SAN LUCAS 7
7
Ngua'ni Jesús jo'o ji'i̱ sca msu ji'i̱ xu'na sendaru
1Lo'o ndye nchcui' Jesús lo'o ñati̱ bi', li' ndu'u yu ndyaa yu ca quichi̱ Capernaum. 2Ca bi' ndi'i̱ sca capitán nu laca loo ji'i̱ sendaru ji'i̱ ngu' romano. Ntsu'u sca msu ji'i̱ nu tyaca'a tsa ji'i̱; pana quicha tsa nu msu bi', cua cajaa ti. 3Lo'o cua ndyuna nu capitán bi' quiña'a̱ cha' nu nchcui' ngu' cha' ji'i̱ Jesús, li' nchcui' xi lo'o ngu' cusu' nu ca tyi quichi̱ bi', cha' tsaa ngu' chcui' ngu' lo'o Jesús cuentya ji'i̱, cha' jña ngu' ji'i̱ Jesús cha' ca̱a̱ yu cua'ni yu jo'o ji'i̱ msu quicha bi' ji'i̱. 4Ndu'u ngu' ndyaa ngu' li'. Lo'o ndyalaa ngu' bi' ca slo Jesús, li' nguxana ngu' nchcui' ngu' lo'o yu cuentya ji'i̱ nu capitán bi'.
―Tso'o tsa nu capitán bi' ―nacui̱ ngu' ji'i̱ Jesús―. Ndulo tsa yu jinu'u̱ cha' cua'ni nu'u̱ jo'o ji'i̱ msu quicha bi' ji'i̱ yu ―nacui̱ ngu'―. 5Cua ngui'i̱ tsa nu cusu' bi' ji'na cha' ndi'i̱ yu quichi̱ tyi na, hasta ycui' yu cua nda yu cñi cha' tya' laa ji'na quichi̱ re ―nacui̱ ngu'.
6Li' ndyaa Jesús lo'o ngu' bi'. Lo'o bilya tyalaa ngu' lo'o Jesús ca ni'i̱ ji'i̱ nu capitán bi', li' nda capitán ji'i̱ xa' tya'a tso'o cha' tsaa ngu' tyacua tya'a ngu' lo'o Jesús ca tyucui̱i̱ su lijya̱:
―Ndi'ya̱ nchcui' nu capitán bi' ―nacui̱ ngu' ji'i̱ Jesús li'―: “Ná quiña'a̱ tsa cha' culacua ti' nu'u̱, cusu'”, nacui̱, “masi ná ca̱a̱ nu'u̱ to' ni'i̱ jna'”, nacui̱. 7“Bi' cha' ná lo'o na' ndya'a̱ ngu' ndyiqui'ya ngu' jinu'u̱ tsa̱”, nacui̱. “Tsa bi' ti cña nti' na', si culo nu'u̱ cña, tyaca tso'o msu jna' jua'a̱ ti.” Jua'a̱ nacui̱ nu capitán bi', cha' chcui' ya lo'o nu'u̱. 8Chaca cha' nacui̱ yu ji'i̱ cua: “Lo'o jua'a̱ na'”, nacui̱ yu, “ntsu'u xa' ñati̱ nu laca loo la nu nclyo cña 'na. Lo'o jua'a̱ nclyo na' cña ji'i̱ sendaru nu cuentya jna'”, nacui̱. “Tsaa ngu' lquichi̱ 'na, si culo na' cña ji'i̱ ngu' cha' tsaa ngu'; lijya̱ ngu' slo na', si xi'ya na' ji'i̱ ngu' cha' ca̱a̱ ngu'; hora ti cua'ni msu jna' sca cña, si culo na' cña bi' ji'i̱ yu”, nacui̱ nu capitán bi'. “Jua'a̱ nu'u̱ ni, jlo ti' na' cha' taca jinu'u̱ culo nu'u̱ cña cha' cati̱ quicha bi'.” Tsa bi' ti cha' nti' capitán chcui' lo'o nu'u̱ ―nacui̱ ngu' tya'a tso'o nu capitán bi' ji'i̱ Jesús.
9Lo'o cua ndyuna Jesús cha' nu nchcui' ngu' lo'o, ndube tsa ti' yu. Li' nguxtyacui Jesús su ndu̱ tyucui̱i̱, nchcui' yu lo'o ñati̱ nu ndya'a̱ lo'o yu:
―Chañi cha' nu nchcui' na' lo'o ma̱ juani ―nacui̱ Jesús―, cha' bilya ña'a̱ na' ji'i̱ sca ñati̱ nu jlya tsa ti' ji'i̱ ycui' Ndyosi ñi'ya̱ nu jlya ti' nu capitán bi'. Tyucui ña'a̱ nasiyu̱ Israel re, ná ntsu'u ngu' nu jlya ti' jna' jua'a̱ ―nacui̱ Jesús ji'i̱ ngu'.
10Lo'o li' nguxtyu̱u̱ tya'a tso'o nu capitán bi', ndyaa ngu' ca to' ni'i̱ ji'i̱. Li' nquije cha' ji'i̱ ngu' na'a̱ ngu' ji'i̱ msu quicha bi', cha' cua ndyaca tso'o.
Ngua'ni Jesús cha' chaca quiya' ndyu'ú sca yu cuañi' nu ngujuii ca ti
11Tiya' la li' ndyaa Jesús sca quichi̱ ca su naa Naín; ndyaa nu ngu' nu ndyaca tsa'a̱ ji'i̱ lo'o, lo'o jua'a̱ quiña'a̱ tsa xa' la ñati̱ ndyaa ngu' lo'o. 12Lo'o cua ndyalaa ngu' ca to' quichi̱ bi', li' na'a̱ ngu' cha' ndyaa lo'o ngu' quichi̱ bi' ji'i̱ sca jyo'o cha' cua tyatsi'. Sñi' sca nu cuna'a̱ ti'i laca jyo'o bi'; cua ndyanu ma' ycui' ti ma' nu lo'o ngujuii sñi' ma', cha' nu sca ti sñi' qui'yu ma' laca yu nu ngujuii bi'. Tyu̱u̱ tsa tya'a ngu' quichi̱ bi' ndya'a̱ ngu' lo'o ma'. 13Lo'o na'a̱ Jesús nu Xu'na na ji'i̱ jyo'o bi', ngua tya'na ti' yu ji'i̱ nu cuna'a̱ ti'i xtya'a̱ jyo'o bi'. Li' nchcui' yu lo'o ma':
―Ná xi'ya nu'u̱ ―nacui̱.
14Li' ya̱a̱ Jesús cacua la slo ngu' bi', ngusta ya' yu chu̱' caju̱. Li' ndatu̱ ngu' nu ndyi'ya ji'i̱ jyo'o bi', nchcui' Jesús lo'o nu jyo'o bi':
―Yu cuañi' nu'u̱ ―nacui̱―. Tyaca'a̱ clya nu'u̱.
15Hora ti ndaca'a̱ nu ngua jyo'o bi', nguxana nchcui' yu lo'o ngu' li'. Xa' ndya Jesús ji'i̱ nu qui'yu cuañi' bi' ji'i̱ xtya'a̱ yu li'. 16Ndube tsa ti' lcaa ñati̱ ca bi' lo'o na'a̱ ngu' ji'i̱ yu nu ngujuii bi'. Li' nguxana ngu' ndyu'ni tlyu ngu' ji'i̱ ycui' Ndyosi.
―Tlyu tsa ñati̱ ndyalaa slo na juani ―nacui̱ ngu'―, bi' laca nu chcui' lcaa cha' ji'i̱ ycui' Ndyosi lo'o na.
Jua'a̱ nacui̱ ngu' li'. Lo'o chaca cha' nacui̱ ngu':
―Cua ndyalaa ycui' Ndyosi juani cha' xtyucua Ni ji'i̱ ñati̱ ji'i̱ ycui' Ni ―nacui̱ ngu'.
17Cua ngañi lye cha' ji'i̱ lcaa cña tonu nu ndyu'ni Jesús tyucui ña'a̱ loyuu su cuentya Judea; jua'a̱ lcaa quichi̱ cacua ti, lo'o bi' ngañi cha' bi'.
Nda Juan ji'i̱ ñati̱ ji'i̱ cha' tsaa ngu' ca slo Jesús
18Ngujui cha' ji'i̱ Juan ñi'ya̱ nu ngua cajua, cha' nu ngu' cuañi' nu ndya'a̱ lo'o Juan, bi' laca ngu' nu cua ndacha' ji'i̱ yu. 19Li' ngusi'ya Juan ji'i̱ tucua tya'a ngu' tya'a ndya'a̱ yu bi'. Ngulo yu cña ji'i̱ ngu' cha' tsaa ngu', tsaa xcuane ngu' ji'i̱ Jesús si chañi cha' ycui' yu laca yu Cristo, nu ñati̱ tlyu nu cua ca̱a̱ ti; si tya ntsu'u cha' jatya la xi ngu' ña'a̱ cuayá' nu ca̱a̱ chaca ñati̱ nu cua tlyu la. 20Li' ndyalaa ñati̱ ji'i̱ Juan ca su nga'a̱ Jesús. Ndi'ya̱ nacui̱ ngu' ji'i̱:
―Cua nda Juan nu ntyucuatya ji'i̱ ngu' ji'i̱ ya lijya̱ ya ―nacui̱ ngu'―, cha' xcuane ya jinu'u̱ si chañi cha' la cui' Cristo laca nu'u̱, nu ñati̱ tlyu nu cua ca̱a̱ ti nde chalyuu. Cua nti' ya cha' caja cha' liñi ji'i̱ ya si tya ntsu'u cha' jatya la ya ji'i̱ chaca ñati̱ nu tlyu la.
21Nu lo'o ndi'i̱ ngu' bi' slo Jesús, li' ngua'ni Jesús jo'o ji'i̱ tyu̱u̱ tya'a ñati̱; masi cua sa'ni ngusñi quicha ji'i̱ ngu', masi quicha ndya'a̱ ti, masi ngusñi cui'i̱ cuxi ji'i̱ ngu', hora ti ndyaca tso'o ngu' bi'. Lo'o nu cuityi̱', ngua'ni Jesús cha' ngulane xee cloo ngu' ña'a̱ ngu' chaca quiya'. 22Bi' cha' ndi'ya̱ nguxacui̱ Jesús cha' ji'i̱ ngu' bi' li':
―Yaa clya ma̱ cacha' ma̱ ji'i̱ nu Juan bi' lcaa cha' nu cua na'a̱ ma̱ slo na', lcaa cha' nu cua ndyuna ma̱ ca nde. Ñacui̱ ma̱ ji'i̱ yu cha' xa' nda na' xee ña'a̱ tyu̱u̱ tya'a ngu' nu ngua cuityi̱'; lo'o juani tso'o tsa ndya'a̱ ngu' nu ngua quicha quiya'; jua'a̱ cua ngua lubii cuaña' ngu' nu ndyatsu' cuaña'; lo'o juani cua nduna tso'o ngu' nu ngua cu'u̱ jyaca̱; jua'a̱ xa' ndyu'ú ngu' chaca quiya', ngu' nu cua ngujuii; jua'a̱ ngu' ti'i ni, nduna ngu' cha' tso'o nu nda na' lo'o ngu' ñi'ya̱ ndu'ni lyaá Ni ji'i̱ ngu' ji'i̱ nu cuxi. Jua'a̱ ñacui̱ ma̱ ji'i̱ Juan bi'. 23Taca caca tso'o tyiquee ma̱ si ná caca tyuju'u ti' ma̱ ña'a̱ ma̱ jna' ―nacui̱ Jesús ji'i̱ ngu'.
24Li' nguxtyu̱u̱ ngu' ndyaa ngu', ñati̱ nu nguane Juan ji'i̱ cha' ca̱a̱ bi'. Li' nguxana Jesús nchcui' cha' ji'i̱ nu Juan bi' lo'o ñati̱ nu ndyanu slo.
―¿Na laca ngua ti' ma̱, nu lo'o ndyaa na'a̱ ma̱ ji'i̱ nu Juan bi' ca ne' quixi̱' su ná ndi'i̱ ñati̱? ―nacui̱ Jesús―. Ngua ti' ma̱ cha' tucua cha' ntsu'u tyiquee yu nu lo'o nchcui' yu lo'o ñati̱, ñi'ya̱ nti' lo'o ndya̱a̱ yaca quii tyucuaa chu̱' ca lo'o lijya̱ cui'i̱. ¿Ha jua'a̱ nti' ma̱? 25¿Na laca ngua ti' ma̱ lo'o na'a̱ ma̱ ji'i̱ yu bi' lacua? ¿Ha tso'o tsa ste' yu lo'o na'a̱ ma̱ ji'i̱ yu ca bi'? Cua jlo ti' ma̱ cha' si'i ne' quixi̱' ndi'i̱ ñati̱ nu tso'o tsa ste', si'i ne' quixi̱' ndi'i̱ ñati̱ nu ntsu'u tsa cñi ji'i̱ cha' culiji jua'a̱ ti; to' tyi nu culiya' nu laca rey, ca bi' ndi'i̱ ngu' bi'. 26Ná tyiquee' ngua tii ma̱ cha' laca nu Juan bi' sca ñati̱ nu nda cha' ji'i̱ ycui' Ndyosi lo'o ñati̱; chañi cha' laca yu jua'a̱, pana lo'o sca cña tlyu la ngujui ji'i̱ Juan. 27Ndi'ya̱ nscua lo quityi cusu' cha' ji'i̱ cña nu ntsu'u ji'i̱ Juan bi':
Culo na' cña ji'i̱ sca msu jna' cha' tsaa yu ca nde loo la su tya'a̱ nu'u̱,
cha' saala clya yu tyucui̱i̱ su ca̱a̱ ycui' nu'u̱, nacui̱ ycui' Ndyosi ji'i̱ Cristo.
28Tya nchcui' la Jesús lo'o ngu' li':
―Cha' liñi nchcui' na' lo'o ma̱ ji'i̱ Juan nu ntyucuatya ji'i̱ ngu', cha' bilya cala sca ñati̱ chalyuu nu jua'a̱ tlyu tsa cña nu ntsu'u ji'i̱, ñi'ya̱ nu laca ji'i̱ Juan bi'. Pana cua lijya̱ na' cha' caca na' loo ji'i̱ ñati̱, lo'o juani cua ña'a̱ ca ñati̱ nu jlya ti' 'na, tlyu la cha' nu ntsu'u ji'i̱ ngu' bi' que Juan, masi ti'i ti ngu', masi cuañi' ngu' ―nacui̱ Jesús.
29Lo'o ñati̱ nu ndyaa slo Juan cha' tyucuatya yu ji'i̱ ngu' tya tsubi' la ni, lo'o ndyuna ngu' cha' nu nchcui' Jesús lo'o ngu', li' ngua'ni tlyu lcaa ngu' bi' ji'i̱ ycui' Ndyosi, masi nu ngu' cuxi nu nxñi cñi cña loo ngu', masi xa' la ñati̱. 30Pana nu ngu' fariseo lo'o ngu' mstru cha' jo'ó nu ná ntaja'a̱ cha' tyucuatya Juan ji'i̱ ngu' nu ngua li', ná ngua'ni ngu' cuentya ji'i̱ cña nu ndyu'ni ycui' Ndyosi cha' nguxtyucua Ni ji'i̱ ñati̱. Li' xa' nchcui' Jesús lo'o ngu':
31―Ná tso'o tsiya' ti ñi'ya̱ nu ndu'ni ñati̱ chalyuu tyempo juani ―nacui̱―. 32Ñi'ya̱ ndu'ni nu sube nu ndya'a̱ ndijya ti cla'be quichi̱, jua'a̱ ndu'ni ñati̱ chalyuu juani. Taja ti' nu sube ji'i̱ tya'a quijya ngu', cha' ná nti' tya'a ngu' quijya la lo'o ngu' bi'. Li' nxi'ya nu sube ji'i̱ tya'a ngu': “¿Ni cha' ná ntaja'a̱ ma̱ cula quiya' ma̱? Na nclya'á ya xi ji̱i̱ cha' ji'i̱ ma̱”, nacui̱ nu sube. “¿Ni cha' ná ntaja'a̱ ma̱ ca xñi'i̱ ti' ma̱ lo'o cua? Na nclya'á ya marcha, na nxi'ya ya nga'a̱ ya.” Lo'o cu'ma̱ ni ―nacui̱ Jesús―, la cui' jua'a̱ ndyu'ni cu'ma̱ ñati̱ chalyuu juani; xcui' na taja ti' ma̱, cha' ná tso'o ntsu'u tyiquee ma̱ tsiya' ti ña'a̱ ma̱ ji'i̱ tya'a ñati̱ ma̱. 33Nde nclyú ti nchcui' ma̱ ―nacui̱ Jesús ji'i̱ ngu'―. Lo'o ya̱a̱ Juan nu ntyucuatya ji'i̱ ñati̱ chalyuu, ná ndyacu yu lo'o ma̱, ná ndyi'o yu lcui lo'o ma̱; li' nacui̱ ma̱ cha' ntsu'u cui'i̱ xña'a̱ ji'i̱ yu ―nacui̱ Jesús ji'i̱ ngu'―. 34Tiya' la li' ndu'u tucua na' nu cua nda ycui' Ndyosi lijya̱a̱ cha' caca na' ñati̱; tso'o ti ndacu na' lo'o ma̱ li', stu'ba ti nga'a̱ na' lo'o ma̱. Bi' cha' nchcui' ma̱ jna': “Ña'a̱ na ñi'ya̱ nu ndu'ni nu jua juani”, nacui̱ ma̱ ji'i̱ tya'a ma̱, “xcui' na cacu ti yu jua nti' yu, xcui' na cu'bi ti yu ndya'a̱ yu. Ná tso'o yu jua cha' laca yu tya'a tso'o ngu' nu nxñi cñi cña loo na, lo'o jua'a̱ xi xa' la ngu' cuxi laca tya'a tso'o yu”, nacui̱ ma̱ 'na. 35Lo'o jua'a̱ nacui̱ ma̱ cha' ná tso'o cha' nu nchcui' na'; pana caca cuayá' ti' ma̱ nde loo la cha' liñi tsa cha' nu nchcui' ngu', cha' cuentya ji'i̱ ycui' Ndyosi laca na'.
Ndyacu Jesús xlyaa ca slo sca ngu' fariseo
36Ntsu'u sca ngu' fariseo nu nchcui' lo'o Jesús cha' tsaa cacu xlyaa lo'o yu ca toni'i̱ ji'i̱ yu. Lo'o ngu' fariseo ni, tacati tsa ndu'ni ycui' ngu', nti' ngu'. Li' ndyaa Jesús ca toni'i̱ ji'i̱ yu, ndyaa tucua ca to' mesa. 37La cui' quichi̱ bi' ndi'i̱ sca nu cuna'a̱ nu quiña'a̱ tsa nu qui'yu ntsu'u ji'i̱. Lo'o ngua cuaya' ti' nu cuna'a̱ bi' cha' cua ndyalaa Jesús cacu xlyaa ca slo yu fariseo bi', li' cha' ji'i̱ ti ndu'u nu cuna'a̱ bi' ndyaa ca slo Jesús; ña̱a̱ lo'o cho' sca caatya̱ setye nu tyixi tsa xtyi'i. 38Ndyaca'a̱ cho' cacua ti slo quiya' Jesús li'. Ndyunaa tsa cho', hasta ndyalú hitya cloo cho' chu̱' quiya' Jesús; lo'o quicha̱' hique cho' nsube' cho' chu̱' quiya' Jesús cha' xquityi ji'i̱ quiya' yu. Nchcuicha' cho' quiya' Jesús li', nda'a̱ cho' setye tyixi xtyi'i bi' chu̱' quiya' Jesús. 39Lo'o nu yu fariseo nu cua nchcui' lo'o Jesús cha' tsaa cua'ni xlyaa ca slo yu ni, lo'o cua na'a̱ yu ji'i̱ nu cuna'a̱ bi', ndi'ya̱ cha' ngua'ya hique yu li': “Si'i cha' chañi laca re, cha' laca yu sca ñati̱ nu laca tu'ba ji'i̱ ycui' Ndyosi cha' chcui' Ni lo'o na. Si la cui' laca yu, li' ta yu cuentya tilaca laca nu cuna'a̱ nu nsta ya' lo quiya' yu juani; caca cuayá' ti' yu cha' sca nu cuna'a̱ nu chiya'a̱ tsa ndu'ni su ndi'i̱ chalyuu laca nu cua.”
40Li' nguxana Jesús nchcui' lo'o nu yu fariseo bi':
―Ntsu'u sca cha' nu ta na' lo'o nu'u̱, Simón ―nacui̱ Jesús ji'i̱.
―Cuacha' clya nu'u̱ jna', cusu' ―nacui̱ yu fariseo ji'i̱ li'.
41Li' nchcuane Jesús sca cha' ji'i̱ yu fariseo bi':
―Ntsu'u tucua tya'a ngu' nu ntsu'u tane' hichu̱' ngu', cha' ngüijñi' ngu' cñi ji'i̱ sca nu culiya'. Tsaca yu ndacui yu ca'yu siyento paxu ji'i̱ nu culiya' bi', lo'o chaca yu ndacui yu tu'ba tyi ti paxu ji'i̱ li'. 42Pana tyucuaa ngu' ná ngua ji'i̱ ngu' tya ngu' cñi ji'i̱ nu culiya' bi' li'. Bi' cha' nguta'a̱chu̱' nu culiya' bi' ji'i̱ cha' nu ndacui ngu' ji'i̱; ngüityi̱ yu cuentya ji'i̱ ngu', ngua'ni tye tane' ji'i̱ tyucuaa ngu' jua'a̱ ti. Cuacha' clya nu'u̱ jna' lacua ―nacui̱ Jesús ji'i̱ yu fariseo bi'―, ¿tilaca laca nu tso'o la ntsu'u tyiquee ña'a̱ ji'i̱ nu culiya' bi'? Si tsaca yu, si chaca yu.
43Li' nguxacui̱ Simón cha' ji'i̱ Jesús:
―Bi' laca nu quiña'a̱ la ndacui, nu ngüi'ya nu culiya' bi' cha' clyu ti' ji'i̱. Jua'a̱ nti' na' ―nacui̱ Simón.
―Chañi cha' nu nchcui' nu'u̱ ―nacui̱ Jesús li'.
44Lo'o nxña'a̱ Jesús ca su nga'a̱ nu cuna'a̱ bi', li' xa' nchcui' lo'o nu Simón bi':
―Cui'ya nu'u̱ xi cuentya ñi'ya̱ nu ndyu'ni nu cuna'a̱ cua ―nacui̱―. Nu lo'o ndyalaa na' toni'i̱ jinu'u̱ tsa̱, ná nda nu'u̱ hitya tyaati̱ quiya' na'; pana nu cuna'a̱ cua ni, cua ngui'í̱ cho' quiya' na' lo'o hitya cloo cho', cua nguxquityi cho' quiya' na' lo'o quicha̱' que cho'. 45La cui' jua'a̱ ná nchcuicha' nu'u̱ jna' lo'o ndyalaa na' ni'i̱ re; pana nu cuna'a̱ cua ni, tya lo'o ndyatí̱ na' ñaa na' nde ni'i̱ re, tya lyiji tye chcuicha' cho' ji'i̱ quiya' na'. 46Lo'o jua'a̱ ná nda'a̱ nu'u̱ setye hique na' tsa̱; pana nu cuna'a̱ cua ni, cua ngusalú cho' setye tyixi xtyi'i chu̱' quiya' na'. 47Nde laca cha' nu ndacha' na' jinu'u̱ juani, cha' tso'o tsa ndyu'ni tya'na ti' nu cuna'a̱ cua jna', bi' cha' ca cuayá' ti' na cha' cua ngüityi̱ ycui' Ndyosi qui'ya nu ntsu'u ji'i̱ cho', masi quiña'a̱ tsa qui'ya ntsu'u ji'i̱ cho' ca slo Ni. Pana ñati̱ nu ná lye ntsu'u qui'ya ji'i̱ cha' cuityi̱ ycui' Ndyosi ji'i̱, xti la xi cha' ndube ti' ngu' bi' ña'a̱ ngu' ji'i̱ ycui' Ni ―nacui̱ Jesús ji'i̱ Simón.
48Li' nchcui' Jesús lo'o nu cuna'a̱ bi':
―Cua ngüityi̱ ycui' Ndyosi lcaa qui'ya nu ntsu'u jinu'u̱ ―nacui̱.
49Lo'o nu ñati̱ nu ñaa stu'ba ti lo'o Jesús cha' cacu ngu' xlyaa slo Simón, nguxana ngu' bi' nchcui' ngu' lo'o tya'a ngu':
―¿Tilaca laca nu qui'yu re? ¿Macala ngujui chacuayá' ji'i̱ yu cha' cuityi̱ yu qui'ya nu ntsu'u ji'i̱ ngu'? ―nacui̱ ngu'.
50Pana ndi'ya̱ nchcui' Jesús lo'o nu cuna'a̱ bi' li':
―Cua ngulaá nu'u̱ ji'i̱ cha' cuxi nu ntsu'u jinu'u̱ xqui'ya cha' jlya ti' nu'u̱ 'na. Ti̱ ti tyi'i̱ tyiquee nu'u̱, tyaa nu'u̱ lacua.
Currently Selected:
SAN LUCAS 7: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
