SAN JUAN 7
7
Ná jlya ti' tya'a Jesús ji'i̱ yu
1Tiya' la li' xcui' nde loyuu su cuentya Galilea ndya'a̱ Jesús; nga'aa ndya'a̱ yu loyuu su cuentya Judea bi', cha' nti' tsa ngu' bi' cujuii ngu' ji'i̱. 2Cua ngulala sca ta'a ji'i̱ ngu' judío, nu ndu'ni ngu' ji'i̱: ta'a chcua'ya. 3Lo'o li' nacui̱ nu ngu' qui'yu tya'a Jesús:
―Tyu'u nu'u̱ su ndi'i̱ nu'u̱ re, yaa nu'u̱ nde loyuu su cuentya Judea tso'o la ―nacui̱ tya'a yu ji'i̱ Jesús―. Ntsu'u tsa ngu' nu ndyaca tsa'a̱ jinu'u̱ cajua; tso'o culu'u nu'u̱ xi cha' tlyu nu ndu'ni nu'u̱ ji'i̱ ngu' bi'. 4Ná cua'ni nu'u̱ cña bi' cuaana ti si nti' nu'u̱ cha' tyuloo lcaa ñati̱ hi̱; culu'u loo ycui' nu'u̱ ji'i̱ lcaa ñati̱ cha' taca jinu'u̱ cua'ni cha' tlyu jua'a̱.
5Jua'a̱ nchcui' ngu', cha' lo'o ngu' tya'a Jesús ni, ná jlya ti' ngu' ji'i̱ yu. 6Li' nacui̱ Jesús:
―Tya lyiji tyalaa la cui' tyempo nu tya'a na' ca bi'. Cua ña'a̱ ca tsa̱ tso'o cha' tsaa cu'ma̱ ―nacui̱ Jesús―, 7cha' ná liye' ti' ngu' ña'a̱ ngu' ji'i̱ ma̱; pana liye' tsa ti' ngu' ña'a̱ ngu' 'na, cha' nchcui' liñi na' lo'o ngu' cuentya ji'i̱ cha' cuxi nu ndu'ni ngu' ―nacui̱―. 8Yaa clya ycui' ca ma̱ ta'a bi'; ná tsa'a na', cha' tya lyiji tyalaa la cui' tyempo nu tya'a̱ ca bi'.
9Nga'aa nchcui' la Jesús li'. Ndyanu yu nde Galilea.
Ndi'i̱ Jesús ta'a chcua'ya
10Ndyaa nu ngu' qui'yu tya'a Jesús ta'a. Ca tiya' la lo'o ycui' Jesús ndyaa. Ná ndyaa yu tsa tlyu ti lo'o xa' ñati̱, ycui' ti yu ndyaa yu cha' ná ña'a̱ ñati̱ ji'i̱ yu. 11Lo'o ndyaca ta'a bi', li' ndya'a̱ ngu' judío ndya'a̱na ngu' ji'i̱ yu:
―¿Macala ndya'a̱ yu bi'? ―ndu'ni ngu'.
12Quiña'a̱ tsa cha' nda ngu' quichi̱ bi' lo'o tya'a ngu' cuentya ji'i̱ Jesús. Ntsu'u ngu' nu nchcui' ndi'ya̱: “Tso'o tsa ñati̱ bi'”. Lo'o ntsu'u xi xa' la ngu' nu ndu'ni: “Si'i. Xcui' cha' cuiñi nda yu, na ñilo'o ti yu ji'i̱ ngu'”. 13Pana ntsi̱i̱ ngu' si cuna ngu' judío cha' nu nchcui' ngu', bi' cha' cuaana ti nchcui' ngu' lo'o tya'a ngu'.
14Sca semana ndalo ta'a bi'. Lo'o jua'a̱ tsa̱ nchca jacua ji'i̱ ta'a, li' ndyaa Jesús ne' laa tonu; nguxana yu nclyu'u yu ji'i̱ ngu' ca bi' li'. 15Ndube tsa ti' ngu' judío cha' nchca tsa ji'i̱ Jesús:
―¿Ni cha' laca cha' nchca tsa ji'i̱ yu jua nclyu'u yu ji'i̱ ñati̱? Ná tyu̱u̱ yija̱ nguta'a̱ yu scuelya, ná ngua tsa'a̱ tso'o yu jua ―nacui̱ ngu'.
16Li' nda Jesús sca cha' lo'o ngu' nu ndi'i̱ ne' laa bi':
―Ná nclyu'u na' ji'i̱ ngu' cha' nu nda'ya hique ycui' ca ti na'; ña'a̱ cha' nu nclyacua ti' ycui' Ndyosi nu nda 'na lijya̱a̱ chalyuu, bi' laca cha' nu nclyu'u na' ji'i̱ ngu' ―nacui̱ Jesús―. 17Si nti' ma̱ cua'ni ma̱ cña nu nti' ycui' Ndyosi cha' cua'ni ma̱, li' caca cuayá' ti' ma̱ mala ngutu'u cha' nu nclyu'u na' ji'i̱ ngu', si slo ycui' Ndyosi ngutu'u cha' bi', si sca cha' nu nda'ya hique ti na' laca cha' bi' ―nacui̱ yu―. 18Sca ñati̱ nu nchcui' cha' ji'i̱ ycui' ca lo'o ngu', jua'a̱ nti' yu cha' caca tlyu ycui' ca ti yu. Xa' ña'a̱ ndu'ni na', cha' tyucui tyiquee na' ndu'ni tlyu na' ji'i̱ ycui' Ndyosi nu Xu'na na' nu ngulo cña 'na ca̱a̱ na' nde chalyuu. Ná ntsu'u cha' cuiñi 'na tsiya' ti.
19’¿Ha si'i la cui' jyo'o cusu' Moisés nu ngulu'u ji'na cha' cua'ni na lcaa cña nu nti' ycui' Ndyosi? Pana ná ndaquiya' ma̱ tsiya' ti ji'i̱ cha' bi' ―nacui̱ Jesús―. Lo'o nu juani nti' ma̱ cujuii ma̱ jna'. ¿Ni cha' laca bi'?
20―Ñi'ya̱ nti' sca nu xña'a̱, jua'a̱ nti' nu'u̱ ―ndu'ni ngu' ji'i̱ Jesús li'―. ¿Tilaca nti' cujuii jinu'u̱ lacua?
21Li' nchcui' Jesús lo'o ngu' chaca quiya':
―Sca ti quiya' ngua'ni na' sca cha' tlyu tsa̱ ta'a tsa̱ nu tacati tsa ji'i̱ ma̱, lo'o li' ndube tsa ti' ma̱. 22Ntsu'u sca cña nu ndaquiya' tsa ma̱ ji'i̱ ―nacui̱ yu―, sca cña laca nu nda jyo'o Moisés cha' lo'o ma̱ sa'ni cha' cua'ni ma̱; ni si'i Moisés bi' ngua nu nda cha' bi' lo'o ma̱, cha' cua sa'ni la lo'o bilya cala ycui' Moisés ndu'ni jyo'o cusu' ji'i̱ ma̱ cña bi'. Ndyi'u tsa ti' ma̱ cha' si'yu ma̱ lo quiji̱ nu sube qui'yu sñi' ma̱ cha' culacua̱ ngu', masi tsa̱ nu ndi'i̱ cña' ngu' laca bi' ―nacui̱ Jesús―. 23Nu lo'o ndu'u scua snu' tsa̱ tya lo'o ngula sñi' ma̱, ndu'ni ma̱ cña bi', masi ndi'i̱ cña' ngu' cha' ta'a, cha' ndaquiya' ma̱ lcaa cha' nu cua nda Moisés lo'o na. Bi' cha' juani, ¿ni cha' laca cha' ñasi̱' ma̱ 'na? ―nacui̱ Jesús―. Laca cha' ngua'ni na' cha' ngua tso'o sca ñati̱, masi sca tsa̱ ndi'i̱ cña' ngu' ngua bi'. 24Ná tso'o cua'ni cuayá' ma̱ ji'i̱ sca ñati̱ lo'o ña'a̱ ti ma̱ ji'i̱ ―nacui̱ yu―. Ñi'ya̱ nu tyu'u liñi cha' ji'i̱ sca ngu', jua'a̱ cua'ni cuayá' ma̱ ji'i̱ ngu' tso'o la.
Nchcui' Jesús mala ngutu'u yu lijya̱ yu
25Lo'o ndyuna xi ngu' quichi̱ Jerusalén cha' bi', li' nguxana nchcui' ngu' ji'i̱:
―Nu ñati̱ jua, ¿ha si'i na nclyana ngu' ji'i̱ yu cha' cujuii ngu' ji'i̱? ―nacui̱ ngu'―. 26Lo'o juani ña'a̱ ma̱ ñi'ya̱ nu ndyu'ni yu jua, ndu̱ yu nchcui' yu su ndi'i̱ lcaa ñati̱. Ná nchca ji'i̱ ngu' tsiya' ti cua'a ngu' ji'i̱ yu cha' nga'aa chcui' yu ―nacui̱ ngu' ji'i̱ tya'a ngu'―. ¿Ha ngujui cha' ji'i̱ nu laca loo ji'na lacua, cha' nu jua laca Cristo, nu ñati̱ tlyu nu cua ca̱a̱ ti? 27Pana jlo ti' na macala ngutu'u yu jua. Si'i jua'a̱ caca lo'o nu Cristo nu ñati̱ tlyu nu ntajatya na ji'i̱ cha' ca̱a̱. Lo'o ca̱a̱ nu bi', ná tucui caca cuayá' ti' mala tyu'u nu bi' ca̱a̱.
28Bi' cha' cui̱i̱ nchcui' Jesús ca su ndu̱ yu nclyu'u ji'i̱ ngu' ne' laa tonu bi':
―Chañi cha' nslo ma̱ 'na, chañi cha' jlo ti' ma̱ mala ngutu'u na' ―nacui̱―, pana si'i cuentya jna' lijya̱ na' ca nde. Sca ti ycui' Ndyosi nda 'na lijya̱a̱ chalyuu, lo'o jua'a̱ ná nslo ma̱ ji'i̱ nu bi' ―nacui̱―. 29Nslo na' ji'i̱ ycui' Ni, cha' ca slo Ni ngutu'u na' lijya̱a̱; ycui' Ni laca nu ngulo cña 'na cha' ca̱a̱ na' ca nde.
30Lo'o ndye nchcui' Jesús cha' bi', li' ndyalaa xi ngu' slo yu, ngua ti' ngu' cha' taya' ngu' ji'i̱ yu. Pana ni sca ngu' ná ndaya' ngu' ji'i̱ yu, cha' tya lyiji tyalaa tyempo ji'i̱ Ni cha' xñi ngu' ji'i̱ yu. 31Masi jua'a̱ ngua'ni ngu' bi', tya ndi'i̱ quiña'a̱ ñati̱ nu ngusñi cha' ji'i̱ yu. Nchcui' ngu' lo'o tya'a ngu' li':
―La cui' ña'a̱ cña tonu cuentya ji'i̱ ycui' Ndyosi ndu'ni yu re, ñi'ya̱ nu nscua lo quityi cha' cua'ni nu ñati̱ tlyu nu cua ca̱a̱ ti; bi' laca yu re, nti' ya ―nacui̱ ngu'.
Ngua ti' ngu' fariseo su'ba ji'i̱ Jesús ne' chcua̱
32Cua ndyuna ngu' fariseo ña'a̱ cha' nu nchcui' ngu' quichi̱ ji'i̱ Jesús. Bi' cha' ngulo ngu' cña ji'i̱ policía ne' laa cha' tsaa ngu' taya' ngu' ji'i̱ Jesús. Jua'a̱ ngua'ni sti jo'ó nu laca loo lo'o nu ngu' fariseo bi'. 33Li' nacui̱ Jesús ji'i̱ ñati̱ nu ndi'i̱ ne' laa tonu bi':
―Tya tyi'i̱ na' la xi lo'o ma̱ nde lo yuu chalyuu ―nacui̱―, lo'o li' tya'a na' slo ycui' nu Xu'na na' nu nda 'na lijya̱a̱ ca nde ―nacui̱―. 34Li' tsaana ma̱ jna' macala su ndi'i̱ na', lo'o ná quije na' ji'i̱ ma̱ tsiya' ti, cha' ná caja chacuayá' tyalaa ma̱ ca su tyi'i̱ na' li'.
35―¿Macala tsaa yu jua, su ná taca quije yu ji'na? ―nacui̱ nu ngu' judío bi' ji'i̱ tya'a ngu'―. ¿Ha tsaa yu tyijyu' la ca su ndi'i̱ xa' la ngu' judío tya'a na? ¿Ha tsaa yu cha' culu'u yu cha' ji'i̱ ycui' Ndyosi ji'i̱ xa' ñati̱ nu ndi'i̱ ca bi'? ―nacui̱ ngu'―. 36¿Ñi'ya̱ nti' yu jua cha' nchcui' yu ndi'ya̱: “Tsaana ma̱ jna' macala su ndi'i̱ na', lo'o ná quije na' ji'i̱ ma̱ tsiya' ti, cha' ná caja chacuayá' tyalaa ma̱ ca su tyi'i̱ na' li'”? ―nacui̱ ngu'.
Su̱u̱ hitya nu tyu'u ne' cresiya ji'i̱ ngu'
37Lo'o cua tye ti ta'a, tsa̱ ycui' ta'a li' tya ndu̱ Jesús ne' laa tonu. Cui̱i̱ nchcui' yu lo'o ñati̱ ca bi':
―Lo'o nguityi ca ma̱ hitya, ca̱a̱ ma̱ ca slo na' cha' ta na' hitya co'o ma̱ ―nacui̱ yu―. 38Ñati̱ nu ntsu'u cha' ji'i̱ lo'o na' caca ji'i̱ ngu' bi' ñi'ya̱ laca si ntsu'u sca su̱u̱ hitya ne' cresiya ji'i̱ ngu'. Tlyu tsa cha' tso'o ntsu'u ne' cresiya ji'i̱ ngu' bi', cha' cua'ni tso'o ngu' bi' lo'o tya'a ñati̱ ngu' li' ―nacui̱ Jesús ji'i̱ ngu'―. Lo quityi ji'i̱ ycui' Ndyosi nguscua cha' jua'a̱ caca ji'i̱ ngu' bi'.
39Cua nti' Jesús chcui' lo'o ngu' cha' cua ta ti Ni Xtyi'i ycui' Ni cha' tyanu ne' cresiya ji'i̱ ñati̱ nu cua ngusñi cha' ji'i̱ ycui' Ni, bi' cha' nacui̱ yu jua'a̱. Bilya ta ycui' Ndyosi Xtyi'i ycui' Ni ca̱a̱ nde chalyuu, xqui'ya cha' bilya tyaa Jesús ca su tlyu su ntucua ycui' Ndyosi Sti yu.
Ná stu'ba nchcui' ngu' ji'i̱ Jesús
40Lo'o ndyuna ngu' quichi̱ cha' bi', ntsu'u ngu' nu nchcui' ji'i̱ Jesús ndi'ya̱:
―Chañi cha' yu jua laca nu cusu' nu cua ca̱a̱ ti cha' chcui' cha' ji'i̱ ycui' Ndyosi lo'o na.
41Lo'o jua'a̱ nchcui' xi xa' la ngu' cha' ji'i̱ yu:
―Yu jua laca nu ñati̱ tlyu nu nda ycui' Ndyosi ji'i̱ cha' ca̱a̱ ―nacui̱ ngu'.
Li' nguxtyacui xa' la ngu' quichi̱ cha' lo'o tya'a ngu':
―Pana si'i nde Galilea tyu'u nu ñati̱ tlyu bi', si'i jua'a̱ caca. 42Lo quityi cusu' bi' nscua cha' sca ñati̱ tya'a ji'i̱ jyo'o David caca nu ñati̱ tlyu bi'; quichi̱ Belén cala yu bi', cha' quichi̱ tyi ngu' David laca bi'.
43Ná ngua stu'ba cha' ji'i̱ ngu' lo'o tya'a ngu' cha' ji'i̱ Jesús. 44Pana ná tucui ntejeya' ji'i̱ yu, masi ntsu'u ngu' nu ngua ti' ngu' xñi ngu' ji'i̱.
Ná jlya ti' ngu' laca cña ji'i̱ Jesús
45Chaca quiya' ndyaa nu policía ne' laa bi' slo sti jo'ó nu laca loo, slo ngu' fariseo. Li' nchcuane ngu' ji'i̱ policía:
―¿Ni cha' laca ná lo'o yu bi' lijya̱ ma̱ slo cua?
46Li' nacui̱ policía:
―Bilya cuna ya nchcui' sca ñati̱ ñi'ya̱ nu nchcui' yu jua.
47Nguxacui̱ ngu' fariseo cha' ji'i̱ ngu' bi':
―¿Ha lo'o ji'i̱ cu'ma̱ ñilo'o yu jua lacua? ―nacui̱ ngu'―. 48Ná ntsu'u ni sca ñati̱ nu laca loo ji'na nu ngusñi cha' ji'i̱ yu bi'. Ni ngu' fariseo cua, ná jlya ti' ya cha' nu nchcui' yu ―nacui̱ ngu'―. 49Ná tso'o ngu' quichi̱, xcui' cha' cuxi ntsu'u ji'i̱ ngu', xqui'ya cha' ná ndaquiya' ngu' ji'i̱ cha' nu nda jyo'o Moisés lo'o na.
50Li' ndyatu̱ tsaca ngu' fariseo laja ngu' bi'; Nicodemo naa yu, la cui' nu cusu' nu cua ndyaa slo Jesús talya bi' laca yu.
51―Lo'o cua'ni cuayá' na ji'i̱ sca ñati̱ ―nacui̱ Nicodemo li'―, ná nscua chacuayá' ji'na cha' xcube' na ji'i̱ ñati̱ bi' si tya lyiji cuna na lcaa cha' nu ta yu, si bilya caca cuayá' ti' na ñi'ya̱ laca cha' cuxi nu ngua'ni yu bi' ―nacui̱.
52―¿Ha la cui' ngu' Galilea laca nu'u̱ lacua? ―nacui̱ tya'a fariseo ji'i̱ Nicodemo li'―. Lo quityi ji'i̱ ycui' Ndyosi nu nscua sa'ni ña'a̱ nu'u̱ xi, cha' caca cuayá' la ti' nu'u̱ cha' si'i nde Galilea tyu'u ñati̱ nu culu'u cha' ji'i̱ ycui' Ndyosi ji'na.
Ngusta ngu' qui'ya ji'i̱ sca nu cuna'a̱
53Li' ndyaa ngu' to' tyi ngu'.
Currently Selected:
SAN JUAN 7: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
