SAN JUAN 11

Ngujuii Lázaro

1Ndi'i̱ sca nu qui'yu nu naa Lázaro. Quicha tsa bi'. Ngu' quichi̱ Betania laca, lo'o jua'a̱ María lo'o Marta laca tya'a ngula nu qui'yu bi'. 2(Tya'a ngula María laca Lázaro nu quicha bi', lo'o jua'a̱ María laca nu su'ba setye tyixi xtyi'i chu̱' quiya' Jesús nde loo la, lo'o li' sube' cho' quicha̱' que ycui' cho' quiya' Jesús cha' quityi.) 3Cua nda tyucuaa nu cuna'a̱ bi' cha' ndyaa ca slo Jesús:

―Tyu'u cha' clyu ti' jinu'u̱, Xu'na ―nacui̱ ngu' cuna'a̱ bi'―, nde lijya̱ cha', cha' caca cuayá' ti' nu'u̱ cha' ntsiya tya'a tso'o nu'u̱, quicha tsa yu.

4Lo'o ndyuna Jesús cha' bi', li' nacui̱:

―Ná nga'a̱ cha' cajaa nu quicha bi'. Na quicha yu bi' cha' caca tlyu la ycui' Ndyosi, cha' cua'ni tlyu ngu' jna', cha' na' laca̱ nu sca ti Sñi' ycui' Ndyosi. Lo'o ña'a̱ ngu' ñi'ya̱ cña tonu nu cua'ni na' cha' caca jo'o ji'i̱ yu, li' cua'ni tlyu ngu' ji'i̱ ycui' Ndyosi.

5-6Lo'o ndyuna Jesús cha' quicha Lázaro, li' tya ndyanu Jesús tya tyucuaa tsa̱ su ndi'i̱ bi', masi ntsu'u tsa tyiquee yu ña'a̱ yu ji'i̱ ca ta'a sna ngu' bi', ji'i̱ Marta, lo'o ji'i̱ nu chaca cho' tya'a Marta, lo'o ji'i̱ ycui' Lázaro. 7Tiya' la, li' nacui̱ Jesús ji'i̱ ñati̱ nu ndyaca tsa'a̱ ji'i̱:

―Tyaa na xtyu̱u̱ na nde loyuu su cuentya Judea ―nacui̱.

8Li' nguxacui̱ ngu' bi' cha' ji'i̱:

―Mstru ―nacui̱ ngu'―, ná sa'ni ngua bi' lo'o ngua ti' ngu' judío bi' cu̱ ngu' quee jinu'u̱ cha' cujuii ngu' jinu'u̱, ngua ti' ngu'. ¿Ha cua tsaa ti nu'u̱ nde jua chaca quiya'? ―nacui̱ ngu'.

9Li' nacui̱ Jesús ji'i̱ ngu' bi':

―Tii tyucuaa ti hora ntsu'u ji'i̱ sca tsa̱. Lo'o tya'a̱ na ndacua̱, ná sca na tyacua quiya' na, tyaca̱' su ndya'a̱ na cha' tya xee ―nacui̱―. 10Lo'o tyu'u ta'a̱ na talya, li' tyacua sca na nga'a̱ tyucui̱i̱ quiya' na, cha' ná tyaca̱' xee ña'a̱ na ji'i̱ li'.

11Lo'o cua nchcui' Jesús jua'a̱, li' nacui̱:

―Cua laja' Lázaro tya'a tso'o na. Nde jua tsa'a na' juani cha' xtyu'u̱ ji'i̱ yu.

12―Mstru ―nacui̱ ngu' nu ndyaca tsa'a̱ ji'i̱―, lo'o laja' ca yu, li' tyaca tso'o yu.

13Ngua ti' ngu' cha' ndyu'u xcalá yu, masi nti' Jesús ñacui̱ ji'i̱ ngu' cha' chañi cha' ngujuii yu. 14Lo'o li' liñi nchcui' Jesús lo'o ngu':

―Ngujuii Lázaro ―nacui̱―. 15Tso'o ti nti' na' cha' ná nguti'i̱ na' nde jua lo'o ngujuii yu. Juani taca tyu'u tso'o cha' ji'i̱ ycui' ma̱, taca xñi tso'o la ma̱ cha' jna' ―nacui̱―. Tyaa na ca su nscua jyo'o.

16Li' nchcui' Tomás nu Culaca' lo'o tya'a ndyaca tsa'a̱ ji'i̱ Jesús:

―Tyaa na lo'o nu cusu' lacua, cha' stu'ba ti cajaa na lo'o ―nacui̱ Tomás.

“Tyu'ú tya'a ngula nu'u̱ chaca quiya'”

17Lo'o ndyalaa Jesús ca bi', ngujui cha' ji'i̱ yu cha' cua jacua tsa̱ nguatsi' jyo'o Lázaro. 18Ná tyijyu' ndyi'ya tya'a quichi̱ Betania bi' lo'o quichi̱ Jerusalén, ntsu'u xi tucua ti kilómetro cla'be cuayá' tyijyu' ndi'i̱ quichi̱ bi'. 19Lo'o li' quiña'a̱ ngu' quichi̱ tonu bi' ndyaa cha' xtyucua ngu' ji'i̱ Marta lo'o ji'i̱ María cha' ngujuii tya'a ngula ngu'. 20Tya cuayá' ndyuna ngu' cha' cua lijya̱ Jesús, hora ti ngutu'u Marta ndyaa cha' tyacua tya'a lo'o Jesús tyucui̱i̱. Sca ti María ndyanu ni'i̱. 21Lo'o li' nchcui' Marta lo'o Jesús:

―Ná ngujuii tya'a ngula na' si nguti'i̱ nu'u̱ ca nde, cusu' ―nacui̱ nu cuna'a̱ bi' ji'i̱ Jesús―. 22Pana jlo ti' na' cha' masi juani cua'ni ycui' Ndyosi lcaa cha' nu jña nu'u̱ ji'i̱ Ni.

23Li' nguxacui̱ Jesús cha' ji'i̱ Marta bi':

―Tyu'ú tya'a ngula nu'u̱ chaca quiya'.

24―Jlo ti' na' cha' chaca quiya' tyu'ú yu bi' nu lo'o tyu'ú lcaa jyo'o lo'o cua tye ti chalyuu ―nacui̱ Marta.

25Li' nguxtyacui Jesús cha' lo'o nu cuna'a̱ bi':

―Na' laca̱ nu ndu'ni cha' tyu'ú ñati̱, na' laca̱ nu ndu'ni cha' chañi caca tso'o cresiya ji'i̱ ñati̱ ―nacui̱ Jesús―. Masi cajaa ngu', tya tyu'ú ngu' bi' chaca quiya', caja chalyuu cucui ji'i̱ ngu' si cua ngusñi ngu' cha' jna' ―nacui̱ Jesús ji'i̱ Marta―. 26Lo'o jua'a̱ lcaa ñati̱ nu tso'o ti ndi̱'i̱ tyiquee cha' ngusñi ngu' cha' jna', ná nscua cha' cajaa ngu' bi' tsiya' ti. ¿Ha jlya ti' nu'u̱ cha' bi'?

27―Chañi cha' jlya ti' na', cusu' ―nacui̱ nu cuna'a̱ bi'―. Hasta juani jlya ti' na' cha' nu'u̱ laca Cristo nu ñati̱ tlyu bi', nu'u̱ laca nu sca ti Sñi' ycui' Ndyosi, lo'o jua'a̱ cua nda Ni jinu'u̱ lijya̱.

Lo'o Jesús ndyunaa yu

28Ndye nchcui' Marta, li' ndyaa nu cuna'a̱ bi', cuaana ti ngusi'ya ji'i̱ María tya'a ngula:

―Cua tyalaa ti nu Mstru bi' juani ―nacui̱―. Nxi'ya yu jinu'u̱ cha' tsaa nu'u̱ slo yu.

29Lo'o ndyuna María cha' bi', hora ti ngutu'u ndyaa slo Jesús li'. 30Tya lyiji tyalaa Jesús quichi̱, tya nga'a̱ yu su ndyacua tya'a Marta lo'o yu tya tsa̱ la. 31Lo'o nu ngu' judío nu ndi'i̱ nxtyucua ji'i̱ María ni'i̱ ni, lo'o na'a̱ ngu' cha' tsa tsiya' ca ngutu'u María ndyaa, li' ndyaa lca'a̱ ngu' ji'i̱ cho'; ngua ti' ngu' cha' to' cuaá ndyaa cho' cha' cunaa cho'.

32Lo'o li' ndyalaa María ca su ndu̱ Jesús. Lo'o na'a̱ cho' ji'i̱ yu, hora ti ngutu̱ sti̱' cho' slo Jesús. Lo'o li' nacui̱ María bi':

―Si nguti'i̱ nu'u̱ tsubi', cusu' ―nacui̱―, ná ngujuii tya'a ngula na' li'.

33Xñi'i̱ tsa ñaa xtyi'i Jesús li', ndube tsa ti' yu cha' ndyunaa María, lo'o jua'a̱ ngusi'ya tsa ngu' judío tya'a ndya'a̱ María. 34Li' nchcuane Jesús ji'i̱ ngu':

―¿Macala nguxatsi' ma̱ ji'i̱ jyo'o bi'?

―Tsa na'a̱ na xi ji'i̱, cusu' ―nacui̱ ngu' li'.

35Lo'o Jesús ngusi'ya li'.

36―Tyaca'a tsa jyo'o bi' ji'i̱ Jesús, ntsu'u tsa tyiquee yu ña'a̱ yu ji'i̱ ―nacui̱ ngu' judío bi'.

37Lo'o jua'a̱ ndi'i̱ xi ngu' nu nacui̱:

―¿Ni cha' laca ná ngujui ñi'ya̱ nu cua'ni yu cha' ná cajaa Lázaro nquicha'? Nchca ji'i̱ yu cua'ni yu cha' tyaca tso'o cloo ngu' cuityi̱'.

Ndyu'ú Lázaro chaca quiya'

38Ca chaca quiya' xñi'i̱ tsa ñaa xtyi'i Jesús, lo'o li' ndyaa yu ca to' cuaá. Sca tyuquee laca, lo'o ndu̱ sca quee tlyu ndyacu̱' tu'ba tyuquee bi'.

39―Clyatsu' ma̱ quee cua ―nacui̱ Jesús.

Li' nchcui' Marta tya'a ngula jyo'o bi' lo'o Jesús:

―Tyucu̱ tsa xtyi'i caca si tyu'utsu' quee cua, cusu' ―nacui̱―. Cua jacua tsa̱ nguatsi' jyo'o re.

40Li' nacui̱ Jesús:

―Caca ña'a̱ ma̱ cha' tlyu tsa nu ndu'ni ycui' Ndyosi nu lo'o jlya ti' ma̱ ji'i̱ Ni. ¿Ha si'i jua'a̱ ni na' ji'i̱ ma̱ tsa̱?

41Li' ngulotsu' ngu' quee nu ndyacu̱' tu'ba tyuquee bi'. Li' nguxña'a̱ Jesús nde cua̱.

―Sti na' ―nacui̱ Jesús li'―, tsa xlya'be hi̱ cha' cua ndyuna nu'u̱ cha' nu nchcui' na' lo'o nu'u̱. 42Lcaa tsa̱ cua jlo ti' na' cha' nduna nu'u̱ lcaa cha' nu nchcui' na' lo'o nu'u̱; pana nchcui' na' lo'o nu'u̱ juani xqui'ya ñati̱ nu ndi'i̱ re, cha' taca ca jlya ti' ngu' jna' cha' chañi cha' cua nda nu'u̱ jna' lijya̱a̱ chalyuu.

43Li' cui̱i̱ tsa nchcui' Jesús:

―Lázaro, tyu'u nu'u̱ su ntsu'u nu'u̱ ndacua, tya̱a̱ nu'u̱ nde liya' re.

44Li' ngutu'u nu ngua jyo'o bi'; ña'a̱ ti tya ngüixi̱i̱ late' ngati̱ tyucui ña'a̱ hichu̱', ña'a̱ ti tya ndyacu̱' chaca late' loo.

―Xati̱' clya ma̱ late' nu ntsu'u chu̱' yu cua ―nacui̱ Jesús ji'i̱ ngu'―, cha' ta ma̱ chacuayá' tya'a̱ yu.

Nchcui' ngu' ñi'ya̱ caca cujuii ngu' ji'i̱ Jesús

45Lo'o li' quiña'a̱ tya'a ngu' judío bi' jlya ti' ngu' ji'i̱ Jesús, ñati̱ nu ndi'i̱ nxtyucua ji'i̱ María tsa̱ la, cha' cua na'a̱ ngu' cha' tlyu nu ngua'ni ca ti Jesús cuentya ji'i̱ ycui' Ndyosi. 46Pana ntsu'u xi ngu' bi' nu hora ti ndyaa slo ngu' fariseo, nda ngu' cha' lo'o ngu' ñi'ya̱ nu ngua'ni Jesús. 47Bi' cha' nu ngu' sti jo'ó nu laca loo lo'o ngu' fariseo bi', nguxana nxi'ya ngu' ji'i̱ lcaa ngu' tisiya, cha' tyu'u ti'i̱ ngu'. Lo'o li' nchcui' ngu' lo'o tya'a ngu':

―¿Ñi'ya̱ cua'ni na juani? ―nacui̱ ngu'―. Quiña'a̱ tsa cha' tlyu ndyu'ni nu qui'yu bi'. 48Lo'o ta na chacuayá' ji'i̱ yu cha' tya cua'ni la yu jua'a̱, li' xñi lcaa ngu' quichi̱ cha' ji'i̱ yu. Li' ca̱a̱ ngu' romano cha' cuityi̱ ngu' laa tlyu ji'na, culo'o ngu' ji'i̱ ñati̱ tya'a na su ndi'i̱ ngu' ―nacui̱ ngu'.

49Li' ndatu̱ tsaca ngu'; Caifás naa yu, lo'o jua'a̱ yija̱ bi' laca yu xu'na sti jo'ó. Nchcui' yu lo'o ngu' bi' li':

―Ni sca na ná jlo ti' ma̱, 50ná nchca tii ma̱ tsiya' ti ―nacui̱ yu―. Tso'o la caca ji'i̱ ma̱ si cajaa sca ti ñati̱, cha' ná cajaa lcaa ngu' quichi̱ tyi na. Cuxi la cña caca si cuityi̱ ngu' tyucui ña'a̱ nasiyu̱ re.

51Si'i cha' nu ngua'ya hique ycui' ca yu nchcui' yu jua'a̱; cha' yija̱ bi' ngua yu xu'na sti jo'ó, bi' cha' nacui̱ yu jua'a̱, cha' cuentya ji'i̱ ycui' Ndyosi nda yu cha' lo'o ngu', ni cña caca ji'i̱ Jesús ca nde loo la lo'o cajaa Jesús lo crusi. Si'i xqui'ya ñati̱ chalyuu jua ti cajaa Jesús, 52masi cajaa Jesús cuentya ji'i̱ lcaa ñati̱ lcua ti ña'a̱ chalyuu, cha' stu'ba ti caca tyiquee lcaa ñati̱ nu jlya ti' ji'i̱ ycui' Ndyosi, ngu' nu cua ngusubi ycui' Ndyosi ji'i̱ cha' caca ngu' sñi' Ni.

53Lo'o li' nguxana nchcui' ngu' nu laca cña lo'o tya'a ngu' ñi'ya̱ nu caca cujuii ngu' ji'i̱ Jesús; 54bi' cha' nga'aa ndyaa Jesús su ndi'i̱ ngu' judío, ngutu'u yu loyuu bi', ndyaa yu chaca loyuu su tyijyu' la xi, ca to' yuu btyi. Ndyalaa yu sca quichi̱ su naa Efraín li', ca bi' nguti'i̱ Jesús lo'o ngu' nu ndyaca tsa'a̱ ji'i̱.

55Cua ngulala tsa ta'a pascua, bi' laca sca ta'a ji'i̱ ngu' judío. Quiña'a̱ ngu' ngutu'u ngu' quichi̱ tyi ngu', masi quichi̱ ne' quixi̱', ndyalaa ngu' quichi̱ Jerusalén li'. Yala ti ngua'ni lubii ngu' tyucui ña'a̱ ngu' cuentya ji'i̱ ycui' Ndyosi, nu lo'o tya lyiji ti caca ta'a. 56Li' ndyaa ngu' ndyaana ngu' macala ntsu'u Jesús. Lo'o ndi'i̱ ngu' ne' laa, li' nchcui' ngu' lo'o tya'a ngu':

―¿Ñi'ya̱ nti' ma̱? ―nacui̱ ngu'―. ¿Ha ca̱a̱ yu ta'a nti' ma̱?

57Ndube tsa ti' ngu' cha' lo'o nu ngu' sti jo'ó nu laca loo bi', lo'o ngu' fariseo, cua ngulo ngu' cña ji'i̱ lcaa ngu' quichi̱; nacui̱ sti jo'ó cha' lo'o caja cha' ji'i̱ ngu' macala ntsu'u Jesús, hora ti ntsu'u cha' cacha' ngu' ji'i̱ ngu' nu laca loo. Li' tsaa ngu' policía xñi ngu' ji'i̱ Jesús, nti' ngu' nu laca loo bi'.

Currently Selected:

SAN JUAN 11: cta

Highlight

Copy