joon jmaa²aa' jmai'²xʉ jee²¹² 'naa'. 18Tsʉ la lo‑o fo'³oo, jo jmɨɨ²¹² yaai'¹³gɨɨ duu'¹³uu jmɨ'³ mɨ'³ wuunjøø'³ ca mi tyʉ'² Dios to².
19Mo ngayuui'¹³ joon gason'¹on coon²¹ 'iñi'¹. Joon gacwo'²o 'maai'¹³ Dios joon gajmaa¹a ca'no'³. Joon gacwo'²o tsá² tya'a sɨɨ'²¹ 'ido:
―'E lo‑o cuerpo tyiia ijoon'¹³oo 'wii²¹² tyii'. Jmaa²aa' 'elo joon itɨ'¹‑'oo' jna.
20La joon jon gajmaa¹a coon'¹³ coon²¹ wúun¹xʉ do mo ngayuu'¹³ gagøø'²¹ø. Joon gajin'²in:
―'E wúun¹xʉ lo lawa coon²¹ 'ii'²¹ 'e 'múui². Joon 'e jmɨ¹ 'ǿø³na lo 'e nitʉʉn²¹ 'wii²¹² tyii' 'e li² tya' 'e 'ii'²¹ 'múui² do.
21’Pe nano cwoo²¹ tsá² 'in i'nɨɨi¹ jna roon¹ coon'¹³ cwóo³oo ni mesa lo. 22Pe jna‑a 'in Ruu'²¹na Tsá² nilí²‑i jiin'¹³ la 'ii'²¹ nigalisá². Pe 'áa¹mo fúu² 'in 'nɨɨi¹ jna.
23Joon ga'láa² tsá² tya'a 'wii²¹² gaunngɨɨ¹ɨ jee²¹² 'ii:
―¿'Iin jee²¹² jna' 'in jmoo¹o 'e gó² lo?
Gasɨ́ɨ²i jee²¹² 'ii 'iin 'in tyiin²gɨ jee²¹² 'ii
24Mo ngayuui'¹³ joon gasɨ́ɨ²i jee²¹² 'ii 'iin 'in tyiin²gɨ jee²¹² 'ii. 25Joon gajin'² Jesús gasɨɨ'²¹ɨ 'ii:
―Jileei'²¹ rǿøi¹³ 'in tyʉ'² to² ni cwoo'¹³ juncwii²¹ tyʉ'²o to² ce caain²¹‑tsi. Joongɨ jileei'²¹ tsacøøi'¹³ tya' 'ii lawa 'ña'o sii²¹ tsá² tyúi¹. 26Pe 'naa'gɨɨ' jo tɨ́ɨ²naa' jmaa²aa' la joon. Lɨ'² cɨɨ'¹²ɨ jmoo² 'naa'. Jileei'²¹ 'in tyiin²gɨ jee²¹² 'naa' 'ná² sɨ́ɨ¹³naa' lawa 'in xuui²¹²gɨ. Joon 'in tyʉ'² to² 'naa' 'ná¹ jmaa¹o la jmoo¹o tsa'leei'¹³. Jo cwooi¹ tyʉ'²ʉ to². 27¿'Iin 'in tyiin²gɨ awa 'in tyíin¹ gø'²ø sɨ 'in gatyáa¹ tyʉ́² 'ee? Pe jna‑a 'yuu²na jee²¹² 'naa' lawa jaain²¹ 'in tyaa¹ tyʉ́².
28’'Naa' nigangɨ²ɨɨ' coon'¹³ jna coon²¹ tǿøi² la lɨ 'e móo³oo wúu¹. 29'E joon jna cwo'³oo 'naa' coon²¹ lɨ ityʉʉ²ʉʉ' to² la lɨ́² 'e gacwo'² Ñʉ'³ʉʉ jna. 30'E joon ilí² cøø²øø' joongɨ 'uu²uu' coon'¹³ jna mi tyʉ'³ʉʉ to². Joongɨ iní²ii' 'áan³ tyii' lawa tsacøøi'¹³ 'e jmaa¹aa' 'ii'²¹ tya' 'in dyatun¹ poo²¹² tsá² seein²¹ Israel.
Jmoo¹ Jesús júu³ 'e jo rǿø¹i Tʉ́³ 'e cwii¹in 'ii
31Gajin'²in jon Ña'ñʉ'¹ʉ':
―Simóoi¹³, Satanás nigamóoi¹ 'naa' 'e jøøi'¹² 'naa' la mo untyʉ́² tsá² trigo 'e coon'²¹ cwáain¹ 'naa'. 32Pe jna nigamɨ́³ɨɨ tyani Dios 'wii²¹² tyi'i 'e jo tʉ́²'ʉ 'e jo'² cwolíin²un. Joon mi jaa'²¹‑o'o cwotyii'¹²a‑tsi 'in tsaruu'²¹'u.
33Joon gajin'² Simóoi¹³ do:
―Ña'ñʉ'¹ʉ', naná¹a tyʉ́² tyiia 'e ní³ii 'nʉñí³ coon'¹³ 'nʉ ca xʉfiin'¹³ jún¹moo coon'¹³ 'nʉ.
34Joon gajin'² Jesús:
―Tʉ́³, fuu²¹²uu 'nʉ 'e jmɨɨ²¹² no‑o la nʉ'gɨ i'ó¹ tuuitsáa² jo røø¹u 'e cwii¹un jna 'nɨ¹ naa'¹³.
Ityée¹mo júu³ tya' Jesús
35Joon gaunngɨɨ¹ɨ Jesús:
―Gasɨ́ɨ³na 'naa' jo 'ee tʉloo²¹ tyán²aan', jon'gɨ cuu² tyán²aan', jon'on mɨ́ɨ¹³ɨɨ' ga'ǿø¹³øø', ¿tɨ 'ee gali'ná¹gɨ tyii'?
'Ido‑gɨ gajin'²in:
―Jiin'¹³ coon²¹ jo 'ee ga'naai²¹ tyi jna'a.
36Joon gajin'² Jesús:
―E ningóo¹ lɨ' cɨɨ'¹²ɨ no joon jileei'²¹ 'in 'oo¹ tuloo²¹ 'ná² cwotyaan²¹o. Joongɨ 'in 'oo¹ cuu² 'ná² cwotyaan²¹. Joongɨ jileei'²¹ 'in jo 'oo¹ ñí³ 'ná² cwo'nɨɨ¹ 'mɨ'² tyíia² tya'a joon ló² ñí³ tya'a. 37Tsʉ la ja'²mo fo'³oo, 'ná²‑a tsangɨ́ɨ¹na jilaa'²¹ la lɨ 'e tyaan²¹ ni jí² tya' Dios 'e jin'²: “Sɨ́ɨ²i la jee²¹² yaai 'e tsá² gó² 'ii.” Tɨ lɨ tsín¹ jiin'¹³ la jin'² jí² cwáain¹ tyiia.
38Joon gajin'² 'ido:
―Sá² tún² ñí³ lo.
Joon gañii¹ Jesús:
―Naleen¹mo jon.
Ngó¹ Jesús lɨ sii²¹ Getsemaní ngafee'¹²i Dios
39Joon gacwo'ɨ́ɨ¹ Jesús. Joon jiin'¹³ la tɨɨsi'² tya'a gangóo¹ fu moo'²¹ Olivos. Joon gangaliin¹mo tsá² tya'a coon'¹²on. 40Mo gatyalíin² do joon gasɨɨ'²¹ɨ Jesús 'ii:
―Mɨ́²ɨɨ' tyani Dios 'e jo xuu'²¹naa'²¹ tsaa² tyii'.
41Joon gangawíin² Jesús coon²¹ jiin'¹³ la wíin² mo tyʉ'² tsá² cuun²¹². Joon gasii'¹i wojníi¹i. Joon faa'²¹a júu³ tyʉ́². 42Joon gajin'²in:
―Ñʉ'², wana 'iin²¹²un un'øø²¹u jna 'e jo móo³oo wúu¹ coon'¹³ jilaa'²¹ 'e 'ná² lí². Pe jo lí² jiin'¹³ la 'iin²¹²na pe jiin'¹³ la 'ii'²¹ tyi'i.
43Joon gajnéi¹ jaain²¹ ángel jó¹ fu ñʉ'fú² joon gacwoo²¹gɨ 'waa'²¹ pí². 44Joon ga'í² 'e nii²¹ wúu¹ lɨɨlɨ¹. Joon gamɨɨ¹ɨ 'wii²¹² tya'a coon'¹³ 'láai²gɨ 'waa'²¹ pí². Joon ga'yá² untyiia²¹ tya'a lɨ la lɨ jmɨ¹ 'e xʉʉ'²¹ ni 'wó².
45Mo róon² joon ngaa'¹²in lɨ téein² tsá² tya'a. Joon gatsee'²¹i 'ido cwuu²¹mo coon'¹³ jilaa'²¹ fa'í³. 46Joon gajin'²in:
―¿'Ee lɨ cwuu²¹naa'? Ráan²naa', fee'¹²naa' Dios joon jo xuu'²¹naa' tsaa² tyii'.
Tøø¹ tsá² Jesús 'ñúu¹i
47Faa'²¹gɨ Jesús siin'¹²in mo gacwolíin² tsá² fúui¹. Joon jaain²¹ jee²¹² jɨ dyatuuin¹ tsá² tya'a 'in sii²¹ Judas jó¹ nifu tya' 'in tsá² do. 'Ii ngatyeen¹in lɨ siin'¹² Jesús ijun'²un ju'² Jesús. 48Joon gajin'² Jesús:
―Judas, ¿tɨ ga'nɨɨ²¹²un jna, 'in Ruu'²¹na Tsá², coon'¹³ 'e gajiin'¹'in ju'³uu?
49Jileei'²¹ 'in téein² coon'¹³ Jesús mo ganí²i jilaa'²¹ 'e lɨ́² gajin'²in sɨɨ'²¹ɨ Jesús:
―¿Jatɨɨ²ɨ' coon'¹³ ñí³ 'ee?
50Joon jaain²¹ jee²¹² 'ii gauncwuu'²¹i jaain²¹ tsa'leei'¹³ tya' 'in tyʉ'² to² untsá² nifú². Gatyʉ'²ʉ cataain²¹ loocwo² lɨ tsáa¹. 51Joon gajin'² Jesús:
―Cwoján²xʉ la no. Jo caai'¹³gɨɨ' 'ino.
Joon gasʉ́ʉ² Jesús loocwo² 'ido joon ga'láa²mo tsifu. 52Joon gajin'² Jesús sɨɨ'²¹ɨ 'in nijalíin² 'e tøø¹ 'ii. Sɨɨ'²¹ɨ 'in tyʉ'² to² tya' untsá² coon'¹³ 'in tyʉ'² to² 'in jǿø² inʉʉ cwo' coon'¹³ tsacøøi'¹³:
―Nañilíin²naa' coon'¹³ ñí³ coon'¹³ 'mó² 'e tøø²øø' jna lawa jaain²¹ 'uun²¹. 53La coon²¹ jmɨɨ²¹² 'yuu²na jee²¹² 'naa' tsi inʉʉ cwo'¹ fee'¹ do. Joon jo mo gaseen'²naa' jna coonti. Pe jiin'¹³ lo‑o 'ii'²¹ tyii' mo ga'ɨ́ɨ² nʉʉ²¹.
Jo rǿøi¹ Tʉ́³ 'e cwii¹in Jesús
54Joon gajée¹i Jesús sɨ'ñúu¹mo fu tya' 'in tyʉ'² to² untsá² nifú². Joon Tʉ́³ ngaa'¹³i caluu Jesús wíin²gɨxʉ. 55Joon do‑o gajiin'² coon²¹ jɨ́² tún² tsa'² tya'i tyi¹ do. Joon do‑o gacwó²o cu' lɨ' lɨ coo²¹ jɨ́² do. Tʉ́³‑gɨ do‑o jon tyíin¹in. 56Joon jaain²¹ tsamɨ́² 'in jmoo¹o to² inʉʉ do mo ganí²i tyíin¹ Tʉ́³ co' jɨ́² do joon gajaan¹ jǿøi² 'ido. Joon gajin'²in:
―Ngɨɨ¹ jon 'in tsañʉʉ'¹ lo coon'¹³ 'ido.
57Joon jo garǿø¹i Tʉ́³, gajin'²in:
―Tsamɨ́², jo cwii¹na 'ido.
58Mo galɨ́² cɨɨin²¹gɨxʉ joon 'in xee'²¹mo gasɨɨ'²¹ɨ 'ii:
―'Nʉ‑ʉ, jaain²¹ jee²¹² 'ii.
Joon gajin'² Tʉ́³:
―Jon' 'i jna, tsañʉʉ'¹.
59Coon²¹ hora ngóo¹gɨxʉ mo gajin'² 'in xeei'²¹ gasɨɨ'²¹ɨ 'ii:
―'E la ja'²mo ngɨɨ¹ 'in tsañʉʉ'¹ lo coon'¹³on tsʉ 'in seein²¹ Galilea lo.
60Joon gajin'² Tʉ́³:
―Tsañʉʉ'¹, jo ñí³ii 'ee 'e fo'²'o.
La tsifu joon, la 'ɨɨ²¹² faa'²¹gɨ Tʉ́³ ga'oo¹ jaain²¹ tuuitsáa². 61Joon jiin'²¹ 'ña'a Jesús níi¹i gajǿøi² Tʉ́³. Joon gatɨ'²‑tsi Tʉ́³ jiin'¹³ la nigajin'² Jesús sɨɨ'²¹ɨ 'ii: “La nʉ'gɨ i'oo¹ tuuitsáa² jo røø²¹u 'e cwii¹u jna 'nɨ¹ naa'¹³.” 62Joon gacwo'ɨ́ɨ¹ Tʉ́³ joon gatyi'²o xuui²¹²‑tsi 'áai¹.
Ungøøi¹ tsá² Jesús
63Jileei'²¹ tsá² do 'in 'aa¹i Jesús gaungøøi¹ 'ii 'áai¹ joongɨ gajmee'²¹mo lɨɨlɨ¹. 64Gajnii¹ unníi¹i 'ido joon gapoo²¹ ni² 'ido joon gasɨɨ'²¹ɨ 'ii:
―Faa'¹³du', ¿'iin pó² tyi'i?
65Joongɨ 'láai² júu³ 'laa'²¹ gafa'²o tya' Jesús.
Ngó¹ Jesús tyani tsá² 'in tyiin²gɨ tya' tsá² Israel
66Mo gajná² joon galicaain²¹ tsacøøi'¹³ tya' tsá² Israel coon'¹³ 'in tyʉ'² to² untsá² coon'¹³ tɨfo'² tya' ley. Joon gangajée¹i Jesús lɨ sɨcaain²¹ tsá² 'in tyiin²gɨ do. Do‑o gaunngɨɨ¹ɨ:
67―Sii'¹³ jna'a, ¿tɨ 'nʉ Cristo?
Joon gañii¹i Jesús:
―Wana fo'³oo, jo jo'² ilíin²naa' júu³ tyiia. 68Joongɨ wa'a unngɨ́³ɨɨ 'naa' jo ñí²ii' jon'gɨ jo laa²¹²naa' jna. 69Pe ca nano‑o ca li ngoo²¹gɨ jna‑a, 'in Ruu'²¹na Tsá², ninii²¹²ii cáai¹ Dios Jmii²¹ lɨ' tsáa¹.
70Joon jilee'²¹mo gaunngɨɨ¹ɨ:
―¿Tɨ 'nʉ‑ʉ Jóon¹ Dios?
Joon gañii¹i Jesús:
―Jnagɨɨ 'i jiin'¹³ la nafaa'¹³naa'.
71Joon gajin'²in jee²¹² 'ii do:
―Jo 'ee júu³ 'ná¹gɨ jna'. Yiiana' jon ninʉʉ²¹ʉ' júu³ tya'a.
Currently Selected:
SAN LUCAS 22: chq
Highlight
Share
Copy
Want to have your highlights saved across all your devices? Sign up or sign in
© 1983, Wycliffe Bible Translators, Inc. All rights reserved.
